Jehovha a xamulisa kutxani mikombelo yathu?

1-2. Ti txita ka mhaka ya mkombelo, ngu tihi ti hi nga ti wotisako tona?

INA u da nga tiwotisa to Jehovha wa xamula mikombelo yako? I di ina, khu nga wekha. Vanathu vo tala va di nga tiwotisa toneto ngutu-ngutu va di ka mbimo ya sikarato. Phela ngako hi txi xaniseka, nathu ti nga hi karatela kuwona nzila yi Jehovha a xamulako ngu yona mikombelo yathu.

² Konku he wone ati ti nga hi mahako hi tsaniseka to Jehovha wa xamula mikombelo ya vakhozeli vakwe. (1 Joh. 5:15) Hi na tshumela hi bhula ngu siwotiso siya: Ngu kutxani mbimo yimwani ti nga wonekako nga Jehovha kha xamuli mikombelo yathu? I ngu nzila yihi Jehovha a xamulako mikombelo yathu?

TI NGA MAHA JEHOVHA A SI XAMULI MKOMBELO WATHU NGA HA HI NGADI TI EMETE NGU KONA

3. Ngu kutxani Jehovha a txi lava ti to hi maha mkombelo kwakwe?

³ Bhiblia ya hi tsanisekisa ti to Jehovha wa hi randa ni ku hi va lisima ngutu kwakwe. (Hag. 2:7; 1 Joh. 4:10) Ngu toneto a hi rambako ti to hi kombela txivhuno kwakwe ngu mkombelo. (1 Pedro 5:6, 7) Ene a lava ku hi vhuna to hi simama hi va hafuhi kwakwe ni ti to hi sikota kutimisela sikarato si hi wonisanako naso.

4. Hi ti zivisa kutxani to Jehovha wa xamula mikombelo ya malanda akwe? (Wona ni mfota.)

⁴ Amu ka Bhiblia hi gonda to Jehovha a xamute mikombelo ya malanda akwe. Ina ku ni txikombiso txi u pimisako ngu txona? Ku wombwa txani ngu mkoma Dhavhidha? Ene a wonisanile ni valala va tshofu ngutu ka wutomi wakwe ni ku mbimo yotshe a kombete txivhuno ka Jehovha ngu mkombelo. Dikhambi dimwani a kombete Jehovha a txi: “MKOMA, engisa mkombelo wangu! Riya nzeve u pfa kuvilela kwangu; ni pfisise madingano ni ditshuri dako, ni wululami wako!” (Mas. 143:1) Jehovha a xamute mkombelo wa Dhavhidha nguko m’hulukisa. (1 Sam. 19:10, 18-20; 2 Sam. 5:17-25) Se Dhavhidha a ndi na womba ngu kutsana atxi: “Mkoma a hafuhi ni votshe vale va mdhanako.” Nathu hi nga va ni themba yi yi fanako.—Mas. 145:18.

5. Ina Jehovha a xamute mikombelo ya malanda akwe a kale nga ha ma ngadi tiemete ngu kona? Ningela txikombiso. (Wona ni mfota.)

⁵ Ti nga maha Jehovha a si xamuli mikombelo yathu ngu nzila yi hi ngadi yi emete ngu yona. Eto ti humelete ka mpostoli Paulo. Ene a kombete Txizimu ti to e thavisa “m’pa ha mmidini kwakwe.” Ene a kombete makhambi mararu mayelano txikarato txonetxo. Ina Jehovha a xamute mikombelo yoneyo? Ina, kambe kha xamula ngu nzila yi Paulo a ngadi yi emete ngu yona. Hahanze ko thavisa txikarato txile, Jehovha a mningile mtamo wu a nga txi wu lava to e simama e mthumela a di thembekile.—2 Vak. 12:7-10.

6. Ngu kutxani mbimo yimwani ti nga wonekako nga Jehovha kha xamuli mikombelo yathu?

⁶ Mbimo yimwani nathu hi nga xamulwa mikombelo yathu ngu nzila yo hambana ni yi hi ngadi yi emete. Hi nga tsaniseka ti to Jehovha wa yi ziva ngu kukongoma nzila yi a nga hi vhunako ngu yona. Ene ‘a na hi mahela sa singi ngutu kupinda asi hi mkombelako mwendo asi hi si pimisako.’ (Vaef. 3:20) Ngu toneto, tixamulo ta mikombelo yathu ti nga ta ngu mbimo ni ngu nzila yi hi nga mba yi emela.

