Mareferensiya a txibhukwana txa mitshangano ya Mahanyelo a Wukristu
© 2025 Watch Tower Bible and Tract Society of Pennsylvania
7-13 KA JULHO
TITHOMBA TA MU KA DIPSWI DA TXIZIMU MAVINGU 21
Matshina a milayo a ya ma nga kuvhunako kasiku u va ni wukati wo tsakisa
w03 15/10 4 ¶5
U nga si mahisa kutxani sisungo sa wutxhari?
Sisungo so si maha ngu magwava si nga kubeta txibeheni. Mavingu 21:5 a womba tiya: “Mapimo ya wule a mahako ta tinene ma humelelisa, aniko a votshe vale vo kuluvetela, mbusiwana dwe.” Ngu txikombiso, majovhem ya ma namorarako ma fanete ku tiha mbimo yo me zivana kwati ma si se maha txisungo txo ma na txhadha mwendo nem. Ngaku va txo mbi maha toneto, va nga humelelwa ngu ti ti nga wombwa ngu mmahi wa mafilmi William Congreve, ene a ti khene: “Awu a tutumelako kutxhadha a na ti laya kudingana mbimo yo lapha.”
g 7/08 7 ¶2
Nzila yo va ni wukati wo tsakisa
Tiveke hahatshi. “[Mi] nga maheni to maha ngu kukanetana hambi kutikulisa, aniko thumani ngu kutiveka hahatshi, mi si alakanyi ti to ma pinda vamwani ngu wunene.” (Vafilipiya 2:3) Sikarato so tala hamwayani si humelela ngu kona ha ko tiguleta, hahanze ko lava tinzila to lulamisa sikarato ngu nzila ya yinene, vatekani va nga khata kuningana mnandu ve xungametana. Ka mbimo yoneyo, ku tiveka hahatshi ku nga va vhuna ku ve vayilela moya wo lava razawu.
w06 15/9 28 ¶13
“Tsaka ngu msikati wa wuphya wako”
Se vatekani va nga maha txani ngaku mwaya wawe wu txi dekadeka ngu mhaka ya nzila yi va ñolanako ngu yona? Ti nga lava mizamo ya hombe kasiku ve lulamisa txikarato txonetxo. Phela ti nga maha kwa mbi bhulisana ngu nzila ya wunene i di tona ti vangako txikarato. (Mavingu 12:18) Nga ha hi nga ti wona ngu kona ka gondo yi yi nga pinda, eto ti nga wusa txivhunye hamwayani. Dibhuku da Mavingu di womba tiya: “I txhuko kuzumba ka mafu a txiwula, kupinda wamsikati wo karata, wa mazunga.” (Mavingu 21:19) Ngaku u di wamsikati wu u nga tekwa, se wukati wako wu di ka txiemo txiya, ti wotise tiya: ‘Ina mahanyelo angu ma maha ti to mwamna wangu e zumbela kule ni nani?’ Bhiblia yi gela tiya vavamna: “Anu vavamna, randani vasikati vanu, mi si zumbi ngu ku va xupha.” (Vakolosa 3:19) I di ti to u wamwamna ti wotise tiya: ‘Ina na karata ha ko msikati wangu a tipfa kwati a di ni mmwani m’thu kupinda ani?’ Ditshuri ti to kha hi nga ni txivangelo txo tiemelela ko maha wugango. Kasiku eto ti si maheki, nda tinene ku vatekani ve xongolela ve lulamisa txikarato txawe.
Tithomba ta moya
w05 15/1 17 ¶9
Wuprofeti wu wu nga ti wombilwe mayelano ni Mfumo wa Txizimu wa hetiseka
Jesu hi nga ngadi ene wule a nga gadha tximbongolana, kambe i Mkoma wa mtamu ngutu. Ene a txhamuselwa kota wu a nga gadha dikavhalu, dikavhalu donedo amu ka Bhiblia di fanekiselako yimbi. (Mavingu 21:31) Dibhuku da Mtuletelo 6:2 di womba tiya: “Se konako ni to wona dihantxhi do basa,” “mgadhi wa dona a di ni wulaho. Va mu ningile m’bhoti, se e huma, nga ndena, yi yi yako kuxulani.” I si ngeto dwe, m’bhali wa masalmo Dhavidha a bhate tiya mayelano ni Jesu: “Mkoma a na rumela ngu Siyoni ndonga yako ya mfumo; a txi khene: ‘Fuma txitimwi ka valala vako.’”—Masalmo 110:2.
14-20 KA JULHO
TITHOMBA TA MU KA DIPSWI DA TXIZIMU MAVINGU 22
Matshina a milayo a Bhiblia a ya ma nga kuvhunako kuwunja vanana
Ina vanana vako va na thumela Jehovha?
