Txizimu txi mahile wamwamna wo khata ni wamsikati wo khata

Jehovha a mahile jaradhi ka wukhalo awu a nga wu dhana ku i Edheni. Jaradhi yoneyo yi ti tate ngu mafilori, mindonga ni sihari. Se Txizimu txi to teka lithulu txi maha ngu lona wamwamna wo khata. Ngu msana, txi to futeta ka tithonvu takwe. Wa tiziva ati ti nga maheka? Wamwamna wule a to khata kuhefemula. Se Jehovha a m’rayile ditina do i Adhamu, ni ku a mningile mthumo wo khatalela jaradhi ni kuraya matina sotshe sihari ngu kuya ngu ti si nga zumbisa tona.

Jehovha a tshumete e gela mlayo wuwa Adhamu: ‘Awe u nga dya mihando ya yotshe mindonga ayi yi ku ka jaradhi yiya. Kambe ku ni mndonga awu u nga mbi fanela kudya mihando ya wona. Ngaku u txo dya, u na fa.’

Ku di pindile mbimo, Jehovha a wombile tiya: ‘Ni na maha wamsikati kasiku e va m’vhuneteli wa Adhamu.’ Koneho, Txizimu txi mahile ti to Adhamu e mana wukohe wa hombe ngutu. Se txi teka limbavhu la Adhamu txi maha ngu lona msikati wakwe. Txi gwita txi m’raya ditina do i Evha. Ina Adhamu a m’tsakete msikati wakwe? Ina. Ene a tsakile ngutu a ha koza e womba tiya: ‘Hi nga wona kutshura ka ti Jehovha a nga ni mahela ngu limbavhu langu. Ni mahetwe m’thu wo fana ni nani.’ Phela, Adhamu ni Evha ngu vona va nga va mwaya wo khata hamafuni.

Jehovha a gete Adhamu ni Evha ti to va ti fanete kuva ni vanana vavangi kasiku ve tata mafu. Txizimu txi txi lava ti to ve thuma kumweko va di tsakile, kasiku ve txitxa mafu otshe me va paradhise. Paradhesi wukhalo wo tshura ngutu wo fana ni jaradhi ya Edheni. Kambe to mbi tsakisa ngu ti to, Adhamu ni Evha kha va txitxa mafu me va paradhise. Ngu kutxani? Xamulo hi na yi mana ka matimu aya ma londiselako.