Kapitulo 10—Pagkaluwas Ngadto sa Usa ka Bag-ong Yuta
“Sila Dili na Pagagutomon”
1. Unsa ka seryoso ang kabalaka sa kalibotan mahitungod sa kalan-on?
Ang usa sa dakong suliran nga giatubang sa kalibotan karon mao ang kalan-on. Ang taas nga mga prisyo nakahatag kalisod sa kadaghanan. Giatubang ang uban ug kagutmanan mismo. Karong bag-o gitaho nga matag tuig 40 ka milyong tawo—sa ubang mga tuig sama ka daghana sa 50 ka milyon—ang nangamatay tungod kay wala silay kalan-on nga ilang gikinahanglan. Hapit napulo ka pilo nianang gidaghanona ang nag-antos sa grabeng malnutrisyon. Bisag sobra ang ani sa ubang mga nasod kay sa ilang makaon, ang politikal nga pag-indigay ug hakog nga pangomersiyo sagad maoy makabalda sa mga paningkamot aron ang sobrang kalan-on mabatonan niadtong may dakong panginahanglan niini.—Itandi sa Pinadayag 6:5, 6.
2. Bisan diha sa dagayang kayutaan, nganong may katarongang mabalaka ang katawhan?
2 Gani ang yuta nga daw dagaya nagaatubang gihapon ug makapabalakang umaabot. Ngano? Ang bag-ong mga paagi sa pagpang-uma nagadepende sa asiete, ug ang suplay sa kalibotan limitado. Ang sobrang paggamit sa komersiyal nga mga abuno naghugaw sa ilang mga tuboran sa tubig. Ang sobrang paggamit sa pamatay sa dangan, nga gidesinyo sa pagpanalipod sa mga tanom, nakadaot usab sa mga organismo nga niini nagadepende ang umaabot nga pagkamabungahon sa yuta. Halos sa tanang natad sa tawhanong paningkamot, nagkatumpitumpi ang seryosong mga suliran. Gipakasama ni Aurelio Peccei, presidente sa internasyonal nga kapunongan sa mga makinaadmanon, ang kalibotan sa “usa ka nabandabandang bala nga nakahatag ug katalagman ngadto sa laing katalagman.” Realistiko ba ang paglaom sa umaabot diha sa usa ka kalibotan nga may rekord nga ingon niana?—Jeremias 10:23; Proverbio 14:12.
3. Kinsa ang makapasalig ug kadagaya sa pagkaon alang sa tanang katawhan, ug unsay nakahatag kanimo niana nga pagsalig?
3 Sa makataronganon, gidawat sa milyon-milyong mga tawo ang ilang panginahanglag tabang nga ang Diyos lamang ang makahatag. Tapos nakasusi sa tagna sa Bibliya, sila nasayod nga gipalingkod na ni Jehova nga Diyos ang iyang langitnong Anak si Jesu-Kristo sa trono ug gihatagan siya sa tanang yuta ingong iyang kabtangan. (Salmo 2:7, 8) Siya may kaalam ug katakos sa paghatag ug pasalig nga ang tanang katawhan dagayang tagan-an gikan sa abot sa yuta. (Salmo 72:7, 8, 16; Colosas 1:15-17) Dihang wagtangon ang hakog nga sistema, si Kristo ang magdumala sa mga paningkamot sa mga tawong mangaluwas aron ang yuta mahimong usa ka mabungahong Paraiso.
4. Aron makapahimulos niining pisikal nga mga tagana, unsay kinahanglang buhaton nato karon?
4 Apan, ang mga tawo nga makabaton sa walay kataposang kaayohan sa iyang pagmando, mao kadtong nakasabot nga dili lamang mabuhi ang tawo sa tinapay, mga tawong nagapabili sa espirituwal nga mga hiyas ug sa dakong panginahanglan sa pagkuhag kalig-on gikan sa pagkakat-on ug sa pagtuman sa kabubut-on sa Diyos. Ang Bibliya sa masubsob nagpasiugda sa pagkahinungdanon niini. (Juan 4:34; 6:27; Jeremias 15:16) Gipasiugda kini ni Jesus dihang miingon siya: “Nahisulat na, ‘Ang tawo mabuhi dili sa tinapay lamang kondili sa mga pulong nga magagula sa baba ni Jehova.’” (Mateo 4:4) Atong gikinahanglan kanang maong espirituwal nga pagkaon karon, kon buot kitang mabuhi sa kataposan sa presenteng kalibotan. Kon sa unsang paagi atong mabatonan kana giilustrar alang kanato diha sa asoy sa Bibliya mahitungod kang Jose ug sa iyang mga igsoon.
