GONDO 6

Kutxhamusela kwati m’bhalo

Johani 10:33-36

ATI HI NO TI GONDA: U nga lere m’bhalo u pinda u ya ka wumwani u si txhamuseli. Maha ti to vaengiseli vako ve pfisisa kuyelana ku kuho ka m’bhalo wu u nga lera ni ti u ti txhamuselako.

U NGA MAHISA KUTXANI:

Junyatisa mapswi ya ma nga ñola msungo wa mhaka. Msana ko lera m’bhalo, junyatisa mapswi aya ma nga ñola msungo wa mhaka. U nga maha toneto ngu kuwuyeletela mapswi oneyo mwendo kumaha txiwotiso txi txi no maha ti to vaengiseli ve pfisisa mapswi oneyo.

I di ti to u lava kuthumisa mapswi o hambana ti to u junyatisa mhaka, tsaniseka ti to vaengiseli vako va pfisisa kuyelana aku ku kuho ka mapswi a mu ka Bhiblia ni msungo wa mhaka.
Junyatisa msungo wa mhaka. Ngako u di lerile m’bhalo, veka ha kubasani txikongomelo txo lera m’bhalo wonewo ni kutxhamusela ti to mapswi oneyo ma yelanisa kutxani ni msungo wa mhaka.

Mbimo yi u txhamuselako m’bhalo, leka Bhiblia yako yi di tulekile. Eto ti na vhuna vaengiseli kuyelanisa ati u txhamuselako ni ti u ku ngadi kugonda ka m’bhalo.
Ningela txhamuselo yo hehuka. U nga tateli titxhamuselo ka mhaka yi u bhulako ngu yona. Wekelela ngutu ka ti vaengiseli se va ti zivako ngu mhaka yoneyo, u gwita u wona ti to ngu yahi madungula aya ma lavekako ti to u kota kutxhamusela kwati msungo wa mhaka.