Kapitulo 11
“Gumula Kamo sa Taliwala sa Babilonya”
1. (a) Sa unsang paagi kita nahibalo kon unsang matanga sa pagsimba ang kahimut-an sa Diyos? (b) Gikan diin nga giawhag kita sa Diyos sa paggula?
Daghang mga tawo nagbalhinbalhin gikan sa usa ka relihiyon ngadto sa lain, nagapangitag makatagbawng mga tubag sa ilang mga pangutana bahin sa kinabuhi. Sila nakakitag mga kaamgiran sa mga pagtuo ug mga buhat, ug daghang mga kalainan usab. Apan pinaagi lamang sa paggamit sa kaugalingong Pulong sa Diyos ingong giya nga makatino ang tawo kon haing mga tubaga ang tinuod ug unsang mga buhat ang tinuod nga kahimut-an sa Diyos. Pinaagi sa Bibliya, gipahibalo kita sa Maglalalang mahitungod sa iyang kaugalingon ug sa iyang katuyoan. Iyang giladlad kanato ang tinubdan sa bakak nga pagsimba. Sa pagbuhat sa ingon, siya nagpasidaan kanato batok nianang iyang gitawag nga “Babilonyang Bantogan” ug nag-awhag kanato sa “paggula” gikan sa iyang taliwala. Gisunod ba nimo kanang pasidaana?—Pinadayag 18:4, 21; Jeremias 51:6.
2. Unsa ang “Babilonyang Bantogan”?
2 Unsa ang “Babilonyang Bantogan”? Kon lantawon sa kinatibuk-an, ang tanang relihiyon naglaban sa mga kaisipan, mga pagtuo kun mga buhat nga nagagikan sa relihiyon sa karaang Babilonya nga gilangkoban sa Babilonyang Bantogan. Busa ang mga kinaiyahan niini mailhan pinaagi sa pagsusi sa gigikanan ug sa relihiyon sa karaang Babilonya mismo.
3. (a) Unsay sinugdanan sa karaang Babilonya, ug unsang espiritu ang gidasig sa magtutukod niini? (b) Sa unsang paagi kadtong espirituha makita sa mga relihiyon karon?
3 Kapin sa usa ka siglo human sa Lunop sa mga adlaw ni Noe, ang siyudad sa Babel (sa ulahi gitawag nga Babilonya) gilibotan ug torre—usa ka proyekto nga gisugdan ni Nimrod. Nagpasanay si Nimrod sa iyang mga kauban ug espiritu sa pag-alsa batok kang Jehova ug sa tinguha sa pagpadako sa ilang kaugalingon. (Genesis 10:9, 10; 11:1-9) Nakita ba nimo kanang espirituha karon—usa ka pagsalikway sa Pulong sa Diyos, bisan niadtong nangangkong relihiyoso, ug sa paggamit sa relihiyon aron makakuhag pagtagad sa ilang kaugalingon o aron mainila?
4. Sa unsang paagi gituis sa Babilonya ang kamatuoran mahitungod sa Diyos?
4 Ang tulo ka persona sa usa ka diyos mao ang nangibabaw sa relihiyon sa Babilonya. Dihay tulo ka persona sa diyos nga gilangkoban ni Anu, Bel ug Ea; lain naglakip kang Sin, Sharmash ug Ishtar. Dugang pa, puno ug mga larawan ang mga dapit sa pagsimba sa Babilonya. Kining tanan nakapalayo sa pagtagad gikan sa kamatuoran nga adunay usa lamang ka matuod nga Diyos, kansang ngalan mao si Jehova. (Deuteronomio 4:39; Juan 17:3) Ang hiyas ug paggawi nga maoy gilarawan diha sa ilang diyos, lakip sa paggamit sa walay kinabuhing mga rebulto, nakatuis sa kaisipan sa mga tawo bahin sa Maglalalang.—Jeremias 10:10, 14; 50:1, 38; 1 Corinto 10:14, 19-22.
5. (a) Sa unsang paagi ang Babilonyanhong pagtuo mahitungod sa kamatayon puno sa kabakakan ni Satanas kang Eva? (b) Unsa pang ubang mga pagtulon-an ang mitungha tungod niini?
