Giuyonan ba ni Kristo ang Pasko?

DIHA sa daghang bahin sa yuta, ang mga esena sa Belen komun sa panahon sa Pasko. Sa kasagaran kini adunay halos samag tawo kadak-ang mga rebulto sa batang si Jesus diha sa pasungan, uban kang Maria, Jose, mga magbalantay sa mga hayop, Mago, ug pipila ka baka. Giuyonan ba ni Kristo ang maong mga pasundayag sa Pasko?

Sa tinuod ang pagkatukma sa mga esena sa Belen mainit nga gilantugian, bisan sa Korte Suprema sa Tinipong Bansa. Sa miaging Disyembre, ang magasing Time mitaho: “Tungod sa desisyon sa Korte Suprema sa miaging tuig, ang mga esena sa Belen karong tuiga idayandayan usab sa publikong mga parke ug mga tinukod ug sa pipila ka munisipalidad nga mihunong na sa pagpasundayag kanila samtang gihusay pa ang isyu.”

Apan, sa tinuod, ang isyu kon legal ba ang mga esena sa Belen diha sa mga propidad sa kagamhanan gilantugian gihapon. “Ang desisyon sa Korte Suprema,” miingon ang Time, “napakyas sa pagtul-id sa maong butang.” Karong tuiga, sa patas nga 4 sa 4 nga desisyon kon legal ba ang mga esena sa Belen diha sa Scarsdale, New York, napakyas ang Korte Suprema sa paghatag ug tin-awng direktiba.

Nagapasiugda sa Kristiyanidad?

Ang mga magsusupak sa mga esena sa Belen, lakip sa American Civil Liberties Union, miingon nga ang mga pasundayag sa Pasko maoy pagpasiugdag relihiyon ug busa supak sa konstitusyon. Apan ang kolumnistang si Bill Hall, nagsulat sa Seattle Post-Intelligencer, mitutol nga wala magpasiugda ang Pasko ug Kristiyanidad:

“Diin ba makakuha sa binuang nga ideya ang American Civil Liberties nga usa ka Kristohanong piyesta ang Pasko? Kon mopasiyo ka sa bisan haing shopping center sa Amerika sa panahon sa Pasko mawala ang imong pagtuo niana.

“Ang Pasko wala gayoy kalabotan sa Kristiyanidad. Ang Pasko maoy usa ka paganong selebrasyon sa bahandi, kahakog ug pagpatuyang ug kaon.

“Apan, ang Kristiyanidad, kon itandi, maoy halos patay nga relihiyon pinasukad sa mga pagtulon-an sa usa ka Jesu-Kristo. Kadto maoy relihiyon nga nagpasiugda ug pagkamahinatagon, gugma, pailob ug pagkadili-mapintason. . . .

“Apan ang ACLU miambak nga walay basehanan sa mapatuyangong konklusyon—tingali tungod sa kaamgiran sa mga ngalan—nga ang Pasko ug ang Kristohanong mga iglesya karon sa aktuwal may kalangkitan sa tinuod, orihinal nga Kristiyanidad. . . .

“Ang ACLU nakahimo ug komung kasaypanan nga ang Pasko maoy usa ka Kristohanong selebrasyon nga gisaulog usab sa paganong mga Amerikano. Ang baliskad mao ang tinuod. Ang kadaghanan niadtong nagasaulog sa Pasko maoy mga tawong dili manimba. Usa kini ka paglipaylipayng pagano.”

Ang Pasko ba maoy “usa ka paglipaylipayng pagano”? Tinuod ba kana? Dili ba ang Pasko maoy adlawng natawhan ni Kristo?

Kang Kinsang Adlawng Natawhan

Dili, dili kana adlawng natawhan ni Kristo. “Ang adlawng natawhan ni Kristo dili matino gikan sa B[ag-ong] T[estamento], o, sa pagkatinuod, sa bisan unsang ubang tinubdan,” mibatbat ang Cyclopedia of Biblical, Theological, and Ecclesiastical Literature. Usa ka butang ang tino, si Kristo wala matawo sa Disyembre 25. Dihang natawo siya ang mga magbalantay sa mga hayop diha sa gawas sa gabii nga nag-atiman sa ilang mga panon, nga dili nila mahimo sa panahon sa matugnawng gabii sa Disyembre.—Lucas 2:6-8.

