Karong Gabhiona Kami Nakadaog!

MITUGPA ang akong tiil sa nawong sa akong kontra! Mituyok samag kilat, misulay siya sa pagpatumba kanako pinaagi sa pagsipa, gisundan kinig patid sa tikod diha sa akong tiyan. Nagbayloay kami ug tanang matang sa legal nga mga patid ug mga suntok, kaming duha nagdinawatayg silot.

Mayo 19, 1978 kadto, ug ang akong kontra, si Gilbert Letouzo, nagparang sa nasyonal nga kampeyonato sa Pransiya diha sa Hotel Meridien sa Paris. Ako ug si Gilbert nakakat-on sa mga paagi sa savate, usa ka matang sa boksing sa Pransiya, diha sa mga bangga sa mga dalan sa siyudad sa Paris. (Tan-awa ang tupad nga panid)

Ang mga tumatan-aw naghinamhinam ug nag-abiba sa pagdasig. Apan nabalaka ako. ‘Unsa kaha kon may daotang mahitabo? Unsa kaha kon maangol ko siya?’ Sige akog hunahuna. Ang makatuok, punog-aso nga palibot mas nakapalisod sa pagpalandong. Nagkinahanglan ako sa tanang gutlo sa pagtagad nga akong gikinahanglan.

Sa ikaupat nga hugna, nagpakita nag timaan si Gilbert ug hilabihan nga kakapoy. Naglisod siya sa pagbantay, ug kulang sa pagsalig ang iyang mga suntok. Apan ako, maayo pa ang akong lihok sa pagbalos. Mibalos ako ug kusog kaayong suntok, ug natumba ang akong kontra. Apan bisag nakabangon dayon siya, dayag nga naluya na si Gilbert, ug gipaundang siya sa iyang luyoluyo. Nadaog ko ang nasyonal nga kopa sa Pransiya!

Sa miaging mga bulan, ikalipay ko unta kining yugtoa sa himaya, ang tingog sa mga trompa nga nagsibya sa dagkong puntos sa bangga, giduyogan sa pag-abiba sa mga tawo! Apan, karong gabhiona, kining tanang himaya—dungog, kabantogan, ug umaabot nga mga kontrata—wala kaayoy bili kanako.

Nakita nako ang malipayong panagway sa akong asawa diha sa panon sa katawhan. Tataw, nakabasa siya sa ekspresyon sa akong nawong nga dili na ako mobalik pa sa akong desisyon. Kami tinuod makaingon, ‘Karong gabhiona kami nakadaog!” Kami tinuod nga nakadaog, kay nakahimo na akog desisyon sa paghunong sa tanang pakigbahin sa mga bangga sa boksing. Kami karon mosulod sa laing bangga apan karong panahona kaming duha.

Kombati sa Kapintasan Batok sa Kapintasan

Natawo ako sa 1947 sa siyudad sa Paris sa Rueil—Malmaison, nga nahimutangan sa palasyo nga gipuy-an kas-a sa unang asawa ni Napoléon, si Josephine ug namatay sa ulahi. Pamilya kami nga nagtrabaho, ug wala magdugay nasilag ako sa tanang mga inhustisya sa kalibotan. Buot kong tul-iron ang tanang kadaotan. Sa 1967 misugod ako sa pagtuon sa abogasiya sa paglaom nga mahimong abogado. Niadtong panahona misugod pagbukal ang kasamok sa mga unibersidad sa Pransiya, ilabina sa Nanterre, laing siyudad sa Paris, diin didto nag-eskuyla ako. Panahon kadto sa mabangis nga komprontasyon tali sa ekstremistang mga grupo sa politika.

Sa una pang mga katuigan misulod ako sa masaarong karera sa soker, apan miundang ako tungod sa kapintasan nga mikaylap sa istadyom. Kataw-anan, mibali ako sa dula sa kombati. Nakabaton akog panghunahuna: ‘Maayo pang makakat-on sa pagdepensa sa kaugalingon.’ Tungod sa mapiitong palibot sa unibersidad, nagtuo ako nga ila akong pasagdan kon mahibalo ako sa pagpanalipod sa akong kaugalingon. Tapos nakasulay sa daghang dula, sa kataposan gipili ko ang savate, tanang matang nga dula sa boksing nga dala ang sipa nga gikan sa Pranses nga boksing. Naikag ako sa savate tungod kay “kompleto” kadto sa teknik sa kombati, apil ang tiil ug kamot.

