Unsa ang Paglaom nga Matapos ang Gubat?
ANG Gubat sa Kalibotan I, nga gisangka gikan sa 1914 ngadto sa 1918, gitawag nga mao ang gubat nga motapos sa tanang mga gubat. Apan sukad niadto dihay kapin sa 200 ka gubat, lakip na ang labing dako sa pagkakaron—ang Gubat sa Kalibotan II.
Tin-aw, ang mga paningkamot sa tawo sa pagtapos sa gubat bug-os nga napakyas. Nan, ikahibulong ba nga daghan ang miingon, “Aduna gayoy mga gubat kanunay”? Mao ba kanay imong pagtuo?
Ang pagtukod sa Hiniusang Kanasoran sa 1945 human sa Gubat sa Kalibotan II gilaraw sa paghatag ug paglaom sa mga tawong gikapoy na sa gubat ug usa ka kalibotan nga walay gubat. Kana nga paglaom gipahayag diha sa gisulat sa pader sa plasa sa UN sa Siyudad sa New York, nga mabasa: ANG ILANG MGA ESPADA ILANG HIMOON NGA MGA PUNTA SA DARO. UG ANG ILANG MGA BANGKAW HIMOON NGA MGA GALAB: ANG NASOD DILI NA MOBAKYAW SA ESPADA BATOK SA LAING NASOD. NI MAKAKAT-ON PA SILA MAHITUNGOD SA GUBAT.
Ikasubo, ang mga nasod tungod sa ilang pagpasiugdag gubat nagayubit niining maanindot nga pagkapahayag nga paglaom alang sa pakigdait. Bisan pa, kining mga pulonga matuman! Tungod kay kini nagagikan kapin sa 2,500 na ka tuig kanhi sa Tinubdan nga mas hataas kay sa mga tawong dili-hingpit. Kini nagahawas sa usa ka saad nga gihimo sa Labing Gamhanang Diyos.—Isaias 2:4.
Usa ka Bakak nga Paglaom
Daghan ang nagalantaw sa mga iglesia nga motabang sa pagmugna ug usa ka kalibotan nga walay gubat. Apan ang mga iglesia, sa pagkatinuod, napamatud-an sa kasaysayan nga usa sa labing makapabahin, magubatong mga puwersa. Pananglitan, si Frank P. Crozier, Ingles nga brigader heneral sa Gubat sa Kalibotan I, miingon: “Ang mga Iglesia sa Kristohanon mao ang labing maayong mga tig-agda sa pag-ula ug dugo nga atong nabatonan ug atong libreng gigamit sila.”
Busa, hinungdanon nga atong maila ang tinuod ug ang bakak nga Kristiyanidad. Aron matabangan kita niini, si Jesus mihatag ug usa ka yanong lagda: “Maila ninyo sila pinaagi sa ilang mga bunga.” (Mateo 7:16) Ang mga pulong, o mga pangangkon, dili pa igo. Sa pag-ilustrar niini si Steve Whysall, magsusulat sa Sun sa Vancouver, miingon: “Dili tanang mga tawo nga nagasul-ob ug puno sa asiete nga mga sinina sa mga mekaniko mga mekaniko, bisan pag mga mekaniko silang tan-awon, . . . bisan pag sila moingon ‘Kami mga mekaniko.’”
Sa pagpadapat sa iyang ilustrasyon diha sa Kristiyanidad, si Whysall miingon: “Sagad makadungog kag mga tawong moingon kon giunsa kini o kana gihimo sa ngalan sa Kristiyanidad ug pagkamakalilisang ang gihimo niini. Aw, oo, kadto makalilisang. . . . Apan kinsa bay nag-ingon nga mga Kristohanon ang naghimo niadtong makalilisang nga mga butang?
“O, ikaw moingon, ang establisadong mga iglesia ang nag-ingon. Aw, kinsa bay nag-ingon nga ang establisadong mga iglesia mga Kristohanon?
“Bitaw gibendisyonan sa papa si Mussolini, ug adunay ebidensiya bahin sa ubang mga papa nga nakahimog mangil-ad nga mga buhat sa miagi. Busa kinsa bay miingon nga sila mga Kristohanon?
