Mareferensiya a txibhukwana txa mitshangano ya Mahanyelo a Wukristu
© 2023 Watch Tower Bible and Tract Society of Pennsylvania
1-7 KA JANEIRO
TITHOMBA TA MU KA DIPSWI DA TXIZIMU | JOBE 32-33
Thavelela ava va wonisanako ni kuvilela
it-1710
Elihu
Elihu a ti si nga ni txisawu-sawu, a si ningeli txithopo txo guleka ka vamwani kupinda vamwani. Ene a pfisisile ti to ene, kufana ni Jobe, va mahilwe ngu lithulu ni ku Txizimu txa mtamo wotshe i ti txona mvangi wawe. Elihu a ti singa ni txikongomelo txo dhukisa Jobe kambe a wombawombile kota mngana wakwe wa ditshuri, e tshumela e mu dhana ngu ditina, i ku ti Elifazi, Bhilidhadhe, ni Zofari va nga mbi ti maha.—Jobe 32:21, 22; 33:1, 6.
w14 15/6 25 ¶8-10
Ina awe wa kuwona kutandeka ka vathu vamwani kufana ni Jehovha?
Ngu mtolovelo hi nga kombisa ngutu wumbilu ngako hi txi khumbula ti to vamwani vanathu vathu vo dhundeka va tandekile kumaha to kari ngu kona ha ko godholiswa ngu siemo so hambana-hambana—kufana ni kuwonisana ni txikarato txa dihanyo, kuhanya ka mwaya wu wu si nga ku ni wumwewo, mwendo kuwonisana ni depresawu. Nanathu hi nga thuka hi wonisana ni siemo si si fanako ditshiku dimwani. Na va si se bela ka ditiko da txithembiso, Vaisrayeli, va i nga ti sisiwana ni kwa mbi nga ni mtamo khe ka ditiko da Egipta, va khumbutisilwe ti to va sa fanela “ku bangisa timbilu [tawe]” ka vanawe ava va nga ti ni sikarato. Jehovha a txi emela ti to ve wona sisiwana kota nzila yo ve si vhuna.—Dhewut. 15:7,11; Levhi. 25:35-38.
Hahanze kova valamuli, hi fanete hi thavelela ngu didhawa da moya avale va tshanganako ni siemo so mbi tsakisa. (Jobe 33:6, 7; Mat. 7:1) Ngu txikombiso: Ngako mtsimbitisi wa txithuthuthu a di txitaratoni se e dawiswa, ina vadhokodhela va na lava kuziva ti to ngene a nga vanga phango? Ahim-him, vona ngu txikuluveta va na mu tendera. Ngu ha kufanako, ngako mwanathu a txi godholiswa ngu siemo so kari, txo khata ngu hi m’vhuna ku e tsana ngu didhawa da moya.—Lera 1 Vatesalonika 5:14.
Ngako hi txi ema hi alakanyisisa ngu siemo si vanathu va wonisanako naso, hi na sikota kuwona kutandeka ka vamwani ngu nzila yo hambana. Hi nga alakanyisisa ngu vanathu vatxisikati ava va wonisanako ni kukanetwa kudingana malembe o tala ha timwayani. Vamwani vathu vo tiveka hahatshi ni ku woneka va sa tsana, kambe ina kha va kombise mtamo ni likholo asi si xamalisako? Ngako u txi wona mame awu a wunjako vanana i di ene ekha a txi ya mitshanganoni ni mwanana mwendo vanana, ina kha li kuxamalisi likholo lakwe ni ku tiemisela kwakwe? Se hi nga womba txani ngu ma jovhem a ya ma simamako me ñolela ditshuri hambi ma txi wonisana ni mkuzetelo wo biha txikolwani? Kambe ngu kutiveka hahatshi, ha tumela ti to ava va wonekako nga kha va tsana, kambe va nga va va i di “va nyatithombe amu ka likholo” kupinda vale hagari kwathu va hanyako ka siemo sa sinene.—Jak. 2:5.
Ngu yihi mbimo ya yinene yo womba-womba?
Wamwamna wa wumune awu a nga ta pfuxela Jobe i ti Elihu, i nga ti dixaka da Abrahamu. Ene a engisete mbimo yi Jobe kumweko ni vavamna vale vavararu va nga txi womba-womba. Ene a engisete kha kwati se a ningete txialakanyiso ngu kutsana kambe ngu wumbilu, kasi kululamisa ma alakanyelo a Jobe. (Jobe 33:1, 6, 17) Ka Elihu txa lisima i ti kudhumisa Jehovha kupinda ene mwendo m’thu mmwani. (Jobe 32:21, 22; 37:23, 24) Ka txikombiso txa Elihu, hi gonda to ku ni mbimo yo malala hi engisela. (Jak. 1: 19) Hi tshumela hi gonda to, ngako hi txi ningela txialakanyiso, hi lava kudhumisa Jehovha i si nga athu hipune.
Hi nga kombisa to ha yi bonga ningo yo womba-womba ngu kuengisa txialakanyiso txa Bhiblia txo ziva to womba ni mbimo ya kona. Mkoma Solomoni a bhate tiya: “Mhaka yo wombwa ngu nzila ya yinene, yi fana ni mihando ya silivhela amu ka txiya txa nzalama.” (Mav. 25:11) Ngako hi txi engisela kwati ati vamwani va wombako, ni kualakanyisisa hi si se womba-womba, mapswi athu ma nga fana ni mihando ya silivhela; yona yi ni lisima ni ku yi tshurile. Kota wuyelo, ti si nga ni mhaka ni ti to hi womba ta tidotho mwendo to tala, mapswi athu ma na aka vamwani ni kumaha Jehovha e hi tsakela. (Mav. 23:15; Vaef. 4: 29) Ayiya i nzila ya yinene yo kombisa kubonga ningo yiya yo ta ngu ka Txizimu!
