Ang Edukasyon sa Imong Anak ug Ikaw

“Ang mga ideya sa imong anak bahin sa edukasyon ug sa kahulogan niini magagikan kanimo. Kinahanglang buhi ka nga panig-ingnan sa imong ginalaoman sa imong kabataan nga pasidunggan ug sundogon.”—The National Commission on Excellence in Education.

UNSAY kahimtang sa mga tunghaan sa inyong dapit? Tagsaon man o igoigo lang, hayan igugol sa imong bata ang dakong panahon didto. Unsang matanga sa mga impluwensiya nga siya maladlad? Ang paagi lamang sa pagkasayod mao ang paghimog regular nga pagduaw sa tunghaan sa imong anak ug sa pagsinati sa mga magtutudlo. Himoang bukas usab ang komunikasyon sa imong mga anak. Magmaigmat sa mga problema o mga kabalaka nga ilang mabatonan may kalabotan sa tunghaan.

Tinuod, daghang ginikanan mismo wala makaeskuyla. Apan sama sa gisulti sa usa ka prinsipal sa tunghaang elementarya sa New York City sa Pagmata!: “Bisan ang dili makamaong mobasa ug mosulat nga mga ginikanan mahimong positibo sa iyang paagi sa edukasyon sa iyang anak. Iyang madasig ang iyang anak sa pagtungha. Iyang matan-aw nga ginahimo sa bata ang iyang homwork ug nga ang bata adunay maayong palibot sa pagtuon. Iyang mapasilsil kon unsay gitudlo sa tunghaan pinaagi sa pagpangutana, ‘Unsay imong nakat-onan sa eskuylahan karon?’”

Hinumdomi, usab, nga ang labing importanteng edukasyon nga mahatag sa ginikanan mao “ang pagmatuto ug pahamatngon kang Jehova.” (Efeso 6:4) Ang bata nga tinudloan sa ingon matinguhaon sa pagkab-ot ug edukasyonal nga mga katakos. (Itandi sa Deuteronomio 17:18, 19; 1 Timoteo 4:13 ug 5:8.) Makabaton usab ang bata ug timbang nga panghunahuna sa kalab-oton ug maglikay sa hingaping kompetisyon, busa mas makasagubang sa mga kalisod ug mga kapit-osan sa tunghaan.a—Ecclesiastes 4:4; Galacia 5:26.

Ang nangapakyas nga mga tunghaan maoy bahin lamang sa nagkadaghang ebidensiya nga dili epektibo ang tawhanong pagmando. (Jeremias 10:23) Ang mga hitabo sa kalibotan nagpamatuod nga sa dili madugay mopuli ang Diyos sa pagpalakaw sa yuta. (Lucas 21:10-28) Wala na unyay kal-ang sa literasiya o schulangst ilalom sa iyang pagmando. Kay ang tanang pomuluyo sa yuta mahimong “mga tinudloan ni Jehova.” (Isaias 54:13) Ug “ang yuta mapuno sa kahibalo ni Jehova sama sa mga tubig nga nagatabon sa dagat.”—Isaias 11:9.

Apan, sa karon, pagpakitag kaikag sa edukasyon sa imong anak. Dayon bisan pag dili makapasar ang tunghaan sa pasulit, mogula ang imong anak nga malamposon.

[Mga footnote]