Gikan sa Among mga Magbabasa

Pakigsinabtanay sa Uban

Salamat kaninyo tungod sa artikulong “Mga Batan-on Nangutana . . . Nganong Lisod Kaayong Magkasinabtanay Ako ug ang Akong Igsoong Lalaki ug Babaye?” (Hulyo 22, 1987) Ako 16 anyos, ug subsob nga may panagbingkil sa akong mga igsoong babaye. Sa miaging pila ka adlaw nakig-away ako sa usa kanila, ug gibati nakong gusto ko siyang hasmagan. Gituklod ko siyang kusog pero nakapugong ako sa akong kaugalingon. Nasayod ako nga ang mga Kristohanon dili angay mag-away sama sa among ginabuhat. Ang inyong artikulo nakatabang nako sa pagsabot kon unsaon pagkontrolar ang kahimtang ug paghupot sa kalinaw diha sa panimalay. Buhaton ko ang tanan kong mahimo sa pagpadapat sa mga sugyot ug pag-amot ngadto sa panaghiusa sa among pamilya.

R. A. G., Brazil

Kalalangan sa Lasang sa Aprika

Nakaangay ako sa bug-os sa inyong mga artikulo mahitungod sa kalalangan sa lasang sa Aprika. (Septiyembre 22, 1987) Nakakatawa ako sa mga artikulo, ug may panahong gibati ko ang dakong kasubo tungod sa makalilisang pagpamatay niining nagkalainlaing kahayopan tungod sa komersiyalismo. Salamat alang sa makapalamdag nga mga kasayoran bahin sa nagakahitabo sa kahayopan.

S. R., Virgin Islands

Yelo Alang sa Sakit sa Ulo

Nagbasa ako sa inyong Septiyembre 22, 1987, nga isyu ug gilabdan ako sa ulo tapos sa pagbasa sa “Pagpaniid sa Kalibotan.” Gipakli ko ang panid 31. Nagkagrabe ang akong labad-sa-ulo, apan diha ang artikulong “Kon Magsakit ang Imong Ulo” nga naghisgot nga ang dinugmok nga yelo makapahupay sa sakit sa ulo. Busa nanaog ako sa ubos ug nagkuhag diyutayng yelo. Kini usa ka paaging ang Pagmata! nakatabang kanako, ug may daghan pa. Ako nuybe anyos. Ipadayon ang inyong maayong buhat.

M. M., Tinipong Bansa

Pagsultig mga Dila

Nakadawat akog mga kopya sa inyong artikulo diin ako sayop nga gikutlo. (Abril 8, 1987, “Pagsultig mga Dila—Gikan ba sa Diyos?”) Gisabot ninyong sayop ang akong mga pulong nga mipatim-aw kana nga ako maulaw sa pagsultig mga dila, sa dihang kana tinong dili matuod. Sa kamatuoran ako nagkutlo kang C. S. Lewis, kinsa miingon nga ang mga dila maoy usa ka kaulawan. Dayon ako mipahayag bahin sa dakong bili sa mga dila sa kasaysayan sa iglesya, mao nga kini angay dili igakaulaw sa iglesya. . . . Ang maong sayop nga pagkutlo tinong nagapatim-aw nga ako nagasupak sa mga dila, nga sa pagkamatuod ako dili man supak.

Vinson Synan, Tinipong Bansa

Gikasubo namong sa wala tuyoa napasangil namo ang pamulong ni C. S. Lewis, “Ang pagsultig mga dila usa ka kaulawan namo,” kang Vinson Synan. Bisan pa niana, nakutlo namo sa husto ang pamulong ni Dr. Synan nga mipatim-aw sa basahong “One in Christ”: “Bisan pag makaulaw, ang glossolalia mao ang gasang gipili sa Diyos sa estratehikong mga punto sa kasaysayan sa pagpadako ug pagbag-o sa Iglesya.” Wala namo kutloa si Dr. Synan sa pagpasabot nga siya supak sa pagsultig mga dila kondili sa pagpakitang iyang giila nga ang pagsultig mga dila mahimong usa ka gumonhap alang sa pila ka sinserong mga magsisimba karong adlawa. Nianang artikuloha gipaila ni Dr. Synan ang posibleng gumonhap alang sa pipila: “Mouyon ako kang Larry Christenson nga miingon . . . ‘Ang Diyos sa pagkamakagagahom nagpili sa paggamit sa gasa sa mga dila ingong katalista alang sa pagpabag-o . . . mahimong kini dili makataronganon sa atong kaugalingong panghunahuna . . . apan siya nagapanuktok kon diin niya gusto . . .’” Gilaoman namong kini magapatin-aw sa baroganan ni Dr. Synan kon bahin sa pagsultig mga dila, nga lahi sa amoa.—ED.