Tithomba ta moya
w13 15/1 19 ¶10
Simama u tshuketa hafuhi ni Jehovha
Ngu nzila yi yi fanako, ta laveka ku hi karateka ngu mazumbelo athu. Kha ti lavi hi ti maha nga ho wa ngadi ma jovhem, kuve se hi kute ngu tanga. Sikombiso so kula ngu tanga si nga kombisa ti to hi vathu va va ku ni wutixamuleli, txithavo, ni ku va va hi nga tshura ngu mndani. Ngu txikombiso, Bhiblia yi khene: “Wunvi m’bhoti wo dhundeka, wu manekako ka mahanyelo o lulama.” (Mav. 16:31) Jehovha a hi wonisa toneto, nanathu hi fanete kuzama ku tiwona ngu nzila yi ene a hi wonako ngu yona. (Lera 1 Pedro 3: 3, 4.) Ngu toneto, Ina i ngava wutxhari kumaha ma operasawu a ya ma ku ni phango ngu ku hi lava ku woneka hi di tshurile? “Kutsaka ka Mkoma” mtamo wanu ni ku tshura ka mndani, ti singa ni mhaka ni malembe anu mwendo dihanyo danu. (Neh. 8:10) Nga mafu a maphya dwe aha hi no tava ni dihanyo da dinene ni kutshura ka hahanze. (Jobe 33:25; Isaya 33:24) Kala kuza yi hoka mbimo yoneyo, hi fanete ku kombisa wutxhari hi tshumela hi va ni likholo ka sithembiso sa Jehovha nguko eto ti na hi vhuna ku hi tidila ngu wutomi konku ni ku hi si karateki kupinda mpimo ngu dihanyo dathu.—1 Tim. 4:8.
8-14 KA JANEIRO
TITHOMBA TA MU KA DIPSWI DA TXIZIMU | JOBE 34-35
Mbimo yi ti wonekako nga to biha ti mahekela vathu va vanene
I mani Txizimu?
Txizimu mbimo yotshe txi maha ti i ku tatinene. Bhiblia yi womba ti to, “kambe kule ni Txizimu wubihi, kule ni wa mtamo wotshe wuhambunyeti.” (Jobe 34:10) Wulamuli wa Txizimu wu lulamile, ngu toneto m’bhali wa Masalmo a nga womba ti to: “Nguko awe u fuma vathu ngu kululama”. (Masalmo 67:4) Vathu vo kanganyisa kha va nge sikoti kuphazamisa Jehovha nguko “MKOMA a wona mbilu”, ene wa wona ditshuri ni ku wulamuli wakwe mbwawunene mbimo yotshe. (1 Samuwele 16:7) Hahanze keto, Txizimu txa wu wona wukanganyisi ni wubihi wu wu mahekako nyamsi, Txizimu txi thembisile ti to i singa kale “vaonhi va na dulwa ha mafuni”.—Mavingu 2:22.
Ngu tihi ati Mfumo wa Txizimu wu no ta timaha?
Jehovha a na maha txani ngu vathu vo biha? Konkuwa o va ninga mkhanjo wo txitxa mahanyelo awe. (Isaya 55:7) Hambiku mafu awa ma no gumiswa, ku na ta va ni kulamulwa ko gwitisa. Ku na maheka txani ngu vathu va va lambako kutxitxa mahanyelo awe ni va va seketelako mafu awa kala ka xanisa ya hombe? Jehovha a na thavisa vathu vo biha. (Lera Masalmo 37:10.) Nyamsi vamwani va gondile kusisa wubihi wawe, se kha va mani kutsayiswa. (Jobe 21:7, 9) Kambe Bhiblia ya hi khumbutisa yi txi khene: “Nguko Txizimu txa wona tinzila ta vathu, kambe txa bhala otshe makando a kutsimbila kwakwe. Ku walo kuphuma mwendo txidema, txi si kotako kusisa avale va mahako wubihi. (Jobe 34:21, 22) Ngu toneto, kha ku nga ni txitinga txo barama ka txona Jehovha. Ene wa wona totshe ati vabihi va ti mahako. Msana ka Armagedhoni, ti nga maha hi pinda ngu ha ku nga ti zumba vabihi, kambe hi na mbi va wona. Va na va va di tsulete da magwito!—Masalmo 37:12-15.
Ina u na khuvekiswa u leka kulondeta Jesu?
Ina atiya ta maheka nyamsi? Ina! Vathu vo tala nyamsi va khuvekiswa ngu ku hi si beleliko timhaka ta politika. Vona va rinzela ti to hi ya vhota kufana ni vona. Kambe athu ha pfisisa ti to ngu kuya ngu mawonelo a Jehovha ngako hi txi vhota m’thu ti to e hi fuma ti fana ni loko hi txo tsukula Jehovha. (1 Sam. 8: 4-7) Vathu vamwani va pimisa ti to athu hi fanete kuaka sikolwa, sibhejela, ni kumaha mithumo yimwani yo vhuneta vathu. Se vona va khuvekiswa nguko athu hi veka mapimo ka mthumo wo txhumayela dwe i singa kululamisa sikarato sa mafu awa.
Hi nga maha txani ti to hi si khuvekiswi? (Lera Matewu 7: 21-23.) Athu hi fanete kuveka mapimo ko maha m’thumo awu Jesu a nga hi ruma wona. (Mat. 28:19, 20) Athu kha hi lavi kutsulupetwa ngu timhaka ta politika, mwendo kuzumba hi di bhisi ngu kuzama kululamisa sikarato sa mafu awa. Athu ha va dhunda vathu kambe ha tiziva ti to nzila ya yinene yo va vhuna ngu va gondisa mayelano ni Mfumo wa Txizimu ni ku va vhuna ti to ve sakulela wuxaka ni Jehovha.
Tithomba ta moya
Maha ti u nga ti kotako ti to ku kudhumiswa Jehovha!
