Ang Hunahuna sa Bibliya
Paghatag sa Ikapulo—Kinahanglanon Ba?
ANG sekretaryo sa Anglican nga diosisis sa South Africa nabalaka. Ang iyang iglesya naglisod sa salapi nga lisod na ang pagsuweldo sa mga ministro. Iyang solusyon: Ipasiugda ang paghatag sa ikapulo ngadto sa mga membro.
Apan unsa ba ang ikapulo? Ang pipila nagaingong kini maoy paghatag alang sa relihiyosong mga katuyoan “sa ika-10 sa tanang imong madawat.” Bisan tuod ang paagi sa pagkalkular sa ikapulo nagkalainlain sa usa ka relihiyon ngadto sa lain, gibati sa daghang ministro nga kinahanglang ipasiugda ang paghatag sa ikapulo. “Anugon kaayong wala nato ipasiugdang labaw pa ang paghatag sa ikapulo,” matud sa usa ka Katolikong pari sa Aprika. Ang Worldwide Church of God, diha sa usa ka artikulo sa magasin bahin sa kon unsaon paglikay sa kakabos pinaagi sa pagpakig-abyan sa Diyos, miingon: “Sa pagsugod sa imong relasyon sa Diyos, kinahanglang sundon nimo una ang kasugoan sa Diyos bahin sa ikapulo.” Ang artikulo midugang nga kadtong dili mohatag sa ikapulo “nagapangawat sa Diyos.”
Apan gibaod ba sa Diyos nga ikaw mohatag ug ikapulo? Tingali matingala ka sa pagkasayod kon unsay ginasulti sa Bibliya bahin niini.
Paghatag sa Ikapulo ug ang Kasugoan ni Moises
Ang paghatag sa ikapulo maoy bahin sa hugpong sa mga kasugoang gihatag sa Diyos pinaagi ni Moises ngadto sa karaang nasod sa Israel. Ang napulog-duha ka banay sa Israel gibaoran sa pagsuportar sa ika-13ng banay, ang saserdotehanong mga Levihanon, si kinsa walay panulondong yuta. Tungod niadto ang mga Levihanon nakahatag ug bug-os nga pagtagad sa espirituwal nga mga panginahanglan sa nasod. (Numeros 18:21-24) Tungod kay mga tawo man sa uma, ang mga Israelinhon wala sugoa nga ang ikapulo bayran sa salapi. Hinunoa, kadto magagikan sa abot sa yuta ug sa pagsanay sa mga hayop. Kon kuhaan sa ikapulo ang abot ug buot hinuon sa Israelinhon nga mohatag ug salapi, nan kinahanglang siya mobayad ug dugang 20 porsiento sa bili sa abot.—Levitico 27:30-33.
Ang sugo sa Diyos bahin sa ikapulo maoy seryosong butang. Kon nasayop ang usa ka Israelinhon sa paggamit alang sa iyang kaugalingon sa bahin niadtong iyang ihatag nga ikapulo, nan kinahanglang siya mohimog mga pagtul-id. Sa unsang paagi? Pinaagi sa paghatag ug ekstrang 20 porsiento ug paghalad sa hayop nga halad alang sa iyang sala. (Levitico 5:14-16) Bisan tuod dili tanang Israelinhon makaapil sa pagkasaserdote, ang tanan makaapil sa pagsuportar sa pag-alagad sa saserdote pinaagi sa ikapulo. Kadtong tanan naapil sa kasugoan sa Diyos bahin sa ikapulo. Busa, kadto haom sa mga kahimtang niadtong karaang katawhan. Apan haom ba kini sa mga kahimtang sa katawhan karong adlawa? Labing hinungdanon, gisugo ba ang mga Kristohanon sa paghatag sa ikapulo?
Kausaban sa Kasugoan
Sa pila ka tuig tapos sa pagkabanhaw ni Jesus, ang dili-sinirkunsidahang mga dili-Hudiyo nakabig sa Kristiyanidad. “Kinahanglang sila sirkunsidahan ug pabantayon sa kasugoan ni Moises,” mipatuo ang pila ka Hudiyong Kristohanon. (Buhat 15:5) Wala mouyon ang uban. Busa ang mga apostol ni Jesus ug ang ubang eksperyensiadong mga Kristohanon nagtigom sa Jerusalem sa paghisgot sa suliran. Buot nilang masabtan ang kabubut-on sa Diyos. Gisugo ba niya ang mga sumusunod ni Kristo sa pagbantay sa Kasugoan ni Moises, nga nag-apil sa paghatag sa ikapulo? Ang mga kasinatian gisugid nga nagpakita sa pagkausab sa mga pagpakiglabot sa Diyos sa mga dili-Hudiyo, ug kadto gipamatud-an sa matagnaong Pulong sa Diyos. (Buhat 15:6-21) Unsa ang desisyon?
