Kapitulo 12—Pagkaluwas Ngadto sa Usa ka Bag-ong Yuta
Nailhan Alang sa Kalaglagan o sa Kaluwasan?
1. Kining leksiyona nagadasig kanato sa pagtagad sa unsang mga pangutana?
Tungod sa relihiyosong kahimtang nagalungtad karong adlawa kinahanglang atong ipakita kon unsay tinuod anaa sa atong mga kasingkasing. Tinuod ba natong gihigugma si Jehova ug ang iyang mga dalan? Kita ba sama sa iyang Anak, si Jesu-Kristo, nga kaniya kini giingon: “Gihigugma mo ang pagkamatarong, ug gidumtan mo ang pagkamalapason”? (Hebreohanon 1:9) Andam ka bang mopasundayag niini sa dayag aron ang uban mahibalo kon hain kita magabarog? Ang rekord sa Bibliya mahitungod kang Jehu ug kang Jonadab ang anak ni Re’chab motabang nato sa pagsusi sa atong baroganan.
2. Kinsa si Jehu ug si Jonadab?
2 Sa ikanapulong siglo W.K.P., si Jehu gidihogan aron mahimong hari ibabaw sa napulog-tribong gingharian sa Israel, nga ang kaulohan niana mao ang Samaria. Siya gisugo sa paglaglag sa tanang sakop sa daotang balay ni Haring Ahab, apil si Rayna Jezebel, kinsa nagpasiugda sa pagsimba ni Baal sa Israel ug naningkamot sa pagwagtang sa pagsimba ni Jehova. Si Jonadab, usa ka Kenihanon (busa, dili Israelinhon), pihong nasayod sa programa ni Jehu sa pagpanglaglag sa dihang siya mitagbo kang Jehu. Apan unsa ka kusganon ang gugma ni Jonadab alang kang Jehova? Dayag ba niyang ipaila nga siya hugot nagtuo nga si Jehova, ang matuod nga Diyos, mao lamang ang pagasimbahon?
“Ang Imong Kasingkasing ba Matul-id Uban Kanako?”
3. Giunsa pagpahibalo ni Jonadab sa dayag ang iyang baroganan mahitungod sa pagsimba ni Jehova?
3 Tapos magbayloayg mga pangomosta ang duha ka lalaki, giawhag ni Jehu nga tin-awon ni Jonadab ang iyang baroganan. “Ang imo bang kasingkasing matul-id uban kanako,” nangutana si Jehu, “maingon nga ang akong kasingkasing maoy uban sa imong kasingkasing?” Nga wala manuko si Jonadab mitubag: “Mao kana.” “Kon mao kana, itunol ang imong kamot,” mitubag si Jehu. “Busa iyang gipatungtong si Jonadab sa iyang karro ug miingon: “Uban kanako ug tan-awa ang dili nako pagtugot sa pakig-indig kang Jehova.” Si Jonadab nga walay kahadlok wala mobalibad.—2 Hari 10:15, 16; tan-awa ang Deuteronomio 6:13-15.
4, 5. (a) Sa unsang paagi gihimo ni Jehu nga ang mga magsisimba ni Baal magpaila sa ilang kaugalingon? (b) Unya unsang aksiyon ang gihimo ni Jehu, ug diin man si Jonadab? (c) Unsay imong sanong ngadto sa paglaglag sa mga magsisimba ni Baal?
4 Sa pag-abot sa Samaria, si Jehu mihimog mga lakang nga magkinahanglang magpaila ang tanang nagsimba kang Baal. Ang mga propeta, ang mga pari ug tanang magsisimba ni Baal gipatawag alang sa usa ka dakong paghalad sa balay ni Baal. Sila gipahibalong si bisan kinsang mapakyas sa pagtambong mawad-an sa ilang mga kinabuhi. Mimando si Jehu nga ang tanang magsisimba ni Baal hatagag mga biste nga isul-ob aron sila mailhang tin-aw. Si bisan kinsang nag-angkon usab nga nagsimba kang Jehova sa ingon nagpadayag kon kinsa gayod ang ilang gisimba. Kadto morag mahimayaong takna alang kang Baal ug alang kang Satanas nga Yawa, ang bakak nga diyos nga maoy gihawasan ni Baal.
