Nangita Akog Mas Yanong Kinabuhi Pinaagi sa mga Droga

NAGLINGKOD ako sa ngiob nga selda diha sa hugaw daang kutson. Gipalandong ko ang mga hitabo sa maong adlaw. Pagkabuang gayod namo nga nadakpan kami!

Kon nagpabilin pa unta kaming kalma ug wala matarantar, dili unta pahunongon ang among kotse sa polis. Kon nalabay pa unta namo ang mga upos sa marijuana ug nakatago sa droga sa wala pa susiha sa polis ang butanganag upos sa sigarilyo. Ngano bang nakasulod ako niini nga kagubot? Mipanaw ang akong hunahuna sa nangaging mga tuig . . .

Sa tin-edyer pa, taas ug niwang ako ug busa mibatig kaulaw ug nalahi. Maulawon kaayo ako ug diyutay lamag mga higala. Apan, gusto kong mahimong popular sa esluylahan, nga relaks tan-awon. Sa hinayhinay, misugod ako sa pagpataas sa akong buhok, nagsul-ob ug pughawng jeans, ug molingkod sa likod sa klase tapad sa ubang relaks nga mga batan-on.

Dayon nahitado kini sa usa ka adlaw. Didto ako niadtong higayona sa lugar nga katabakoan uban sa mga batan-on. Gipasahan akog sigarilyong marijuana. Dili buot moduko sa pag-tan-aw niini, miapil ako ug mitabako niini. Wala magdugay nadala ako sa bag-ong sirkulo sa mga higala. Sa kataposan napopular akog diyutay ug nakabaton ug daghang mga higala.

Sa ulahi misugod ako sa paggamit ug mas isog nga mga droga. Kulbahinam kaayo kadtong tanan ug mapanimpaladnon, nagtagotago ug mobatig kalalim ug naghimog mga butang nga nalangkit sa haluag nga paagi sa kinabuhi. Misugod ako sa pagsulti sa akong kaugalingon nga mas yano unta ang kinabuhi kon magtabako pa ang tanan ug pot. Ngano? Tungod kay makatabang kini kanimo sa pagpabili sa katahom sa imong palibot ug sa pagrelaks, busa maayo gayod kini alang kanimo. Matud pa nako. Apan karon, niining hugawng selda, gisagpa ako sa kamatuoran.

Wala mahibalo ang akong mga ginikanan nga migamit akog mga droga. Tingali maguol gayod sila dihang ilang mahibaloan kini! Tapos sa yugto nga daw walay kataposan, mibukas ang pultahan sa selda. Gisultihan ako sa polis nga gipiyansahan ako sa akong amahan. Malisod kaayong panahon kadto samtang nagmanehong namauli.

Mitawag ang akong amahan ug abogado aron tabangan ako sa pag-atubang sa mga opisyal sa hukmanan. Higala siya sa pamilya ug naglibog sa pagkadungog nga naapil ako sa kasamok. Sa ulahi diha sa estasyonan sa kapolisan, nakigsulti ang abogado sa lokal nga mga opisyal alang kanako. Mabalak-ong naghulat ako sa resulta.

Sa kataposan, gidesisyonan nga pagawason ako, sanglit wala man akoy rekord nga nadakpan sa miagi. Malulutong gitambagan ako sa abogado sa pagsentro sa akong pagtagad sa ubang mga pangagpas inay sa mga droga. Gisultihan ko siya nga himoon ko gayod kana. Apan ang mga pulong masayon kay sa mga lihok.

Depresyon ug Pagsulay sa Paghikog

Mipadayon ako sa pakig-uban sa akong daang mga higala. Busa tungod sa pagpugos sa igigkaingon, mibalik ako sa pag-inom ug mga droga. Tapos sa usa ka panahon nawala na ang kulbahinam. Apan dili ako makalahutay kon wala kana. Nagkinahanglan akog pagpadasig aron makalingkawas sa mga problema sa akong palibot ug sa pagtabang kanako nga makalahutay sa tibuok adlaw. Ako ug ang akong mga higala walay kalipay kon walay mga droga. Bisan sa matahom nga adlaw diha sa linaw nga nag-iski sa tubig, mangandoy kami ug moingon, “Oh, kon aduna lang unta kitay mga droga!”

