Hi nga tshukwatisa kutxani mikombelo yathu?

1. Jehovha a ramba vakhozeli vakwe ku ve maha txani? (Wona ni mfota.)

I MANI wu hi nga yako kwakwe ngako hi txi lava mkongomiso ni kuthavelelwa? Xamulo se ha yi ziva. Hi nga tshuketa ka Jehovha ngu mkombelo. Ene a hi ramba ku hi maha toneto. A lava ti to hi “khongela hi si karali.” (1 Vat. 5:17) Hi nga ti pfa hi di khululekile kutshuketa kwakwe ngu mkombelo ni ku kombela mkongomiso ka totshe ta wutomi wathu. (Mav. 3:5, 6) Kota Txizimu txa wuha, Jehovha kha hi gemeli makhambi ya hi fanelako kutshuketa kwakwe ngu mkombelo.

2. Hi na bhula ngu txani ka gondo yiya?

² Athu ha ninga lisima ningo yiya ya mkombelo. Ngu mhaka yo talelwa ngu to maha, ti nga thuka ti hi karatela kumana mbimo yo maha mkombelo. Ti nga maha kambe hi tumbula ti to ti lava hi tshukwatisa mikombelo yathu. Ha M’bonga Jehovha ngu mibhalo nguko ka yona ha mana ku kuzetwa ni mkongomiso. Ka gondo yiya, hi na bhula ngu ti to hi nga mahisa kutxani kasi ku tivekela mbimo yo maha mkombelo ngu kuxolisisa txikombiso txa Jesu. Hi na tshumela hi bhula ngu nzila yi hi nga tshukwatisako ngu yona mikombelo yathu ngu kupata 5 wa timhaka ta lisima ka mikombelo.

JESU A TI VEKETE MBIMO YO MAHA MKOMBELO

3. Ngu tihi ti Jesu a nga txi ti pfisisa mayelano ni mkombelo?

³ Jesu a txi ti pfisisa to Jehovha wa yi ninga ngutu lisima mikombelo. A si se ta hamafuni Jesu a woni Tate wakwe atxi xamula mikombelo ya vavamna ni ya vavasikati vo thembeka. Ngu txikombiso, mbimo yi Jehovha a nga xamula mikombelo yo huma mbiluni ya Ana, Dhavhidha, Elija ni vamwani, adi kumweko ni Jesu. (1 Sam. 1:10, 11, 20; 1 Vafu. 19:4-6; Mas. 32:5) Se, ngu toneto ti nga maha Jesu e gondisa valondeteli vakwe ti to ve khongela va di ni themba!—Mat. 7:7-11.

4. Hi gonda txani ka mikombelo ya Jesu?

⁴ Nzila yi Jesu a nga ti womba-womba ngu yona ni Jehovha ngu mkombelo i ve txikombiso txa txinene ka valondeteli vakwe. Ka mthumo wakwe wo txhumayela, mbimo yotshe Jesu a txi maha mkombelo. Ene ati ti vekete mbimo yo khongela nguko mbimo yotshe atxi zumba a di ñolekile ni ku a ti randelwa ngu vathu vo tala. (Marku 6:31, 45, 46) Ene atxi wuka ni mixo ku di ngadi phumile kasiku eya va ka wukhalo wakwe ekha ti to e khongela. (Marku 1:35) Dikhambi dimwani a khongete wusiku wotshe a si se maha txisungo txa lisima ngutu. (Luka 6:12, 13) Ka wusiku wule a si se fa, Jesu a khongete makhambi o tala a txi veka mapimo ka txiavelo txakwe txo karata ngutu.—Mat. 26:39, 42, 44.

5. Hi nga mu etetelisa kutxani Jesu mbimo yi hi mahako mkombelo?

⁵ Txikombiso txa Jesu txi hi gondisa ti to hambi hi di ñolekile ngutu tilava hi ti vekela mapimo yo maha mkombelo. Kufana ni Jesu ti nga lava hi ti vekela mbimo yo maha mkombelo i nga va ni mixo ngutu mwendo hagari ka wusiku. Hi txi maha toneto hi komba Jehovha to ha yi bonga ningo yiya ya lisima. Mwanathu wa txisikati wu a dhanwako ku i Lynne a khumbula nzila yi a nga gweseka ngu yona mbimo yi a nga gonda ngu dikhambi do khata mayelano ni lungelo yo maha mkombelo. Ene a womba tiya, “Mbimo yi ni nga gonda to ni nga womba-womba ni Jehovha mbimo yotshe eto ti ni vhuni ku ni m’wona kota Mngana wangu wa hombe ni ku ni ti lava kutshukwatisa mikombelo yangu.” Kha hi kanakani to kutala kwathu hi tipfa ngu nzila yi yi fanako. Se konku he wone 5 wa timhaka ati hi nga ti patako ka mikombelo yathu.