5 Kadto dili dapit alang sa matuod nga mga magsisimba ni Jehova. Gihimo ang pagsusi sa pagtino nga ang mga magsisimba lamang ni Baal ang didto. Unya ang seremonyas mipadayon. Kasamtangan, sa gawas, ang mga tawo ni Jehu nangandam, ug sa iyang senyas sila milihok. “Tigbasa sila! Ayaw pagawasa ang bisan usa,” mao ang iyang sugo. Ang tanang magsisimba ni Baal namatay. Ang balay ni Baal giguba. “Sa ingon gilaglag ni Jehu si Baal gikan sa Israel.” Si Jonadab didto sa kiliran ni Jehu nga nakasaksi nianang mga hitaboa. (2 Hari 10:18-28) Unsay imong sanong sa personal sa nahitabo? Bisan tuod walay mausa kanato ang malipay sa kamatayon sa uban, bisan sa mga tawong daotan, gipabilhan ba nato nganong kinahanglan kadto ug nganong gitala kini sa Bibliya aron atong mabasa karong adlawa?—Itandi ang Ezekiel 33:11.
6. (a) Sa unsang paagi pagalaglagon ang Dakong Babilonya? (b) Sa dinhi sa yuta, giunsa pagpakita ni Jesus nga siya dili motugot sa pakig-indig kang Jehova?
6 Ang asoy wala maghatag kanatog gahom sa paglaglag sa mga tinukod kaha nga iya sa relihiyosong mga grupo o sa katawhang debotado sa bakak nga pagsimba. Gitudlo ni Jehova, dili ang iyang modernong-adlawng mga saksi, kondili ang hinimayang si Jesu-Kristo, ingong ang Labawng Jehu, sa pagpatuman sa Iyang matarong nga mga paghukom. Pinaagi sa pagtugot nga ipahayag sa nagkatingob nga politikanhong mga gahom ang ilang pagdumot sa Dakong Babilonya, ang langitnong Hari magpahinabo sa pagkalaglag sa imperyo sa bakak nga relihiyon sa kalibotan. (Pinadayag 6:2; 17:16; 19:1, 2) Sa dinhi sa yuta, si Jesus midumili bisan sa usa ka buhat sa pagsimba nga magpasidungog sa Yawa. Iyang gisaway ang pagpadaplin sa Pulong ni Jehova tungod sa tawhanong tradisyon ug ang paggamit sa pagsimba sa Diyos alang sa panapi. Wala niya itugot ang bisan unsang pakig-indig kang Jehova.—Lucas 4:5-8; Mateo 15:3-9; 21:12, 13.
7. (a) Unsa ang pipila sa modernong-adlawng mga ebidensiya sa Baalismo? (b) Nganong gitugot ni Kristo nga Hari kining mga butanga?
7 Nan, nganong si Kristo, nga karon nagahari taliwala sa iyang mga kaaway, nagatugot nga ang modernong Baalismo daw magmauswagon? Nganong siya nagatugot nga ang mga tawo nagapasidungog sa diyos niining sistema sa mga butang pinaagi sa pagpadaplin sa mga kinahanglanon ni Jehova nga wala masiloti? Nganong siya nagatugot nga sila nagalihok nga daw ang Diyos dili supak sa ilang seksuwal nga imoralidad, sa ilang paghimaya sa materyalistikanhong paagi sa kinabuhi, ilang pag-apil sa espiritistikanhong mga buhat samtang nagaangkong mga Kristohanon, ug sa ilang pagtudlog Babilonyanhong mga doktrina nga daw kini mao ang pulong sa Diyos? Ang karaang drama nagapakita nga kini maoy aron sulayon ang mga tawo, nga ipakita nila sa dayag kon kinsay ilang ginasimba, ug sa ingon kon kaha sila takos luwason o laglagon.
8. Unsang seryosong mga pangutana ang kinahanglang atong isukna sa atong kaugalingon?
8 Unsang dalan ang imong napili? Gibiyaan na ba nimo ang tanang buhat nga makapailang ikaw magtutuman sa modernong Baalismo? Ikaw ba nakabulag na sa kalibotan ug nakakuha sa imong baroganan ingong matuod nga magsisimba ni Jehova?—2 Corinto 6:17.
9. (a) Kon kita tinuod nga sama kang Jonadab, unsay angay natong pagabuhaton? (b) Giunsa pagpasiugda sa gisitar nga mga kasulatan ang kahinungdanon niining mga butanga?