Ang tigom nahidangat sa nagkahiusang hukom. Ang mga Kristohanon dili na pabug-atan sa Kasugoan ni Moises. Hinuon, may pila ka “kinahanglanong butang” nga pagabantayan. Ang paghatag sa ikapulo usa ba? Ang dinasig nga hukom mabasa: “Ang balaang espiritu ug kami mismo nagpalabi sa dili pagpabug-at pa kaninyo, gawas niining kinahanglanong mga butang, nga maglikay sa mga butang nahalad sa mga diyosdiyos ug sa dugo ug sa mga butang linuok ug sa pakighilawas.” (Buhat 15:25, 28, 29) Makaiikag, ang kasugoan sa Diyos bahin sa ikapulo wala mahitala taliwala sa “kinahanglanong mga butang” alang sa mga Kristohanon.
Sa ulahi, gisaysay ni apostol Pablo nga ang tugon sa Kasugoan sa Diyos uban sa Israel gipapas pinaagi sa pagkamatay ni Jesus. “Gipapas [sa Diyos] ang sinulat sa kamot nga kalagdaan,” matud niya, “ug Iyang gikuha kana sa dalan pinaagi sa paglansang niana sa kahoy sa pagsakit.” (Colosas 2:14) Kini wala magpasabot nga ang mga Kristohanon walay kasugoan. Hinunoa, may kausaban sa kasugoan nga karon nagalangkit sa “kasugoan ni Kristo.”—Galacia 6:2; Hebreohanon 7:12.
Si apostol Pablo nagkinabuhing nahiuyon niining nausab nga kasugoan. Bisan pag nagbudlay sa pagporma sa sunodsunod nga kongregasyon, siya wala gayod mangayog bayad sa dagway sa mga ikapulo. Hinunoa, siya andam sa pagsuportar sa iyang kaugalingong galastohan pinaagi sa pagtrabaho nga magbubuhat ug tolda sa dili-bug-os nga panahon. (Buhat 18:3, 4) Sa bug-os nga pagkamaminatud-on siya nakaingon: “Kining mga kamota nag-alagad sa akong mga panginahanglan ug sa akong mga kauban.”—Buhat 20:34.
Nan, unsa ang giya sa mga Kristohanon kon bahin sa paghatag? Pila ba ang angay nimong ihatag?
Ang Kristohanong Paagi sa Pagpanghatag
Si Jesu-Kristo mao ang labing mahinatagong tawo nga nakalakaw sa yuta. Ang iyang panig-ingnan nakadasig sa daghan nga magmahinatagon. “Panghatag kamo,” siya miingon, “ug kamo pagahatagan sa mga tawo. Igabubo sa inyong sabakan ang maayong takos, nga dinasok, tinantan ug pinaugdo. Kay sa takos nga inyong ginatakos, ilang ibalos kana sa pagtakos kaninyo.” (Lucas 6:38) May mga limitasyon ba niini? Wala. Ang mga Kristohanon gidasig sa paghatag nga madagayaon, nga mahimong labaw pa sa ikapulo kon sila makaabot niana.—Lucas 18:22; Buhat 20:35.
Sa laing bahin, ang Kristohanon basin sa kalit makaatubang sa kinahanglang galastohan, tingali tungod sa aksidente o sakit. Ang paghatag ug ikapulo sa iyang suweldo ilalom sa maong mga kahimtang basin makahikaw sa mga sakop sa iyang pamilya sa mga kinahanglanon sa kinabuhi. Kana maoy dili Kristohanon.—Mateo 15:5-9; 1 Timoteo 5:8.
Ang Kristohanong pagpanghatag maoy kinabubut-on. Kini magkonsiderar nga ang matag tawo dunay nagkalainlaing kahimtang sa kinabuhi. “Kon anaa una ang pagkaandam,” nagaingon ang Bibliya, “dalawaton kini sumala sa nabatonan sa usa ka tawo, dili sumala sa wala niya mabatoni.”—2 Corinto 8:12.
Nan, pila ba ang angay nimong ihatag? Kana sulirang hukman nimo sa imong kaugalingon. Ang giladmon sa apresasyon sa imong kasingkasing sa Diyos—dili ang nahukman daang pormula sa ikapulo—ang mohukom kon pilay imong ihatag. Sumala sa ginaawhag sa Bibliya: “Pasagding ang matag usa magahatag sumala sa gihukom sa iyang kasingkasing, nga dili uban ang pagbagulbol o pagpugos, kay ang Diyos nahigugma sa malipayong nagahatag.” (2 Corinto 9:7) Ang paghatag sa ikapulo maoy usa ka tagana sa Moisesnong tugon sa Kasugoan sa pagsuportar sa templo ug mga saserdote sa Israel. Alang sa mga Kristohanon karong adlawa, kini wala isugo ni kinahanglanon kini.