Sa anam-anam naeksperyensiyahan ko ang mga yugto sa grabeng depresyon. Ang kinabuhi walay katuyoan. Walay butang nga akong ginapaabot gawas sa pagkahimong high o batiog kalalim tungod sa droga. Misugod ako sa paghunahunang maghikog. Usa ka adlaw gitulon ko halos ang tanang medisina diha sa butanganag medisina sa akong apohan sa pagsulay aron mamatay sa sobrang medisina. Apan sa akong kasubo, nakamata gihapon ako sa pagkasunod buntag.

Usa ka gabii dihang wala ako migamit ug droga, mikatkat ako sa atop sa among balay. Nabihag kaayo ako sa katahom sa kagabhion. Takdol ang bulan, dako abuhong mga panganod gipadpad sa panganod, ug ang taas nga mga kahoyng pino naglubaylubay sa hangin. ‘Aduna bay usa nga nagapaluyo niining malinawng katahom ug kahusay sa kinaiyahan?’ Natingala ako. ‘Aduna bay mas hataas nga katuyoan sa kinabuhi kay sa pagkinabuhi lamang samag mananap, nagapangita sa pagtagbaw lamang sa pisikal nga mga kailibgon?’ Nakamatikod ako sa akong espirituwal nga mga panginahanglan.

Misugod ako sa pagbasa bahin sa reinkarnasyon. Gisusi ko ang Zen Buddhism. Naukayan ko ang daang Bibliya, gipagpagan kini sa abog, ug misugod sa pagbasa sa “Bag-ong Tugon.” Didto akong nakita ang mga hunahuna nga nagustohan ko, sama sa mga pulong ni Jesus: “Busa buhati ang mga tawo sa bisan unsay buot ninyo nga ilang pagabuhaton kaninyo.”—Mateo 7:12, American Standard Version.

‘Kinsa ang makatagana niining mga butanga?’ Natingala ako. ‘Kinsa ang makapatin-aw sa Bibliya kanako?’ Midesider ako sa pag-adto sa nagkalainlaing mga simbahan aron makasusi. Apan tungod sa akong pagkamaulawon, dili gayod ako makaarang sa paggawas sa akong trak aron sa pagsulod bisan hain kanila.

Ang Tubag Diha sa Segunda-manong Libro

Sa usa ka adlaw misulay ako sa pag-ampo sa Diyos. “Palihog tabangi ako nga makakaplag niadtong tinuod gayod nga nagapadapat sa mga prinsipyo sa Bibliya,” mihangyo ako. Sa milabay ang usa ka semana nanan-aw ako diha sa tindahan sa segunda-mano. Taliwala sa nagamit nang mga libro, nakuha ang akong pagtagad diha sa usa ka gamay asul nga libro nga nag-ulohang Ang Kamatuoran nga Motultol sa Kinabuhing Dayon. Gipalit ko kini ug gihurot kini pagbasa. Gisaysay niini ang pangunang mga doktrina sa Bibliya ug gipaluyohan sa mga pulong uban sa mga pangutlo sa Bibliya. Mihukom ako sa pagsunod sa tambag diha sa panid 138 bahin sa pagtambong sa mga tigom sa usa sa Kingdom Hall sa mga Saksi ni Jehova.

Wala pa gayod ako makahibalag sukad ug mga Saksi. Apan nakahinumdom ako nga gisultihan ako sa akong inahan nga ang tawo nga iyang gipaapholster maoy usa ka Saksi. Gipasidan-an niya ako sa dili pagpakigsulti kaniya bahin sa relihiyon, tungod kay iyang putlon ang akong dalunggan. Gipangita nako siya diha sa libro sa telepono ug gitawag siya ug nangutana kon hain ang Kingdom Hall.