Usa ka Magubot nga Yugto

Sa Mayo 1968 ang mga grupong ekstremista sa mga unibersidad nangusog alang sa kausaban sa politika ug sa katilingban. Sa among katingala, ang mga trabahante, nga misimpatiya sa among mga demonstrasyon sa estudyante, miduyog sa pagsuportar kanamo. Dayon ang unyon sa mga trabahante miapil uban sa ilang kaugalingong mga martsa sa demonstrasyon ug may mga sugo sa mga trabahante sa pagwelga. Busa, sa Mayo ug Hunyo 1968, naparalisar ang Pransiya.

Mihari ang espiritu sa kalipay taliwala kanamong mga estudyante, kay giisip namo ang among kaugalingon nga usa ka matang sa pagdasig nga naghagit ug kalihokan nga nagpahayag sa kinatibuk-ang tinguha alang sa mas matarong ug tawhanong katilingban. Sa sinugdan debotado kaayo ako niining daw bililhong kawsa, ug, tuohi ako, ang akong pagpaugnat sa lawas napuslan sa managan gikan sa kapolisan sa panahon sa mga demonstrasyon sa mga estudyante sa Latin Quarter sa Paris.

Apan, nawad-an akog kasibot sa ulahi, kay nahimong mapintas ang among mga demonstrasyon. Ang gipangandoy nga kausaban sa politika ug sa katilingban wala gayod makab-ot, ug ang palaabuton sa mas timbang ug mahigalaong sosyal nga sistema natabonan sa temporaryo ug malipatong materyal nga mga bentaha. Naluya ako. Nawad-an akog pagsalig sa tawo, sa iyang mga proyekto ug mga prinsipyo.

Personal nga mga Nakab-ot

Bisan pa, nakagraduwar ako sa unibersidad sa wala pa mibiya alang sa pagserbisyo sa militar. Sa akong paghiuli, mibalik ako sa mga dula, ilabina sa savate. Gigantihan ang akong mga paningkamot, kay nahimo akong kampeyon unom ka besis sa Pransiya. Nakadaog akog duolan sa gatos ka kopa ug mga medalya, ug napili ako sa makadaghan sa nasyonal nga tem.

Dugang pa, nahimo akong magtutudlo sa nasod ug nagpalakaw ug mga klab sa dula, lakip sa usa diha sa Rueil-Malmaison nga niadto nagpasigarbo sa pinakadaghang membro sa Uropa. Ako usab ang nagdumala sa daghang mga asosasyon, nahimong editor sa magasin sa mga dula, ug hunta direktiba sa Pederasyon sa Boksing ug Savate sa Pransiya.

Kalit nga Kausaban

Sa Oktubre 1977 nahimamat sa akong asawa ang duha ka Saksi ni Jehova ug dayon misugod sa pagtuon sa Bibliya. Sa sinugdan wala akoy pagpinig batok sa mga Saksi ni Jehova ni may daang kiling kanila. Sanglit usa ka nawad-ag kasibot nga Katoliko, wala gayod ako makahigayon sa pagtuon sa Bibliya, busa nganong did-an ang akong asawa nianang posibilidara? Niadtong yugtoa ang among mga paryente misugod sa pagsupak sa mga panaghisgot sa Bibliya, nga nag-ingon nga peligrosong sekta ang mga Saksi ni Jehova. Busa napugos ako sa pagdepensa sa akong asawa sa ngalan sa kagawasan sa relihiyon ug sa pangunang mga prinsipyo sa Rebolusyon sa mga Pranses sa 1789 ug sa Deklarasyon sa Katungod sa Tawo, nga akong gipabilhag dako.

Ang usa sa misupak nga paryente ubos kanako sa mga klase sa boksing ug misugod siyag pagpakaylap ug tabi nga nahimo akong usa sa mga Saksi ni Jehova. Busa sa matag leksiyon, akong ipaila ang akong awtoridad pinaagi sa mga teknik nga nagpatin-aw nga dili pa ako tinuod nga Kristohanon, sumala sa pila ka nabun-og ko nga mga gusok ug mga apapangig!

