Kapitulo 4—Pagkaluwas Ngadto sa Usa ka Bag-ong Yuta
Ang Matang sa Kinabuhi nga Nagapaabot sa mga Maluwas
1. Nganong ang umaabot nga “adlaw ni Jehova” dili magbilin sa yuta nga usa ka awaaw nga kagun-oban?
Bisag makalilisang ang umaabot nga “adlaw ni Jehova,” kana dili magbilin sa yuta nga guba aron puy-an. Ang mga epekto unya niana dili mahisama sa iya sa nukleyar nga katalagman, nga gikahadlokang makapagubot sa ekolohiya ug ang mga maluwas makaagom sa mangil-ad nga mga epekto gumikan sa radyasyon. Inay nga iyang daoton ang yuta aron puy-an sa tawo, ang Maglalalang “maglaglag niadtong nagalaglag sa yuta.”—Joel 2:30, 31; Pinadayag 11:18.
2. Unsay mohatag kanatog pagsalig nga luwason ni Jehova ang mga matinumanon latas sa dakong kasakitan?
2 Walay tipik sa pagduhaduha diha sa mga hunahuna sa matinumanong mga alagad ni Jehova nga ang Diyos makaluwas kanila bisan unsa ang makapalaglag nga mga puwersa ang iya unyang buhian alirong kanila. Sila nahibalo nga dihang ang daotag-moral nga Sodoma ug Gomora gilaglag sa ‘asupre ug kalayo gikan sa langit,’ ang mga manulonda ni Jehova nagluwas kang Lot ug sa duha niya ka anak babaye. (Genesis 19:15-17, 24-26) Sila nasayod usab nga dihang ang mga panganay sa tibuok Ehipto gilaglag sa mga adlaw ni Moises, ang manulonda ni Jehova nga tiglaglag milabay sa mga balay sa mga Israelinhon, kadtong mga balay nga gipahiran sa dugo sa nating karnero sa Paskuwa. (Exodo 12:21-29) Busa, inigsilaob sa malaglagong kapungot sa dakong kasakitan, luwason ni Jehova kadtong naghimo kaniya nga ilang salipdanan.—Salmo 91:1, 2, 14-16; Isaias 26:20.
3. Nganong ang daghan kaayong patayng lawas dili makapameligro sa panglawas sa mga maluwas?
3 Tinuod, ingong resulta sa dakong kalaglagan, ang yuta makatagan niadtong pinatay ni Jehova. Apan walay labawng nahibalo kay sa Diyos kon unsay kinahanglang buhaton sa pagpanalipod sa panglawas sa mga maluwas. Siya nagasulti kanatong iyang dapiton ang mga langgam sa langit ug ang mga mananap sa kapatagan ngadto sa iyang “dakong panihapon” ug sila mabusog sa mga unod niadtong pinatay. (Pinadayag 19:17, 18; Ezekiel 39:17-20) Ang dili nila mahurot iyang mahipos sa laing paagi. Ang katuyoan sa Diyos alang sa yuta sumala sa gipahayag sa Eden mopadayon unya ngadto sa iyang pagkatuman.
Kon Unsay Ginapadayag sa Orihinal nga Katuyoan sa Diyos
4. Unsang matang sa pagsugod ang gihatag ni Jehova sa unang magtiayon, ug nganong kana makaiikag ilabina kanato?
4 Ang timailhan kon unsay umaabot sa mga maluwas sa dakong kasakitan hikaplagan diha sa matang sa sinugdanan nga gihatag ni Jehova sa tawhanong pamilya sa Eden. Sa pag-andam sa yuta aron puy-an sa katawhan, gipatungha sa Maglalalang ang dagayang talamnon, isda usab, mga langgam ug mga mananap sa mamala sa makapahimuot nagkadaiyang klase. “Si Jehova nga Diyos nagtanom sa usa ka tanaman sa Eden, sa silangan, ug didto iyang gibutang ang tawo nga iyang giumol.” (Genesis 2:8) Apan wala himoa sa Diyos nga paraiso ang tibuok yuta ug dayon mentenahon kana ingong parke alang sa tawo. Hinunoa, gihatag ni Jehova ang kahibulongang pagsugod sa unang tawhanong magtiayon, gihatag ang iyang panalangin kanila ug gihatag kanila ang usa ka buluhaton. Iyang gibutang sa ilang atubangan ang mga proyekto nga makapaarang nila sa paggamit sa bug-os sa ilang mga katakos ug pagkaplag sa katagbawan sa ilang mga kahimoan. Kana magpuno sa ilang mga kinabuhi sa kahulogan. Pagkamakalingaw ang ilang buluhaton—pagmatuto ug mga anak aron ipasibaw ang diyosnong mga hiyas, pagpaabot sa Paraiso ngadto sa kinatumyan sa yuta ug pag-atiman niana uban sa nanghitok nga mga linalang! Kon si Adan ug Eva nagpadayon sa pagtahod sa pagkamagmamando ni Jehova, sila dili gayod unta mamatay. Sila magpahimulos unta sa hingpit nga kinabuhi sa yuta sa walay kataposan.—Genesis 1:26-28; 2:16, 17.
