Ang Hunahuna sa Bibliya

Nabuhi Ka ba sa Nangagi?

“Ako mahinumdom sa daghan kong nangaging kinabuhi—usahay ako lalaki, sa ubang panahon ako babaye.” Ang artistang si Shirley MacLaine misaysay sa unsang paagi siya nahidangat nianang paghinapos diha sa iyang himalitan kaayong Out on a Limb. Sa sinugdan siya “natingala sa pagkasayod, dili lamang nga ang reinkarnasyon usa ka dimalaksing bahin sa kadaghanang pagtuo sa Sidlakan . . . apan daghang iladong pilosopo nga taga-Kasadpan nagtuo niini.”

Oo, mas daghang tawo kay sa imo tingaling gituohan—apil ang ginatos ka milyong Budhista ug Hindu—nagtuo nga sila nabuhi sa nangagi. Sila nagtuong ang usa ka butang sa ilang kahiladman—gitawag kini sa daghan nga kalag—magpabiling buhi tapos sa pagkamatay ug matawo pag-usab sa usa o labaw pang sunodsunod nga kinabuhi. Kining maong “butang” mobalik sa dagway sa tawo, o sumala sa ginaingon sa pipila sa dagway sa hayop o bisan utanon. Kadaghanan kanila mouyong ang tuyo niini mao ang pagputli nga inanay sa kalag o pagtultol sa indibiduwal ngadto sa kahingpitan sa kataposan.

Angkonon, ang ideya sa pagkabuhi sa nangagi ug tingali pagkabuhi pag-usab tingali makapadani, nga makalipay pa. Apan tinuod ba kini?

Ikaw Nabuhi ba sa Kalibotan sa Espiritu?

“Oo,” matud sa The Church of Jesus Christ of Latter-day Saints, kansang mga membro kasagaran gitawag mga Mormon. Si anhing James E. Talmage, usa ka apostol sa simbahan, misulat mahitungod sa “daghang pamatuod sa kasulatan nga ang mga espiritu sa katawhan naglungtad una pa sa ilang pagsulay sa yuta—usa ka kahimtang diin ang maong mga intelihensiya nabuhi ug migamit sa ilang kagawasan sa pagpili una nila batoni ang lawasnong mga tabernakulo.”

Tinuod, si Jesus, ang Anak sa Diyos, naglungtad sa langit una siya mabuhi sa yuta. (Juan 6:38, 62) Ngani, kini ang miagak kang Talmage sa pagsulat nga “walay panagkasumpaki ang pagpasabot nga kon ang Iyang yutan-ong pagkatawo mao ang panaghiusa sa naglungtad-daan o una-himalatyong espiritu uban sa himalatyong lawas mao usab ang pagkatawo sa tanang sakop sa tawhanong banay.”

Samtang didto sa langit, si Jesus sa kanunay masinugtanon sa iyang Amahan. Busa ang yutan-on niyang paglungtad wala larawa sa pagbutang kaniya sa “yutan-ong pagsulay,” nga daw siya makasasala. Sa kasukwahi, siya hingpit, walay-salang tawo, nga nakatubos sa mga makasasala, nga “nakahatag sa iyang kalag ingong lukat ilis sa daghan.” (Mateo 20:28) Busa si Jesus maoy linaing matang, ang “usa ka tigpataliwala sa Diyos ug sa mga tawo.” (1 Timoteo 2:5, 6) Ang iyang asaynment sa pag-alagad sa yuta maoy temporaryo. Sa pagkatapos niadto, siya nakabalik sa iyang tinuod nga pinuy-anan, sa langit.

Apan tungod niining mga kamatuorana, ikaingon ba natong ang langit mao ang atong pinuy-anan sa samang diwa sa iyang pagtawag niana?

Sa Tawhanong Dagway Apan Dili Tawo

Sa nangaging mga panahon, ang dili-makitang mga espiritung linalang, mga manulonda, nagsul-ob sa makitang tawhanong mga lawas sa mando sa Diyos. (Genesis 19:1; Lucas 1:26-28) Apan sa mga adlaw ni Noe, ang pipila kanila nagbuhat niana sa ilang kaugalingong pagbuot. Ngano? Tungod sa hakog nga katuyoan sa pagpahimulos sa seksuwal nga relasyon uban sa mga babaye. (Genesis 6:2) Sanglit kadto dili mao ang kahikayan sa Diyos alang sa mga manulonda, ang ilang gibuhat maoy pagkamasupakon. Ang Bibliya nagatawag kanilang “mga manulonda nga wala magpabilin sa ilang unang dapit kondili nagbiya sa ilang tukmang dapit puy-anan.” (Judas 6) Nan, tin-awng ang langit mao ang “tukmang dapit puy-anan” alang sa mga manulonda, maingong ang yuta maoy alang sa mga tawo.—Itandi ang Salmo 115:16; 1 Corinto 15:39, 40.