Dizambi dimwani a di di nga engisela mabhulo a Jobe ni vavamna vale va vararu i Elihu. Ene a wotisile Jobe ngu Jehovha a txi khene: “Ngako u di lulamile, njitxani u txi ningako kani, mwendo njitxani Txizimu txi txi amukelako manzani kwako kani?” (Jobe 35:7) Ina nene a ti la kuwomba ti to mthumo wu hi wu mahako ka Txizimu hi nga wa txilo? Ahim-him. Nguko Jehovha kha kawuka Elihu nga ha a nga maha ngu kona ka Elifazi ni Bhilidhadhe. Elihu a ti ni mawonelo o hambana ni a vavamna vale. Ene a ti womba ti to Jehovha kha vhuneki loko hi txi m’khozela, nguko ene kha pwati txilo. Ti walo a ti hi nga mahelako Jehovha a ti a nga tipfako a di ganyile ngu tona. Hahanze keto, tifanelo ni wusikoti wu hi ku nawo si ta ngu kwakwe, ni ku wa yi wona nzila yi hi si thumisako ngu yona.
15-21 KA JANEIRO
TITHOMBA TA MU KA DIPSWI DA TXIZIMU | JOBE 36-37
Ngu kutxani u di fanete kuthemba txithembiso txa Txizimu txa wutomi wo mbi guma
w15 1/10 13 ¶1-2
Ina ta koteka ngu ditshuri kuziva Txizimu?
TXIZIMU TXA KWA MBI NA MAGWITO: Bhiblia yi gondisa ti to Txizimu txiho “kukhukhela ka kale.” (Masalmo 90:2) Ngu mapswi mamwani, Txizimu kha txa ngava ni makhato nem kha txi na mbi va ni magwito. Ngu mawonelo a vathu, “wona, Txizimu nja hombe kupinda wuzivi wathu; kambe kha ku na kubalwa malembe a txona.”—Jobe 36:26.
Ti ku vhunisa kutxani eto: Txizimu txi ku thembisa ku kuninga wutomi wo mbi na magwito ngako u txi txi ziva kwati kota mngana. (Johani 17:3) Ina ti di na ku koteka ku hi themba txithembiso txiya , i ti ku txizimu kha txi hanye kala kupinduka? O wa “Mkoma wa totshe timbimo” awu a nga sikotako kuhetisisa txithembiso txiya.—1 Timoti 1: 17.
Bonga sihiwa si Txizimu txi nga hi ninga!
Mati maho ha mafuni nguko ku ni mpfuka wa wunene hagari ka planeta yathu ni ditambu. I di ku mafu ma to ko va hafuhinyana ni ditambu mati ma ndi na hala me nyamalala kusala siwindi dwe. Ni ku i di ku ma to ko va kulenyana kambe, mati ma da titila ngutu me maha to mafu otshe me va jelo. Aku Jehovha a nga veka mafu ka wukhalo wa wunene, mati ma maneka me tshumela me thuma ngu nzila ya yinene ti to kuva ni wutomi. Ditambo di hisa mati a linene ni a magova ti to me kwela me ya nzumani me ya maha marefu. Ditambo di maha to mati me kwela me ya nzumani, ma txi hoka ma zumba 10 wa masiku. Ngu msana me wa i di mati a nzuma mwendo me maha hunguva, me gwita me tshumela me ya lineneni ni magovani njalo-njalo. Ngu dilembe, mpimo wu wu dinganako 500.000 km3 wa mati ma kwela me ya nzumani. Mathumelo awa a mati ma kombisa ti to Jehovha a ni wuzivi wa hombe ngutu ni ku a ni mtamo wa hombe.—Jobe 36:27, 28; Ekl. 1:7.
Tsanisa themba yako kota Mkristu
Themba yo ta mana wutomi wo mbi guma i ningo yo sawuleka yi tako ngu ka Txizimu. Hi wu emete ngu maso o Bhilivila wumangwana wuwa wo tsakisa awu hi tsanisekako to wu na hoka. Themba yiya yi fana ni hangi ayi yi hi tsanisako kasi ku hi wonisana ni sikarato, hi tsanisela kuxaniswa hambi kuwonisana ni lifo. Ni ku, themba yi tshumela yi thuma kota txigoko atxi txi vhikelako mapimo athu kasi ku hi vayilela to biha kambe hi namarela ka ti i ku ta tinene. Themba yathu ayi yi nga seketelwa ka Bhiblia, ya hi tshuketisa ka Txizimu ni ku yi kombisa lirando la hombe a li Txizimu txi ku nalo ngu ngathu. Ha wuyelwa ngutu ngako hi txi simama hi va ni themba yo tsana.
Tithomba ta moya
it-1492
Kubhulisana
Mahungu ni mawonelo ma txi hoka ka vathu ngu ti nzila to hamba-hambana ka timbimo ta Bhiblia. Ti ti tolovelekile ti to vathu ve pindiselana mahungu a makhalo o hambana-hambana. (2 Sam. 3: 17, 19; Jobe 37:20) Vathu va va nga txi enda ngu kuthumisa tiñolo, va txi womba madungula a makhalo a kule mbimo yi va nga txi ema ka madhoropa mwendo makhalo mamwani kasi ku ve mana sakudya, mati mwendo silo simwani. Ditiko da Palestina ha di nga txi manekela kona i ti nzila yo kupinda tiñolo ati ti tako mwendo ti yako ka makhalo a kule, o nga Ásia, África ni Europa. Ngu toneto ti ndi na va hehukela vazumbi va palestina ku ve mana madungula mayelano ni simahakalo sa lisima sa makhalo a kule. Mahungu a wukhalo wule mwendo a kule, ma ndi na manwa ka madhoropa mwendo mabhazara.
22-28 ka Janeiro
TITHOMBA TA MU KA DIPSWI DA TXIZIMU | Jobe 38-39
Ina wa tininga mbimo yo xolisisa mtumbuluko?
Ina u tiemisete kurinzela Jehovha?