9 Si Jonadab, ingong dili-Israelinhong magsisimba ni Jehova, naglandong sa “ubang mga karnero” nga karon gitigom uban ang paglaom sa kinabuhing dayon sa yuta. Gibanaag ba nimo ang espiritu ni Jonadab? Andam ka bang magpaila sa imong kaugalingon sa dayag uban sa Labaw nga Jehu ug uban sa dinihogan niyang mga sumusunod sa yuta nga nagamantala sa nagsingabot nga “adlaw sa panimalos sa bahin sa atong Diyos”? Nakig-ambit ka ba uban kanila nianang dinaliang buluhaton? (Isaias 61:1, 2; Lucas 9:26; Zacarias 8:23) Ginahatag mo ba kang Jehova ang imong linaing pagkamahinalaron, nga wala magtugot sa bisan unsa nga manghilabot sa dapit nga iyang pagahuptan diha sa imong kasingkasing? (Mateo 6:24; 1 Juan 2:15-17) Ang imong kinabuhi nagapasundayag ba nga ang imong relasyon uban kaniya mao ang imong labing mahal nga kabtangan, nga ang tanang ubang butang nasentro niana?—Salmo 37:4; Proverbio 3:1-6.
Nabatonan ba Nimo ang Patik?
10. Giunsa pagpakita sa Bibliya nga ang mga magsisimba lamang ni Jehova ang maluwas?
10 Usa unya ka seryosong sayop ang paghinapos nga kon maningkamot ang usa ka tawo sa pagkinabuhig “maayong” kinabuhi ug kon iyang likayan ang mga relihiyong nagabuhat sa mga butang tin-awng gitunglo sa Pulong sa Diyos, wala nay laing gikinahanglan kaniya. Ang tanang nagalaom nga maluwas ngadto sa “bag-ong yuta” kinahanglan nga tinong mailhan nga mga magsisimba ni Jehova. (Pinadayag 14:6, 7; Salmo 37:34; Joel 2:32) Kining mensahea gipasabot sa usa ka panan-awon nga gihatag ngadto kang propetang Ezekiel una pa malaglag ang Jerusalem sa 607 W.K.P.
11. (a) Batbata ang panan-awon nga gitala sa Ezekiel 9:1-11. (b) Unsa ang yawi ngadto sa kaluwasan?
11 Nadungog ni Ezekiel nga gipatawag ni Jehova kadtong gitudlo sa paglaglag sa dili-matinumanong Jerusalem ug sa iyang mga molupyo. Iyang nakita ang unom ka lalaking nasangkapan ug mga hinagiban sa pagpanglaglag, ug may usa usab ka lalaking sinul-oban sa lino, nga may tintero sa sekretaryo sa iyang hawak. Ngadto una sa maong sinul-oban ug lino nga lalaki si Jehova miingon: “Agi sa tunga sa siyudad, agi sa tunga sa Jerusalem, ug kinahanglang butangan nimog patik ang mga agtang sa mga tawong nagapanghupaw ug nagaagulo tungod sa tanang dulumtanang butang nga ginabuhat sa taliwala niini.” Unya ngadto sa unom pa siya miingon: “Lumakaw kamo latas sa siyudad nga sunod kaniya ug panigbas kamo. Ayaw itugot nga ang inyong mata maluoy, ug ayaw kamo pagkahangawa. Ang tigulang lalaki, batan-ong lalaki ug mga ulay ug ang gamayng bata ug mga babaye inyong pagapatyon—ngadto sa pagkapuo. Apan kang bisan kinsa nga adunay patik ayaw kamo pagduol, ug pagsugod kamo sa akong sangtuwaryo.” Nakita ni Ezekiel sa panan-awon ang kalaglagang sunod nahitabo—mabug-oson kaayong daw ang tanang Israel nga diha pa sa yuta gilaglag. (Ezekiel 9:1-11) Unsa ang yawi ngadto sa kaluwasan? Kadto mao ang patik nga gibutang sa agtang sa usa sa lalaki nga may tintero sa sekretaryo.
12. (a) Unsa ang dulumtanang mga butang nga tungod niana ang mga pinatikan “nanghupaw ug nag-agulo”? (b) Nganong si Jehova masuko nianang mga butanga?