5 WA TIMHAKA ATI HI NGA TI PATAKO KA MKOMBELO

6. Ngu kuya ngu Mtuletelo 4:10, 11, ngu tihi ti ti fanelako Jehovha?

⁶ Dhumisa Jehovha. Ka muwoniso wakwe wo xamatisa Johani a woni 24 wa madhota nzumani ma txi khozela Jehovha. Vona va txi dhumisa Txizimu nguko va txi tiziva to ngu txona txi ku ni fanelo yo amukela “kupfaliswa, wudhumo ni mtamo.” (Lera Mtuletelo 4:10, 11.) Tingelozi to thembeka ni tona ti ni sivangelo so tala so dhumisa Jehovha. Aku ti ku nzumani tona ti ni mkhanjo wo mziva kwati Jehovha. Ta wona tifanelo takwe ati ti wonekako ka ti a ti mahako. Mbimo yi Tingelozi ti wonako Jehovha a txi maha to kari, ti susumeteleka ku mdhumisa.—Jobe 38:4-7.

7. Nji txani txi hi mahako hi dhumisa Jehovha?

⁷ Nathu hi nga dhumisa Jehovha ka mikombelo yathu, ngu kuwomba ti hi ti dhundako ni ti hi ti tsakelako kwakwe. Mbimo yi u gondako Bhiblia zama kuwona tifanelo ta Jehovha ati ti ku xamatisako ngutu. (Jobe 37:23; Var. 11:33) Msana keto, mgele nzila yi u tipfako ngu yona ngu tifanelo toneto. Hi nga tshumela hi dhumisa Jehovha ngu ku a vhunako athu, ni vanathu votshe. Mbimo yotshe ene wa khatala ngu ngathu ni ku wa hi vhikela.—1 Sam. 1:27; 2:1, 2.

8. Ngu sihi simwani sa sivangelo asi si hi mahako hi bonga Jehovha? (1 Vatesalonika 5:18)

⁸ Bonga Jehovha. Hi ni sivangelo so tala so bonga Jehovha ka mkombelo. (Lera 1 Vatesalonika 5:18.) Hi nga m’bonga ngu sotshe sa sinene asi hi ku naso, nguko totshe tiningo ta tinene ti ta ngu kwakwe. (Jak. 1:17) Ngu txikombiso hi nga bonga kutshura ka mafu ya hi zumbako ka ona ni kuxamatisa ka mtumbuluko. Hi nga tshumela hi kombisa kubonga ngu wutomi wu a nga hi ninga, mwaya wathu, vangana kumweko ni themba. Hi lava kubonga Jehovha ngu ku a nga hi tumelela ku hi ti dila ngu kuva ni wungana wo sawuleka nayo.

9. Ngu kutxani ti txi lava hi sakulela kubonga Jehovha?

⁹ Ti nga lava hi maha mizamo yo kari kasi kualakanyisisa ngu sivangelo si hi ku naso so bonga Jehovha. Hi hanya ka mafu o biha, aha vathu va vekako mapimo ka ti va ti lavako i singa ko kombisa kubonga ka si va ku naso. Ngako hi txo tshapelwa ngu mahanyelo oneyo, mikombelo yathu yi na va lista ya sikombelo dwe, hi si bongi asi hi ku naso. Kasi kuvayilela mahanyelo oneyo, ti lava hi simama hi sakulela kukombisa kubonga ka totshe ti Jehovha a hi mahelako tona.—Luka 6:45.

10. Ku kombisa kubonga ku vhunisile kutxani mwanathu mmwani wa txisikati ti to e tsanisela? (Wona ni mfota.)

¹⁰ Ku kombisa kubonga ku nga hi vhuna ku hi tsanisela sikarato. Wona txiperiyensiya txa Kyung-sook, txi manekako ka direvhista da Muwoneleli wa 15 de Janeiro wa 2015. Ene ati ni câncer ka maphaphu ayi va nga swela ku yi tumbula. Ene a womba tiya: “Malwati yawa ma ni godholisile ni ti pfite ni di luzeketwe ngu totshe, ni ku ni txi thava.” Nji txani txi nga m’vhuna ku e wonisana ni malwati yawa? Ene a womba to otshe masiku ni wusiku a si se kuwotela, a txi huma eya vharanda ka dipredhiyo eya maha mkombelo ka Jehovha e bonga 5 wa timhaka ati a nga ti tsakela ka ditshiku donedo. Eto ti mu mahile e tsana ni ku ti m’susumetile ku e kombisa lirando lakwe ngu Jehovha. Ene a woni nzila yi Jehovha a khataleleko ngu yona malanda akwe o thembeka mbimo yi ma wonisanako ni siemo so karata, ni ku a gwitile e wona to ku ni makatekwa o tala ka wutomi wathu kupinda sikarato sathu. Kufana ni Kyung-sook, hi ni sivangelo so tala so bonga Jehovha hambi hi di haghari ka sikarato. Kukombisa kubonga kwathu ngu mkombelo ku nga hi vhuna to hi tsanisela ni kusimama hi mana litsako.