Wona ti Bhiblia yi ti wombako mayelano ni nzila yi Jehovha a nga vanga ngu yona mafu, yona yi wombawomba ngu ku veka “tipimo” ni ku zimeka “tiphande” ni ku tshumela kuvekwa “dirigwi do khata.” (Jobe 38:5, 6) Yona yi tshumela yi womba ti to Jehovha a vekile mbimo yo e wonisisa ati a nga ti maha. (Gen. 1:10, 12) Ina wa alakanya nzila yi tingelozi ti nga tipfisa tona mbimo yi ti nga txi wona Jehovha a txi wumba ditiko kudotho-kudotho? Tona ti xamate ngutu! Ha koza ti kulungela “ngu kutsaka ngutu.” (Jobe 38:7) Hi gonda txani? Jehovha a tekile mazana-zana a malembe ti to e hetisa mthumo wakwe, kambe kuva a di mahile totshe kudotho-kudotho ti vhunile. Mbimo yi a nga ema e wonisisa ti a nga ti ti vangile, a ti wonile ti to “tinene ngutu.”—Gen. 1: 31.
Kuwuswa ka vafi ku kombisa lirando wutxhari ni kutimisela ka Jehovha
Kukhata Jehovha a vangile mwanana wakwe Jesu. Se ngu kuthumisa mwanana wakwe Jesu ene ‘a vangile sotshe simaha’ kupata ni timiliyoni ta tingelozi. (Vakl. 1:16) Jesu a ti tsaka ngu kuthuma kumweko ni Tate wakwe. (Mav. 8:30) Tingelozi ni tona ti tsakile ngu kuwona mithumo ya Txizimu. Ngu tona to khatha kuwona mbimo yi Jehovha ni Jesu va nga vanga nzuma ni mafu. Tingelozi ti ti pfisile kutxani? Tona ti tsakile ngutu, se ti to ‘patana ti embelela’ mbimo yi ku nga ti vangwa mafu, ni ku ti simamile ti embelela mbimo yi Jehovha a nga vanga silo simwani, kupata ni txivangwa txo xamalisa, i ku m’thu. (Jobe 38:7; Mav. 8:31) Txivangwa tximwani ni tximwani txi kombisa to Jehovha a ni lirando ni ni wutxhari.—Mas. 104:24; Var. 1:20.
Gonda to tala ngu Jehovha ka mtumbuluko
Hi fanela ku hi mthemba Jehovha. Jehovha a vhuni Jobe ti to e kulisa themba yakwe ngu ngene. (Jobe 32:2; 40:6-8) Ka dibhulo di a ngava nado ni Jobe, Jehovha a thumisile silo so tala ka mtumbuluko si patako tinyeleti, marefu ni ku keluka ka nzuma. A tshumete e womba-womba ngu sihari so fana ni nyari ni dikavhalo. (Jobe 38:32-35; 39:9, 19, 20) Totshe tiya ti hi gondisa ti to Jehovha hi nga Txizimu txa mtamo dwe, kambe txa lirando ni wutxhari wa hombe. Kasi kukombisa to a bongile dibhulo dile, Jobe a simamile a themba ngutu Jehovha kupinda makhatoni. (Jobe 42:1-6) Ngu ha kufanako mbimo yi hi gondako ngu mtumbuluko, hi khumbutiswa to Jehovha ani wuzivi wo mbi na magwito ni mtamo wa hombe ku hi pinda. Ene a na gumisa sotshe sikarato si hi wonisanako naso. Atiya ti nga tsanisa themba yathu ngu ngene.
Tithomba ta moya
it-2222
Mmahi wa Milayo
Jehovha kota mmahi wa Milayo. Ti hakubasani ti to Jehovha ngene dwe i ku mmahi wa ditshuri wa milayo wa hamafuni kotshe. Ni ku ngene mmahi wa milayo ya mtumbuluko yi kongomisako simaha asi si si hefemuliko (Jobe 38: 4-38; Mas. 104:5-19), ni wutomi wa sihari. (Jobe 39: 1-30) M’thu nene, kota txivangwa txa Jehovha, a pfala hahatshi ka milayo ya mtumbuluko wakwe, ni ku kota ku i ku txi vangwa txi ku ni wusikoti wo alakanyisisa ni txilaveko txa moya, a fanete ku ti veka hahatshi ka milayo ya mahanyelo ayi yi tako ngu ka Txizimu. (Var. 12:1; 1 Vak. 2:14-16) Hahanze keto, mlayo va Jehovha wu kongomisa sivangwa sa moya, tingelozi.—Mas. 103:20; 2 Pedro 2:4, 11.
Milayo ya mtumbuluko ya Jehovha kha yi funyeki. (Jer. 33:20, 21) Kotshelele hawa hi kotako ku wona mtumbuluko wa Jehovha, milayo ya kona yi tsani ni ku ya thembeka, amu va siyentista va yi zivako milayo yoneyo ngu kutsopeta ka diso vona va nga sikota kupima livilo la mtxima, maplaneta ni simwani sivangwa sa mpfukani. Awule a ndakako milayo ya mtumbuluko a ti veka phangoni a pune. Ngu ha kufanako milayo ya Txizimu mayelano ni mahanyelo, kha yi txitxi ni ku kha yi jika-jike ni ku kha yi na ku ndakwa ku si maneki txitsayiso. Hambi ku hi txi ndaka milayo ya mtumbuluko hi si tsayiswiko ngu mbimo yoneyo, kambe milayo yiya ya thembeka kufana ni milayo ya mtumbuluko. “Mi nga ti xengeni. Txizimu kha txi sakanelwi. M’thu ni m’thu a na elula asi a phayako.”—Vag. 6:7; 1 Tim. 5:24.
29 KA JANEIRO KALA 4 KA FEVEREIRO
TITHOMBA TA MU KA DIPSWI DA TXIZIMU | JOBE 40-42
Hi gonda txani ka ti ti nga humelela Jobe
w10 15/10 3-4 ¶4-6
“I mani a nga zivako mialakanyo ya Txizimu”
Hi txi alakanyisisa ngu mithumo ya Jehovha hi fanete kuvayilela kulamula Txizimu ngu kuya ngu mawonelo a vathu. Mawonelo oneyo ma kombisilwe ka mapswi a Jehovha nga ha ti nga bhalwa ngu kona ka Masalmo 50:21: “U pimisile ti to ani ni fana ni nawe.” Nga ha txigondi tximwani txa Bhiblia txi nga womba ngu kona 175 wa malembe msana: “Vathu va tolovete kulamula Txizimu ngu mawonelo awe, ve tshumela ve ti vekelqa mihingano ngu milayo yi va ti vekelako yona va pune.”