Dugang pa, ang ministro sa Lutheran si John C. McCollister misulat diha sa iyang bag-ong librong The Christian Book of Why: “Gituohan niadto sa tanang mga Kristohanon nga ang pagsaulog sa tanang adlawng natawhan (bisan sa adlawng natawhan sa Ginoo) maoy kostumbre sa mga pagano. Sa paningkamot sa pagbulag sa ilang kaugalingon gikan sa tanang paganong mga batasan, ang unang mga Kristohanon midumili sa paglain ug petsa sa pagtimaan sa pagkatawo ni Kristo.”

Nan, diin gikan ang pagsaulog sa Pasko sa Disyembre 25? Ang librong Celebrations—The Complete Book of American Holidays ni Robert J. Myers mitubag: “Sa wala pa isaulog ang Pasko, ang Disyembre 25 sa kalibotan sa Romano mao ang Natalis Solis Invicti, ang Adlawng Natawhan sa Dili Madaog nga Adlaw. Kining piyestaha, nga gihimo human sa winter solstice sa kalendaryong Juliano, maoy sa paghimaya sa Diyos nga Adlaw, si Mithras.”

“Gawas pa sa impluwensiya ni Mithras,” mipadayon si Myers, “ang ubang paganong mga puwersa ang nagalihok.” Gisaulog sa mga Romano ang mapatuyangong piyesta sa Saturnalia sa ulahing bahin sa Disyembre, ug, sumala sa gibatbat ni Myers: “Sa ulahi gipasulod sa klero ang baliskad nga kalibotan sa Saturnalia sa iglesya.” Dili ikatingala nga ang librong Christmas Customs Around the World mitaho: “Gipakita sa mga Puritano ang ilang pagtamay niining paganong piyesta pinaagi sa pagplano ug kuging trabaho sa adlaw ug sa pagpasa ug balaod nga nagbaod sa pagsaulog sa Pasko”!

Giuyonan ba ni Kristo?

‘Apan sobra ra kaayo ka istrikto ang mga Puritano,’ tingali may motutol, ‘ug maingon man ang unang mga Kristohanon. Karon ang Pasko naghimaya kang Kristo.’ Tinuod ba gayod? Gilabanan sa tanang panahon ni Kristo ang kamatuoran, apan gipadako sa Pasko ang mga kabakakan. (Juan 14:6) ‘Adlawng natawhan kana ni Kristo,’ moingon ang mga magtutudlo ug mga klerigo. Apan dili! ‘Hatagan ka ni Santa Claus ug pinaskohan kon buotan ka.’ Apan dili kana tinuod. Palandonga usab ang mga esena sa Belen.

Daghan niini magpasundayag ug Mago, o mga astrologo, lakip kang Jesus dihang natawo siya. Apan ang Bibliya nag-ingon nga sa panahong miabot ang mga astrologo, wala na si Jesus sa pasungan kondili usa na ka bata nga nagpuyo sa balay. (Mateo 2:7-11) Nagtuo ka ba nga uyonan ni Kristo ang selebrasyon nga nagapresentar sa kabakakan?

Apan, ang mas labing seryoso, mao ang bakak nga impresyon nga gihatag sa Pasko nga si Kristo maoy usa ka walay mahimong bata. Ang usa ka batang babaye nga nagtan-aw sa Belen nadunggan nga nangutana sa iyang inahan: “Wala ba diay modako si Jesus?” Nganong nangutana siya? “Aw,” siya mitubag, “wala man god siya modako sukad nga nakita ko siya sa miaging tuig!” Ug mao kana ang impresyon nga gibilin sa Pasko, nga si Jesus maoy usa ka walay mahimong bata, dili ang nagamandong Hari, ang usa nga maoy mowala sa yuta sa tanang pagkadili matarong.—Salmo 2:9, 12; 110:1, 2; Pinadayag 12:5; 19:15, 16.

