Kapitulo 13—Pagkaluwas Ngadto sa Usa ka Bag-ong Yuta
Usa ka Panahon sa Paglalang Pag-usab
1. (a) Unsang kahibulongang higayon ang magapaabot sa mga maluwas ngadto sa “bag-ong yuta”? (b) Apan unsay gikinahanglan niana?
Ang pagkaluwas sa kataposan sa presenteng hiwing kalibotan maoy talagsaong palaaboton. Buot natong makalingkawas sa mga inhustisya, sa kadalo ug sa kapintasan niining kalibotana. Apan may lain pang nagahimong mas tilinguhaon nga kita maluwas. Unsa ba kana? Ang kamatuorang ang tanang mahimong bahin sa “bag-ong yuta” makabaton usab ug higayong mahigawas sa ilang kaugalingong mga pagkadili-hingpit, sa sakit ug sa kinabuhing may kasakit, oo, bisan sa kamatayon. (Pinadayag 21:1-5) Hinunoa, aron kini mahitabo ang sala mismo kinahanglang bug-os malangkat. Sa unsang paagi kana posible? Kini nalangkit sa gibatbat ni Jesu-Kristo nga “ang paglalang pag-usab.”
2. Unsa ang “paglalang pag-usab” nga gitumong sa Mateo 19:28?
2 Ngadto sa iyang mga apostol, si Jesus miingon: “Sa paglalang pag-usab, sa diha nga ang Anak sa tawo magalingkod na sa iyang mahimayaong trono, kamo nga nanagsunod kanako magalingkod usab sa napulog-duha ka trono, nga magahukom sa napulog-duha ka banay sa Israel.” (Mateo 19:28) Ang paglalang pag-usab mao unyay panahon sa “pagbag-o,” usa ka panahon “dihang ang tanan pagabagohon,” sumala sa pagpahayag niana sa ubang hubad sa Bibliya. (The Emphasised Bible, ni Rotherham; The Jerusalem Bible) Pinaagi niining paglalang pag-usab, posible na nga ang mga tawo makatagamtam sa kahingpitan nga nabatonan sa katawhan sa sinugdan.
3. (a) Unsay misangpot gikan sa sala ni Adan? (b) Nganong walay mausa sa mga kaliwat ni Adan ang nakapahigawas sa ilang kaugalingon sa mga epekto sa napanunod nga sala?
3 Tungod sa salang napanunod gikan kang Adan, ang tanan niyang kaliwat kinahanglang mamatay, ug daghan ang nag-antos sa makapaguol nga sakit nga mohatod sa kamatayon. (Roma 5:12) Ang pagkahigawas sa kamatayon dili mapalit sa salapi. Walay binuhatan nga mahimo sa dili-hingpit nga tawo ang mahagoan aron siya o ang lain maluwas. Ang balaang hustisya nagkinahanglan nga aron maangkon pag-usab sa katawhan ang higayong matagamtam ang kinabuhing dayon, ang usa ka halad pagahimoon nga katumbas sa bili nga giwala ni Adan, nga mao, ang hingpit tawhanong kinabuhi. Walay mausa sa kaliwat ni Adan ang nakabaton nianang kinabuhia aron ihalad.—Salmo 49:7-9; Ecclesiastes 7:20.
4. (a) Sa unsang paagi gitagana ang gikinahanglang lukat? (b) Sa unsang paagi kita makabatog kaayohan gikan niana?
4 Sa pagkamaluluy-on, si Jehova mihimo sa gikinahanglang tagana pinaagi sa pagpadala sa iyang bugtong nga Anak, si Jesus, nganhi sa yuta ingong hingpit nga tawo aron itugyan ang iyang kinabuhi ingong “usa ka tumbas nga lukat.” (1 Timoteo 2:5, 6) Pagkadakong pasundayag sa dili-takos nga kalulot ug sa gugma sa Diyos alang sa katawhan! Ang kinabuhing posible ingong sangpotanan dili butang atong mahagoan samag suhol kondili usa ka gasa gikan sa Diyos. Ugaling, kini igahatag lamang ngadto niadtong tinuod nagaila sa ilang panginahanglan niining balaang tagana, nga magbutang ug pagtuo niana ug magpasundayag nianang pagtuoha pinaagi sa pagkamasinugtanon ngadto sa Anak sa Diyos. (Roma 6:23; Juan 3:16, 36) Apan diin man masinati sa katawhan ang mga kaayohan nianang halara?
Mga Kaayohan Karon sa Halad ni Kristo
5. (a) Kinsa ang unang nakabatog kaayohan sa halad ni Kristo? (b) Unsang laing grupo ang nakabatog kaayohan, ug ilabina sukad kanus-a?