Hi fanete ku hi ti wonela ku hi si txitxi mawonelo a Jehovha ngu nzila yo veka milayo yathu ayi yi tsimbitisanako ni minavelo yathu. Ngu kutxani toneto i di ta lisima? Ngako hi txi gonda mibhalo, yimwani milayo ya Jehovha yi nga woneka nga hi nga ya yinene ngu kuya ngu mawonelo athu o koma a kwa mbi pelela. Ma Israyeli a kale, ma wete ka mlawo wonewo wo pimisa ni ku ma hokelete mawonelo o biha mayelano ni wuxaka wu Jehovha a nga ti nawo ni ona. Wona ti Jehovha a nga ti womba: “Ma womba mi txi khanu: ‘Nzila ya Mkoma hi nga yo lulama.’ Engisa koko awe nyumba ya ka Israyeli: Nzila yangu kha ya lulama kani? Hi nga tinzila tanu ti nga gombonyeka kani?”—Eze. 18:25.
Khiya yimwani yo vayilela mlawo wo lawula Jehovha ngu kuya ngu mawonelo athu, ngu tumela ti to mawonelo athu ma komile ni ku mbimo yimwani i nga va phazamo. Jobe ti txi lava e yi mana gondo yoneyo. Kudingana mbimo yi a nga ti ka sikarato, Jobe a txi zumbela kukarateka, ati ti nga mmaha e zumbela kupimisa ngu ngene. Ene a luzile kupimisa ngu timhaka ta hombe. Jehovha ngu lirando a mvhuni ku a engetela nzila yi a nga txi wona ngu yona timhaka. Mbimo yi a nga mahela Jobe kona mu ko pinda 70 wa siwotiso so hambana hambana, kha txi ngaho ni txatximwetxo txi a nga txi kota kuxamula, Jehovha a vekile hakumbasani kutandeka ka mapfisiselo a Jobe. Jobe a angute ngu nzila yo ti veka hahatshi, e lulamisa mawonelo akwe.—Lera Jobe 42:1-6.
U nga divali a ti i ku ta lisima ngutu
Ina Jehovha a bhongile mbimo yi a nga ti wombawomba ni Jobe ka totshe ti ti nga m’humelela? Ahim-him. Jobe a tumete kulaywa ngu Jehovha. Ene a ti khene: “Ngu kota yeto, na ti laya, kambe na pandiseka mbiluni, ni txi tola lithule ni dikhuma.” (Jobe 42:1-6) Makhatoni Elihu a vhuni Jobe ti to e lulamisa mawonelo akwe. (Jobe 32:5-10) Msana keto Jobe a engisete mlayo wa lirando waJehovha e tshumela e lulamisa mawonelo akwe. Jehovha a wombile ti to wa ti guleta ngu kuthembeka ka Jobe.—Jobe 42:7, 8.
Veka themba yako ka Jehovha
Jobe hi nga dona dilanda do thembeka da Jehovha adi di nga kombisa txibindi ni kutimisela hambiku a nga txi manana ni sikarato. Ka dipapilo di Paulo a nga bhalela Vahebheru, ene wombile ngu vamwani ava ni vona va nga kombisa kuthembeka ava a nga va dhana ku i “mtalo wa hombe wa tifakazi.” (Vaheb. 12:1) Votshe va mananile ni sikarato sa hombe, hambiketo va simamile va di thembekile masoni ka Jehovha. (Vaheb. 11:36-40) Ina kutimisela kwakwe ku vi mnyuko wa yimbwa? Ahim-him. Hambiku va nga mbi kuwona kuhetiseka ka sithembiso sa Txizimu vona va simamile ve veka themba yawe ka Jehovha. Aku va nga di ni kuthemba ti to Jehovha a txi va tsakela, vona va fite va txi tsaniseka ti to va ndi na kuwona kuhetiseka ka sithembiso sa Txizimu. (Vaheb. 11:4, 5) Se txikombiso txawe txi nga hi ninga mtamo wo hi simama hi veka themba yathu ka Jehovha.
Nyamsi hi hanya ka timbimo ti wubihi wu ko ya wu txi engeteleka ngutu. (2 Tim. 3:13) Sathani khasi kugwita kuduka vathu va Txizimu. Ti si nga ni mhaka ni sikarato asi hi no manana naso, hotshethu he tiemiseleni ku simama hi thumela Jehovha hi txi tsaniseka ti to athu hi “vekile kuthemba kwathu ka Txizimu txi txi hanyako.” (1 Tim. 4:10) Khumbula ti to hakhelo ayi Jehovha a nga ninga Jobe yi kombisa ti to “[Jehovha] a na ni wumbilu ni divalelo.” (Jak. 5:11) Kufana ni Jobe, he simameni hi di thembekile ka Txizimu hi txi tsaniseka ti to ene a “ninga txhatxhazelo ka vale va txi lavako.”—Lera Vahebheru 11:6.