Ngako mi di txhadhile mi txi lava kuva ni vanana ti wotiseni tiya: ‘Ina hi vathu vo tiveka hahatshi, va moya, va va nga wunjako vanana nga ti Jehovha a ti lavisako tona?’ (Mas. 127:3, 4) Ngako se u di m’veleki ti wotise tiya: ‘Ina na gondisa vanana vangu ku ve dhunda kuthuma?’ (Ekl. 3:12, 13) ‘Ina na maha totshe ati ni nga ti kotako ti to ni vhikela vanana vangu ko kuzetelwa kumaha to biha ngu mafu awa a Sathani?’ (Mav. 22:3) Kha ti na ku koteka kuvhikela vanana ka sotshe sikarato si va nga mananako naso. Kambe ngu lirando kudotho-kudotho u nga va lulamisela ti to ve wonisana ni sikarato sa wutomi ngu ku va vhuna ve engisa sialakanyiso sa mu ka Bhiblia. (Lera Mavingu 2:1-6.) Ngu txikombiso, ngako dixaka danu di txi leka ditshuri, vhuna vanana vako ve wona ti to ngu kutxani i di ta lisima kusimama va di thembekile ka Jehovha. (Mas. 31:23) Ngako mi txi felwa ngu dixaka, gondisa vanana vako ku ve thumisa Bhiblia ti to ve wonisana ni txikarato txo felwa na va si gumelwi ngu themba.—2 Vak. 1:3, 4; 2 Tim. 3:16.
Vaveleki gondisani vanana vanu kuranda Jehovha
U nga sweliseli kugondisa vanana vako. U txi kuluveta u khata kugondisa vanana vako, ndinene ngutu. (Mav. 22:6) Alakanya ngu Timoti awu mbimo yi a nga kula a nga ti tsimbila ni mpostoli Paulo. Mame wakwe Eunise ni kokwani wakwe Loyidhe va mu gondisile “kukhukhela ha wananani” wakwe.—2 Tim. 1:5; 3:15.
Jean-Claude ni Peace, ni vona va Costa do Marfim, va sikoti kugondisa vanana vawe va 6 kuranda Jehovha ni ku mthumela. Va vhunwi ngu txani? Va etetile txikombiso txa Eunise ni Loyidhe. Va womba tiya: “Hi gondisile Dipswi da Txizimu ka vanana vathu kukhukhela ha wananani, hi khata neti va velekwako.”—Dhewut. 6:6, 7.
Ti womba txani “kugondisa” Dipswi da Jehovha ka vanana vako? Ka Dhewuteronome dipswi da Txihebheru adi di ku “kugondisa” di womba “kugondisa ni kujunyatisa ngu kuzumbela kuwuyeletela.” Ti to ve maha toneto, vaveleki ti lava ve heta mbimo va di ni vanana vawe. Yimwani mbimo ti nga woneka ti txi godholisa kuwuyeletela u txi gondisa vanana. Kambe, vaveleki va fanete ve ti karatela kuwona toneto i di mkhanjo wo vanana vawe ve pfisisa Dipswi da Txizimu ni kuthumisa ati va ti gondako.
w06 1/4 9 ¶4
Vaveleki, vekelani txikombiso txa txinene vanana vanu
Ngu mtolovelo vanana va maha timhaka ngu nzila ya wu wanana, vamwani va ni tikanu ni ku vamwani va timaha sijwalume. (Genesisi 8:21) Se ngu tihi ti vaveleki va nga ti mahako? Bhiblia yi womba tiya: “Wuphukuphuku wu maneka mbiluni ka mfana, kambe ndonga yo tsayisa yi na wu tutumisa.” (Mavingu 22:15) Vamwani va nga pimisa ti to kumaha toneto ngu xanisa mwanana ni ku nda txikale. Hambiku Bhiblia yi wombako to ndinene kutsayisa vanana, kambe yona kha yi seketeli mazunga mwendo kuxaniswa ka vanana. Hambiku kutsayisa mwanana mbimo yimwani ti nga patako ku mkwapa, kambe hi nga maha toneto ngu nzila ya lirando nguku hi kombisa ti to ha khatala ngu ngene.—Vahebheru 12:7-11.
Tithomba ta moya
Tsaka ngu ti u ti kotako kumahela Jehovha
Ngako hi txi thuma ngu yotshe mbilu yathu ka txiavelo tximwani ni tximwani txi hi ningwako ka sengeletano ya Jehovha hi na mana ngutu litsako. “Ti ningetele” ka mthumo wo txhumayela u maha ti u nga ti kotako ka mithumo yimwani ya dibanza. (Mith. 18:5; Vaheb. 10:24, 25) Tsula mitshanganoni u di lulamisete u tshumela u ya ni ningela tixamulo ta tinene. Maha kwati sienge si u ningwako ka mitshangano ya hagari ka divhiki. Ngako madhota ma txi ku kombela ku u maha mthumo wo kari dibanzani maha ngu txikuluveta ni ku thembeka. U nga thuki u pimisa ti to kha ti vhuni txilo kumaha mthumo wu u ningwako wona dibanzani. Londola mkhanjo wumwani ni wumwani kasi ku tshukwatisa wusikoti wako. (Mav. 22:29) Ngako u txi tiningetela u kuluveta kumaha mthumo u na kula ngu didhawa da moya, ni ku litsako lako li na engeteleka. (Vag. 6:4) Phela ti na ku hehukela ku u mana litsako nga ku vamwani va txi amukela malungelo aya u nga txi navela kuva nawo.—Var. 12:15; Vag. 5:26.
