GONDO 13

Txhamusela lisima la ti u ti gondisako

Mavingu 3:21

ATI HI NO BHULA NGU TONA: Vhuna vaengiseli vako ve pfisisa nzila yi ati u gondisako ti va gwesako ngu yona, ni nzila yi va nga ti thumisako ngu yona ka wutomi wawe.

U NGA MAHISA KUTXANI:

Alakanya ngu vaengiseli vako. Alakanyisisa ngu ti to ngu kutxani ati u ti gondisako i di ta lisima ka vaengiseli vako, ka txienge txako sawula mhaka yo kari yi yi nga va vhunako.
U txi txhuka txienge txako, kombisa vaengiseli ati va felako kumaha. U txi nga di u txi khata, muengiseli a fanete e pfisisa ti to ‘atiya ti vhuna ani.’ Mbimo yi u txhamuselako timhaka ta lisima, kombisa nzila yi ti thumako ngu yona. U nga jika-jike, peka msungo wa mhaka.

Kombisa nzila yo thumisa matshina a milayo ya Bhiblia ngu lirando. Hahanze ko va konanisela, tsanisa lirando ni likholo lawe, themba ti to timbilu tawe ti na va kuzeta kumaha ta tinene.