Alistong Paggamit sa Pulyetong “School”
MIPATIK ang Watchtower Society ug pulyetong nag-ulohang “School and Jehovah’s Witnesses.” Ang katuyoan niini mao ang pagsinati sa mga magtutudlo ug ubang mga awtoridad sa tunghaan sa mga pagtuo sa mga Saksi nga makaapektar sa pakigbahin sa mga kalihokan sa tunghaan. Ang mosunod nga asoy sa usa ka tin-edyer nagailustrar sa mahimo niini nga mga tagana kon alisto ang mga Saksi ug gamiton kini sa epektibong paagi.
“Nakuha ko ang mga listahan sa mga superintendente ug ubang mga administrador sa nasod ug sa mga sistema sa tunghaan sa Georgia. Gipadala ang mga pulyeto ngadto sa Atlanta ug sa mga dapit sa palibot. Mipadala akog 350 ug nakadawat ug hangyo alang sa dugang 2,000 ka kopya. Ako ug ang akong amahan nakaduaw ug 42 ka prinsipal. Daghan ang mipahayag ug apresasyon ug nangandoy nga ang ‘tanang relihiyon motaganag ingon niining matanga sa impormasyon nga makatabang.’ Diha sa kadaghanang tunghaan nga akong giduaw, giapod-apod ang pulyeto ngadto sa tanang magtutudlo sa kuwarto, ug nakapahimutang ug mga kopya sa mga librarya sa tunghaan.
“Dugang pa sa pulyeto, nakapahimutang kamig 32 ka kopya sa librong Ang Imong Pagkabatan-on, Pagpahimulos sa Labing Maayo Niini ug 140 ka kopya sa gula sa Pagmata! nga naghisgot bahin sa ‘Pag-abuso sa Bata.’ Daghang prinsipal nangayog permiso sa pagkutlo niining mga publikasyona alang sa mga mantalaan sa tunghaan, sa basahon sa PTA, ug sa mga pakigpulong ngadto sa mga tigom sa lawas sa mga estudyante. Gidapit kami sa usa ka prinsipal sa pagbalik sa pagpakigsulti sa mga magtutudlo bahin sa mga pagtulon-an sa mga Saksi ni Jehova. Mipakigpulong ang akong amahan sa 20 minutos, ug tapos nakapahimutang kamig dugang libro ug mga magasin. Lain pa, nakadawat kamig hangyo gikan kang Gg. Samuel Wallace sa Planning and Expanded Services sa opisina sa Atlanta. Nangayo siyag mga kopya sa pulyeto ug sa magasing Pagmata! alang sa matag 30 ka social workers nga magduawan sa mga tunghaang elementarya ingong mga magtatambag.
“Tapos niining tanan, nakadawat kamig upat pa ka hangyo nga ang tanan mitotal ug 450 ka pulyeto. Ang mga binhi sa kamatuoran gikatanom na, ug naglaom kami nga atimanon sa mga ginikanan ang interes nga gipakita sa mga magtutudlo inigbalik sa mga kabataan sa pagtungha sa tinghunlak.”—B.L., Norcross, Georgia.