5. Busa, unsang kalaoman ang anaa sa atubangan sa mga maluwas sa dakong kasakitan?
5 Hinuon, ang mga kahimtang sa yuta human dayon sa dakong kasakitan dili unya mahisama sa iya sa Eden. Apan ang orihinal nga katuyoan sa Diyos alang sa yuta ug katawhan magpabiling dili mausab. Ang paraiso molukop sa tibuok yuta, ang katawhan mao unya ang mga mag-aatiman niini, ug silang tanan mahiusa sa pagsimba sa matuod nga Diyos. Sa ilang atubangan anaa unya ang higayon sa pagkinabuhi sa walay kataposan, nga magpahimulos sa mahimayaong kagawasan sa mga anak sa Diyos.—Lucas 23:42, 43; Pinadayag 21:3, 4; Roma 8:20, 21.
6. (a) Unsay mahitabo sa kasangkapang militar? (b) Nganong wala nay gutomon pa?
6 Sa sinugdan, ang kagun-oban sa daang sistema pihong pagahinloan. Ang militaryong mga kasangkapan nga mabilin pagausbon alang sa malinawong mga kagamitan. (Ezekiel 39:8-10; itandi ang Miqueas 4:3.) Ang mga tanom nga anaa pa sa mga uma pihong pagaanihon sa pagpakaon sa mga maluwas. Unya samtang ipugas ang binhi ug anihon ang bag-ong mga alanihon, ang saad mamatuman: “Ang yuta mohatag gayod sa iyang abot; ang Diyos, ang atong Diyos, magapanalangin kanato.” (Salmo 67:6; itandi ang Deuteronomio 28:8.) Tungod kay wala na ang hakog ug makapabahin nga mga elemento sa daang sistema, wala na gayoy si bisan kinsa nga mapugos sa pagkatulog nga gigutom sa magabii.—Salmo 72:16.
7. Sa unsang paagi ang pagpili ni Jehova ug bag-ong Hari sa yuta nagapasibaw sa kaugalingong kaalam ug gugma sa Diyos?
7 Kini unya usa ka kalibotang nalangkoban sa mga tawong nagaila sa bili sa pagbaton sa pagtultol ug panalangin ni Jehova. Ug sila itagana sa paagi nga mopasibaw sa kaalam ug gugma sa Diyos. Ang gitudlo ni Jehova ingong bag-ong Hari sa yuta mao ang iyang Anak mismo, si Jesu-Kristo. Ang Bibliya nagapadayag nga pinaagi kaniya gilalang sa Diyos ang yuta ug ang tanang nagkadaiyang matang sa kinabuhi ibabaw niana. (Colosas 1:15-17) Ang Anak sa Diyos bug-os nakasabot kon unsay gikinahanglan sa pagpatunhay sa kinabuhi sa yuta ug siya may linaing kahamuot sa mga butang maylabot sa katawhan.—Proverbio 8:30, 31.
8. Unsang pagsanong ngadto sa pagkamagmamando ni Jehova nga tabangan ni Kristo sa pag-ugmad ang yutan-on niyang mga ginsakpan?
8 Labaw sa tanan, ang Anak maunongong nagalaban sa pagkamagmamando ni Jehova. Mahitungod kang Jesus kini gitagna: “Diha kaniya mopuyo ang espiritu ni Jehova, ang espiritu sa kaalam ug pagsabot, ang espiritu sa tambag ug kagahom, ang espiritu sa kahibalo ug ang kahadlok kang Jehova; ug aduna unyay pagkalipay kaniya nga nahadlok kang Jehova.” (Isaias 11:2, 3) Iyang tabangan ang iyang yutan-ong mga ginsakpan sa pagkaplag ug susamang kalipay sa pagpahiuyon sa ilang mga kinabuhi ngadto sa mga paagi ni Jehova. Ilalom sa iyang pagkahari, ang mga maluwas sa dakong kasakitan mapasig-uli ngadto sa matang sa kinabuhi nga gituyo sa Diyos alang sa katawhan dihang ang atong unang mga ginikanan gihatagan sa Eden ingong ilang puy-anan.