12 Ang mga tawo lamang nga “nagapanghupaw ug nagaagulo tungod sa tanang dulumtanang butang” nga ginabuhat sa Jerusalem ang gipatikan alang sa kaluwasan. Unsa ba ang maong “dulumtanang mga butang”? Gitala ang lima: (1) Usa ka “simbolo sa pangabugho” sa entrada sa sulod nga sawang sa templo ni Jehova. Bisan kon unsa man ang porma niadto, kadtong butanga gisimba sa mga Israelinhon nga angay iya lamang ni Jehova. (1 Hari 14: 22-24) (2) Mga kinulit sa bungbong sa nagakamang nga mga butang ug sa mga mananap, nga atubangan niana ang insenso gihalad sulod mismo sa paril sa templo. (3) Mga babayeng nagbakho tungod sa pagkamatay sa diyos nga si Tammuz, nga maoy laing ngalan ni Nimrod, kadtong rebelde batok kang Jehova. (Genesis 10:9) (4) Mga lalaking nagpadayag ug dakong pasipala pinaagi sa pagtalikod sa templo ni Jehova ug pagyukbo ngadto sa adlaw. (Deuteronomio 4:15-19) (5) Ingong kataposang pakaulaw, pagpuno sa katawhan sa yuta sa kapintasan ingon man pagkupot sa usa ka “udlot,” lagmit usa ka simbolo sa sekso, ngadto sa ilong ni Jehova. Maila ba nimo nganong si Jehova nasuko kanila?—Ezekiel 8:5-17.
13. (a) Nga hisgotang tinagsa, komentohi ang modernong-adlawng mga buhat nga susama niadtong “dulumtanang mga butang.” (b) Unsay imong pagbati sa maong mga buhat?
13 Unsay imong sanong sa personal ngadto sa modernong-adlawng mga buhat sa Kakristiyanohan nga susama niining “dulumtanang mga butang”? (1) Sa daghan niyang simbahan anaa ang mga estatwa nga sa ilang atubangan ang mga tawo nagayukbo sa pagsimba, bisan pag ang Bibliya nagapasidaan batok sa pagbuhat niana. (1 Corinto 10:14; itandi ang 2 Hari 17:40, 41.) (2) Siya nagakuyog sa kiling nga pulihan ang paglalang sa Diyos sa ebolusyon sa tawo gikan sa kahayopan; siya nagaapil usab sa pagpasundayag ug mainitong debosyon sa atubangan sa mga hulagway sa mga mananap ug mga langgam nga gigamit nga mga simbolo sa nasod. (3) Sa iyang pagsimba iyang gipaila ang krus, nga sukad sa kakaraanan maoy relihiyosong simbolo ni Tammuz, ug siya nagaapil sa mga seremonyas sa pagbalata niadtong nangamatay sa nagaula-sa-dugo nga mga gubat nga nagapasibaw sa espiritu ni Nimrod. (Apan tan-awa ang Juan 17:16, 17.) Siya nagatalikod sa ginaingon sa Diyos pinaagi sa iyang Pulong ug, hinunoa, nagapalabi sa “kalamdagan” nga gihatag sa modernong siyensiya ug tawhanong pilosopiya. (1 Timoteo 6:20, 21; itandi ang Jeremias 2:13.) (5) Nga daw kana dili pa igo, iyang ginaduso ang rebolusyon diha sa pila ka dapit ug nagbaton sa mapatumanong hunahuna bahin sa seksuwal nga imoralidad, samtang nagaangkong nagasulti sa ngalan sa Diyos. (2 Pedro 2:1, 2) Giisip sa pila ka tawo ang maong mga kiling nga liberal. Tingali sila dili mouyon nianang tanan, apan tingali sila moapil sa uban o labing menos nagakonsentir kanila. Unsay imong pagbati bahin sa maong nagapakaulaw-sa-Diyos nga mga buhat nga nagapahilayo sa katawhan gikan sa Maglalalang sa katawhan?
14. (a) Nganong ang kamatuoran nga ang usa ka tawong nawad-ag kasibot sa mga iglesya wala gayod magkahulogang siya maluwas?