“Pangadto Kamo Kang Jose”
5. Sa unsang paagi nahimong ulipon si Jose didto sa Ehipto?
5 Ang Diyos mihatag kang Jose, ang apo sa tuhod ni Abraham, ug mga damgo nga nagpaila nga may dakong papel si Jose sa kinabuhi. Tungod niini, ug sa kamatuoran nga gimahal siya sa iyang amahan, ang napulo ka igsoon sa amahan ni Jose nagdumot kang Jose. Naglaraw sila sa pagpatay kaniya apan sa kataposan gibaligya siya ingong ulipon, ug siya gidala sa Ehipto. Sa unsang paagi ang katuyoan sa Diyos may labot kang Jose matuman karon?—Genesis 37:3-11, 28.
6. (a) Sa unsang paagi nakuha ang pagtad ni Paraon ngadto kang Jose? (b) Unsa ang mga damgo nga nakatugaw kang Paraon?
6 Dihang nagpuingong 30 si Jose, gipadamgo ug duha ka damgo ni Jehova si Paraon, nga hari sa Ehipto, nga nagsamok kaniya. Sa unang damgo nakakita siyag pito ka baka nga “maanindot ug panagway ug tambok,” ug dihay laing pito ka baka nga “mangil-ad ug panagway ug niwang.” Gikaon sa niwang nga mga baka ang tambok nga mga baka. Sa laing damgo nakita ni Paraon ang pito ka uhay gikan sa usa ka lindog, “bus-ok ug maanindot,” ug ang pito ka laing uhay “gagmay ug nakusokuso sa hangin sa silangan.” Sa makausa pa, gikaon sa gagmay ang bus-ok. Unsay kahulogan niining tanan? Walay usa niining maalamong lalaki sa Ehipto ang nakasaysay sa mga damgo. Apan ang magtitiing ni Paraon nakahinumdom nga, dihang nabilanggo, ang kaubang binilanggo, nga si Jose, tukmang nakasaysay sa mga damgo. Dihadiha gipatawag ni Paraon si Jose.—Genesis 41:1-15.
7. (a) Sa unsang paagi nahimong administrador sa kalan-on si Jose sa Ehipto? (b) Dihang migrabe ang kagutmanan, unsay gihimo sa mga Ehiptohanon aron mabuhi?
7 Wala magpasidungog sa iyang kaugalingon, gisultihan ni Jose si Paraon: “Ang damgo ni Paraon usa lamang. Ang himoon sa matuod nga Diyos iyang ipahayag kang Paraon.” (Genesis 41:16, 25) Gisaysay ni Jose nga ang ikaduhang damgo samag kahulogan sa una ug gipasiugda ang pagkapiho niini. Ang pito ka tuig sa kadagaya sa Ehipto sundan ug pito ka tuig nga gutom. Iyang gitambagan si Paraon sa pagtudlo ug kuwalipikadong tawo sa pagdumala sa paghipos ug trigo sa mga tuig sa kadagaya sa pagpangandam alang sa gutom. Miila nga ang Diyos mismo nagbutyag niining tanan diha kang Jose, gitudlo ni Paraon si Jose ingong administrador sa kalan-on, naghatag kaniyag awtoridad sa Ehipto nga ikaduha lamang kang Paraon. Sumala sa gitagna, ang pito ka tuig sa tagsaong kadagaya miabot, ug nagpatigom si Jose ug hilabihan ka daghang kalan-on. Dayon miabot ang gitagnang pito ka tuig nga gutom sa yuta. Dihang nangayo ang katawhan kang Paraon ug tinapay, siya mitubag: “Pangadto kamo kang Jose. Ug kon unsay iyang ipabuhat kaninyo, buhaton ninyo.” Busa gibaligyaan sila ni Jose ug bugas—sa sinugdan gibayran ug salapi, dayon sa ilang mga kahayopan, ug sa kataposan baylo sa ilang kaugalingon ugsa ilang yuta. Aron mabuhi, bug-os nilang gihatag ang ilang kaugalingon sa pag-alagad kang Paraon.—Genesis 41:26-49, 53-56; 47:13-26.
8. (a) Aron makabaton sa gikinahanglang kalan-on, unsay gipangayo diha sa mga igsoon sa amahan ni Jose? (b) Nganong ang rekord bahin niini gitipigan?
