Ang Sagradong Dahon nga Nakagamot

Sulod sa tulo ka siglo ang tabako maoy medisina alang sa mga taga-Uropa. Gireseta sa mga doktor ang dahon alang sa mga sakit gikan sa bahong gininhawa ngadto sa mga kalyo. Ang tanan nagsugod sa 1492 dihang si Columbus ug ang iyang tripulante, ang unang mga taga-Uropa nga nakakitag tabako, nakadiskobre nga ang mga taga-isla sa West Indies nagtabakog tabagnolon nga abano sa mga seremonyas sa tribo.

Dugay na una kang Columbus, hapit ang tanang karaang mga katawhan sa mga Amerika nag-isip sa tabako nga sagrado. Sa sinugdan, ang pagtabako maoy katungod ug trabaho sa mga tambalan ug mga pari. Gigamit nila ang narkotikong epekto niana sa pagpatunghag mga panan-awon panahon sa solemneng mga rituwal sa tribo. “Ang tabako suod nalangkit sa ilang mga diyos,” nagtaho ang historyanong si W. F. Axton, “dili lamang sa ilang relihiyosong mga pagsaulog kondili sa ilang mga paagi usab sa pagpanambal, nga kanang tanan konektado sa usa o laing paagi sa ilang relihiyon.” Apan kon ang medisinal nga gamit sa tabako mao ang unang nakit-an sa Katsila ug Portuges nga mga eksplorador, ang paggamit niana alang sa kalingawan misunod sa wala madugay.

“Motabako akog laing sigarilyo/Ug tunglohon si Sir Walter Raleigh,” miawit ang Beatles si John Lennon ug Paul McCartney. Si Sir Walter, gitawag “labing iladong propagandista sa mga Ingles alang sa makapalingawng hunsoy,” nagtanom ug tabako sa iyang asyenda sa Irlandiya. Gihimo niya ang iyang labing maarangan sa pagpabantog sa bisyo taliwala sa tigsunod sa uso nga katilingban. Nga una sa iyang panahon, siya mopahinumdom sa industriyalista sa tabako ug tawong tig-anunsiyo sa ‘siglo sa sigarilyo.’

Apan ang Gubat sa Katloan ka Tuig sa Uropa, dili ang kamadanihon ni Sir Walter, ang naghimo sa ika-17 nga siglo ang “Dakong Panahon sa Hunsoy,” matud ni Jerome E. Brooks. “Ilabina pinaagi sa ahensiya sa gubat,” siya nagpatuo, “ang pagtabako mikaylap sa tibuok Kontinente” ug ngadto sa Asia ug Aprika. Ang usa ka susamang hitabo maoy nagpasugod sa panahon sa sigarilyo.