Aduna bay Malungtarong Solusyon?

ANG mga primer ministro ug mga presidente nakahisgot bahin niana. Nasulayan kana sa mga lider sa negosyo ug sa mga pangulo sa bangko. Gihimo sa mga ehekutibo sa higanteng mga koporasyon ang ilang maarangan. Apan unsay presenteng kahimtang sa internasyonal nga negosyo?

Gikan sa Washington, D.C., miabot kining report sa Kalihim sa Panalapi, si James Baker: “Samtang gibanabana nga mous-os ang pagkadili-timbang sa [negosyo] sa 1987, may posibilidad nga motaas kini pag-usab sa 1988 ug magpabilin sa politikanhon ug ekonomikanhong paagi sa dili maayong sukod.”

Gikan sa Seoul, South Korea, mao kining artikulo sa balita: “Ang Batok-Amerikano nga sentimento misamot tali sa mga disidente ug sa mga estudyante sa South Korea, tungod sa ilang nakita ingong proteksiyon sa Amerikano batok sa mga produkto nga hinimo sa Korea. . . . Gisakripisyo sa Tinipong Bansa ang Korea aron makunhoran ang ilang depisit sa negosyo.”

Mahitungod sa Uropa, nakadawat kami niining tahoa: “Ang 12 ka nasod sa European Community [EC], ang labing dakong bloke sa patigayon, . . . miingon nga ang mga kompaniyang Hapones naningkamot sa pagbawi sa alkansi didto sa Tinipong Bansa pinaagi sa pagpasulod ug dugang baligya ngadto sa Uropa . . . Ang [mga nasod nga membro sa EC] nabalaka sa dugang sa pagkawalay trabaho ingong resulta sa mga importasyon, ug nanghulga sila sa paghatag ug bag-ong pagpugong sa importasyon batok sa Japan.”

Sa dayag, bisan pag ang mga lider sa politika ug ang mga ministro sa panalapi sa kalibotan naningkamot pag-ayo, ang ilang mga ideya wala moobra. Ang relasyon sa negosyo taliwala sa mga nasod misamot, ug ang sunodsunod nga mga akusasyon midangat sa punto nga kabutohon. Aduna bay nasayod kon unsaon sa pagsulbad niining mga problemaha?

Ang Usa nga Adunay Solusyon

Kon kinsa man ang makasulbad sa pinansiyal nga kalisod ug ubang mga problema sa kalibotan kinahanglang may katakos sa pagsulod sa lalom nga pagkagamot nga mga kababagan sa nasyonalismo, hakog nga ambisyon, pagkawalay-katinoan, ug pagkawalay paglaom. Ang iyang ideya kinahanglang lahi, oo, sukwahi, sa balaod sa lasang nga niini gipasukad ang presenteng adlawng sistema sa ekonomiya. Aduna bay ingon niini nga persona?

Oo, aduna, ug ang iyang mga pagtudlon-an ilado sa tibuok kalibotan. Iyang gibatbat ang mga butang nga nailhang Bulawanong Lagda: “Busa, ang tanang butang nga buot nimong buhaton sa tawo nganha kanimo, mao usay ibuhat nganha kanila.” Ug siya mitudlo usab: “Bansaya ang paghatag, ug kamo pagahatagan. Ang takos nga pinaugdo, dinasok ug tinantan, ug magaawas igabutang ra unya diha sa inyong sabakan. Kay ang takos nga inyong igahatag mao usab unya ang takos nga inyong pagadawaton.”—Mateo 7:12; Lucas 6:38.

Nahibalo ka ba kon kinsa kini nga persona? Siya walay lain kondili si Jesu-Kristo, kansang mga pagtulon-an kaylap nga gidayeg apan tagsa rang gisunod. Sa pagkatinuod, gibati sa kadaghanang tawo nga idealistiko ra kaayo kining mga pagtulon-ana, dili-praktikal, ug dili gayod molampos. Mao ba usab kanay imong gibati? Nan, nganong dili susihon ang mga praktis taliwala sa sumusunod ni Jesu-Kristo sa unang siglo ug tan-awa kon kini bang mga prinsipyoha, nga binase sa tinuod nga gugma, miobra?

Ang Malungtarong Solusyon

Sa mga tuig 55 K.P., si apostol Pablo misulat sa Kristohanong kongregasyon sa Corinto ug mihisgot ug paghalad, o kontribusyon, nga gihimo sa mga Kristohanon sa Uropanhong Macedonia ug Achaia sa pagtabang sa ilang kaubang mga Kristohanon sa Asianhong Palestina. Kini, sa tinuod, maoy dungganong lihok sa ilang bahin, apan si Pablo misaysay: “Sibo sa pagpaangay ang inyong sobra niining panahona magahulip sa ilang kakulangan, aron nga sa kapulihay ang ilang sobra magahulip usab sa inyong kakulangan, ug sa ingon niana adunay pagkaangay-angay.”—2 Corinto 8:14.

Bisan wala dinhi maghisgot sa komersiyal nga negosyo, ang prinsipyong nalangkit angay tagdon. Ang nahimo niini mao ang pagpaangay sa mga kadagaya ug kakulangan. Apan praktikal ba ang pagdahom nga moobra ang mga prinsipyo nga gibase sa gugma ning kalibotan karon nga andam mobuhat ug bisan unsa aron lang makuha ang gusto diha sa internasyonal nga patigayon? Dili, dili gayod. Busa, ang bugtong malungtarong solusyon nagkinahanglan ug kalit nga kausaban, nga maoy gimbut-an sa Diyos nga tumanon.

Nagpunting niining puno sa kagubot nga mga adlaw, ang tagna sa Bibliya nag-ingon: “Sa mga adlaw niadtong mga haria ang Diyos sa langit magatukod ug usa ka gingharian nga . . . molumpag ug mout-ot niining tanang mga gingharian, ug kini molungtad sa walay kataposan.” (Daniel 2:44; Salmo 110:2) Kining Ginghariana nga “pagatukoron sa Diyos sa langit” mao ang gitudlo ni Jesu-Kristo nga maoy iampo sa iyang mga sumusunod niining mga pulonga: “Paanhia ang imong gingharian. Matuman ang imong kabubut-on sa langit, maingon man sa yuta.” (Mateo 6:10) Ang mga hitabo sa kalibotan ug ang nangatuman nga mga tagna sa Bibliya naglig-on nga ang panahon sa paglihok nianang maong Gingharian haduol na.

Imo bang mahanduraw kon unsa unyay kahimtang dihang usa na lamang ka kagamhanan ang momando sa tibuok yuta? Wala na unyay kantidad sa baylo sa kuwarta. Wala na unyay buluhisan o mga tigihay sa negosyo. Wala na unyay price fixing o pag-maniobra sa prisyo ug proteksiyonismo. Ang tanan mailalom sa usa ka matarong bag-ong sistema dili lamang sa ekonomikanhon kondili sa politikanhon, relihiyoso, ug sa ubang bahin usab.

[Letrato sa panid 9]

Masulbad lamang ang mga problema sa katawhan kon magtinabangay ang mga tawo diha sa gugma