5 Ang mga kaayohan misugod sa pagtandog sa mga kinabuhi sa tawo dihadiha tapos ipresentar ni Jesu-Kristo (diha sa papel ingong dakong Hataas nga Saserdote sa Diyos) ang bili sa iyang halad atubangan sa Diyos sa langit. Nahauna, sugod sa Pentekostes sa 33 K.P., kining mga kaayohana unang nasinati niadtong si kinsa, nga gitawag aron mahimong mga manununod uban ni Kristo, mag-alagad nga mga hari ug mga seserdote uban kaniya sa langit. (Buhat 2:32, 33; Colosas 1:13, 14) Unya, nga talagsaon sa 1935, ang mga tawong midawat sa paglaom sa kinabuhing dayon sa yuta misugod sa pagpadayag sa ilang kaugalingon. Ang ilang paglaom, usab, naposible sa halad ni Kristo. (1 Juan 2:1, 2) Kining progresibong pagpadapat sa bili nianang maong halad gipaila sa mga nahitabo sa Adlaw sa Pagtabon sa Sala sa karaang Israel.
6. Ilaraw sa daklit ang nahitabo sa Adlaw sa Pagtabon sa Sala.
6 Ang usa ka hataas nga saserdote nga membro sa Levihanong balay ni Aaron mao ang nagdumala sa sagradong tabernakulo sa Israel, ug sa ulahi sa templo. Ang ubang lalaki sa balay ni Aaron maoy ubos nga mga saserdote, ug ang nahibiling mga lalaki sa banay ni Levi nag-alagad nga mga luyoluyo. Aron sa pagtabon sa mga sala, ang hataas nga saserdote naghalad ug duha ka hayop, nga ang dugo sa matag usa gipresentar nga bulag diha sa Labing Balaan, sumala sa gibaod ni Jehova. Nahauna mao ang nating laking baka nga ihalad sa Aaronikanhong hataas nga saserdote alang sa “iyang kaugalingon ug sa iyang balay,” nga nag-apil sa tibuok banay ni Levi. (Levitico 16:11, 14) Sunod mao ang kanding nga gipresentar ingong halad sa sala “alang sa katawhan,” ang ubang napulog-duha ka banay. (Levitico 16:15) Dugang pa, ang mga sala sa tibuok Israel gisugid ibabaw sa ulo sa usa ka buhing kanding, ug kadto gidala ngadto sa kamingawan. (Levitico 16:21, 22) Unsay gipasabot niadtong tanan?
7. (a) Unsang usa ka halad ang gilandongan didto? (b) Nganong dili lamang usa ka hayop ang gigamit sa halad?
7 Gisaysay ni apostol Pablo nga ang katumanan niadto nahasentro sa usa ka halad ni Jesu-Kristo. “Si Kristo misulod, dili ngadto sa usa ka balaang dapit nga binuhat sa mga kamot, nga maoy hulad sa matuod, kondili ngadto sa langit mismo, sa maong panahon sa pag-atubang sa Diyos alang kanato . . . aron sa pagpapas sa sala pinaagi sa paghalad sa iyang kaugalingon.” (Hebreohanon 9:24-26) Nan nganong ang dugo sa labaw sa usa ka hayop ang gidala sa Labing Balaan sa Adlaw sa Pagtabon sa Sala sa Israel? Kadto maoy sa pagpaila sa nagkalainlaing bahin sa mahimo sa hingpit tawhanong halad ni Jesus. Ug ang usa pa ka bahin gipasiugda sa pagsugid sa mga sala sa nasod ibabaw sa ulo sa usa ka buhing kanding ug dayon pagdala niana ngadto sa kamingawan.
8. (a) Sa unsang paagi ang mga paagi sa Adlaw sa Pagtabon sa Sala nagpaila kon kinsay unang makabatog kaayohan sa halad ni Kristo? (b) Unsang pagpadapat sa halad ni Jesus ang gipaila sa halad sa sala “alang sa katawhan”? (c) Unsang dugang kamatuoran ang giilustrar sa pagdala sa usa ka kanding ngadto sa kamingawan?