8 Nakaapekto usab ang gutom sa mga yuta sa kasikbit sa Ehipto. Sa ulahi miabot ang mga igsoon sa amahan ni Jose gikan sa Canaan. Kapin sa 20 ka tuig ang milabay sukad nga ilang gibaligya siya sa pagkaulipon, ug sila wala makaila kaniya. Miyukbo sila sa iyang atubangan, nga maoy gitagna sa mga damgo ni Jose sa dugay nang panahon, nga mianha aron makaremedyog kalan-on. (Genesis 37:6, 7; 42:5-7) Sa maalamong paagi gisulayan sila ni Jose ug nakakitag malig-ong ebidensiya nga nausab na ang ilang kaisipan kaniya ug sa ilang amahan. Sa kataposan nagpaila siya sa iyang kaugalingon ug misaysay nga kadto sa tinuod maoy sa “pagluwas sa kinabuhi” nga sa ingon gipadala siya sa Diyos ngadto sa Ehipto nga nag-una kanila. Sumala sa iyang pagbuot, ilang gidala ang ilang amahan ug ang ilang mga pamilya sa Ehipto. (Genesis 45:1-11) Kining tanan natala sa alang atong kaayohan, ug ang matagnaong kahulogan niini adunay kalabotan sa mga hitabo sa atong adlaw.—Roma 15:4.
Pagtagbaw sa Atong Kagutom ug Kauhaw Karon
9. (a) Unsay hinungdan sa espirituwal nga kagutmanan sa kalibotan karon? (b) Nganong mao kini ang hinungdan sa mga suliran sa katawhan?
9 Ang usa sa mga hinungdan sa suliran sa katawhan mao ang espirituwal nga kagutmanan. Tungod kay ilang gitalikdan si Jehova, wala niya sila hatagi ug pagsabot sa iyang Pulong, ug, ingong resulta, sila nag-antos sa “kagutmanan, dili kagutmanan sa tinapay, ni kauhaw sa tubig, kondili kagutmanan sa pagpatalinghog sa mga pulong ni Jehova.” (Amos 8:11) Ang gigutom sa espirituwal nga katawhan nagapangitag mga tubag sa hinungdanong mga pangutana sama sa: Unsay kahulogan sa kinabuhi? Nganong mamatay ang mga tawo? Duna bay tinuod nga paglaom alang sa umaabot? Nabuang tungod sa espirituwal nga kagutom, ginadaot lamang sa mga tawo ang ilang kaugalingon ug ang uban, dihang makigbahin sila sa imoral ug kriminal nga paggawi aron sa pagtagbaw sa ilang mga pangibog.
10. (a) Ingong katumanan sa Isaias 65:13, 14, unsang kahimtang ang naglungtad taliwala sa katawhan ni Jehova? (b) Kanus-a ang mga yugto sa espirituwal nga kagutmanan ug espirituwal nga kadagaya?
10 Sa kasukwahi, gihatagan ni Jehova ug espirituwal nga kadagaya ang iyang maunongong mga alagad, ug ang tinuod nga gugma naglungtad taliwala kanila. Iyang gibuksan ang ilang pagsabot sa makatagbawng espirituwal nga mga kamatuoran sa iyang dinasig nga Pulong ug gihatagan sila ug buluhaton nga buhaton ingong iyang mga saksi. Sila malipayong nakigbahin niining mga kamatuorana sa uban nga gigutom sa espirituwal ug nagapangitag kinabuhi may labot sa Diyos. (Isaias 65:13, 14; Lucas 6:21) Balik sa karaang Ehipto ang pito ka tuig nga kagutmanan misunod sa pito ka tuig nga kadagaya. Apan sa atong adlaw nagdungan ang mga yugto sa espirituwal nga kagutmanan ug espirituwal nga kadagaya.
11. (a) Kinsa ang gilarawanan ni Paraon ug ni Jose, ug ngano? (b) Sa unsang paagi ang dalan nga gisubay sa “dakong panon” kaamgid niadtong gihampak sa gutom nga mga Ehiptohanon?
11 Karon dili si Paraon ang magmamando. Si Jehova nga Diyos, ang Dakong Paraon, mao ang Unibersal nga Soberano. Iyang gihatag kang Jesu-Kristo ang awtoridad ikaduha lamang kaniya. Ingong Mas Dakong Jose, si Jesus mao ang Usa nga gisaligan ni Jehova sa kaakohan sa pag-apod-apod sa makahatag kinabuhi nga espirituwal nga pagkaon. Ang relihiyoso ug sekular nga mga pilosopiya sa kalibotan nakahatag sa katawhan ug makaluyang espirituwal nga kagutom. Pinaagi lamang sa pagdangop kang Jesu-Kristo ug sa pagbaton ug espirituwal nga pagkaon sa paagi sa iyang pagdumala nga sila mapabaskog. Gihimo kana sa minilyong katawhan, nga gilarawanan sa gihampak sa kagutmanan nga Ehiptohanon. Pinaagi kang Jesu-Kristo bug-os silang nagpahinungod kang Jehova, ug busa lakip sila sa dakong panon sa umaabot nga mga makalabang-buhi sa umaabot nga adlaw sa balaang kasuko.