11. Ngu kutxani vagondiswa va Jesu ti nga txi lava ve va ni txibindi msana kova a di tshumete eya nzumani?

¹¹ Kombela Jehovha e ku ninga txibindi ka mthumo wo txhumayela. A si se tsula nzumani, Jesu a khumbutisile vagondiswa vakwe ngu txiavelo txawe txo ningela wufakazi mayelano ni nene “khe Jerusalema ni ka dotshe ditiko da Judheya ni Samariya kala magemeta-mitshi ka ditiko.” (Mith. 1:8; Luka 24:46-48) Msana ka mbimonyana, vathangeli va Vajudha va ñote mpostoli Pedro ni Johani ve va yisa masoni ka dibanza, ve va gela to ve ema kutxhumayela ni ku va va xanisile ngutu. (Mith. 4:18, 21) Pedro ni Johani va angulisile kutxani ka mhaka yiya?

12. Ngu kuya ngu Mithumo 4:29, 31, ngu tihi ti vagondiswa va nga maha?

¹² Msana kova va di xanisilwe ngu vathangeli va Vajudha, Pedro ni Johani va wombile tiya: “Ati ti nga lulama masoni ka Txizimu ngu tihi kani: Kuengisa anu mwendo kuengisa Txizimu kani? Athu kha hi na kusikota kumalala ni ti hi nga ti wona, ni ti hi nga tiengisa.” (Mith. 4:19, 20) Mbimo yi va nga humiswa vona va to guleta mapswi awe va txi maha mkombelo awu wu nga txi yelana ni kuranda ka Jehovha. Va khongete va txi: “U txi ninga sithumi sako kuwomba dipswi dako, na va si thavi txilo.” Jehovha a xamute mkombelo wonewo wo huma mbiluni.—Lera Mithumo 4:29, 31.

13. Hi nga gonda txani ka txikombiso txa Jin-hyuk?

¹³ Hi nga etetela txikombiso txa valondeteli va Jesu ngu kusimama hi txhumayela hambi vakoma va ditiko va txi hi tsimbisa. Wona txikombiso txa mwanathu Jin-hyuk, awu a nga khotelwa ngu mhaka yo mbi pateka ka timhaka ta politika. Kona jele mule, ene a ti avetwe kukhatalela sibotxhwa simwani asi a nga ti khotetwe kumweko naso, kambe asi tumelelwi kubhula naso ngu timhaka ti ti si yelaniko ni txiavelo txakwe, kupata ni ta Bhiblia. Ene a mahile mkombelo ti to e va ni txibindi txo e txhumayela ditshuri ngu nzila ya yinene ka yotshe mikhanjo ayi yi di no mtulekela. (Mith. 5:29) Ene a womba tiya: “Jehovha a xamute mikombelo yangu ngu ku ni ninga txibindi ni wutxhari ti to ni khata sigondo sa Bhiblia a ha ni nga txi heta 5 wa timeneti ka ditimba dimwani ni dimwani da sibotxhwa. Se ni wusiku, ni ti bhala mapasi aya ni ndi no ma ningela ka sibotxhwa kulothi mangwanani ka kona.” Kufana ni Jin-hyuk, nathu hi nga kombela txibindi ni wutxhari, hi txi tsaniseka ti to Jehovha a na hi vhuna to hi hetisisa mthumo wathu wo txhumayela.

14. Nji txani txi nga hi vhunako ngako hi txi wonisana ni sikarato? (Masalmo 37:3, 5)

¹⁴ Kombela Jehovha to e ku vhuna u wonisana ni sikarato. Wungi wathu ha wonisana ni sikarato sa malwati, sa matipfelo, kuluzekelwa ngu wu hi m’dhundako, sikarato sa mwaya, kuxaniswa ni simwani. Ni ku sikarato simwani so fana ni mitungu ni tiyimbi si mahile ti to, ti karata ngutu kuwonisana ni sikarato si hi ku naso ngu kale. Gela Jehovha ta mbiluni kwako. M’gele ti u tipfisako tona ngu txiemo txonetxo nga ha u di no bhulela ngu kona mngana wako wa hombe. Tsaniseka ti to Jehovha “a na maha totshe.”—Lera Masalmo 37:3, 5.