Si Jesus aktuwal “nahimong unod” dihang siya mianhi sa yuta. (Juan 1:14) Kana dili maoy nahitabo sa maong mga manulonda. Sila yanong nagsul-ob sa tawhanong mga lawas nga ilang gibiyaan sa panahon sa Lunop aron mobalik sa kalibotan sa espiritu. Apan tungod sa ilang pag-alsa ang Diyos nagtugyan “kanila ngadto sa mga bung-aw sa bagang kangitngitan aron itagana sa paghukom.” Sila dili na makasul-ob ug unodnong mga lawas aron mopuyo sa yuta.—2 Pedro 2:4.

Busa ang mga panig-ingnan ni Jesus ug sa nagsul-ob sa unod nga mga manulonda dili magamit sa tukma sa pagpamatuod nga ang mga tawo naglungtad na sa kalibotan sa espiritu “una sa ilang yutan-ong pagsulay,” sumala sa ginatudlo sa mga Mormon. Apan kini ba magpahigawas sa pagkinabuhi sa nangagi ingong mga tawo dinhi sa yuta?

Ang Katuyoan sa Diyos sa Paglalang sa Kalag

Sa pagkamatuod, ang yawi sa pagtino kon kaha ang tawo nabuhi sa nangagi o wala—sa kalibotan kaha sa espiritu o sa yuta—mao ang pagtino kon kaha siya may kalag nga dili mamatay o wala. Ang Genesis 2:7 nagabatbat sa paglalang sa unang tawhanong kalag niining paagiha: “Ug giumol ni Jehova nga Diyos ang tawo gikan sa abog sa yuta ug gihuypan ang iyang mga ilong sa gininhawa sa kinabuhi, ug ang tawo nahimong usa ka buhing kalag.”

Matikding ang kalag wala batbata ingong butang lahi ug bulag sa walay-kinabuhing lawas. Ngani, tapos lamang buhia sa Diyos ang walay-kinabuhing lawas pinaagi sa “gininhawa sa kinabuhi,” sa ingon gipasugod kini sa pagginhawa, nga nabuhi ang kalag nga si Adan. Kon mohunong ang pagginhawa ug mohunong ang gahom sa kinabuhi, ang lawas mawala na usab ing kinabuhi. Ang tawo “mobalik sa iyang yuta; nianang adlawa ang iyang mga hunahuna mahanaw.” (Salmo 146:4) Kinahanglang magpaabot siya sa adlaw sa pagkabanhaw aron mabuhi pag-usab. (Juan 5:28, 29) Kasamtangan, “walay buluhaton ni lalang ni kahibalo ni kaalam” diha sa patay nga kahimtang. (Ecclesiastes 9:5, 10) Yanong pagkasulti, ang kalag maoy patay.

Ang dinosenang teksto sa Bibliya nagapakitang ang kalag malaglag, sa ingon nagapahigawas sa yano sa pagkadili-mamatay sa kalag. (Ezekiel 18:4, 20; Salmo 22:29; Buhat 3:23; Pinadayag 16:3) Kay patay na ang kalag, unsay mahibilin aron mabuhi pag-usab diha sa laing lawas? Gawas pa, nganong kinahanglang may mopabilin pa? Sa gilalang sa Diyos ang tawhanong mga kalag, iyang gitawag silang “maayo kaayo.” Kini iyang nahimo tungod kay sila gilalang nga hingpit, gidesinyo sa pagkabuhi sa yuta sa walay kataposan. (Genesis 1:31) Sila maoy mga kalag nga dili kinahanglang putlion, sila sa moral putli na. Ni sila mga kalag nga kinahanglang mamatay aron mabuhi pag-usab. Ang kinabuhing dayon sulod sa gambalay sa ilang unang paglungtad sa yuta mao ang ilang kalaoman.

Ang tubag sa Bibliya sa kon kaha ikaw nabuhi sa nangagi—sa kalibotan kaha sa espiritu o sa yuta—tin-aw. Samang tin-aw mao ang higayong ginatanyag sa Diyos kanimo nga ikaw may adlaw nga mabuhi sa paraisong yuta sa walay kataposan. Buot ba nimong mahibalo sa dugang?

[Blurb sa panid 11]

Mga usa ka gatos ka teksto sa Bibliya nagapakita nga ang tawhanong kalag mamatay, malaglag; makakita ka bag teksto nga nagaingong kini dili mamatay?

[Letrato sa panid 10]

Ikaw ba mao kining mga tawhana sa nangagi?