12. (a) Sa unsang paagi gihimo ni Jesus nga atua sa langit ang espirituwal nga pagkaon nga mabatonan nato dinhi sa yuta? (b) Unsay nakakabig kanimo mahitungod sa pag-ila sa “matinumanon ug maalamong ulipon”?
12 Apan si Jesus anaa sa langit. Sa unsang paagi gitagana niya ang pagkaon aron kita makapahimulos dinhi sa yuta? Siya nagtagna nga iyang buhaton kini pinaagi sa “matinumanon ug maalamong ulipon.” (Mateo 24:45-47) Kini maoy daghang bahing nga “ulipon,” nga gilangkoban sa iyang kongregasyon sa mga dinihogan sa espiritu samtang dinhi pa sa yuta. (Itandi sa Isias 43:10.) Ang nanghibilin kanila ania pa sa yuta. Kining tinuod nga Kristohanong kongregasyon daling mailhan pinaagi sa pagtandi sa mga pagtulon-an ug sa mga buhat niini diha sa Bibliya. Kini tinuod nga nagtudlo sa gisugo ni Jesus. Busa wala kini makigbahin sa politikal nga mga kalihokan sa kalibotan, apan ang tanang mga sakop niini maoy mga magwawali sa Gingharian sa Diyos. Dili sila sanga gikan sa mga sekta sa Kakristiyanohan. Sila nahiusa, sumala sa giingon ni Jesus mahitungod kanila—silang tanan mga Saksi ni Jehova sa pagsunod sa ilang Ginoo. (Tan-awa ang Juan 17:16, 20, 21; Mateo 24:14; 28:19, 20; Pinadayag 1:5) Gitagamtam nila ang espirituwal nga kadagaya ug mainandamon kaayo sa pagpakigbahin niini sa uban.
13. (a) Sa unsang paagi gipakita sa daghang mga tawo ang ilang kaugalingon nga sama sa napulo ka igsoon ni Jose sa amahan? (b) Sa unsang paagi nakapahimulos kitang tanan sa espirituwal nga pagkaon nga gitagana ni Kristo pinaagi sa “ulipon” nga matang?
13 Gitamay sa daghang mga tawo kining dinihogang mga Kristohanon, nga nag-ingon: ‘Nagtuo ba kamo nga mas maayo kamo kay kanamo? Nagtuo ba kamo nga kamoy ray husto?’ Apan sa ulahi mapainubsanong gidawat sa uban nga tinuod may mga saksi si Jehova sa yuta ug nga sila tinuod nga nagwali sa lyang pulong. Sila midangat sa pagsabot nga nagpakita ang Bibliya nga duna lamay usa ka tinuod Kristohanong kongregasyon ug nga ang mga sakop niini nahiusa. (Efeso 4:5; Roma 12:5) Ang matinud-anon ug mapainubsanong pagsusi sa mga kamatuoran nakaagak kanila nianang organisasyona. Ang napulo ka igsoon sa amahan ni Jose naglarawan niining mga tawhana, nga maglulutos kanhi sa dinihogang mga sumusunod ni Jesus kun mihatag ug moral nga pagpaluyo sa mga maglulutos apan karon nagpakita ug tinuod nga kausaban sa kasingkasing. (Juan 13:20) Mapasalamaton nilang gidawat ang espirituwal nga pagkaon nga gitagana ni Jesu-Kristo pinaagi sa iyang ‘matinumanon ug maalamon nga ulipon’ nga matang. Makabaton silag espirituwal nga kalig-on dihang mokaon sila sa mga kamatuoran sa Bibliya nga ginahisgotan sa mga publikasyon sa Watch Tower, regular nga tigtambongan sa mga miting sa mga Saksi ni Jehova ug aktibong nakigbahin sa pagtuman sa kabubut-on sa Diyos. Usa ka ba niining mga mapainubsanon?—Hebreohanon 10:23-25; itandi sa Juan 4:34.
14. Unsa ang espirituwal nga mga kahimtang ang gitagamtam niadtong nagkinabuhi sumala sa mga prinsipyo nga nakat-onan gikan ning dramaha sa Bibliya?
14 Ang malipayong kahupayan gitagamtam sa tanan nga mahigugmaong nagtugyan sa ilang mga kinabuhi aron magamit sa ilang Maglalalang pinaagi kang Jesu-Kristo. Sa espirituwal nga pagkasulti, “dili na sila pagagutomon pa ni pagauhawon, . . . tungod kay ang Kordero [Jesu-Kristo], nga anaa sa taliwad-an sa trono, magabantay kanila, ug magatultol kanila sa mga tuboran sa tubig sa kinabuhi.”—Roma 7:16, 17; Isaias 25:6-9.