Tithomba ta moya
it-2808
Sikarato
Sikarato sa hombe asi Jobe a nga txi wonisana naso si ti mmaha e va wo thembeka ni wo lulama. Kambe a vite ni mawonelo o biha e maha phazamu, a ha ti nga lava ku e kawukwa. Elihu a wombile tiya mayelano ni Jobe: “Mbwamwamna muni a kuho wo nga Jobe, wo sela sipoyilelo nga o sela mati kani?” (Jobe 34:7) Jobe a karatekile ngutu ngu ku ti emelela, hahanze ko emelela Txizimu, ene a txi wona kululama kwakwe hahanze ko wona kululama ka Txizimu. (Jobe 35:2; 36:24) Mbimo yi a nga amukela mapswi o biha a “vangana” vakwe va vararu, Jobe ati ni mawonelo o womba-womba ngu ngene i si nga a Txizimu. Ti txi fana ni m’thu wu a nga txi ti ningeta ka txisolo ni wubihi wawe e ti emelela, a selako nga o sela mati. Ngu tsimbila ka mbimo, Txizimu txi txhamusete Jobe ti to mapswi onewo o biha (ngu magwito ma txi setxisiswa) ngu ditshuri, ku txi wombwa-wombwa makuho ngu Txizimu. (Jobe 42:7) Ngu ha kufanako, Jehovha a gete tiya mprofeti Samuwele mbimo yi Vaisrayeli va nga txi kombela kuva ni mkoma: “Nguko kha va lambe awe; kambe ngani va ni lambako, kasiku ani ni si fumi txitimwi kwawe.” (1 Sam. 8:7) Ni ku Jesu a gete tiya vagondiswa vakwe: “Sekoko va na mi ningela kuxaniswani ni kudawani, mi na vengelwa ngu votshe vathu [i si nga ngu kona ha kwanu, kambe] ngu mhaka ya ditina dangu.” (Mat. 24:9) Kuva ni eto ka mapimo ti na vhuna mkristu ku e tsanisela wubihi ngu nzila ya yinene ni ku ti na maha e faneleka ku amakulela makatekwa ngu kona ha ko tsanisela kwakwe.—Luka 6:22, 23.
5-11 KA FEVEREIRO
TITHOMBA TA MU KA DIPSWI DA TXIZIMU | MASALMO 1-4
Sawula kuseketela Mfumo wa Txizimu
“Ni na dekadekisa otshe matiko”
Vathu va angulisa kutxani ka thenga yiya? Vo tala kha va yi tsakeli. (Lera Masalmo 2:1-3.) Matiko ma nyekanyeka, ona va lamba ku tumela awu Jehovha a nga msawula kota Mfumeli. Vona kha va woni didungula di hi txhumayelako da Mfumo kota mahungu a manene. Phela mifumo yo tala ya tsimbisa mthumo vathu wo txhumayela. Hambiku vakoma vo tala va matiko va wombako ti to va thumela Txizimu kambe vona va lava kuzumba va txi fuma. Kufana ni vakoma ka timbimo ta Jesu, vafumeli va nyamsi va wukela msawuleki wa Jehovha ngu kuxanisa ava va tumelako kufumwa ngu ngene.—Mith. 4:25-28.
w16.04 29 ¶11
Simamani mi si pateki ka mafu yawa ma si ngako ni wumwewo
Kudhunda tithomba.Ngako hi txi dhunda tithomba, ti na hi karatela kutsanisela mbimo yi hi mananako ni txikarato. Rute wa khe Malawi a ti woni ti txi maheka eto ka timwani ta Tifakazi ta Jehovha mbimo yi ti nga xaniswa kona mu ka ma 1970. Ene a womba tiya: “Vamwani vanathu kha va ti kota kuleka tithomba tawe. Kukhatani, vamwani va kona va hingilwe kumweko ni nathu, kambe va gwitisile ku ti pata ni va ti politika, kasi ku ngu magwito ve tshumelela mtini. Nguko kha va si kota kutsanisela wutomi wo nemela amu hi nga ti baramile kona.” Txo tsakisa, vanathu ngu mtalo wawe wa sikota kusimama va si pateki ka ti mhaka ta ditiko hambi va txi wonisana ni sikarato sa timale, hambi msana ko luzekelwa ngu sotshe si va nga ti naso.—Vaheb. 10:34.
Tithomba ta moya
it-1425
Mthungu
Txivhikelo txa txidotho txi txi manekako ka mafaka, sevhadha, mpunga mwendo trigu, txi dhanwa ku mthungu. Hambi ku mareferensiya ya mu ka Bhiblia ma si womba wombiko ngu mthungu wa ditshuri, ona ma fanekisela nzila yi vathu va nga txi hula ngu yona timbewu ka timbimo ti ti nga phinda. Msana ko hulwa, sotshe sile i si ngako mbewu si si vhuni txilo, se ngu toneto, si txi wonwa i di si maha si si si vhuniko txilo, si nga ti si lawe, tximaha txi txi hambaniswako ni si i ku sasinene txi tshotshwa.
Kukhata, kuhula ti ti maha ti to timbewu ti hambana ni si si si lavekiko. Msana ko hehera, mthungu wu txi huhiswa ngu moya kufana ni lithuli. (Wona JOEIRAR.) Eto ti kombisa nzila yi Jehovha Txizimu a thavisako ngu yona va apostata hagari ka vathu vakwe, ati a ti hambanisisako tona ni vathu va vabihi kumweko ni vathu va matiko va vakaneti. (Jobe 21:18; Mas. 1:4; 35:5; Isaya 17:13; 29:5; 41:15; Hos. 13:3) Mfumo wa Txizimu wu na hoxota vabihi va txi fana ni mthungu wule wuhuhiswako ngu moya.—Dhan. 2:35.
Mthungu wule wu nga sala wu si vhuniko txilo wu txi patwa wukhalo wa wumwewo wu hiswa, ati to wu si tshumetwi kambe ngu moya wu ta patana ni timbewu. Ngu ha kufanako, Johani mbhabhatisi, a womba wombile ngu kuhoxotwa ka wukhongeli wa makuhu—M’huli, Jesu Kristu, a na sengeleta trigo “aniko makamba a na ma hisa ngu mndilo wo mbi timeka.”—Mat. 3:7-12; Luka 3:17; wona DEBULHA.
12-18 KA FEVEREIRO
TITHOMBA TA MU KA DIPSWI DA TXIZIMU | MASALMO 5-7
Simama u di thembekile ti singa ni mhaka ni ti vamwani va ti mahako
Hi nga wu manisa kutxani mtamo ka Mibhalo
Ina u khala kujikelwa ngu mngana wo kari mwendo dixaka? I di toneto u nga wuyelwa ngu kuxolisisa matimu a Abhisalome, awu a nga jikela tate wakwe Dhavhidha e lava ku mu honyola wukoma.—2 Sam. 15:5-14, 31; 18:6-14.
