GONDO 30
Vathu va u va dhundako va nga fa, va nga tshumela ve hanya!
Lifo li tisa kupanda ka hombe ngutu ni kuxaniseka. Ngu toneto Bhiblia yi dhanako lifo kota mlala. (1 Vakorinto 15:26) Ka gondo 27 u gondile ti to Jehovha a na fuvisa mlala eneyo. Se ku na maheka txani ngu va se va nga fa? Ka gondo yiya u na gonda ngu themba yimwani yo tsakisa ngutu ayi Jehovha a no yi hetisisa i ku kuwusa vakufa. Ene a na wusa tibhiliyoni ta vathu ti to ve hanya ngu ha ku si ngako ni magwito. Ina eto ti na maheka ngu ditshuri? Va na wuselwa ku ya hanya hani? Hamafuni mwendo nzumani?
1. Jehovha a na maha txani ngu maxaka ni vangana vathu ava va nga fa?
Jehovha a lava ti to ava va nga fa ve tshumela va hanya. Jobe wamwamna wo thembeka a ti kholwa ti to Txizimu txi ndi na m’khumbula hambi a di fite. Ene a ti khene ka Txizimu: “U ndi na ni dhana, se ani ni ndi na kuxamula [ni di diyivani].”—Lera Jobe 14:13-15.
2. Hi ti zivisa kutxani ti to ava va nga fa va nga wuswa?
Mbimo yi Jesu a nga ti hamafuni, Jehovha a mu ningile mtamo wo wusa vakufa. Ngu txikombiso Jesu a wusile txihoranana txa 12 wa malembe ni mwanana wa noni wa dizambi. (Marku 5:41, 42; Luka 7:12-15) Ene a tshumete e wusa mngana wakwe Lazaru. Hambi ku Lazaru a nga ti ni mune wa masiku a di fite, Jesu a mu wusile e tshumela e hanya. Msana kova Jesu a di mahile mkombelo ka Txizimu ene a wombile tiya: “Lazaru, huma hahanze!” Se msana keto “mufi a to huma” a txi hanya! (Johani 11:43, 44) Alakanya nzila yi vangana ni maxaka akwe va nga tsaka ngu yona!
3. Ngu yihi themba ayi yi kuho ka vangana ni maxaka ako aya ma nga fa?
Bhiblia yi thembisa ti to vathu “va na wuka ka vakufa.” (Mithumo 24:15) Votshe vathu ava va nga wuswa ngu Jesu kha va nga ya nzumani. (Johani 3:13) Vona va tsakile ngu ku va nga tshumela ve hanya kona hawa ha mafuni. Ngu ha kufanako i si nga kale Jesu a na wusa tibhiliyoni ta vathu ti to ti tshumela ti hanya ngu ha ku si gumiko ka paradhise kona hawa ha mafuni. Ene a wombile ti to “votshe vale va ku mayivani” va na wuswa. (Johani 5:28, 29) Eto ti lava kuwomba ti to votshe vale va ku ka mialakanyo ya Txizimu va na tshumela ve hanya, hambi ava va si khumbulwiko ngu m’thu.
ENGETELA WUZIVI WAKO
Wona wufakazi wa mu ka Bhiblia awu wu kombisako ti to vafi va na tshumela ve wuswa ni ku eto ti na maheka ngu ditshuri. Tshumela u wona nzila yi kuwuswa ka vafi ku nga ku thavelelako ngu yona ni ku kuninga themba.
4. Jesu a kombisile ti to a nga wusa vafi
Gonda to tala ka ti Jesu a nga mahela m’ngana wakwe Lazaru. Lera Johani 11:14, 38-44, mi gwita mi bhula ngu siwotiso siya:
Hi tizivisa kutxani ti to Lazaru a ti fite ngu ditshuri?—Wona vhersikulo 39.
Jesu a wusile Lazaru ti to e hanya ha mafuni. I di ti to Lazaru a ti nzumani ina u pimisa ti to Jesu a di mahile toneto?
5. Vathu vo tala va na wuswa!
Lera Masalmo 37:29, mi gwita mi bhula ngu txiwotiso txiya:
Vathu vo tala va na wuswa. Se va na hanya hayi?
Hahanze ko wusa malanda a Jehovha o thembeka dwe, Jesu a na wusa ni vathu vamwani vo tala ngutu. Lera Mithumo 24:15, mi gwita mi bhula ngu txiwotiso txiya:
I mani awu awe u tsakelako ku tshumela u m’wona a di wusilwe ka vakufa?
Ta mu hehukela tate kuwusa mwanana wakwe awu a nga otela. Ngu ha kufanako Jesu nene ta mu hehukela kuwusa m’thu awu a nga fa
6. Kuwuswa ka vafi ku nga kuthavelela ni ku kuninga themba
Kugonda ngu ti ti nga humelela mwanana wa Jayiru ka Bhiblia ta thavelela ni kutsanisa ava va wonisanako ni kupanda ko felwa ngu wu va m’dhundako. Lera matimu a kona ka Luka 8:40-42, 49-56.
Jesu a si se wusa mwanana wa Jayiru a ti khene kwakwe: “U nga thave, tumela dwe.” (Wona vhersikulo 50.) Themba ya kuwuswa ka vafi yi nga ku vhunisa kutxani ngako . . .
u txi felwa ngu wu u mu dhundako?
wutomi wako wu di ha phangoni?
Xalela VHIDHIYO, mi gwita mi bhula ngu txiwotiso atxi txi londiselako.
Themba ya kuwuswa ka vafi yi thavelete ni kutsanisa vaveleki va Phelicity ngu nzila yihi?
NGAKO VATHU VA TXI KHONA: “Ina matimu ya kuwuswa ka vafi nga ditshuri?”
U nga khawe txani?
Ngu yihi ndimana ayi u nga yi thumisako kukombisa ti to kuwuswa ka vafi ku na vaho ngu ditshuri?
ATI HI NGA TI WONA
Bhiblia yi thembisa ti to tibhiliyoni ta vathu ava va nga fa va na wuswa. Jehovha a lava ti to ve tshumela ve hanya, se a ningile Jesu mtamo wo wusa vafi.
Ngu tihi ti u nga ti gonda
Jehovha ni Jesu va na maha txani ngu va va nga fa?
Tibhiliyoni ta vathu ava va no wuswa va na hanya nzumani mwendo hamafuni? Ngu kutxani u txi womba toneto?
Ina wa tsaniseka ti to vathu ava va nga fa u va dhundako va na tshumela ve hanya? Ngu kutxani u txi womba toneto?
XOTA TIMWANI
Wona nzila yo wonisana ni kupanda ko felwa.
“Nzila yo wonisana ni kupanda ko felwa” (Khenjemuka! No. 3 2018)
Ina matshina a milayo ya Bhiblia ma nga vhuna awu a pandisekako ngu felwa ngu wu a mdhundako?
U nga m’vhuna ngu nzila yihi mwanana awu a pandisekako ngu kufelwa ngu wu a mdhundako?
Ina vathu va na wuselwa ku ya hanya nzumani? Mba mani ava va no mbi wuswa?