8 Maingong ang dugo gikan sa laking baka nga gihalad alang sa balay ni Aaron gidala una ngadto sa Labing Balaan, busa ang mga kaayohan sa halad ni Jesus gipadapat una niadtong makauban ni Kristo sa langitnong pagkasaserdote. Kadto gihimo sukad sa 33 K.P. paunahan. Si Jesu-Kristo walay mga sala nga alang niana pagahimoon ang pagtabon sa sala, sama kang Aaron, apan kadtong mahimong mga ubos nga saserdote uban ni Kristo may mga sala. Sila gilandongan sa banay ni Levi. (1 Pedro 2:4, 5) Ang pagpresentar sa dugo gikan sa ikaduhang halad, ang kanding sa halad sa sala “alang sa katawhan,” nagpailang uban pa sa katawhan makabatog kaayohan sa halad ni Jesus tapos sa langitnong matang. Kini sila maoy mga tawo nga makabatog kinabuhi sa napasig-uling Paraiso sa yuta. Sila gihulagwayan sa “napulog-duha [dili-saserdotehanong] mga banay sa Israel” sa Adlaw sa Pagtabon sa Sala. (Mateo 19:28; Salmo 37:29) Dili lamang si Jesus namatay alang kanilang tanan, apan sa aktuwal iyang ginadala sa halayo ang mga sala niadtong si kinsa iyang gipakamatyan sa haladnong paagi, nga nagdalag kahupayan kanila. Kini gipaila sa kamatuoran nga, sa kataposan, tapos ang mga sala sa Israel gisugid ibabaw sa usa ka buhing kanding, kadto gidala ngadto sa kamingawan, nga dili na gayod igkita pag-usab.—Salmo 103:12; Isaias 53:4-6.
9. (a) Unsang mga panalangin ang gitagamtam karon niadtong nagtuo sa halad ni Kristo karon? (b) Unsang dugang mga kaayohan ang moabot sa ulahi?
9 Alang sa tanang nagtuo sa mahigugmaong tagana ni Jehova pinaagi kang Kristo, ang matuod nga kapasayloan sa mga sala, ang mahinlong pagbarog atubangan sa Diyos, karon posible na walay sapayan sa ilang kanhing paagi sa kinabuhi. Sila makatagamtam sa bililhong panalangin sa paghatag ug balaang pag-alagad sa Diyos uban ang hinlong konsensiya. (1 Corinto 6:9-11; Hebreohanon 9:13, 14) Apan kini wala magkahulogan nga sila pagkakaron hatagan sa kinabuhing libre sa tanang epekto sa sala. (1 Juan 1:8-10; Roma 7:21-25) Alang niadtong magamando sa langit uban ni Kristo, ang maong kinabuhi maangkon lamang dihang ilang matapos ang ilang yutan-ong pagkinabuhi ug banhawon ngadto sa imortalidad sa mga langit. Alang niadtong ubang tawo, ang bug-os nga kahupayan gikan sa sala maposible pinaagi sa paglalang pag-usab.
“Sa Paglalang Pag-usab”
10. (a) Kanus-a nagsugod ang paglalang pag-usab? (b) May gihatagan na bag mga trono ingong katumanan sa saad ni Jesus?
10 Sumala sa giingon ni Jesus, ang paglalang pag-usab maoy “dihang ang Anak sa tawo [Jesu-Kristo] magalingkod sa iyang mahimayaong trono.” (Mateo 19:28) Hinuon, ang tanang butang wala mahitabo dayon sa dihang siya naentrono na. Tapos sa pagkaentrono ni Jesus sa 1914 K.P., iya unang gihinloan ang mga langit, nga nagpalagpot kang Satanas ug sa iyang mga demonyo. Unya iyang gibanhaw ang iyang dinihogang mga sumusunod ngadto sa langitnong himaya. (Pinadayag 12:5, 7-12; 1 Tesalonica 4:15-17) Dili lamang nga ang matinumanong mga apostol ni Kristo gihatagan sa “napulog-duha ka trono” nga gisaad kanila, kondili nga progresibo ang tanan nga uban sa 144,000 naentrono sa langit sa ilang pagkabanhaw gikan sa mga patay.—Pinadayag 3:21.
11. Sa unsang paagi ang “ubang mga karnero” nagabati na sa mga epekto sa paglalang pag-usab?
11 Samtang nagkatapos ang pagpili sa mga tawo nga maglangkob sa langitnong matang, ang pagtigom sa dakong panon sa “ubang mga karnero” nagsugod, ilabina sukad sa 1935 paunahan. Kini sila, usab, misugod sa pagkasinati sa mga kaayohan gikan sa halad ni Kristo, ‘nga naglaba sa ilang hatag-as nga mga biste ug nagpaputi kanila sa dugo sa Kordero.’ Sila gibuligan sa “pagsul-ob sa bag-ong pagkatawo nga nalalang sumala sa kabubut-on sa Diyos diha sa matuod nga pagkamatarong ug pagkamaunongon.” (Pinadayag 7:9, 10, 14; Efeso 4:20-24) Sa kanunay-nagtubong mga gidaghanon sila nagapahimulos sa mga tagana sa Diyos pinaagi ni Kristo nga mahimong motultol sa ilang pagkinabuhing walay kataposan sa napasig-uling Paraiso.—Pinadayag 7:17; 22:17.