21-27 KA JULHO
TITHOMBA TA MU KA DIPSWI DA TXIZIMU MAVINGU 23
Sialakanyiso sa wutxhari a si hi nga si thumisako ka mhaka ya wusuke
w04 1/12 19 ¶5-6
Dinganisela ka mhaka ya wusuke
Se ngaku m’thu a txo sela wusuke kambe a si hoki ha ko e tikomba to a levile? Vamwani kha va ti kombi ti to va levile hambi i di ti to va peka mabhojela o talanyana. Kambe awu a pimisako to kusela ngu nzila yoneyo kha ta biha, o ti drabhara apune mwendo ku ti kanganyisa. (Jeremiya 17:9) Kudotho-kudotho, va nga khata kumaha siviliselo sa wusuke mwendo “tikhumbi ta kusela ko pindisa.” (Titosi 2:3) Caroline Knapp a txi womba-womba ngu ti ti mahako m’thu eza e maha txiviliselo txa wusuke, a khene: “Ti maheka kudotho-kudotho na u si ti tumbuli.” Kusela ngutu wusuke i mlawu wu wu dayako!
Wona txialakanyiso txi Jesu a nga hi ninga, a ti khene: “Kambe ti woneleni ti to timbilu tanu ti si talelwi ngu kudya ni kusela ngutu, ni kuvilela ngu sa wutomi wuwa ti to ditshiku dile di si ta mi mana mi sa di rinzela nga mlawu. Nguko di na wela votshe avale va hanyako hamafuni.” (Luka 21:34, 35) Hambi i di ti to m’thu kha seli ha koza e leva, wusuke wu nga mmaha ti to e va ni bhabhalaza, wukara ni wukohe ngu didhawa da nyama ni da moya. Se ku na humelela txani ngu m’thu eneyo ngaku ku txi hoka ditshiku da Jehovha?
it-1656
Wudevi
Ati Bhiblia yi wombako to ti bihile. Bhiblia ya tsimba kusela ngutu wusuke ni kuleva. M’bhali mmwani wa mavingu a wombile tiya: “I mani a ku ni dikhombo kani? I mani a ku xomuloni kani? I mani a ku ni mazunga kani? I mani a ti tsetsako kani? I mani a ku ni silonda hahanze ka mnandu kani? I mani wa maso o bhilivila kani? Ngu vale va zumbako kuselani ka vhinya, vale va tsimbilako ve lava wusuke wo patelwa. U nga yi wone walo vhinya, kule yi wonekisako kubhilivila, mbimo yile yi pupumako mu ka dijingo yi thekelela kha kwati. Ngu magwito ka kona yi na luma kufana ni mnyoka, yi gwaya kufana ni mamba. Maso ako ma na wonetela vavasikati vavane, se mbilu yako yi na womba-womba wubihi; kha mbi ti ñola, ni vhinya, ni wusuke si thavisa mapimo; Nguko asi si humako ngu mkanani si khukhela mbiluni, eso ngu sona si nyamisako m’thu. Ngu txikombiso, kudaya, wugango, wubhemba, kupa, kulumbeta vamwani ni kuruketela si huma ngu mbiluni.”—Mav 23:29-33; Hos 4:11; Mat 15:18, 19.
M’bhali wuleya wa mavingu a tshumete e womba tiya ngu ti ti humelelako ngu didevi: “U na nga m’thu wo otela hagari ka linene, [u na pfa zululwani kufana m’thu wu a bhwabhwamelako mapimo ako me nzulukela], hambi ku nga wule a nga otela tshokani ka phande [kufana ni dibhoti di wekelawekelako di txi pekwa ngu mavimbi, didevi di nga dhedherekela di va haphangoni, di wusa mazunga ni timwani]. Se u na khawe: ‘Va ni balisete, aniko kha na kupfa kupanda; va ni pekile, kambe ni ya tipfa [ku womba didevi, di txi womba-womba dokha, dona di ya pfa txilo ka totshe ti ti nga txi maheka]. Ni na wuka yihi mbimo kani? Ni na tsula ni ya yi lava kambe [dona da otela kala yi guma bhabhalaza, hambiketo dona se txibotxhwa txa wusuke ni ku di emela mkhanju wumwani kasiku di ya sela].’” Nguko ene a na wela wusiwanani; kambe wukohe wu na ambeka wusakato.—Mav 23:20, 21, 34, 35.
Tithomba ta moya
w04 1/11 31 ¶2
Tixamulo ta siwotiso sa vagondi
Ngu txikombiso, kuena ngutu ti nga tsimbitisana ni kudya ngutu, kambe hi nga mbimo yotshe ti wombako toneto. Ti nga maha m’thu e ena ngutu ngu mhaka ya malwati, vamwani ngu tekelela maxaka awe. Ditshuri ti to kuena ngutu tiya ngu mmidi wa m’thu, kambe kudya ngutu ngu ti sawulela. Kuena ngutu “ti nga vangwa ngu ku sengeletelana ka difura,” kambe kudya ngutu ti mahwa ngu “makolo.” Kudya ngutu kha tiyi ngu pezu ya m’thu kambe tiya ngu ti a wu wonisako tona mndiwo. M’thu a ngava ni pezu yo toloveleka mwendo e va wo songa, kambe a txi mita yi si txhayi. Kambe pezu yi yi wombwako to njo toloveleka yi nga hambanelana ngu kuya ngu makhalo.