1) Maha mkombelo. U si se gonda didungula diya, gela Jehovha a ti u ti pfisako tona ngu ti ti nga kumahekela. (Mas. 6:6-9) U nga jika-jike, peka msungo mhaka. Kombela Jehovha ngu kukongoma ti to e kuvhuna ku u mana ditshina da mlayo adi di no kuvhuna ku u wonisana ni txikarato txako.
Tsaniseka ti to ati u ti gondako ditshuri
Ti ni phango kuseketela likholo lathu ka lirando li li kuho hagari ka Makristu basi. Ngu kutxani? Alakanya ngu tiya, mwanathu wo kari i nga va didhota mwendo nyaphandule a txi maha txionho, mwendo u henyiswa ngu mwanathu wo kari dibanzani. Mwendo m’thu i nga ti mwanathu e kaneka ditshuri. Ngako eto ti txo maheka u nga henya u leka kuthumela Jehovha. Nda lisima kualanyisisa ngu tiya: Hi txi aka likholo ka mahanyelo a vamwani i si nga ka wuxaka wathu ni Jehovhali na mbi tsana. Likholo lako kha la fanela kutsaniswa ngu silo so hehuka so fana ni matipfelo a vathu vamwani. Kambe u fanete kutsanisa liko ka silo si si nga banga. Ku pfisisa ati u ti gondako u maha wuxolisisi kasi ku tsaniseka ti to ati u ti gondako ditshuri.—Var. 12:2.
Jesu a wombile ti to vamwani va ndi na tumela ditshuri ngu “kutsaka”, kambe likholo lawe li ndi na guma mbimo yi va dukwako. (Lera Matewu 13:3-6, 20, 21.) Ti nga maha va sa ti pfisisa ti to kulondisela Jesu ti pata sikarato (Mat. 16:24) Kutilava va txi alakanya ti to wutomi wa Wukristu mbo tsakisa, wo tala ngu makatekwa wu si nga ni sikarato. Kambe ka mafu yawa o mbi hetiseka hotshethu hi na manana ni sikarato. Siemo si nga txitxa se eto ti nga hi maha hi gumelwa ngu litsako ngu mbimo yo kari.—Mas. 6:6; Ekl. 9:11.
Tithomba ta moya
it-1995
Diyiva
Ka Varoma 3:13 mpostoli Paulo a womba mapswi a Masalmo 5:9, a fananisa mkolo wa vabihi mwendo vaxengeteli ni “diyiva no asama.” Kota diyiva do asama, di fanete kutatwa ngu vafi ni wukhamba, mkolo wa kona wu tuleka ka mawomba-wombelo o daya ni a wukhamba.—Fananisa ni Mt 15:18-20.
19-25 KA FEVEREIRO
TITHOMBA TA MU KA DIPSWI DA TXIZIMU | MASALMO 8-10
“Ani ni lava ku kudhumisa, MKOMA”!
Ninga lisima wukhalo wako ha mwayani ka Jehovha
Jehovha a hi lulamisete mti wo tshura. Ku di nga ti sate mbimo yo lapha ti to e vanga m’thu wo khata, Jehovha a lulamisete mafu ti to vathu ve ta zumba ka ona. (Jobe 38:4-6; Jer. 10:12) Aku Jehovha a khatalako ni wuha, a hi ningile silo sa singi ti to hi kota ku mana litsako. (Mas. 104:14, 15, 24) Jehovha a ti ti ninga mbimo ti to e wona ti a nga ti maha, se e “wona ti to ndinene.” (Gen. 1:10, 12, 31) Jehovha a ningile lisima vathu ngu kuva ninga “kufuma” sotshe so tshura si a nga si vanga hamafuni hawa. (Mas. 8:6) Txikongomelo txa Txizimu ngu ti to vathu vo hetiseka ve va ni litsako ngu ku khatalela sivangwa sotshe si Txizimu txi nga si vanga ngu ha ku singa ko ni magwito. Ina wa m’bonga Jehovha mbimo yotshe ngu txithembiso txiya txo tsakisa?
Bonga sihiwa si Txizimu txi nga hi ninga!
Hi nga kombisa kubonga txihiwa txiya txo womba-womba ngu tinzila to tala. Yimweyo ya kona ngu txhamusela ati hi ti kholwako ngu Txizimu ka va va nga kanganyiswa ngu gondo ya kutimahekela a ka silo. (Mas. 9:11; 1 Pedro 3:15) Ava va si kholwiko ka M’vangi va zama ku hi kholwisa ti to mafu ni silo sotshe si si ku ka ona si to ti mahekela. Ngu kuthumisa Bhiblia ni ti hi nga ti wona ka gondo yiya, hi nga emela Tate wathu wa nzumani ni kuthxamusela ava va riyako nzeve ti to ngu kutxani hi txi kholwa ku Jehovha ngene a nga vanga nzuma ni mafu.—Mas. 102:25; Isaya 40:25, 26.
Ina awe u txikombiso txa txinene ko womba-womba?
Embelela ngu mbilu yotshe. Mbimo yi hi embelelako tindando ta Mfumo, txikongomelo txathu ngu lava kudhumisa Jehovha. Mwanathu mmwani a dhanwako ku i Sara a ti wona i si nga m’thu wo kota kuembelela kwati. Hambiketo ene a lava kudhumisa Jehovha ngu tindando. Se ti to e tikota kumaha toneto, ene a lulamisela kha kwati adi mtini, nga ti a mahisako tona a txi lulamisela sienge simwani sa mitshangano. Mbimo yi a lulamiselako a zama kuwona ti to ndando yoneyo yi yelanisa kutxani ni ti a no gonda mitshanganoni. Ene a womba tiya: “Atiya ti ni vhuna ti to ni veka mapimo ka ti ndando yi wombako tona i si nga kuveka mapimo ka wusikoti wangu wo embelela.”