7. Ngu kutxani mbimo yimwani ti txi lava hi txitxa ati hi nga ti womba ka mkombelo wathu? Ningela txikombiso.

⁷ Mbimo yimwani ti nga lava hi txitxa ati hi nga ti kombela ka mkombelo wathu ngako hi txi pfisisa kwati ati kudhunda ka Jehovha ku wombako tona. Wona txikombiso txa Martin Poetzinger. Msananyana kova a di txhadhile, mwanathu Poetzinger a vhaletwe jele ka Vanazi. Makhatoni a kombete ka Jehovha ti to e m’humisa ka jele yile kasiku eya khatalela msikati wakwe ni kuhetisa mthumo wakwe wo txhumayela. Hambi keto msana ka mavhiki mambidi txi walo txi txi nga ti kombisa ti to Jehovha a ti maha to kari kasi ku mwanathu Poetzinger e humiswa jele, ene a khatile kukombela a txi: “Jehovha ni kombe ati u lavako ni maha tona.” Se a khatile kupimisa ngu ti ti nga txi humelela vanathu va a nga ti vhaletwe navo. Kutala kwawe va txi karateka ngu vasikati vawe ni vanana vawe. Mwanathu Poetzinger a kombete a txi: “Jehovha, na bonga ngu txiavelo txangu txa txiphya. Ni vhuni ti to ni tsanisa ni kukuzeta vanathu.” Ene a hetile 9 wa malembe jele mule a txi tsanisa vanathu!

8. Ngu tihi timhaka ta lisima ati hi fanelako kuveka mapimo ka to tona mbimo yi hi mahako mkombelo?

⁸ Hi fanete kukhumbula to Jehovha a ni txikongomelo a txi a no txi hetisisa ngu kuya ngu mbimo yi a nga yi veka. Txithembiso txonetxo txi pata kugumisa da magwito sotshe sikarato si si hi mahako hi xaniseka nyamsi, so fana ni tiphango ta mtumbuluko, malwati ni lifo. Jehovha a na hetisisa txithembiso txakwe ngu kuthumisa Mfumo wakwe. (Dhan. 2:44; Mtu. 21:3, 4) Aku yi si se hoka mbimo yoneyo Jehovha wa tumelela Sathani ti to e fuma mafu awa.b (Joh. 12:31; Mtu. 12:9) I di ku Jehovha o lulamisa sotshe sikarato sa vathu konku, ti ndi na woneka nga Sathani wa fuma mafu awa ngu nzila ya yinene. Aku hi emelako to Jehovha e hetisisa sithembiso sakwe kha ti wombi ti to a do hi tsukula, kha na mbi hi vhuna. Konku he wone tinzila timwani ati Jehovha a hi vhunako ngu tona.

NZILA YI JEHOVHA A XAMULAKO NGU YONA MIKOMBELO YATHU NYAMSI

9. Jehovha a nga hi vhunisa kutxani ngako hi txi lava kumaha sisungo? Kombisa.

⁹ Jehovha wa hi ninga wutxhari. Ene a thembisa ku hi ninga wutxhari wu hi wu lavako kasi ku hi maha sisungo sa sinene. Hi lava wutxhari wa Txizimu ngutu-ngutu ko maha sisungo asi si no gwesa wutomi wathu wotshe, so fana ni kutxhadha mwendo kwa mbi txhadha. Wona txikombiso txa mwanathu mmwani wa txisikati wu a dhanwako ku i Maria, awu a si se txhadha.c Ene a txi thumela Jehovha a di tsakile kota nyaphandule wa mbimo yotshe, se e ta zivana ni mwanathu wo kari. Ene a womba tiya: “Wungana wathu wu kute, hi txi tsakelana. Kambe ti txi lava ni maha txisungo. Se ni khongete ngutu ka Jehovha ngu mhaka yiya, ni lava mkongomiso wakwe. Kambe ni txi tiziva to ene kha na mbi ni mahela txisungo.” Ene ati pfite ti to Jehovha a xamute mkombelo wu a nga wu maha wo kombela wutxhari. Ngu nzila yihi? Mbimo yi a nga maha wuxolisisi ka mabhuku athu, ene a mani tigondo to kongoma ati ti nga m’vhuna ku e mana tixamulo ta siwotiso sakwe. A tshumete e thumisa txialakanyiso txa wutxhari txi a nga ningwa ngu mame wakwe. Txialakanyiso txonetxo, txi mvhuni ku e xolisisa matipfelo akwe se ngu magwito ti ndi na mhehukela kumaha txisungo txa wutxhari.