28 KA JULHO-3 KA AGOSTO
TITHOMBA TA MU KA DIPSWI DA TXIZIMU MAVINGU 24
U nga maha txani kasiku u wonisana ni sikarato u di tsani?
it-2610 ¶8
Kuxaniswa
Makristu ma yi tsakela ngutu hakelo yi va nga vekelwa yona ngu mhaka ya kutimisela kwawe. A txi womba-womba ngu hakelo yoneyo Jesu a ti khene: “Ava va lwelako to lulama va tsaka, nguko Mfumo wa nzumani mbwawe.” (Mat 5:10) Kuziva kwati themba ya kuwuswa ka vafi ni kuziva kwati Jehovha awu i ku Txisima txa themba yoneyo ta ma tsanisa. Ta ma ninga mtamu wo simama me thembeka ka Jehovha hambi ma txi wonisana ni sikarato sa lifo ni kuxaniswa. Kota wuyelo ya likholo lawe, vona va khulutwe ka kuthava lifo. (Vaheb 2:14, 15) Mkristu awu a ku ni mapimiselo a manene ma nga m’vhuna ku e simama a di thembekile ngaku a txi wonisana ni kuxaniswa. “Hagari kwanu, kulaveka mi zumba mi di ni mapimo a Kristu Jesu . . . A txi ti veka hahatshi ene apune, e ti maha muengisi wa mlayo kala kufa ngu lifo la txihambano mwendo [phande ya xanisa, Tradução do Novo Mundo.]” (Vaf 2:5-8) “Awu a nga leka litsako li a nga velekwa ka lona, a txi langa sixaniso sa kurwala txihambano, asi khatali ngu kurukwa.”—Vaheb 12:2; wona ni 2Vak 12:10; 2Vat 1:4; 1Ped 2:21-23.
w09 15/12 18 ¶12-13
Simama u di tsakile ka timbimo to karata
Mavingu 24:10 a womba tiya: “U txi ti wona u txi relela ngu ditshiku da xomulo, tikomba ku khwa tsana.” Divingu dimwani di womba tiya: “Ngu kupanda ka mbilu, wa funywa muhefemulo.” (Mav. 15:13) Makristu mamwani ma jujeka msungo ha ko me divala ni ku ti mahela gondo yawe ya Bhiblia ni kualakanyisisa ngu ti ma ti gondako. Mikombelo yawe yi nga fana ni ndando ya dikhele ni ku mbimo yimwani va nga tihambanisa ni vanathu. Ngu ditshuri, kuzumba hi di godhote ti ngava ni phango ya hombe ngutu.—Mav. 18:1, 14.
Phela kuva ni mawonelo a manene ti nga hi vhuna kuveka mapimo ka timhaka ta lisima ati ti nga hi tiselako litsako ni kueneliseka ka wutomi wathu. Dhavhidha a bhate tiya: “Ni tsaka ngutu ngu kumaha kuranda kwako, Txizimu txangu.” (Mas. 40:8) Kha ha fanela kuema ni programa yathu ya moya ngaku txa wutomi txi si hi tsimbileli. M’rende wo daya kuzumba hi di karatekile, ngu tiningetela ka timhaka ta moya ati ti no hi tisela litsako. Jehovha a hi gela ti to kasiku hi mana litsako ti lava hi gonda ni kumaha wuxolisisi wa Dipswi dakwe. (Mas. 1:1, 2; Jak. 1:25) Bhiblia ni mitshangano ya Wukristu sa hi ninga ‘mapswi a manene’ a ya ma nga hi ningako mtamo ni kutsakisa mbilu yathu.—Mav. 12:25; 16:24.
Tixamulo ta siwotiso sa vagondi
Mavingu 24:16 yi womba tiya: “Nguko awule wo lulama hambi a txi wa mtxhanu ni kumbidi, ngu magwito a na wuka.” Ina ndimana yiya yi womba-womba ngu m’thu awu a mahako sionho ngu kuphinda-phinda e gwita e divalelwa ngu Txizimu?
Ahim-him, ndimana yiya kha yi wombi eto. Yona yi womba-womba ngu m’thu wu a mananako ni sikarato ngu kuphinda-phinda, kambe e sikota kuwuka, i ku ti to wa timisela.
Mavingu 24:16 kha womba-wombi ngu m’thu wu a “welako” txionhoni ngu makhambi o tala, kambe a womba-womba ngu m’thu wu a mananako ni sikarato ngu kuphinda-phinda. Ka mafu yawa a Sathani, vathu vo lulama va nga manana ni sikarato sa malwati ni simwani. Vona va themba ti to Jehovha a na va vhuna ve xula sikarato soneso ni kuhumelela. Malanda a Txizimu ma manana ni sikarato so tala kambe ma humelela. Ngu kutxani? Nguko Bhiblia yi thembisa tiya: “MKOMA a hafuhi ka vale va m’dhanako; avale va m’dhanako ngu ditshuri.”—Mas. 41:1-3; 145:14-19.
