Wukhalo wo sawuleka kasi kukhozela Jehovha

Akhe ka Mmango wa Sinayi, Jehovha a gete Mosi ti to a ti fanete kuaka ditenda do sawuleka, i ku ha Vaisrayeli va ndi no khozela kona Jehovha. Mosi a ti fanete kuaka ditenda donedo ngu nzila yo ti ndi na koteka ku ve tsimbila-tsimbila nado.

Jehovha a kombete Vaisrayeli ti to ve ningela asi va nga ti naso kasiku ve vhunetela ka kuaka ka ditenda donedo. Se Vaisrayeli va ningete ouro, prata, kobre, marigwi a lisima, tinguwo to tshura, madhowo a sihari ni silo simwani. Vona va ningete silo sasingi a ha koza Mosi a txi khene: ‘Xega, si na enela! Mi nga tiseni simwani.’

Jehovha a vhuni Vaisrayeli ti to ve gonda totshe ati ti nga txi laveka kasiku ve vhuneta ko aka. Majaha amangi ni vavasikati ava va nga txi ziva kumaha mithumo yo hambana-hambana, va vhunetile ko aka ditenda. Mbimo yi vamwani va nga txi thumisana ni si si nga txi mahwa ngu tinguwo, vamwani va txi thuma ni marigwi a lisima, ouro mwendo ko vata mapulango.

Vaisrayeli va akile ditenda nga ti Jehovha a nga di va rumisile tona. Hahanze ka ditenda ku ti ni mthanda a ha ku nga ti ni dibhasiya da kobre ni altari ya hombe. Ngu mndani mule ka ditenda ku ti ni dikortina do tshura adi di nga txi abanisa ditenda ngu makhalo mambidi. Ka makhalo ale a mambidi, kumwani ku txi dhanwa ti to wukhalo wo Sawuleka, se kumwani va txi kha vona wukhalo wo Sawuleka Ngutu. Mndani ka wukhalo wo Sawuleka, ku ti ni dilambu da ouro, meza ni altari. Se ka wukhalo wo Sawuleka Ngutu, ku ti ni dikaxa do mahwa ngu mapulango ni ouro va nga txi khona Dibhokiso da Txitumelelano. Wa ti ziva ti to nji txani txitumelelano? Txithembiso txo sawuleka. Dibhokiso da txitumelelano di txi thumela kukhumbutisa Vaisrayeli ti to va di mahile txithembiso txo thumela Jehovha dwe ni ku m’engisa.

Jehovha a di sawute Aroni ni vanana vakwe kasiku veva vaprista. Vona va ti fanete kukhatalela ditenda ni miningelo ayi vathu va Jehovha va nga txi yi yisa kheya. Jehovha a sawute Aroni kasiku eva mprista wa hombe, i ti ene basi a nga ti fanete kubela ka wukhalo wo Sawuleka Ngutu kumweko ngu dilembe. Wa ti ziva ti to a txi ya maha txani? A txi ya kombela divalelo ka Jehovha ngu timhaka to biha a ti ene, vanana vakwe kumweko ni Vaisrayeli va nga txi ti maha.

Ditenda di hetilwe kuakwa ku di pindile dilembe msana ka kuva Vaisrayeli va di humile Egipta. Vona se va ti ni wukhalo wo khozela ka wona Jehovha.

Jehovha a mahile ti to kuhumelela direfu txitimwi ka ditenda. Mbimo yi direfu di nga si khukhi txitimwi ka ditenda, Vaisrayeli va ti fanete kusimama ve zumba ka wukhalo wu va nga ti ka wona. Kambe, ngaku direfu di txi kwela va txi ti ziva ti to va ti fanete kukhukha ka wukhalo wule ve simama ni liendo. Vona va txi rwala ditenda, se ve londisa direfu.