Gikan sa Among mga Magbabasa

Dili Ngadto sa mga Droga

Buot kong pasalamatan kamo ug pahalipayan kamo tungod sa mga serye sa mga artikulo mahitungod sa mga droga nga gipatik sa pangunang artikulong “Mga Batan-on Nangutana . . . ” (Agosto 8, 1985, Disyembre 8, 1985, Pebrero 8, 1986, Pebrero 22, 1986, Abril 8, 1986) Sa tulo ka tuig ako regular nagtabakog marijuana, ug kana nagdaot sa akong panglawas. Dili ako makasabot sa mga magtutudlo sa eskuylahan, ang akong memorya nagkamenos, ug ako dili makabutang sa akong hunahuna sa bisan unsa sa dugayng panahon. Karong adlawa ako nagapasalamat kang Jehova tungod sa iyang kalulot sa pagluwas kanako gikan sa mga droga. Karon nahibalo ako kon unsay buhaton aron dili mosugod pag-usab sa mga droga.

C. B. V., Mexico

Salamat kaninyo tungod sa inyong mga artikulo mahitungod sa mga droga. Gidala ko ang maong serye sa mga artikulo ngadto sa akong klase sa maayong panglawas sa eskuylahan. Gihatagan ako sa akong magtutudlo ug ekstrang kredito tungod sa paggahin ug panahon sa pagpangitag impormasyon mahitungod sa mga droga. Ang inyong mga artikulo dako gayod ug tabang.

H. P., New York

Pagtug-an sa Imong mga Ginikanan

Ako nagasulat kaninyo mahitungod sa artikulong “Mga Batan-on Nangutana . . . Angay Ko Bang Tug-anan ang Akong mga Ginikanan?” (Mayo 22, 1986) Ako 12 anyos, ug ako nasugamak sa daghang suliran ug dili makasulti sa akong mga ginikanan bahin niana. Kadto nakadaot kanako. Ako may daotang konsensiya, ug ang akong pagtuon nagkamenos. Unya ang mga ansiano nakigsulti sa akong amahan, ug ang tanan kinahanglang ibutyag. Kon nakigsulti unta ako sa akong mga ginikanan sa nangagi, dili unta kadto mograbe kaayo. Karon tapos sa upat ka bulan, ako nagauswag na usab. Makatabang gayod ang pagsulti bahin niana.

M., Inglaterra

Ang inyong artikulo nakatabang kanako sa pagsabot nga angay kong tug-anan ang akong mga ginikanan sa akong mga suliran. Mas sayonan akong motug-an sa akong inahan. Lahi ang akong amahan. Hatagi ako palihog ug dugang tambag mahitungod niining akong suliran. Kini lisod kaayong ulohan.

A. S., Ohio

Imong hisayrang mapuslanon ang pagtug-an sa mga sekreto nganha sa imong mga ginikanan. Ang Bibliya nagaingon diha sa Proverbio 1:8: “Patalinghog . . . sa pagbadlong sa imong amahan, ug ayaw isalikway ang kasugoan sa imong inahan.” Tan-awa usab ang Proverbio 4:1; 6:20; 23:22; ug Efeso 6:1-3. Tan-awa usab ang umaabot nga mga artikulo.—ED.

Hinungdanon ba ang Panagway?

Salamat kaninyo tungod sa artikulong “Mga Batan-on Nangutana . . . Unsa ka Hinungdanon ang Panagway?” (Hunyo 8, 1986) Ang artikulo usab sa samang isyu mahitungod sa “Kalinaw sa Pamilya—Unsa ang Sekreto?” Ang duruha ka artikulo dako nakog tabang sa eskuylahan ug sa panimalay. Ang among pamilya labi pang malinawon karon, ug ang pagkamaanyag dili labing hinungdanon. Kini akong naamgohan.

S. I., Indiana

Pagpauswag sa Pamilyahanong Kinabuhi

Ako naminyo dihang ako 16. Ang akong amahan palahubog, ug si Mama kinahanglang magtrabaho aron matagan-an ako ug ang akong mga igsoong babaye. Ako wala gayod makatuon sa pag-atiman sa balay. Ang ako lamang gibuhat mao ang pagsinggit ug pagreklamo mahitungod sa paglaba sa mga hapin ug ubang sinina. Busa ang akong bana midangop sa lokal nga mga bar, nga naghurot sa iyang suweldo sa sugal uban sa iyang mga higala. Sa pagpalabay sa panahon, ako sigeng nagbasa, ug kay walay kuwarta alang sa ubang libro, akong gibasa ang Bibliya sa akong inahan. Akong nahibaloan nga ang akong gibuhat maoy sayop ug gisulayan ko ang pag-angkon pag-usab sa akong bana. Unya akong nabasahan ang inyong mga artikulo mahitungod sa “Komunikasyon sa Pamilya—Nganong Nadaot?” (Hunyo 8, 1985) Naglaom ako nga inyong ipadayon ang pagpatik nianang kahibulongang impormasyon sa pagtabang sa mga pamilya.

L. P., Brazil

Tan-awa ang “Kalinaw sa Pamilya—Unsa ang Sekreto?” sa Hunyo 8, 1986, “Pagmata!”—ED.