15. Mkombelo wu nga hi vhunisa kutxani “kutimisela kuxanisekani”? Ningela txikombiso.

¹⁵ Kusimama hi khongela ti na hi vhuna ku “timisela kuxanisekani.” (Var. 12:12) Jehovha wa ti ziva ati vakhozeli vakwe va wonisanako nato “ene wa engisa kudila kwawe.” (Mas. 145:18, 19) Mwanathu mmwani wa txisikati awu a ku ni 29 wa malembe a dhanwako ku i Kristie i ku nyaphandule a ti woni toneto i di ditshuri. A sa ti emela, ene a khatile ku lwala, se e karateka ngutu. Ngu msana, a zivile to mame wakwe a ti ni malwati o mbi pinda aya ma ndi no maha to efa. Kristie a womba tiya: “Ni khongete ngutu ka Jehovha to e ni ninga mtamo wo ni sikota kutimisela txiemo txiya ditshiku ni ditshiku. Ni zamile kusimama ni programa yangu ya timhaka ta moya ngu kuxalela mitshangano ni kumaha gondo yangu nipune.” Ene a engetile a txi: “Mkombelo wu ni vhuni ngutu ka timbimo tile to karata. Ni txi ti ziva to Jehovha mbimo yotshe a ni nani, kupimisa ngu toneto ti ni vhuni ku ni tshukwala hambiku malwati angu ma nga mbi tekela kupinda, kambe Jehovha a xamute mikombelo yangu ngu ku ni ninga kurula ni mbilu yo thutha.” Hi nga divaleni ti to “MKOMA wa sikota kuponisa vathu va wukhongeli.”—2 Pedro 2:9.

16. Ngu kutxani hi txi lava txivhuno txa Jehovha ti to hi xula siduko?

¹⁶ Kombela Jehovha ti to e ku vhuna u xula siduko. Aku hi ku vathu vo mbi pelela mbimo yotshe ha dukwa kumaha ti iku to biha. Sathani a maha totshe ti a nga ti kotako ti to sikarato si ya si nemela ngutu. Yimwani ya tinzila yi a yi thumisako kasi kujikisa mialakanyo yathu misakano yo biha. Misakano yoneyo yi nga maha ti to mialakanyo yathu yi tala ngu timhaka ta nzambwa, ni ku eto ti nga hi maha hi wela ka sionho sa hombe.—Marku 7:21-23; Jak. 1:14, 15.

17. Hi nga mahisa kutxani ti to hi hanya ngu kutumelelana ni mikombelo yathu kasiku hi vayilela siduko? (Wona ni mfota.)

¹⁷ Hi lava txivhuno txa Jehovha kasiku hi xula txiduko txo maha to biha. Ka mkombelo wu a nga gondisa valondeteli vakwe Jesu a patile tiya: “U nga hi leki hi txi wa kudukwani, kambe hi thuse ka m’bihi.” (Mat. 6:13) Jehovha a lava ku hi vhuna, kambe hi fanete kukombela txivhuno. Msana keto, hi fanete kuhanya ngu kutumelelana ni mikombelo yathu. Hi nga vayilela kulera mwendo ku engisela timhaka ti ti yelanako ni mapimiselo o biha a mafu awa a Sathani. (Mas. 97:10) Hi nga tata mialakanyo yathu ngu timhaka tatinene ngu kulera ni kugonda Bhiblia. Kuxalela mitshangano ni kupateka ka mthumo wo txhumayela ti nga hi vhuna kuvhikela mialakanyo yathu. Jehovha a thembisa ku kha na mbi tumelela ti to hi dukwa ngu si si ku txitimwi ka mtamo wathu.—1 Vak. 10:12, 13.

18. Ngu tihi ti hotshethu hi fanelako kumaha mayelano ni mkombelo?

¹⁸ Mmwani ni mmwani wathu ti lava e khongela ngutu kasi ku e simama a di thembekile ka Jehovha ka masiku yawa o gwita. Tivekele mbimo yo maha mkombelo wo huma mbiluni ditshiku ni ditshiku. Jehovha a lava ti to hi ‘tshakunuta mbilu yathu kwakwe’ ngu mkombelo. (Mas. 62:8) Dhumisa Jehovha ni ku m’bonga ngu totshe ti a ti mahako. Mkombele ti to e kuvhuna u va ni txibindi ka mthumo wo txhumayela. Mkombele to e kuvhuna u wonisana ni sikarato ni kuxula siduko asi ti nga mahako u txi wonisana naso. U nga tumeleli txilo mwendo m’thu e kulekisa kumaha mkombelo ka Jehovha mbimo yotshe. Se Jehovha a xamulisa kutxani mikombelo yathu? Hi na ta mana xamulo ya txiwotiso txiya txa lisima ka gondo yi londiselako.