12. (a) Kinsay gihawasan sa “napulog-duha ka banay sa Israel” nga gitumong dinhi ni Jesus? (b) Gawas sa mga maluwas kinsa pay makabatog kaayohan sa paglalang pag-usab?
12 Sa dili na madugay, karon, ang daotang kalibotan pagalaglagon. Si Satanas ug iyang mga demonyo igatambog sa bung-aw. Ang milenyong Adlaw sa Paghukom sa katawhan mosugod na. Si Jesu-Kristo mao unya ang Nagadumalang Maghuhukom, ug iyang tinoong ang tanan hatagag bug-os nga higayon ug dakong tabang aron ilang mahibaloan ang matarong nga mga dalan ni Jehova ug sundon kana. Kadtong dinihogang mga sumusunod ni Kristo nga nagpamatuod nga mga maghuhupot sa integridad hangtod sa kamatayon makig-ambit kaniya sa buluhaton, ‘nga magahukom sa napulog-duha ka banay sa Israel.’ (Lucas 22:28-30; Pinadayag 20:4, 6) Kini wala magkahulogan nga sila magahukom lamang sa kinaiyanhong mga kaliwat sa Israel. Hinunoa, ilang pagahukman ang tanang gilandongan sa “napulog-duha ka [dili-saserdotehanong] mga banay sa Israel” sa Adlaw sa Pagtabon sa Sala. Kini nagaapil sa tibuok kalibotan sa linukat nga katawhan. (1 Corinto 6:2) Ang mga maluwas sa dakong kasakitan mao ang unang makabatog kaayohan gikan niining programaha sa pagtuboy sa katawhan. Apan ang binilyon pa makaambit usab, tungod kay ang pagahukman magaapil sa “mga buhi ug mga patay.” (2 Timoteo 4:1; Buhat 24:15) Pagkakulbahinam unya dihang mahibalik ang mga patay nga makobrehan sa halad lukat ni Kristo! Pagkadaghan unya ang luha sa kalipay dihang magkahiusa pag-usab ang mga minahal!
13. Sa unsang paagi ang mga epekto sa milenyong Adlaw sa Paghukom mahimong tinuod nga paglalang pag-usab?
13 Kini mao unya ang panahon dihang, sa kataposan, ang katawhan mahupayan sa lawasnon ug mental nga mga depekto nga gipahinabo sa sala. Dihang dinhi sa yuta, giayo dihadiha ni Jesus ang mga tawong paralitiko, kadtong buta o bungol o amang, ug mga tawo kansang lawas nadaot o kansang kusog naluya tungod sa sakit. Kadtong mga milagroha mao lamay patilaw sa iyang pagabuhaton alang sa tanang tawo panahon sa iyang Milenyong Paghari. Uban ang maayong hinungdan, si bisan kinsang makasaksi o makasinati nianang kahibulongang ebidensiya sa kalulot ni Jehova ug unya mosalikway sa iyang pagkasoberano pagalaglagon sa walay kataposan. Apan pinaagi sa edukasyon sa matarong nga mga paagi ni Jehova, ang panghunahuna ug mga panukmod niadtong nagapasundayag ug sinserong pagtuo ug pagkamasinugtanon anam-anam mouswag hangtod sila makadangat sa bug-os nga kahingpitan. Ang maong mga nahigugma kang Jehova makasinati gayod sa pagbag-o, sa paglalang pag-usab. Kini mahisamag sila gihatagag bag-ong sinugdanan sa kinabuhi uban ang bag-ong Amahan, ang Amahan nga Walay Kataposan, si Jesu-Kristo.—Isaias 26:9; 9:6.
14. Unsang bililhong relasyon makapribilehiyo sa pagpahimulos ang tanang makapasar sa kataposang pagsulay?
14 Unya, tapos makapasar sa kataposang pagsulay sa pagkatapos sa usa ka libo ka tuig, sila pagasagopon ni Jehova nga Diyos pinaagi ni Kristo ingong kaugalingong mga anak sa Diyos, ingong bahin sa Iyang hingpit unibersohanong pamilya. Pagkamakapadasig kini nga kalaoman—dili lamang alang sa mga maluwas sa dakong kasakitan kondili alang usab sa tanang patay nga banhawon sa pag-ambit sa kalipay sa kinabuhi sa usa ka Paraisong yuta!—Roma 8:20, 21.