Kining dili-matukib nga pagsupak nakapukaw sa akong kaikag. Busa gitan-aw ko ang librong Ang Kamatuoran nga Motultol sa Kinabuhing Dayon, nga naghisgot sa pasukaranang mga doktrina sa Bibliya. Gihurot ko kinig basa sa duha lamang ka gabii. Nakabasa na akog daghang libro bahin sa politika, kasaysayan, ug pilosopiya, apan daw wala pa sila matapos, dili-bug-os, kulang, ug—nagkasumpaki. Ang kakulang sa katakos sa tawo daw mas kataw-anan alang kanako niining ika-20ng siglo nga dagkog teknikal ug siyentipikanhong mga kauswagan. Dili sama sa ubang mga basahon nga akong nabasa sukad, kining libroha naghatag malangkobong katin-awan sa sinugdan sa tawo ug dulnganan ug mga katarongan sa iyang paglungtad.

Sa kalit, kining tanang kahibalo misugod sa pagkaporma sa usa ka matin-aw, wala magkasumpaki, makataronganon sa katibuk-an. Ang bug-os nga kasaysayan sa tawo—uban sa mga gubat niini, mga relihiyon, ug mga sibilisasyon—ang tanan mihaom sa usa ka sumbanan, usa ka katingalahang katuyoan nga wala nako hibaloi hangtod niadtong panahona. Labaw sa tanan, nakurat ako sa pagkatukma sa paghubit ni Jesus sa presenteng adlawng mga hitabo, nga gihatag ingong mga timaan sa iyang umaabot nga pagpangilabot sa mga kahikayan sa kalibotan. (Mateo 24; Lucas 21) Kombinsido ako nga nakita ko ang kamatuoran. Apan dunay ubang mga lakang ang gikinahanglan sa dili ko pa bug-os masabtan ang tanang butang nga nalangkit.

Unang Kontak

Sa tingpamulak sa 1978 gidapit ako sa akong asawa sa Memoryal, usa ka selebrasyon nga ginahimo sa mga Saksi ni Jehova kada tuig sa paghandom sa kamatayon ni Jesus. Buot kong motambong, apan dili pa mahuman ang leksiyon sa boksing hangtod sa alas 9:30 s.g. Apan, niadtong gabhiona 15 porsiento lamang sa klase ang mitambong, ug kay gilaayan ang mga estudyante, natapos ang leksiyon sa 7:45 s.g. Wala dahoma, dihay edad-edaran sa klase, nga para sa mga batan-on. Sa natapos ang leksiyon, miingon siya nga iyang hapiton ang iyang asawa sa estasyon tungod kay ang iyang awto naguba. Nagpasabot kini nga moagi siya sa Kingdom Hall nga gitambongan sa akong asawa sa Memoryal. Maayo kaayong pagkaatol niini nga akong gihangyo siya nga ihatod ako, ug miduyog uban sa akong asawa sa tigom.

Bisan pa sa akong panagway—nagsul-ob akog jeans, ug ang akong buhok basa pa gikan sa pagkaligo—mainit nga giabiabi ako. Kinsay makatag-an nga puno ang akong bag sa mga glab sa boksing? Sa natapos ang tigom, giduol ako sa usa ka Saksi ug nakig-estorya kanako. Sanglit kombinsido na ako sa akong nabasa sa librong Kamatuoran, wala ako magtagad sa gisulti sa tawo kondili sa tawo mismo. Akong gipanid-an siya, ug nakabig ako sa akong nakita nga dili siya panatiko. Wala magdugay, misugod usab ako sa pagtuon sa Bibliya.

Usa ka Bag-ong Pagkatawo

Ang akong kataposang pagsangka sa kampeyonato, nga gibatbat sa sinugdan, nahitabo sa pila ka bulan human sa akong pagtuon sa Bibliya. Tapos sa akong dobleng kadaogan, akong gibati nga daw nawala ang kabug-at nga akong gipas-an. Nangatarongan ako nga ang akong kahimtang karon kaharmoniya na uban kang Jehova nga Diyos, sanglit mihunong na ako sa mga bangga. Apan, umaabot pa ang ubang mga kausaban.

Aron regular nga makatambong sa lokal nga mga tigom sa mga Saksi ni Jehova, mihukom ako sa paglimiti sa akong mga kalihokan sa dula diha sa klab sa akong lungsod natawhan sa Rueil-Malmaison. Dayon, sa usa ka tigom, gipahinumdoman kami nga kinahanglang likayan sa Kristohanon ang tanang butang nga moresulta sa pagkasad-an sa dugo, tinuyo o dili tinuyo. Mahinumdoman pa nako nga misaka ang akong dugo sa akong aping sa gihisgotan kining butanga. Abi gud nimo, dili mga sumusugod ang akong mga estudyante nga mianhi lamang aron sa pagparelaks, kondili ang uban mga magsasangka usab, mga boksingerong banggiitan. Unsa kaha kon may mahitabong aksidente? Unsa ang sukod sa akong kaakohan? Ingong resulta, miretiro ako sa tanan nakong mga kalihokan sa Pederasyon sa Boksing ug Savate sa Pransiya ug mihikay sa akong igsoon nga maoy mopuli sa akong pagkamagtutudlo sa klab sa Rueil-Malmaison.

