Txienge 3

Wu ti njani wutomi paradhiseni?

Jehovha a di ningile Adhamu ni Evha silo so tala sa sinene. Genesisi 1:28

Msana kova Jehovha adi mahile Evha, ene a to mningela ka Adhamu

Jehovha a mahile wamsikati wo khata Evha, e mtxhadhisa ni Adhamu.—Genesisi 2:21, 22.

Jehovha a va mahile va di ni mialakanyo ni mmidi so hetiseka, va si nga ni txikhwita.

Adhamu ni Evha va ti tsakile ngu m’ti wawe wa Paradhise

M’ti wawe wa Paradhise i di jaradhi ya Edheni—wukhalo wo tshura ngutu ku di ni mnambu, mindonga ya mihando ni sihari.

Jehovha a txi wombawomba navo ni ku va gondisa. Idiku va ti ko engisa va di hanyile kala ku pinduka ka mafu a Paradhise.

Txizimu txi di khene va nga thuki va txi dya mhando ka wumwane wa mndonga. Genesisi 2:16, 17

Mndonga jaradhi awu Jehovha a nga gela Adhamu ni Evha ti to va si dyi mihando ya wona

Jehovha a kombile Adhamu ni Evha m’ndonga jaradhi a txi khene kwawe, mi nga thuki m’txi dya mihando ya wona, mi nga fa.

Ngelozi yo biha, Sathane Dhiyabhulosi a thumisile mnyoka ti to wu ya wombawomba ni Evha

Ngelozi yimwani yi lekile mlayo wa Txizimu. Ngelozi eyo yo biha i Sathane, Dhiabhulosi.

Sathane a si ti lavi to Adhamu ni Evha va engisa Jehovha. Ngu toneto a thumisile mnyoka e ghela Evha to a txo dya mhando, kha na mba fa, a na ziva ku fana ni Txizimu. I ti makuhu toneto.—Genesisi 3:1-5.