5 Nagtuo ang mga Babilonyanhon nga agianan lamang ang kamatayon ngadto sa laing matang sa kinabuhi, apan sukwahi kini sa gipamulong sa Diyos ngadto sa atong unang mga ginikanan. Gipadako sa Gregong mga pilosopo kining ideyaha, sa pag-ingon nga ang tawo adunay dili mamatay nga kalag. Ang unang bakak sa Yawa mao nga kon supakon ni Adan ug Eva ang Diyos, sila ‘dili gayod mamatay’ sa lawas. Karon gipatuo ang mga tawo nga ang mabuhi sa walay kataposan mao kanang ilang kinasulorang bahin nga dili nila makita. Kining bakak nga pagtulon-an nakaagak sa pagtuo sa impiyernong kalayo, purgatoryo, pagsimba sa mga kagikan ug daghan pa.—Genesis 3:1-5; Ecclesiastes 9:5, 10; Ezekiel 18:4.
6. (a) Unsa pay ubang mga praktis nga komun karon nga nagagikan sa relihiyon sa Babilonya? (b) Unsa kini ka seryoso?
6 Gilakip usab sa relihiyon sa Babilonya ang praktis sa astrolohiya, pagdiwata, salamangka ug pamarang, nga pinaagi niini ang tawo midangop sa paggiya sa mga dili-ingon nato nga magamit sa pagpadato sa ilang kaugalingon ug sa pagkontrolar sa uban. (Daniel 2:27; Ezekiel 21:21) Pagkadaghan niining mga buhata karon, bisan pag gipasidan-an silang tanan batok niini sa Bibliya! Pinaagi sa pagpakigbahin kanila, ang mga tawo nakigdula mismo sa mga kamot sa yawan-ong mga espiritu, kinsa mangayog mabangis nga ganti sa mga pabor nga ilang ihatag.—Deuteronomio 18:10-12; Isaias 8:19; Buhat 16:16; Pinadayag 18:21, 23.
7. Unsay pamatuod nga imong nakita nga ang Babilonyang Batogan (a) adunay mahugawng relasyon sa mga magmamando sa politika? (b) adunay daghang bahandi? (c) maoy responsabli sa pag-ulag dugo?
7 Aron mailhan pa ang Babilonyang Bantogan, ang Bibliya nagsugilon bahin sa iyang malaw-ayng relasyon sa politikal nga mga magmamando, ang iyang bahandi ug ang iyang tulobagon sa pag-ula sa dugo, lakip nianang sa tinuod nga mga alagad sa Diyos. (Pinadayag 17:1-6; 18:24) Ang rekord sa relihiyon sa kalibotan niining bahina gidungog.
Unsa ka Dak-a ang Imong Gugma sa Kamatuoran?
8. Kinsa sa tinuod ang diyos sa Babilonyang Bantogan?
8 Kon sakop ang tawo sa bisan hain niining bahina sa Babilonyang Bantogan, ug nakigduyog sa iyang mga kasaulogan o nagasundog sa iyang mga paagi, kinsa ang ilang gipasidunggan? Sa pagkatinuod dili si Jehova. Hinunoa, kining tawhana, sa pagkatinuod, nagayukbo sa “Diyos niining sistema sa mga butang,” ang usa nga nagabuta sa mga hunahuna sa katawhan.—2 Corinto 4:4.
9. Sa unsang paagi gipahisalaag ni Satanas ang daghan kaayong tawo pinaagi sa relihiyon?
9 Apan nganong daghan man kaayo ang nahisalaag niining bahina? Ang Bibliya nagtubag nga sila nangahimong biktima sa lit-ag ni Satanas “tungod kay sila nagadumili sa paghigugma sa kamatuoran.” (2 Tesalonica 2:9-12) Dili kini makapatingala kanato. Pilay inyong nahibaloan nga nagasulti sa kamatuoran sa tanang panahon—sa balay, sa negosyo, kon sudyaan sa ilang kaugalingong mga kakulangan? Dihang pakitaan kon unsay gipamulong sa Bibliya, sa pulong sa Diyos sa kamatuoran, pila ang andam sa pagbulag sa ilang daang mga pagtuo o mga batasan, sa pagbag-o sa ilang paagi sa kinabuhi, sa pagsunod niini? Ingon ka ba niini?
10. (a) Unsang matanga sa pagkatawo ang ginapangita ni Jehova? (b) Sa unsang paagi makapakita kitag ingon nianang matanga sa pagkatawo?