Tithomba ta moya
w09 15/10 12
Tixamulo ta siwotiso sa vagondi
Ka timbimo ta Bhiblia ngaku wamwamna a txi lava kutxhadha “mwendo kuva ni mwaya,” a di fanete ku ti wotisa tiya: ‘Ina na sikota kukhatalela silaveko sa msikati wangu ni sa vanana vangu ngaku ni txo thuka ni veleka?’ Asi se va ni mwaya a ti fanete kuva ni mthumo wo ti hanyisa mwendo thembwe yi a nga ti dima. Wuhunduluxeli wumwani wu txhamusela vhersikulo yiya ngu nzila yi: “Tshurisela mithumo yako hahanze, u yi hetisela thembweni, sekoko aka nyumba yako.” Ina mapswi yawa ma nga txi thuma ni nyamsi?
Ina. Wamwamna wu a lavako kutxhadha a fanete kutilulamisela i di ngadi mbimo. Ngu toneto, wamwamna kha fanela kuthuma ngutu kasi kukhatalela mwaya wakwe ngu didhawa da nyama dwe, kambe ni da moya. Bhiblia yi womba ti to wamwamna wu a si khataleliko mwaya wakwe ngu didhawa da nyama, da moya ni da matipfelo a bihile ngutu kupinda dihedheni! (1 Tim. 5:8) Ngu toneto, ngaku u txi ti lulamisela kutxhadha, u fanete ku ti wotisa tiya: ‘Ina ni tiemisete kasi ku ta khatalela mwaya wangu? Ina ni tiemisete ku ta khatalela mwaya wangu ngu didhawa da moya? Ina ni na sikota kutsimbitisa gondo ya mwaya divhiki ni divhiki?’ Phela Bhiblia yi teka mhaka yi ya i di ya lisima ngutu.—Dhewut. 6:6-8; Vaef. 6:4.
Ngu toneto dijovhem adi di lavako kutxhadha di fanete kupimisa kwati ngu ditshina da mlayo di di ku ka Mavingu 24:27. Ngu ha kufanako, dihorana ni dona di fanete ku ti wotisa ti to ina ni lungekile kurwala wutixamuleli wo va mame wa mwaya. Majovhem ya ma ku ngadi kutekana ma fanete kumaha siwotiso si si fanako ngaku va txi pimisa ngu kuva ni vanana. (Luka 14:28) Kuengisa sileletelo siya si nga vhuna vathu va Txizimu ti to ve vayilela sikarato ni kuva ni mwaya wo tsakisa.
4-10 KA AGOSTO
TITHOMBA TA MU KA DIPSWI DA TXIZIMU MAVINGU 25
Matshina a milayo a Bhiblia ya ma nga hi vhunako kuthumisa ningo yo womba-womba ngu nzila ya yinene
w15 15/12 19 ¶6-7
Thumisa ningo yako yo womba-womba ngu nzila ya yinene
Nda tinene kusawula mbimo ya yinene yo womba-womba. Mavingu 25:11 a womba tiya: “Mhaka yo wombwa ngu nzila ya yinene, yi fana ni mihando ya silivhela amu ka txiya txa nzalama.” Hi nga pimisa ngu maçã o tshurisela ngu ona o hambwa ngu oru, phela ma nga tshura ngutu ngaku u txo ma beta ka txiya txo ni txona txi tshurile. Ngu ha kufanako, kuwombawomba mapswi a manene ti fana ni maçã o tshura, kambe hi txo sawula mbimo ya yinene yo womba-womba ti ngava ta tinene ngutu. Ti nga fana ni maçã ma di mu ka txiya txo tshura. Se hi nga yi zivisa kutxani mbimo ya yinene yo womba-womba?
Ngaku hi si yi zivi kwati mbimo yo womba-womba ti nga maha vathu va si ti pfisisi a ti hi ti wombako. (Lera Mavingu 15:23.) Ngu txikombiso, ngu Março wa 2011 kuve ni kuzinginikela ka hombe ka mafu aku ku nga hoxota tinyumba to tala ta khe Japão. Kona mu ko pinda 15.000 wa vathu va fite. Vanathu va luzile maxaka awe ni vangana vawe. Hambiku va nga ti ka txiemo txile, vona va txi ti lava kuthavelela vamwani ava va nga ti ka txiemo txo fana ngu kuthumisa Bhiblia. Kambe kutala kwawe i ti Vabhudha ava va nga si zivi txilo ngu Bhiblia. Se ngu toneto, vanathu va mahile txisungo txo mbi womba-womba ngu kuwuswa ka vafi. Vona va va thavelete ngu kuva txhamusela to ngu kutxani timhaka to biha ti txi humelela hambi ka vathu va vanene.