Kon Unsay Ginapadayag sa Ministeryo ni Jesus
9. (a) Unsa ang pipila sa makapaguol nga mga epekto sa napanunod nga sala? (b) Unsang paglaom ang ginahatag sa mga milagro ni Jesus?
9 Apan, sa pagtagamtam nianang matanga sa kinabuhi kinahanglang kita mahigawas sa makapaguol nga mga epekto sa sala. Kitang tanan nakapanunod sa sala gikan kang Adan, kinsa nawad-an sa iyang kahingpitan dihang iyang gipakita ang malapasong dili pagtahod sa pagkamagmamando ni Jehova. Ang mga bunga sa sala madayag sa nagkalainlaing paagi. Kini makapatungha sa sakit, lawasnong mga depekto, sa tiling usab sa paghunahuna ug pagsulti ug pagbuhat sa mga butang gikan sa daotang mga motibo. Sa kataposan kini mobunga sa kamatayon. (Roma 5:12; 6:23) Panahon sa iyang yutan-ong ministeryo, gihimo ni Jesus ang daghang milagro nga nagpasundayag kon unsay iyang buhaton sa pagdalag kahupayan niadtong mga ginsakpan sa Gingharian sa Diyos.
10. Nganong makataronganon man nga gibuhat ni Jesus ang mga milagrong dili masuhid sa mga siyentipiko?
10 Apan dihang basahon sa pila ka tawo ang makapaukyab nga mga asoy sa Bibliya mahitungod sa mga milagro ni Jesus, sila mopahayag ug pagduhaduha. Ngano? Kay kita nagapuyo sa usa ka kalibotan diin bantog ang pagkamaduhaduhaon. Tingali ang mga maduhaduhaon mobating aron katuohan ang mga milagro, ang mga siyentipiko karong adlawa angay makasubli kanila o makasaysay kanila. Apan nganong ang mga siyentipiko nagapadayon sa paghalad ug daghang panahon ug salapi sa panukiduki? Tungod kay daghan pa ang wala nila hisabti. Ang tinuod nga isyu sa atong tinamdan bahin sa ministeryo ni Jesus mao ang kaandam moila sa pagbalda sa Diyos sa tawhanong mga kahikayan.
11. Sa Buhat 2:22, unsang mga ekspresyon ang gigamit sa pagbatbat sa mga milagro ni Jesus, ug unsay ginapaila niini?
11 Ngadto sa usa ka panon sa Jerusalem sa 33 K.P., si apostol Pedro namulong nga si Jesus “usa ka tawong gipadayag sa Diyos nganha kaninyo pinaagig gamhanang’ mga buhat ug mga tilimad-on ug mga ilhanan nga gibuhat sa Diyos pinaagi niya.” (Buhat 2:22) Ang mga milagro, sumala sa gipaila dinhi ni Pedro, maoy “gamhanang mga buhat,” dili mga buhat nga masuhid o ikasaysay sa ubang tawo, kondili ebidensiya nga ang gahom sa Diyos naglihok pinaagi kang Jesus. Sila “mga ilhanan” nga siya mao gayod ang Mesiyas, ang kaugalingong Anak sa Diyos. Sila usab maoy “mga tilimad-on” mga hitabong nagpunting sa makalipayng umaabot nga mga hitabo.
12. (a) Nganong imong nakaplagang makapadasig ang mga asoy mahitungod sa paghinlo sa mga tawo nga may sanla? (b) Unsa ilabina ang makaiikag mahitungod sa pag-ayo ni Jesus sa usa ka paralitiko?
12 Basaha ang mga asoy sa Ebanghelyo sa Bibliya, ug samtang buhaton nimo kana, ibutang sa hunahuna nga ang mga milagrong gibuhat ni Jesus maoy pasiunang pasundayag sa iyang pagabuhaton alang sa katawhang magpuyo sa yuta ilalom sa Mesiyanikong Gingharian sa Diyos. Kana unya panahon dihang ang mga tawong may makadaot-sa-hitsura nga mga sakit sama sa sanla pagahinloan—maingon gayod nga gihinloan ni Jesus ang napulo ka sanlahong lalaki samtang siya nagpaingon sa Jerusalem sa tuig 33 K.P. Iyang gipasundayag nga siya makatabang nianang mga tawhana ug siya buot gayong motabang kanila. (Lucas 17:11-19; Marcos 1:40-42) Daghan ang nabiktima sa paralisis. Sila, usab, pagaayohon—maingong giayo ni Jesus ang usa ka paralitikong dili makabangon, nga gilangkit kadto sa pagpasaylo sa mga sala sa tawo.—Marcos 2:1-12.