10 Si Jehova nagapangitag tawo nga may gugma sa kamatuoran. Siya mao “ang Diyos sa kamatuoran.” (Salmo 31:5) Ang mga pagtulon-an sa iyang Pulong dili handurawan. Sila mao ang kamatuoran. Ngadto sa usa ka babaye sa Samaria, si Jesus miingon: “Ang tinuod nga mga magsisimba magasimba sa Amahan sa espiritu ug kamatuoran, kay kini ang ginapangita sa Amahan nga maoy managsimba kaniya. Ang Diyos Espiritu, ug ang magasimba kaniya kinahanglan managsimba diha sa espiritu ug sa kamatuoran.” (Juan 4:23, 24) Nagtinguha ba ikaw nga maingon ka nianang matanga sa tawo?
Ang Tagana sa Diyos ug Kagawasan
11. (a) Unsay gitagna sa Isaias 49:8, 9? (b) Kanus-a kana unang natuman? (c) Nganong makaiikag kana kanato?
11 Aron makahatag ug giya alang kanato, si Jehova sa dugay nang panahong miagi nagparekord diha sa Bibliya ug saad sa kaluwasan gikan sa malupigong pagmando sa Babilonya. Natuman kini dihang gipagawas ni Siro nga Bantogan ang mga Hudiyo, ug ang dili-Israelinhong Nethinim, aron sila makapauli sa Jerusalem sa pagtukod sa templo ni Jehova. Apan dili kay mao lamang kana ang katuyoan. Ang nahitabo niadto nagpunting ug laing kaluwasan pinaagi sa Dakong Siro, ang Ginoong Jesu-Kristo. Ang atong pagsunod sa iyang mga pagtultol makapanalipod kanato nga dili mapahisalaag sa mga tawo nga nagapangita lamag kadungganan sa ilang kaugalingon. Ngadto kang Jesus aplikado ang tagna nga nag-ingon: “Mao kini ang giingon ni Jehova: ‘Sa panahon sa maayong kabubut-on ako nagatubag kanimo, ug sa adlaw sa kaluwasan ako nagatabang kanimo; ug akong bantayan ikaw ug akong ihatag ikaw nga usa ka tugon sa katawhan, aron sa pagpapuyo sa yuta pag-usab, sa paghimo kanila nga magapanunod sa biniyaan nga mga kabilin, nga magaingon sa mga binilanggo, “Panggula kamo!” nga anaa sa kangitngitan, “Pakita kamo!”’” (Isaias 49:8, 9) Sa unsang paagi natuman kini diha kang Jesus?
12. (a) Sa unsang paagi natuman kanang tagnaa diha kang Jesus? (Lucas 4:16-18) (b) Unsang pagdasig ang makita diha niana alang kanato?
12 Gitubag ni Jehova ang mga pag-ampo ni Jesus. Iyang gitabangan siya ug gipanalipdan ang iyang Anak dihang maisogong giladlad ni Jesus ang relihiyosong kabakakan ug nagpaila sa ‘kamatuoran nga makapagawas sa katawhan.’ (Juan 8:32) Bisan pa sa mga paningkamot ni Satanas sa paglaglag kang Jesus, gitipigan ni Jehova ang iyang Anak hangtod nga natapos ang iyang buluhaton sa yuta. Dayon iyang gibanhaw si Jesus sa dili mamatayng kinabuhi sa langit, didto sa pagpadayon sa iyang buluhaton sa kagawasan. Gihatagan siya sa Diyos ug “tugon,” kun panumpa, nga dunay pagpagawas sa katawhan gikan sa kaulipnan sa Babilonyang Bantogan. Sama nga adunay tino nga pagkabanhaw ug paghimaya ni Jesu-Kristo sa langit, sa ingon tino nga ang mga matarong nga tawo luwason gikan sa relihiyosong kangitngitan sa Babilonyang Bantogan. Makabaton ka bag kaayohan gikan niana nga kaluwasan?
13. Gikan sa 36 K.P. paunahan, sa unsang paagi napamatud-ang “kahayag sa kanasoran” si Jesus?
13 Mahitungod sa sukod sa kagawasan, si Jehova mitagna: “Ako usab ikaw ihatag nga kahayag alang sa kanasoran, aron ikaw mamahimo nga akong kaluwasan hangtod sa kinatumyan sa yuta.” (Isaias 49:6) Busa, sa 36 K.P. ang mga Hentil, kun mga katawhan sa dili-Hudiyohanong mga nasod, gisugdan sa pagdala ngadto sa kongregasyon sa espirituwal nga kongregasyon sa Israel. Apan, ang pagdugang sa mga Hentil ngadto sa dinihogan sa espiritu nga Kristohanong kongregasyon, dili sa bug-os nga sukod nga niini nakaalagad si Jesus ingong “kahayag sa kanasoran.”
