Ngu kutxani Txizimu txi si xamuli yotshe mikombelo?

Tate wathu wa nzumani, Jehovha, wa ti lava ngutu kuengisa mikombelo yathu yo huma mbiluni. Kambe hi nga mikombelo yotshe a xamulako. Ngu kutxani? Hi fanete ku khumbula txani mbimo yi hi mahako mkombelo? A hi wone ti Bhiblia yi ti wombako mayelano ni toneto.

Mtxawa awu ku txhetxheni wu txi wuyeletela mapswi a mkombelo wu ku ka dibhuku da mikombelo.

“Ngako mi txi khongela, mi nga wuyeleteleni mapswi.”—Matewu 6:7, NM.

Jehovha kha lavi kuengisa mikombelo ayi yi ngo dhekorarwa mwendo yo lerwa ka dibhuku da mikombelo. Ene a lava ti to mapswi athu me va o huma mbiluni. Kha ti na ku kutsakisa ngako mngana wako yotshe mbimo a womba-wombako ni nawe e thumela kuwuyeletela mapswi ona ya a mamwewo. Vangana va ditshuri va womba-womba ti txi huma mbiluni ni kutulelana tikhana. Mbimo yi hi mahako mkombelo ka Txizimu mayelano ni tathu, hi txi thumisa mapswi athu hi pune, hi kombisa ti to hi lava kuva vangana va txona.

Dijaha di di nga ñola dithikithe da lotaria di txi wonetela nzumani.

“Hambi mi txi kombela, kha mi amukeli txilo, nguko kha mi kombeli ngu fanelo.”—Jakobe 4:3.

Kha ha fanela kuemela ti to Txizimu txi xamula mikombelo yathu ngako hi txi kombela ati txi si tsakiko ngu tona. Ngu txikombiso, Bhiblia yi womba ti to Txizimu txa nyenya vathu va makolo ni va va kholwako ka ta kwa mbi vaho, to fana ni sorte ya yinene. Se ngako m’thu a txo bheja se e kombela sorte ya yinene ina Jehovha ati na amukela txikombelo txonetxo? (Isaya 65:11; Luka 12:15) Ti hakubasani to ahim-him. Kasi ku Txizimu txi engisa mikombelo yathu, yi fanete kutsimbitisana ni ti Bhiblia yi ti wombako.

Mthangeli wa txhetxhe awu a khongelelako mtxawa wa masotxhwa.

“Awule a vayilelisako tinzeve takwe mu ka kuengisa milayo, hambi mkombelo wakwe wu nave txinyenyeko.”—Mavingu 28:9.

Ka timbimo ta Bhiblia, Txizimu txi si engisi mikombelo ya wu a nga si engisi mlayo wa txona. (Isaya 1:15, 16) Kambe txona kha txa txitxa. (Malakiya 3:6) Hi txi lava ti to Txizimu txi engisa mikombelo yathu ti lava hi maha mizamo kasi ku hi engisa milayo ya txona. Se ani i di ku ka timbimo ati ti nga pinda hi mahile sionho so kari? Ina eto ti lava kuwomba ti to Jehovha kha na mbi gwita a di engisile mikombelo yathu? Ahim-him. Txizimu txi nga hi divalela ngako hi txi ema kumaha to biha se hi ti karatela kumaha ati i ku ta tinene.—Mithumo 3:19.