13. Hisgoti ang usa sa mga milagro ni Jehova nga nagahatag ug paglaom alang sa (a) buta, (b) alang sa bungol o amang, (c) mga tawong gitambalan sa daghang mananambal nga wala maayo. (d) Nganong nahibalo ka nga si Jesus makatambal sa tanang matang sa sakit ug kaluyahon?
13 Bukhon ang buta nga mga mata, padunggon ang bungol nga mga igdulongog ug pasultihon ang mga dila sa amang—maingong gibuhat ni Jesus kining mga butanga alang sa mga tawo sa Galilea ug sa Dekapolis sa unang siglo. (Mateo 9:27-30; Marcos 7:31-37) Alang sa daghang tawo karong adlawa, ang mga doktor dili makaayo kanila. Kana ang kahimtang sa usa ka babaye sa Capernaum nga “gihatagag daghang kasakit sa mga mananambal ug nakagasto sa tanan niyang katigayonan ug wala maayo.” Apan giayo siya ni Jesus, ug iyang buhaton ang sama alang sa daghang sama kaniya. (Marcos 5:25-29) Ang kanser, sakit sa kasingkasing, malarya, snail fever—walay mausa ang lisod unya kaayo, maingong iyang gipasundayag sa iyang giayo “ang tanang matang sa sakit ug tanang matang sa kaluyahon” panahon sa iyang ministeryo sa Galilea.—Mateo 9:35.
14. Sa unsang paagi ang mga asoy mahitungod sa pagbanhaw ni Jesus sa mga patay nagapaila kon unsay ipasabot sa pagkabanhaw alang sa mga maluwas?
14 Kana unya usa ka panahon nga adunay higayon ang mga patay—dili kadtong gilaglag sa Diyos sa dakong kasakitan, kondili ang binilyong lain nga namatay latas sa kasiglohan—nga mabuhi pag-usab, ug uban ang mga kalaomang wala pa gayod nila maangkon sa nangagi. Unsay ipasabot niana alang sa mga maluwas? Haduol sa balangay sa Nain, si Jesus nagpauga sa mga luha sa kasubo sa usa ka babayeng balo pinaagi sa pagpabalik sa kinabuhi sa iyang bugtong anak lalaki. Sa Capernaum iyang gilipay ug dako ang mga ginikanan sa usa ka dalagita pinaagi sa pagpukaw sa ilang anak gikan sa patay. (Lucas 7:11-16; Marcos 5:35-42) Buot ba nimong anaa ka dihang ang imong mga hinigugma mahibalik gikan sa mga patay? Kana unya kulbahinam nga kasinatian sa mga maluwas ngadto sa “bag-ong yuta.”
15. (a) Sa unsang paagi ang mga pagtulon-an ni Jesus nagapaila sa matang sa mga tawo nga magapuyo unya sa yuta? (b) Sa unsang paagi kita makabaton karon sa pasiunang patilaw nianang matanga sa kinabuhi?
15 Ang kinabuhi unya dili pagsubli sa kahapdos sa kasingkasing ug kasubo nga subsob kaayong makapaluya sa mga tawo karon. Kini gipakita dili lamang sa mga milagro ni Jesus kondili pinaagi usab sa iyang mga pagtulon-an, tungod kay kadto lamang tinuod niyang mga tinun-an ang maluwas ngadto sa “bag-ong yuta.” (Juan 3:36) Iyang gitudloan ang iyang mga sumusunod sa pagbutang pag-una sa espirituwal nga mga prinsipyo inay sa materyal nga mga pangagpas, sa pagsalig kang Jehova, sa pagsalig Kaniya alang sa giya ug magmapabilhon sa Iyang mga panalangin. Pinaagi sa pulong ug panig-ingnan, gipasiugda ni Jesus ang kahinungdanon sa gugma ug pagpaubos, pinaagi sa dulot nga pagtagad sa ubang tawo ug paghatag sa iyang kaugalingon alang kanila. Kadtong nahimong mga tinun-an ni Kristo ug kadtong tinuod nagapadapat niining mga prinsipyo nakakaplag na ug dakong kahupayan sa ilang mga kalag ug sila, sa baylo, nakadalag kahupayan alang sa uban. (Mateo 11:28, 29; Juan 13:34, 35) Kini pasiunang patilaw sa matang sa kinabuhi nga tagamtamon niadtong buhi pa dihang mahanaw ang presenteng walay-gugma nga kalibotan. Kon molihok kang maalamon karon, kanang kinabuhia imong maangkon.