Tithomba ta moya
it-1832
Litihu
Ngu nzila yo fanekisela, ku wombwa Txizimu kota mmhahi wa mithumo ngu “manza” akwe, kufana ni kubhala digumi da milayo ka sileti sa marigwi (Eks. 31:18; Dhewut. 9:10), kumaha sidiwukiso (Eks. 8:18, 19), ni kuvanga nzuma (Mas. 8:3). “Manza” ma mahako mthumo, ma kombetela moya wakwe wo sawuleka, ta kombiswa ka dibhuko da Genesisi mayelano ni wuvangi a ha kuwombwako ti to moya wo sawulwka va Txizimu, wu ti ti zinginika txitimwi ka mati. (Gen. 1:2) Ngu toneto, Mibhalo ya Txigriki yi ningela mapfisiselo a manene mayelano ni txikombiso txonetxo nguko ka dibhuko da Matewu kutxhamuselwa ti to Jesu a txi hinga madhimoni ngu kona ha ka ‘moya wo sawuleka wa Txizimu’ ni ku ka Luka ku wombwa ti to toneto ti txi maheka ngu kona ha ka “litihu la Txizimu.”—Mat. 12:28; Luka 11:20.
26 KA FEVEREIRO KALA 3 KA MARÇO
TITHOMBA TA MU KA DIPSWI DA TXIZIMU | MASALMO 11-15
Ti alakanyi u di ka mafu a maphya o rula a Txizimu
w06 15/5 18 ¶3
Ati ti ku mndani ka dibhuku di khata da Masalmo
11:3—Ngu yahi makhato ma khundumuswako? Ewo ngu ona makhato ya vathu—mlayo ni wulilami. Mbimo yi va ku kuhoxokani, kha kuengiswi mlayo ni ku kha ngu nga ni wululami. Ka mbimo yoneyo, “wo lulama” ti lava e themba Txizimu.—Mas. 11:4-7.
wp16.4 11
Ditiko da kwa mbi na wugevenga di hafuhi
Bhiblia yi womba ti to i si nga kale Txizimu txi na gumisa wugevenga. Ditiko di yamsi i ku ni wugevenga di emela “ditshiku do lamulwa ni da kuloviswa ka vathu va va si khataliko ngu Txizimu.” (2 Pedro 3:5-7) Kha ku na mbiva ni sigevenga a si si vangako kuxaniseka ka vamwani. Ngu kutxani hi nga tsanisekako ti to Txizimu txi la kumaha to kari kasi kugumisa wugevenga?
Bhiblia yi womba ti to Txizimu txa “nyenya avale va dhundako wurena.” (Mas. 11:5) Ene wa dhunda kurula ni wululami. (Mas. 33:5; 37:28) Ngu toneto kha na mbi tumela ti to vabihi ve vaho yotshe mbimo.
Ina u ti emisete kurinzela ngu kutimisela?
Ngu ku txani Dhavhidha a nga ti ti emisete kurinzela ngu kutimisela? Ka Masalmu 13 hi mana xamulo, ngu mune wa makhambi a wotisile a txi khene: “Ani ni themba wumbilu wako; mbilu yangu yi tsakela kuhanyisa kwako. Ni na embelela ka MKOMA ni txi bonga wunene wu a nga ni mahela.” (Masalmu 13:5, 6) Jehovha a ti tiziva ti to wa mu dhunda ni ku mbimo yotshe wa thembeka kwakwe. Ene a khumbute mbimo ya kale ayi Jehovha a nga m’vhuna, ni ku a ti emete mbimo yi Jehovha a no ta gumisa sikarato sakwe. Dhavhidha a ti tiziva ti to ti ni lisima kuemela makatekwa a Jehovha.
kr 236 ¶16
Mfumo wa Txizimu wu maha Kudhunda ka txona hamafuni
Kuvhikeleka. Ngu magwito, ati ti wombwako ka Isaya 11:6-9 ti nava ti di hetisekile ngu ditshuri. Vavamna, vavasikati ni vanana va nava va di vhikelekile, ku si khataliseki amu va nova va di kona ko na ha hamafuni. Kha txi ngaho txivangwa, mthu mwendo txihari txi no va txo dhukisa. Alakanya mbimo yi ygi tako mafu otshe i di wukhalo wo zumba ka wona aha u nga yako u ya sambela ka minambo ni linene, kukwela mimango ni kutsimbila makhalo mamwani u di vhikelekile. Mbimo yi dinoswa khu na mbi thava txilo. Mapswi ya ma ku ka Ezekhiyele 34:25 ma na hetiseka ngu nzila yo ti na koteka ti to tinvuta ta Txizimu “ti na zumba txiwulani ti di tsani, ti txi otela sitingani.”
Tithomba ta moya
w13 15/9 19 ¶12
Ina awe u phindukile?
Atxi txi si tsakisiko ngu ti to ka mafu yawa yi randetwe ngu vathu va va nga wombwa ngu Paulo. Ti nga maha ve pimisa ti to kulondisela sirumo kumweko ni matshina a mlayo ya Bhiblia, ta kolwana mwendo ku ti pindetwe ngu mbimo. Kutala ka vagondisi ni vaveleki va ni mkhuwo wo tumelela totshe ni kundunduzela nzila yi va pimisako ngu yona “yo mbi lava kuengisa.” Kwawe totshe ta txitxa, kha ti ngaho ti i ku ditshuri. Hambi vamwani va wombako ti to vakhongeli, va pimisa ti to va ni mkhululeko wo maha ti i ku tona ngu nzila yi va lavako yona na va si kurumetwi kuengisa Txizimu mwendo kuengisa milayo ya txona. (Mas. 14:1) Mawonelo oneyo ma nga va phango ka Makristu a ditshuri. Ma si ti woneli, ma nga va ni mawonelo ya ma fanako ka timhaka ta sengeletano. Ti nga maha va si lavi kulondisela malulamiselo a dibanza ni kusola-sola ka tximwani ni tximwani txi txi si va tsakisiko. Mwendo hambi kusola-sola ka sileleto si si nga seketelwa mu ka Bhiblia mayelano ni misikano, kuthumisa internet ni tigondo to guleka.