14. (a) Ngadto kang kinsa nga si Jesus usab nahimong kahayag “sa kanasoran”? (b) Nganong ang grupong mibiya sa karaang Babilonya ang naglarawan niini? (c) Unsang espirituwal nga mga panalangin ang ilang gitagamtam karon, sa katumanan sa Isaias 49:10?
14 Si Jesus nahibalo nga iyang tigomon ang “ubang mga karnero” sa pagtagamtam ug kinabuhing walay kataposan sa yuta. (Juan 10:16) Sila naglarawan sa dili-Israelinhong mga Nethinim ug sa mga anak nga lalaki sa mga ulipon ni Solomon nga mikuyog sa mga Hudiyo sa 537 W.K.P. sa ilang paggawas gikan sa Babilonya. (Ezra 2:1, 43-58) Aduna nay dakong panon sa katawhan karong modernong panahon ang mipatalinghog sa sugo nga “gumula” sa Babilonyang Bantogan. Sila karon nakatagamtam sa makapapreskong espirituwal nga mga panalangin nga gitagna diha sa Isaias 49:10: “Sila dili pagagutomon, ni pagauhawon, ni ang kainit ni ang adlaw mohampak kanila. Kay ang Usa nga may kaluoy kanila magmando kanila, bisan ubay sa tuboran sa tubig siya magamando kanila.” Diha sa Pinadayag 7:9, 16, 17, kining mga panalangina sa tukma aplikado sa “dakong panon” sa “ubang mga karnero.”
“Gumula Kamo Kaniya, Katawhan Ko”
15. Nganong giawhag sa Bibliya kadtong mamahimong katawhan sa Diyos sa paggula gikan sa Babilonyang Bantogan?
15 Diha sa dinasig nga panan-awon gipakita diha kang apostol Juan ang kahulogan sa paghukom sa Diyos batok sa Babilonyang Bantogan. Tungod sa pagkapiho niini, ang usa ka manulonda sa langit, nga nagpamulong alang sa Diyos, nag-awhag: “Gumula kamo kaniya, katawhan ko, aron dili kamo makaapil sa iyang mga kasal-anan, ug aron dili kamo makaambit sa iyang mga hampak. Kay ang iyang kasal-anan nagatipun-og sungko sa langit, ug nahinumdoman sa Diyos ang iyang mga daotang binuhatan.”—Pinadayag 18:4, 5.
16. Unsay timailhan kon kita tinuod bang nagapatalinghog nianang sugoa?
16 Ang mga sakop sa espirituwal nga Israel mipatalinghog nianang sugoa, ug karon ilang giawhag ang uban sa pagbuhat usab sa ingon. Sila nasayod nga kon isagol sa tawo ang tinuod nga pagsimba sa bakak, siya dili makapahimuot sa Diyos. Kon adunay makig-uban sa mga Saksi ni Jehova apan dili magaputol sa iyang kalangkitan sa Babilonyang Bantogan, sa unsang paagi makaingon siya nga dili siya bahin kaniya? Bisag dili siya motambong sa iyang relihiyosong mga serbisyo, apan kon nakigbahin siya sa iyang relihiyosong mga piyesta diha sa iyang trabahoan o sa iyang mga paryente, siya nagahikap gihapon sa mahugaw. (Isaias 52:11) Kon moapil siya sa mga tradisyon sa pamilya nga nagapabanaag sa pagkadili mamatay sa kalag o sa patuotuong kahadlok sa daotang mga espiritu, siya nakigbahin gihapon sa iyang mga kasal-anan. Dili mahimong duha ka kiliran atong tindogan. Kon kita nagtuo nga si Jehova mao ang tinuod nga Diyos, nan siya lamang ang atong alagaran.—1 Hari 18:21.
17. (a) Sumala sa gipakita sa Pinadayag 14:6, 7, gidapit sa pagbuhat ug unsa ang mga tawo? (b) Aron makasimba kang Jehova nga madinawaton, unsang ubang sugo nga ilang kinahanglang sundon?
17 Ngadto sa mga tawo sa tanang nasod ug tribo ug pinulongan, kining madanihong imbitasyon gitanyag: Duyog sa pagsimba kang Jehova, ang bugtong tinuod nga Diyos! (Pinadayag 14:6, 7) Sa pagbuhat niini, kinahanglang imong sundogon usab ang mga alagad ni Jehova sa karaang panahon kinsa misunod sa sugo: “Gumula kamo sa taliwala sa Babilonya, ug luwasa ang inyong tagsatagsa ka kalag.”—Jeremias 51:6.