10. Ngu kuya ngu Vafilipiya 4:13, ngu tihi ti Jehovha a no ti maha kasi kuvhuna malanda akwe? Ningela txikombiso. (Wona ni mfota.)

¹⁰ Ene wa hi ninga mtamo wo hi tsanisela. Kufana ni mpostoli Paulo Jehovha a nga hi ninga mtamo wu hi wu lavako to hi tsanisela sikarato sathu. (Lera Vafilipiya 4:13.) Wona nzila yi Jehovha a nga vhuna ngu yona mwanathu wu a dhanwako ku i Benjamin ti to e tsanisela siemo so karata. Kukhukhela i ti ngadi vadotho va txi zumba ka wukhalo wo barama yimbi ka ditiko dimwani da África. Benjamin a womba tiya: “Ni txi khongela mbimo yotshe ka Jehovha ni mkombela to a ni ninga mtamo wo maha ati ti m’tsakisako. Jehovha a xamute mikombelo yangu nguku ni ninga kurula ka mialakanyo, txibindi txo simama ni txhumayela ni kugonda mabhuku aya ma nga ni vhuna ti to ni simama ni di tsani ngu didhawa da moya.” Ene a engetile a txi: “Kugonda ngu siperiyensiya sa vanathu ni kuwona nzila yi Jehovha a nga va vhuna ngu yona ti to ve timisela, ti tsanisile kutiemisela kwangu ko simama ni di thembekile.”

11-12. Jehovha a nga thumisa mwaya wathu wa moya ngu nzila yihi ti to e xamula mikombelo yathu? (Wona ni mfota.)

¹¹ Ene a thumisa mwaya wathu wa moya. Ka wusiku wo gwita a si se ningela wutomi wakwe Jesu a khongete ti txi huma mbiluni. Ene a kombete ka Jehovha ti to asi tumeleli vathu ve mrweka mnando wo ene i mruketeli. Jehovha a vhuni mwanana wakwe ngu kurumela ngelozi i ku mmweyo wa vanawe va moya va Jesu kasi ku yi ya mtsanisa. (Luka 22:42, 43) Nathu, Jehovha a nga hi vhuna ngu kuthumisa vanathu ti to ve hi endela mwendo ku hi fonela kasi ku hi tsanisa. Hotshethu hi nga lava mikhanjo yo womba “mapswi a manene” ka vanathu.—Mav. 12:25.

¹² Wona txikombiso txa mwanathu wa txisikati wu a dhanwako ku i Miriam. Msana ka mavhikinyana mwamna wakwe a di fite, Miriam a ti pfite a si nga ni wakwe ni ku a di pandisekile ngutu. Ene a txo zumbela kudila ni ku a txi lava m’thu wo bhula nayo. Ene a womba tiya: “Ni si nga ni mtamo wo fonela m’thu, se ni khongete ka Jehovha. Ni txi ngadi ni khongela ni txi dila, fone yangu yi to dhana, i ti didhota ni msikati wa dona ava i ngadi vangana vathu.” Miriam a thaveletwe ngu didhota dile ni msikati wa dona. Ene wa tsaniseka to i Jehovha a nga susumetela mwanathu wule ku e fona.

13. Ningela txikombiso txa nzila yi Jehovha a nga thumisako ava va si mkhozeliko kasi kuxamula mikombelo yathu.

¹³ Jehovha a nga thumisa vathu va va si mkhozeliko. (Mav. 21:1) Mbimo yimwani Jehovha wa xamula mikombelo ya malanda akwe ngu kuthumisa vathu va va si mkhozeliko ti to ve va vhuna. Ngu txikombiso, a gwesile mbilu ya Mkoma Aritasasta e tumela txikombelo txa Nehemiya txo tshumela eya Jerusalema kasi kuya wuseta didhoropa. (Neh. 2:3-6) Ni nyamsi, Jehovha a nga thumisa vathu va va si mthumeliko ti to ve hi vhuna ngako hi di ni txilaveko.

14. U tsakisilwe ngu txani ka txiperiyensiya txa Soo? (Wona ni mfota.)

¹⁴ Mwanathu wa txisikati wu a dhanwako ku i Soo Hing a pfite txivhuno txa Jehovha ngu kuthumisa dhokodhela wakwe. Mwanana wakwe wa mfana a ti ni malwati a msungo. Mbimo va nga manana ni phango ya hombe, ene ni mwamna wakwe va emile kuthuma kasi ku ve khatalela mwanana wawe. Aku va nga ti lekile mthumo va khatile kupwatela. Soo Hing a wombile to ene a txi tipfa nga a nge sikoti kutimiselela kambe txiemo txile. Ene a gete Jehovha matipfelo akwe e kombela txivhuno. Se dhokodhela a lavetete tinzila to vhuna Soo ni mwaya wakwe. Vona va khatile kukhatalelwa ngu mfumo, ve tshumela ve lavelwa wukhalo wa wunene wo zumba ka wona. Ngu msana Soo a wombile tiya: “Ni woni diwoko da Jehovha ka mhaka yiya, ngu ditshuri ene ‘wa engisa mikombelo.’”—Mas. 65:2.