14 Daghang tawo nawad-ag kasibot sa mga iglesya ug wala na magatambong niana. Sila tingali nahasol pag-ayo sa kapintasan ug pagkadili-matinud-anon sa kalibotan. Apan kana wala magpasabot gayod nga sila gipatikan alang sa kaluwasan. Kinahanglang sila patikan sa ‘lalaki nga may tintero sa sekretaryo.’ Ang mga kamatuoran nagapakita nga “ang matinumanon ug maalamong ulipon” nga matang nagabuhat nianang buluhaton sa pagpatik karong adlawa.—Mateo 24:45-47.
15. (a) Unsa ang patik? (b) Sa unsang paagi kana mabatonan sa usa ka tawo?
15 Ang tanang buot mapatikan ingong inuyonan sa Diyos kinahanglang magdawat sa instruksiyon nga gitagana ni Jehova pinaagi nianang “ulipon” nga matang ug mahimong matuod nga mga magsisimba ni Jehova. Kinahanglan sila dili mga tawong nagapasidungog kang Jehova pinaagi sa ilang mga baba apan nahigugma diay sa mga paagi sa kalibotan. (Isaias 29:13, 14; 1 Juan 2:15) Kinahanglang sila mahigugma kang Jehova ug sa iyang mga sukdanan ug mobatig kaguol sa kasingkasing, nga “magapanghupaw ug magaagulo,” tungod sa mga pagtulon-an ug mga buhat nga nagapasipala kaniya. Walay magbutang ug literal nga patik sa tinta sa ilang agtang. Apan dihang ilang mabatonan ang simbolikong patik madayag sa tanan nga, ingong dedikado, bawtismadong mga Kristohanon, ilang gisul-ob ang “bag-ong pagkatawo” nga gibatbat sa Efeso 4:24. Nabatonan nila ang buhing pagtuo. Sa dayag ug pribado sila naningkamot sa pagbuhat kon unsay mopasidungog kang Jehova. Dili lamang mga tawong nakagawas sa Kakristiyanohan kondili ang tanan, walay sapayan sa kagikan, nga nagalaom nga maluwas ngadto sa “bag-ong yuta” ingong mga nakig-uban sa dinihogang matang kinahanglan nga magbaton niini nga patik.
16. Nganong kining panan-awona hinungdanon ilabina alang sa mga anak ug sa ilang mga ginikanan?
16 Makahuloganon sa linain ang kamatuorang ang mga tiglaglag ni Jehova gisultihang ang edad, sekso, pagkatagsaanon o relasyon sa kaminyoon dili katarongan nga ipahigawas ang usa ka nakasala batok kang Jehova. Ang usa ka tawong minyo kinahanglang sa matag usa mapatikan aron maluwas. Kon motutol ang mga ginikanan nga mapatikan ang ilang mga anak o kon mapakyas sila sa pagmatuto kanila ingong mga alagad ni Jehova, ilang pagapasanon ang responsibilidad kon unsay mahitabo ngadto sa maong mga anak. Bisan tuod ang masinugtanong mga anak sa diyosnong mga ginikanan giisip nga “balaan” ni Jehova, ang mga anak nga rebelyoso wala isipang ingon. (1 Corinto 7:14; Salmo 102:28; Proverbio 20:11; 30:17) Kon ang mga anak edaran na aron mahimong bawtismadong mga Kristohanon apan dili buot mosunod sa mga kinahanglanon, kon kaha sila bawtismado o dili, ang ilang edad dili mosangpot sa ilang kaluwasan. Nan, hinungdanon kaayong ang matag tawo nga edaran na mapatikan sa tin-aw ingong tawong napahinungod sa Diyos ug nagabuhat sa iyang kabubut-on!
17. Unsay atong nakat-onan dinhi bahin sa kahangawa ni Jehova?
17 Gipakita ni Jehova ang dakong kaluoy sa katawhan pinaagi sa pagpadala sa iyang mga saksi aron sa pagpasidaan kanila sa umaabot nga kalaglagan ug pagpunting sa dalan ngadto sa kaluwasan. Apan siya nasayod gayod sa rekord sa bakak nga relihiyon ug sa dunot nga mga bunga nga gipamunga niini. Dihang laglagon ang Dakong Babilonya, dili ipakita ang kahangawa alang niadtong mopugos sa paghawid niini. Aron maluwas sa umaabot nga pagpatuman sa balaang paghukom, kinahanglang mosubay kita sa mga lakang ni Jesu-Kristo ingong matuod nga mga magsisimba ni Jehova, ang Maglalalang sa langit ug sa yuta.