w15 15/12 21 ¶15-16
Thumisa ningo yako yo womba-womba ngu nzila ya yinene
Nzila yi hi wombawombako ngu yona i ngava ya lisima ngutu kupinda ti hi ti wombako. Vathu va txi tidhunda ngutu kuengisela Jesu a txi womba-womba, nguku a txi womba “mapswi o tangalisa.” (Luka 4:22) Ngaku hi txi womba-womba ngu nzila ya yinene vathu va na hi engisela ve tshumela ve kholwa a ti hi ti wombako. (Mav. 25:15) Kasi ku hi womba-womba ngu nzila ya yinene, hi fanete ku xonipha vathu ni kupfisisa matipfelo awe. Ngu toneto Jesu a nga txi ti maha. Ngu txikombiso, mbimo yi Jesu a nga wona txitshungu txa hombe txi txi ta m’engisela, ene a to txi pfela wusiwana e “khata ku va gondisa timhaka to tala.” (Marku 6:34) Hambi mbimo yi va nga ti mruketela, kha ruketela nene.—1 Pedro 2:23.
Ha ma dhunda maxaka athu ni vangana vathu, kambe mbimo yimwani hi nga womba-womba navo ngu nzila yo i si nga ya yinene. Hi nga pimisa ti to kha ti sungi kuwombawomba navo ngu nzila ya yinene nguku hi zivanako. Kambe Jesu kha khali kuwombawomba ni vangana vakwe ngu kubhonga hambi mbimo yi va nga txi dhixkutira, Jesu a va kawukile ngu nzila ya lirando. Ene a thumisile txikombiso txa mwanana kasi kugondisa vagondiswa vakwe ku ve pimisa ngu nzila ya yinene. (Marku 9:33-37) Madhota ni ona ma nga etetela txikombiso txa Jesu ngu kuningela txialakanyiso ngu nzila ya wunene.”—Vag. 6:1.
w95 1/4 17 ¶8
Hi nga va tsanisisa kutxani vanathu ngu nzila ya yinene?
Mbimo yi hi yako hi thumela Txizimu hi nga tsanisana ni vanathu. Jesu a tsanisile vaengiseli vakwe. Ene a ti wu dhunda mthumo wo txhumayela ni ku a txi wu teka i di wa lisima. Ngu toneto, awu fananisile ni sakudya. (Johani 4:34; Varoma 11:13) Kuhiseka ngu nzila yiya ti nga maha vamwani ni vona ve hiseka. Ina nawe u nga kombisa kuhiseka kwako ka mthumo wo txhumayela? Vayilela ku tiguleta, zama kugondisa vamwani dibanzani a ti se u ti zivako. Mbimo yi u thumako ni vamwani ka mthumo wo txhumayela, va vhune ku ve pfa litsako mbimo yi va bhulelako vamwani ngu Jehovha Mvangi wathu.—Mavingu 25:25.
Tithomba ta moya
it-2399
Kuthutha
M’thu wu a ku ni likholo ni mtamo a tolovela kuva m’thu wo thutha. Ene wa dinganisela ni ku kha kuluveteli kuluza litsako lakwe hambi ka siemo so karata. M’thu wo thutha kha na txi henyisani, kha leki likholo lakwe, a ni themba ni ku kha kuluveti kugodhola. Bhiblia yi womba ti to: “M’thu wa kwa mbi xayisa moya wakwe, a fana ni didhoropa do khundumuselwa, do pwata diguma.” (Mav 25:28) M’thu wo mbi thutha ti nga hehuka ku e telwa ngu mapimo a walo aya ma nga mkuzetelako kumaha timhaka to biha.
11-17 KA AGOSTO
TITHOMBA TA MU KA DIPSWI DA TXIZIMU
MAVINGU 26
Tsimbilela kule ni “Txiphukuphuku”
it-2729 ¶6
Kuwa ka mati
Tinguva. Ka Ditiko da Txithembiso ku di ni tinguva timbidi, i ku mbimo yo hisa ni yo titila, mwendo mbimo yo wa ngutu mati ni mbimo ya txihala. (Fananisa ni Mas 32:4; Nda 2:11.) Ka ditiko dileya, kukhukhela hagari ka Abril kala hagari ka Outubro ku siwi ngutu mati. Ka mbimo yo elula ti txi kala ku me wa mati. Dibhuku da Mavingu 26:1 di kombisa ti to mati o wa ngu mbimo yo elula ma si nga ni txivhuno. (Fananisa ni 1Sam 12:17-19.) Kambe ngu nguva yo wa mati, mati ma siwi ngu masiku o fana. Kota ku nguva yiya yi nga txi kotxana ni mbimo yo titila, se kuwa ka mati ti txi maha vathu ve sokola ngutu ngu pheho. (Ezr 10:9, 13) Ngu toneto, ti txi lava ve va ni wukhalo wa wunene wo futumela.—Isa 4:6; 25:4; 32:2; Job 24:8.
