Mapuslanon ang Pagkahibalo sa Imong Garantiya

“GUARANTEED SATISFACTION.” “Money-back guarantee.” “Lifetime guarantee.” “Unlimited warranty.” Kini pipila ra sa mga eslogang gigamit sa mga tig-anunsiyo aron mahaylo ang pumapalit sa pagpalit sa mga manggad o mga produkto. Mahingangha ka ba nianang mga saara? Kon mao, pagbantay!

Si Lynne Gordon diha sa The Consumer’s Handbook mipatin-aw ngano: “Kanang mga pulonga nagbaton sa palibot sa kasegurohan nga lig-on kaayo nga diyutay rang pumapalit ang tinuod motugkad sa ilang kahulogan sa usa ka partikular nga butang pinalit, ug unya makadiskobre sa ulahi, sa dihang mosulay sila sa pagbaton sa mga benepisyo sa usa ka warranty, nga wala diay, o nga wala mag-apil sa kinahanglanong alayohon o mga pag-ilis.” Ang pagkahibalo sa imong garantiya sa dili pa mopirma sa linya sa mga tumbok makapagawas nimo sa ulahi sa kabalaka, kaguol, ug makadaginot sa salapi.

Unsa ang Usa ka Warranty?

Bisan pag ang pulong “guarantee” o garantiya bantog nga gigamit, ang tinuod nga gihisgotan mao ang warranty. Kini, sumala sa Webster’s Third New International Unabridged Dictionary, nagkahulogan: “Sinulat nga garantiya sa integridad sa usa ka produkto ug sa maayong pagtuo sa tagbuhat nga gihatag ngadto sa pumapalit ug malangkobong nagatino nga ang tagbuhat sa usa ka yugto sa panahon maoy responsable sa pag-ayo o pag-ilis sa depektosong mga parte ug usahay motagana usab sa pinanahong pagserbisyo.”

Ang warranties makapanalipod kanimo gikan sa gitago o inabtik nga mga batasan sa negosyo ug sa limbongang mga salesman. Pananglitan, sa dihang ang usa ka tigbaligyag kotse nagbatbat sa usa ka ginamit nga kotse ingong anaa sa primera-klaseng kondisyon sa dihang sa pagkamatuod kini guba, ang pumapalit nag-akusar sa tigbaligya. Kay ang pumapalit gipanalipdan man sa usa ka gipasabot nga warranty, ang huwes nagmando sa tigbaligyag ginamit nga kotse nga pasig-ulian ang nagpalit sa doble sa bili sa pagpalit.

Sayra ang Imong Warranty!

Ang mga warranty o garantiya tingali makita sa tag o label sa usa ka produkto o tingali ipatik sa materyal nga nagauban sa produkto. Ang mosunod mao ang pila ka pulong kasagarang gigamit:

Ang BINABA NGA GARANTIYA labing lisod nga ipatuman kay sa sinulat nga garantiya. Busa, labing maayo nga ipasulat ang tanang garantiya bisan pag nasayrang matinud-anon ang tigbaligya.

Ang GARANTIYA SA TIGBALIGYA nagatagana sa saad sa bahin sa negosyante sa pagpas-an sa responsabilidad alang sa kahimoan o kalidad sa produktong iyang gibaligya. Ang maong mga garantiya kadaghanan gipasabot o gipahayag nga mga warranty.

Ang GIPASABOT NGA MGA GARANTIYA gituohan nga nahiapil sa tanang kontrata sa pumapalit. Ang gipasabot nga warranty, matud sa librong You and the Law, “nagapasalig nga ang tigbaligya may katungod sa pagbaligya sa butang, nga ang mga manggad nakakab-ot sa malangkobong mga pulong sa kabatbatang gihatag, nga sila anaa sa maayong kondisyon ug nahiangay sa katuyoang gipahayag.” Pananglitan, ang toaster angay magtostar sa tinapay. Kay gipasabot ang maong mga saad, ang pumapalit tingali wala masayod nga sila nagalungtad. Ang usa ka produktong gibaligyang “as is” walay gipasabot nga warranty.

Ang usa ka GIPAHAYAG NGA GARANTIYA nagataganag tinong mga saad bahin sa kahimoan ug kalidad sa mga manggad. Kini kasagarang gisulat. Ang gipahayag nga mga warranty o express warranties dili makapanulo sa mga garantiya nga gipasabot sa balaod. Sumala sa gisaysay diha sa librong Consumer Rights and Responsibilities, “ang usa ka gipahayag nga kondisyon o garantiya nagaobligar sa tiggama o tigbaligya (si bisan kinsa ang mihimo sa saad) sa pagtuman sa ilang saad/garantiya nga sama sa, ug dili ilis sa, mga saad nga giobligar sa balaod.”

Ang GARANTIYA SA TAGBUHAT nagagarantiya sa malangkobong kondisyon sa produkto ug kasagarang nagaapil sa usa ka kasabotan sa pag-ayo sa bisan unsang mga depekto sa gasto sa tagbuhat sulod sa usa ka yugto sa panahon. Hinungdanon ang paghinumdom, sumala sa gisaysay diha sa You and the Law, nga ang “mga hukmanan magpanuko nga papanubagon ang tagbuhat ilalom sa sinulat nga garantiya alang sa bisan unsang mga depekto o pagserbisyo nga iapil nga tino ug tin-aw sa gipamulong niini. Hinumdomi, usab, nga ang kadaghanang mga produkto nagbaton sa ilang labing maayong garantiya diha sa ilang labing durable nga mga piyesa. Ang mga piyesa nga lagmit kaayong maguba kasagarang dili maapil. Tinoa kon unsay aktuwal nga naapil.

Giisip sa pila ka tawo ang WALAY-KONDISYONG GARANTIYA ingong nagatagana sa labing maayong panalipod. Kining garantiyaha giingong “walay mga kondisyon.” Ang ubang tawo, hinuon, kombinsido nga ang tanang garantiya nagaapil sa tinong mga kondisyon.

Pagsangkap Daan

Ang usa ka garantiya daling hisaypan sa pagsabot. Pananglitan, ang “lifetime guarantee” wala magpasabot nga kana balido sulod sa imong pagkinabuhi. Hinunoa, kini malangkobong nagatumong sa kinabuhi sa produkto samtang gipanag-iya nimo kanang linaing produkto. Komosta ang terminong “satisfaction guaranteed” o garantisado ang katagbawan? Kini hanap kaayo nga dili maisip nga tinuod nga garantiya.

Tinoa ang PAGBASA SA PINONG MGA PINATIK sa dili pa mopirma. Kadaghanan ang butang nga maorag gigarantiya sa mga letrang itom sa atubangan sa kasabotan mahimong manulo o mabag-o sa pinong pinatik sa luyo. Oo, mapuslanon ang pagkahibalo sa imong garantiya tungod kay, sumala sa gipasidaan sa The Consumer’s Handbook, “ang pinatik sa itom nga letra nagahatag ug ang pinong pinatik nagakuha.”

[Kahon sa panid 26]

Susiha ang Imong Garantiya

◻ Binaba ba o sinulat?

◻ Unsay gikobrehan niini sa eksakto?

◻ Unsay limitasyon sa panahon?

◻ Kinsay nagapaluyo niini, ug unsay ilang reputasyon?

◻ Kinsay mobayad sa gastos sa pag-ayo?

◻ Kinsay pakigkitaan kon may madaot?

◻ May kinahanglan bang buhaton aron makabenepisyo sa garantiya?

◻ Unsa ang imong mga responsabilidad sa pagmentenar ug pag-atiman?