Gisugat ako sa tawong tig-apholster sa balkonahe sa tigomanan ug gidala ako sa sulod. Iya akong gipailaila sa tanan nga miduol. Natingala ako nga nagkailhanay sila sa usag usa ug buhi kaayo ang tigomanan sa mahigalaong panagsultihay inay mahilom, sama sa akong gihunahunang kahimtang diha sa simbahan. Tingali katingalahan akong tan-awon alang kanila, nagsul-ob ug kamesita ug asul nga jeans ug ang akong buhok nagdunghay sa akong abaga ug hangtod sa ubos. Apan wala ako pabatia nga lahi. Ila akong giabiabi.

Tapos sa meting, gipangutana ako ni Gg. Parciacepe, ang tawong tig-apholster, kon gusto ba akong magtuon sa Bibliya. Misugot ako. Dihang miuswag ang pagtuon, nakita ko ang panginahanglan sa paghimog mga kausaban sa akong kinabuhi. Nabag-o ang akong pamiste ug pamostura. Migawas ako sa droga. Gipulihan nako ang akong mga kaubanan kanhi ug bag-ong mga higala taliwala sa mga Saksi ni Jehova.

Ang Abogado ug ang Iyang Kliyente

Sa 1979, mga usa ka tuig tapos nga gibawtismohan ako ingong usa sa mga Saksi ni Jehova, nakahimo ako sa pagsulod sa bug-os panahong ministeryo. Sa unang ting-init nga gihimo ko kadto, usa ka butang nga wala dahoma nahitabo.

Ang usa sa mga Saksi, nga abogado ug usa ka ansiano sa kongregasyon, midesider sa pagduaw sa ubang lokal nga mga abogado sa lungsod sa pagsulti kanila bahin sa atong mga pagtulon-an. Gidala niya ako. Ang usa sa mga abogado nga among giduaw mao kadtong mitabang kanako sa mga katuigang milabay dihang gidakop ako tungod sa paghupot ug droga.

Gisaysay sa akong kauban ang katuyoan sa among pagduaw ug dayon gipailaila ako. Sa naglamano kami, nakurat siya ug makita ang pagkadili-makatuo sa iyang dagway, ug dayon mipahiyom ug dako ug miingon: “Ladd Stansel! Wala gayod ako makaila kanimo! Dako kaayo ang imong kausaban!”

Sa nawala ang kakurat, gipakitaan ko siya ug kopya sa libro nga akong unang nabasa ug miingon: “Kining libroha tinuod gayod nga nakatabang kanako sa pagsabot sa mga prinsipyo sa Bibliya ug sa pagkakita sa bili sa paghimo niining mga kausabana. Buot kong makabaton kag kopya niini.” Gidawat ang libro, malulutong gipasalamatan niya ako. Sa dihang nagmanehong nagpalayo kami, kami natingala kon naapektohan ba siya niini.

Sa pipila ka adlaw among nahibaloan. Ang akong amahan ug ang akong kaubang abogado nakadawat ug makatandog kaayong mga sulat gikan sa akong abogado nga midepensa kanako kanhi. Siya misulat nga nakasaksi siya ug milagro—ang kausaban sa usa ka dili-malig-on tiggamit ug drogang tin-edyer nga nahimong usa ka batan-ong lalaki nga karon may ikaamot na sa komunidad.

Kining kataposang pito ka tuig nakatabang ug dako sa akong pagkahimong hamtong. Sa 1981 gidawat ako sa pagtrabaho ingong bulunter sa Bethel, ang hedkuwarter sa kalibotan sa mga Saksi ni Jehova sa New York. Labi pang natugob ang akong kinabuhi sa miaging tuig dihang akong gipakaslan si Sue, nga miduyog kanako sa pag-alagad sa Bethel.

Busa dili mga droga ang nakapayano sa akong kinabuhi—kasukwahi hinoon kaayo! Pinaagi sa pagsalikway sa mga droga ug sa pag-alagad sa akong Maglalalang, si Jehova nga Diyos, ang nakapahimo sa akong kinabuhi nga yano ug tugob sa katagbawan ug kalipay. (Mateo 6:22)—Sumala sa giasoy ni Ladd Stansel.

[Letrato ni Ladd Stansel sa panid 21]

[Letrato sa panid 23]

Si Ladd ug Sue Stansel karon