w87 1/10 19 ¶12
Kukawuka kuveka mihando ya kurula
Vathu vamwani ta laveka ku ve tsayiswa ngu nzila yo panda nga ha di wombako ngu kona dibhuku da Mavingu 26:3 “Txisephu nja dihantxhi, matomu nja mbongola, se limhika nda msana wa siphukuphuku.” Mbimo yimwani Jehovha a lekile Vaisrayeli ve dyisetwa ngu sikarato si va nga ti mahela vapune: “Ngu kuva va di eyisile sileleto sa Txizimu ni kunyenya mithetho ya Nyatxitimwi. Txizimu txi va rwekile sikarato so nemela, ve humbwa ve wa, ku si maneki ni wammweyo wa ku va vhuna. Sekoko, va to dila ka Mkoma kupandisekani kwawe, se ene a to va xanguta kuxanisekani kwawe.” (Masalmo 107:11-13) Siphukuphuku simwani sa ti bangisa msungo mbimo yi si kawukwako: “M’thu wule a ku a txi kawukwa ko tala e ti bangisa msungo, a na phatulwa ngu txikuluveta, asi kalamuki.”—Mavingu 29:1.
it-2191 ¶4
Wulima, kulemala
Kuthumiswa ka Mavingu. Mkoma wo txhariha Solomoni a wombile tiya: “Awule a rumako txiphukuphuku kuheleketa dipswi, wa ti wila minenge, ni ku tiha dikhombo.” M’thu wu a rumako txiphukuphuku ti to txi mmahela mthumo wo kari o ti wusela mazunga. Mthumo wonewo kha wu na mbi humelela, a na ti dhanela phango apune.—Mav 26:6.
Tithomba ta moya
it-1846
Txiphukuphuku
Kuxamula txiphukuphuku ngu kuya ngu “wuphukuphuku wa txona” i ku ku etetela mawombawombelo a txona, ti nga hi maha hi fana natxo. Kasiku hi si fani ni txiphukuphuku, dibhuku da Mavingu di hi kuzeta tiya: “Txiphukuphuku u nga txi xamule madingano ni wuphukuphuku wa txona.” Ngu didhawa dimwani, dibhuku da Mavingu 26:4, 5, di tshumela di womba ti to kuxamula txiphukuphuku ngu kuya ngu “wuphukuphuku wa txona” ti nga vhuna, ngaku hi txi txi xamula ngu nzila yo txi komba wuphukuphuku wa txona ni ku txi komba ti to ati txi ti wombawombako nda wubhemba.
18-24 KA AGOSTO
TITHOMBA TA MU KA DIPSWI DA TXIZIMU MAVINGU 27
Ku va ni vangana va ditshuri ta vhuna ngutu
Jehovha wa ninga lisima ava vo tiveka hahatshi
M’thu wa kutiveka hahatshi wa tumela kukawukwa. Ngu txikombiso, alakanya u di mitshanganoni. Msana ka kubhulanyana ni vanathu, mmweyo wawe e kundinda didhawa e kugela ngu txihunja to u na ni titshenda ta mmdiwo ka makwasa. Ti ha kubasani ti to u na pfanyana tingana. Kambe u na tsaka aku a nga ta kugela. Phela u nga tshumela u txi khawe a swete ku ni gela. Ngu kufana, ti lava hi bonga mwanathu wu a manako txibindi txo ta hi kawuka. Mwanathu eneyo ti lava hi mu wona kota mngana hayi mlala.—Lera Mavingu 27:5, 6; Vag. 4:16.
it-2491 ¶3
Vhizinyu
Hambiketo, dibhuku da Mavingu di hi kuzeta ku hi themba vhizinyu wathu ni ku wutxhari kukombela txivhuno kwakwe ngaku hi txi humelelwa ngu sikarato. Dona di womba tiya: “U nga leke mngana wako, hambi mngana wa tate wako, kambe u nga wulele nyumbani ka mwananu ngu ditshiku da mazunga. I tshuku vhizinyu wu a ku hafuhi kupinda dixaka di di ku kule.” (Mav 27:10, Tradução do Novo Mundo) M’bhali wa Mavingu a womba ti to hi fanete kuninga lisima vhizinyu wathu ni ku hi fanete kuya kombela txivhuno kwakwe kupinda kukombela txivhuno ka dixaka adi di ku kule, nguku ti nga maha di sa tiemisela ku hi vhuna mwendo txiemo txakwe txi si mtumeleli kumaha toneto.
Majovhem—Sawulani ku va ni wutomi wo tsakisa
Gondo yi hi nga yi thavisako ka txisungo txo biha txa Jowasi ngu yi yo hi fanete kusawula vangana va va ku ni m’kuzetelo wa wunene ava va lavako kutsakisa Jehovha. Kha hi lavi kusawula vangana va i ku va tanga yimweyo ni nathu dwe. Khumbula to, Jowasi i ti m’dotho ngutu ka mngana wakwe Joyadha. Mbimo yi u lavako kusawula vangana, ti wotise tiya: ‘Ina va ni vhuna kutsanisa likholo langu ka Jehovha? Ina va ni kuzeta kuhanya ngu milayo ya Txizimu? Ina va bhula ngu Jehovha ni ditshuri di hi di gondako mu ka Dipswi dakwe? Va yi xonipha milayo ya Jehovha? Ina va ni txibindi txo ni kawuka, mwendo vo ni gela dwe ti ni nga tsakelako ku ti pfa?’ (Mav. 27:5, 6, 17) Ngu ditshuri, ngako vangana vako va si m’randi Jehovha, huma kwawe. Kambe ngako vangana vako va txi m’randa Jehovha, va namarele va na va vavanene kwako!—Mav. 13:20.