Kon imong palandongon kon unsay ginahimo sa panahon sa Pasko, sa unsang paagi makauyon si Kristo? “Ang mga alkoholiko ug ang ilang mga pamilya malisdan niining panahona tungod kay duyogan ang espiritu sa Pasko sa mga botelya,” mitaho ang Time. “Ug ang lama sa lipstick nga makita sa pagpauli gikan sa salosalo sa opisina nakahatag kagubot sa minilyon.” Oo, ang Pasko wala mausab sukad sa mapatuyangong unang mga adlaw niini.

Ang librong Curiosities of Popular Customs, ni William S. Walsh, miingon: “Bisan pa sa pagtunglo sa maalamon ug sa mabuot, ang Pasko sa unang mga adlaw niini sagad mipatunghag labing grabeng paghuboghubog, kahilayan ug kalaw-ayan, sa Bacchanalia ug sa Saturnalia. . . . Ang sobrang hudyaka, sa tinuod, sa panahon sa Pasko sa karaang panahon daw dili katuohan.”

Kon imong palandongon kana, tingali mouyon ka sa opinyon nga gibangon sa miaging Disyembre sa The Sunday Express, usa ka pamantalaan sa South Africa. “Panahon na usab kini sa tuig,” misugod ang artikulo, “dihang ang masadyang espiritu mangibabaw ug ang relihiyosong mga tawo moingon: ‘Ibutang nato ug balik si Kristo sa Pasko.’

“Sanglit wala man didto si Kristo sa sinugdanan pa, mas tukmang kuhaon sa bug-os ang bisan unsang kalangkitan Kaniya ug usbon ang ngalan sa Pasko.

“Nganong bulingan ang ngalan ni Kristo pinaagi sa tanang komersiyalismo, hingaping pangaon ug pag-inom-inom ug paghudyaka?”

Unsay Imong Buhaton?

Sa tinuod, walay pag-uyon si Kristo sa Pasko. Kini nagapasipala kaniya ug sa iyang mga pagtulon-an. Busa unsay imong buhaton niining panahona sa tuig?

Ang gikutlo sa ibabaw nga pamantalaan sa South Africa misugyot: “Maayong magmatinud-anon kita ug atong ibalik ang Pasko sa paganong piyesta sama sa gisugdan niini ug magrelaks ug maglipaylipay kita sa mga salosalo ug panagsadya uban ang tanang mga dayandayang pino ug hingaping kombira ùsa walay pagpakaaron-ingnong gisaulog nato ang pagkatawo ni Kristo.”

Tinuod, dili kana pagpakaaron-ingnon, apan walay pag-uyon si Kristo sa mapatuyangon paganong pagsaulog, kon himoon man kini sa iyang ngalan o dili. (2 Corinto 6:14-18) Busa kon buot mong maangkon ang pag-uyon ni Kristo, unsay imong buhaton? Ang kolumnistang si Bill Hall, nga gikutlo sa sinugdan, mitubag: “Ang tinuod nga Kristohanon—kon may nahibilin pa kanila—nagalikay sa pakig-uban sa kalibotanon, modernong selebrasyon nga nailhang Pasko.”

Gihimo kana sa mga Saksi ni Jehova sa tanang dapit. Wala sila makigbahin sa pagsaulog sa Pasko tungod kay tinuod silang naningkamot sa pagdani sa kahimuot sa ilang langitnong Hari, si Jesu-Kristo. Ug sila nanglimbasog sa pagkinabuhi sumala sa iyang mga pagtulon-an, dili lamang sa espesyal nga okasyon kondili sa tanang adlaw sa tuig. Kon mao kanay imong tinguha, ang mga Saksi ni Jehova malipay sa pagtabang kanimo sa pagkab-ot niana.

[Letrato sa panid 12]

Ang mga esena ba sa Belen nagatudlo ba sa kamatuoran bahin kang Krisfo?