TI LAVA HI VA NI LIKHOLO KASI KUXOLA NI KUTUMELA TIXAMULO TA MIKOMBELO YATHU

15. Ngu tihi ti ti nga vhuna mwanathu mmwani wa txisikati kasi ku e tumbula to mikombelo yakwe yi di xamutwe?

¹⁵ Hi nga mbimo yotshe mikombelo yathu yi xamulwako ngu nzila yo xamatisa. Kambe totshe tixamulo ti hi ti manako, ngu tonti hi ti lavako kasi kusimama hi di thembekile ka Tate wathu wa nzumani. Ngu toneto lavetela tixamulo ta mikombelo yako ka Jehovha. Mwanathu wa txisikati wu a dhanwako ku i Yoko a pfite nga Jehovha kha xamula mikombelo yakwe, se a khatile ku bhaletela totshe ti a nga ti kombela ka Jehovha. Se ku di pindile mbimonyana, adiya tula txikadhernwana txakwe e wonetela totshe ti a ngadi bhate, se a tumbute to Jehovha a ti xamute kutala ka mikombelo yakwe kupata ni yi a ngadi yi divate. Nathu, mbimo yotshe ti lava hi ema hi alakanyisisa ngu nzila yi Jehovha a xamulako ngu yona mikombelo yathu.—Mas. 66:19, 20.

16. Hi nga kombisisa kutxani likholo mayelano ni mikombelo yathu? (Vahebheru 11:6)

¹⁶ Hi kombisa likholo i si nga ngu kumaha mkombelo ka Jehovha dwe, kambe ngu ku amukela xamulo ti si nga ni mhaka ni nzila yi yi tako ngu yona. (Lera Vahebheru 11:6.) Wona txikombiso txa Mike ni msikati wakwe Chrissy. Va di ni makungo o ya thumela Bhetele. Mike a womba tiya: “Hi prenxerile petisawu kota mpatwa kudingana malembe o tala, ni ku hi khongete ka Jehovha ngu kuwuyelela mayelano ni dikungo diya.” Ene a engetile atxi, “kambe kha ha rambwa.” Kambe vona va txi tsaniseka ti to Jehovha wa ku ziva amu a lavako kuva thumisa kona. Vona va simamile ve maha totshe ti va nga ti kotako, va thumile kota vanyaphandule va mbimo yotshe amu ku ngadi ni txilaveko txa hombe ni kuseketela ka maprojeto o aka. Konku, vona va thuma ka wuwoneleli wa txigava. Mike a womba tiya: “Hi nga mbimo yotshe Jehovha a nga xamula mikombelo yathu ngu nzila yi hi ngadi yi emete, kambe ene a xamute ngu nzila ya yinene ngutu yo pinda ayi hi ngadi yi emete.”

17-18. Ngu kuya ngu Masalmo 86:6, 7, ngu tihi ti hi nga tsanisekako ka tona?

¹⁷ Lera Masalmo 86:6, 7. Dhavhidha a txi tsaniseka to Jehovha a engisile ni ku a xamute mikombelo yawe. Nawe u nga tsaniseka ngu nzila yi yi fanako. Sikombiso si hi nga si wona ka gondo yiya si hi tsanisekisa ti to Jehovha a nga hi ninga wutxhari ni mtamo wu hi wu lavako ti to hi tsanisela. Ene a nga thumisa mwaya wathu wa moya kupata ni va konku va si mthumeliko ti to ve hi vhuna ngu tinzila to hambana-hambana.

¹⁸ Hambiku mbimo yotshe Jehovha a si xamuliko mikombelo yathu ngu nzila yi hi ngadi yi emete ngu yona, ha ti ziva ti to ene a na yi xamula. Ene a nga hi ninga a si hi si lavako ngu mbimo ya kona. Maha mkombelo u txi tsaniseka ti to Jehovha a na ku khatalela konku, ni ku a na ta “ninga si si lavekako ka votshe” ava va no ta hanya ka mafu a maphya.—Mas. 145:16.