Tithomba ta moya
w06 15/9 19 ¶12
Timhaka ta hombe ta dibhuku da Mavingu
27:21. Kundunduzelwa ti nga kombisa to ha tiveka hahatshi mwendo ku ha ti guleta. Ha kombisa kutiveka hahatshi nguku yisa wudhumo wotshe ka Jehovha mbimo yi hi ndunduzelwako ni ku tiemisela kusimama hi mthumela. Ngaku hi si tiveki hahatshi, hi na tiwona hi di va lisima ngutu mbimo yi hi ndunduzelwako.
25-31 KA AGOSTO
TITHOMBA TA MU KA DIPSWI DA TXIZIMU MAVINGU 28
Kuhambana ka m’bihi ni m’thu wamnene
w93 15/5 26 ¶2
Ina u thumela Jehovha ngu kuthembeka?
“VO LULAMA va thembekile kufana ni txingonyamwana.” (Mavingu 28:1) Vona va ni likholo, va hanya ngu kuya ngu ti va ti gondako ka Dipswi da Txizimu ni ku va tiemisete kusimama ve thumela Jehovha hambi va txi wonisana ni kuxaniswa.
it-21139 ¶3
Kupfisisa
Ava va vayilelako mkongomiso wa Jehovha. M’bihi kha beti Jehovha ka sisungo sakwe ni makungu akwe. (Job 34:27) Ene a tumelela mbilu yakwe yi m’xenga ni ku kha nga ni wutxhari. (Mas 36:1-4) Hambiku a ti gelako to wa thumela Txizimu, ene a themba wutxhari wa vathu kupinda wa Txizimu. (Isa 29:13, 14) Ene a maha wubihi e gwita e tiemelela nguku womba to o ‘sakana.’ (Mav 10:23) Ni ku wa ti maha dihundwa, dibhemba ni m’bihi aha ko e pimisa ti to Txizimu kha txi wu woni wubihi wu a wu mahako, nga Jehovha o va dibhofu. (Mas 94:4-10; Isa 29:15, 16; Jer 10:21) Ene wa womba ngu mahanyelo akwe ti to: “Kha txi nga ho Txizimu.” (Mas 14:1-3) Ni ku ‘kha txi theli kota.’ Aku a si kongomiswiko ngu milayo ya Txizimu, ene kha tikoti kuwona timhaka ngu nzila ya yinene ni ku kha sikoti kumaha sisungo sa sinene.—Mav 28:5.
it-11211 ¶4
Wuthembeki
Kuthembeka kha ti koteki ngu mtamo wathu, kambe ngu likholo ni kuthemba mtamo wa Jehovha wo hulukisa. (Mas 25:21) Jehovha a thembisa ti to a na va “txitxhavangu” ni “txitsaniso” ka vale va thembekako kwakwe. (Mav 2:6-8; 10:29; Mas 41:12) Ku ti karata kwawe ko lava ku amukelwa ngu Jehovha, ka va tisela litsako ni kuva va vhuna ku ve simama va di thembekile. (Mas 26:1-3; Mav 11:5; 28:18) Hambiku Jobe a nga wona ti to ava vo lulama va xaniseka ngu mhaka ya vabihi ni ku va fa kumweko ni vabihi, Jehovha kha divali wuthembeki wa mlulami, wa tsanisekisa ti to hakelo ya vathu vonevo kha yi na mbi guma ni ku va na va ni wumangwana wo rula ni wo tsakisa. (Job 9:20-22; Mas 37:18, 19, 37; 84:11; Mav 28:10) Kufana ni Jobe, atxi txi mahako m’thu eva wa lisima ka Jehovha ngu thembeka i singa tithomba ti a ku nato. (Mav 19:1; 28:6) Vanana ava va ku ni vaveleki vo thembeka ka Jehovha va ni litsako ni nduma ya yinene. (Mav 20:7), ngu mhaka txikombiso txa va veleki vawe.
Tithomba ta moya
w01 1/12 11 ¶3
U nga sikota kuvayilela kulwala ngu didhawa da moya
Kutithemba ngutu. Vathu vo tala ava va ku ni malwati a mbilu va ti ti gela ti to va ni dihanyo da dinene va si se khata kulwala. Makhambi o tala, vona va si yi sibhejela va ya maha ma ezame va txi tigela to kha ti sungi kumaha toneto. Nguha kufanako, vamwani va pimisa ti to aku i ku kale i di Makristu, vona va tsani ngu didhawa da moya. Ti nga maha va si ti xolisisi ngu didhawa da moya, aha koza likholo lawe li hola. Nda tinene kukhumbula txialakanyiso txa mpostoli Paulo mayelano ni kutithemba ngutu atxi txi ku: “Ina, ngu toneto, awule a pimisako ti to a emekile, a na ti wonele kasiku a si wi.” Wutxhari kutumela ti to kha ha hetiseka, ngu toneto, ndinene ku mbimo yotshe hi ti maha wuxolisisi ngu didhawa da moya.—1 Vakorinto 10:12; Mavingu 28:14.