Sa misunod nga mga bulan, padayon akong mag-adtoan sa klab sa pakigdula, sa pagboksingboksing dili sa maindigong paagi. Apan nagkasensitibo ang akong konsensiya. Maayong palandongon ang mga pulong ni apostol Pablo: “Ang ulipon sa Ginoo dili makig-away, kondili maaghop sa tanan, kuwalipikadong manudlo, mainantuson, magapanudlo nga mapailobon.”—2 Timoteo 2:24, 25.

Ug sa hunahunaon ko kana, malisod kaayo kanako sa paghanduraw kang Jesus ug ang iyang mga apostoles nga nagbansaybansay aron mahimong mga gladyador alang lamang sa dula, bisan ug dili sila moapil sa aktuwal nga kombati. Busa, kay sukwahi ang akong boksing sa tambag sa Bibliya, sa ulahi mibulag ako gikan sa tanang pakigbahin niana.

Sa mibulag ako sa klab, gisangyawan nako sa direkta ug dili direkta ang tanan nakong mga estudyante. Tinuod, giisip kong akong espesyal nga teritoryo ang 200 ka boksingero. Pito niadtong akong gitun-an sa ulahi nahimong mga Saksi ni Jehova. Sa maghisgot ug boksing uban sa akong mga estudyante, hatagan nako silag tambag ginamit ang akong bag-ong nakat-onang kahibalo. Nakita kining dakong tabang kanako sa espirituwal nga paagi. Napugos ako niini sa paghimog dakong pagtuki sa kaugalingon ug miagak kanako sa pagsunod sa akong ginasangyaw.

Busa mibulag ako sa kalibotan sa boksing ug mihunong sa “pagpangagpas sa hangin.” Tinuod, nawad-an akog ginatos ka gitawag nga mga higala lakip sa lumalabayng himaya ug kadungganan. Sa baylo, dagayang gipanalanginan ni Jehova ang akong pamilya. Kami karon aduna nay tumong sa kinabuhi ug matarong nga kawsa sa Gingharian nga panalipdan, dili sa kumo, tiil, ug modernong mga paagi sa kombati, kondili sa espirituwal nga mga hinagiban. (Ecclesiastes 2:11; 4:4; Efeso 6:14-17)—Sumala sa giasoy ni Christian Paturel.

[Blurb sa panid 16]

Ang tanang kasaysayan sa tawo mihaom sa usa ka sumbanan, usa ka katingalahang katuyoan nga wala nako mahibaloi sukad niadto

[Blurb sa panid 17]

Kinsay makatag-an diha sa Kingdom Hall nga puno ang akong bag sa mga glab sa boksing?

[Blurb sa panid 15]

Boksing ug Savate sa Pransiya

Ang boksing sa Pransiya maoy usa ka dula sa sumusugod sa boksing diin legal ang paggamit sa tiil ug mga kumo. Sa hinapos sa ika-19ng siglo, ang Pranses nga si Charles Lecour may dakong bahin sa pagbag-o sa teknik. Iyang gisagol ang mga lagda sa Ingles nga boksing bahin sa mga suntok lakip sa ubang mga lagda sa tiil ug sa mga sipa, nga gibase sa pag-obserbar sa mga boksing sa kadalanan sa Paris. Nahimong popular kaayo ang boksing sa Pransiya, ug daghan ang nakigbahin niana, lakip sa iladong mga awtor sama kang Alexandre Dumas ug Théophile Gautier.

Karon, ang savate⁄Pranses nga boksing nagtanyag ug halapad nga sukod sa mga patid ug mga suntok ug modernong mga paagi sa pagbansaybansay. Ang tumong sama ra sa Ingles nga boksing: daogon pinaagig nak-awut, sa pag-undang, o sa mga puntos. Sa katibuk-ang pagkasulti, diyutay suntok lamang ang mahimo kay sa Ingles nga boksing tungod sa halayong distansiya gikan sa kontra. Apan, delikado kaayo ang mga patid, busa giisip kini nga usa sa labing mapintas nga mga dula sa kombati.