“Nagtuo ka ba nga tungod kay papa ang usa ka tawo siya usa na ka Kristohanon? Tungod lang kay miingon ang tawo ‘Ako usa ka Kristohanon’ wala magpasabot nga siya usa na ka Kristohanon—sama sa usa ka tawo nga nagaangkong mekaniko dili diay mekaniko.
“Ang Bibliya nagpasidaan pa gani sa mga Kristohanon batok sa mga tawong nagpakaaron-ingnong mga Kristohanon . . . Walay Kristohanon ang makiggubat batok sa laing Kristohanon—kana mahisama sa usa ka tawo nga nakig-away sa iyang kaugalingon.
“Ang matuod nga mga Kristohanon maoy mga igsoong lalaki ug babaye diha kang Jesu-Kristo. . . . Sila dili, dili gayod motuyo sa pagsakit sa usag usa.”
Busa angay natong ipadapat ang lagda ni Jesus ug tan-awon ang mga bunga nga gipatungha sa mga iglesia. Apan unsa nga mga bunga? Ang Bibliya nagpunting ilabina sa usa ka butang, nga nagaingon: “Ang mga anak sa Diyos ug ang mga anak sa Yawa maila pinaagi niining kamatuorana: Ang bisan kinsa nga wala maghimog pagkamatarong dili iya sa Diyos, ni siya nga wala mahigugma sa iyang igsoon. Kay kini ang mensahe nga inyong nadungog sukad pa sa sinugdan, nga kita kinahanglang maghigugmaay sa usag usa; dili sama kang Cain, nga iya sa usa nga daotan ug gipatay ang iyang igsoon.”—1 Juan 3:10-12.
Inay idasig ang paghigugma sa usag usa, ang mga iglesia nagpaluyo ug nagdasig pa sa pagpatay sa isigkaigsoon diha sa gubat. Busa, sila nahimong mga kasangkapan ni Satanas nga Yawa nga sama gayod sa mga relihiyon sa karaang mga Ehiptohanon, Asiryanhon, Babilonyanhon, ug mga Romano. Si Jesu-Kristo nagtawag kang Satanas nga “ang magmamando niining kalibotana” ug miingon bahin sa Iyang matuod nga mga sumusunod: “Sila dili bahin sa kalibotan, maingon nga ako dili bahin sa kalibotan.” (Juan 12:31; 17:16; 2 Corinto 4:4) Bisan pa, ang mga iglesia naghimo sa ilang kaugalingon nga usa ka dakong bahin niining kalibotana.
Nan, tin-aw nga wala gamita sa Diyos ang mga iglesia sa pagtuman sa iyang katuyoan sa pagmugnag usa ka walay gubat nga kalibotan. Bisag unsa pay isulti sa mga kapilyan ug sa ubang mga hawas sa iglesia, ang Diyos dili modapig sa mga gubat sa mga nasod.
Sa unsang paaging ang saad sa Diyos sa pagwagtang sa gubat matuman? Aduna bay mga tawo nga tinuod nga nagahimo sa ilang mga espada nga mga punta sa daro? Oo aduna.
Kadtong Nagatuman sa Saad sa Diyos
Ang iladong manalaysay sa iglesia si C. J. Cadoux miingon: “Ang unang mga Kristohanon nagtuo kang Jesus . . . Suod nilang gilangkit ang ilang relihiyon sa pakigdait; lig-on nilang gidumilian ang gubat tungod sa pagkalangkit niana sa pagbanaw sa dugo; ilang gipadapat sa ilang kaugalingon ang tagna sa Daang Tugon nga nagtagna sa paghimo sa mga kasangkapan sa gubat nga mga galamiton sa agrikultura.”—Isaias 2:4.
Apan unsay ikasulti bahin karong adlawa? Aduna bay mga tawo nga nagtuo kang Jesus ug tinuod nga naghigugmaay sa usag usa? Sila ba, sa ingon, nagahimo sa ilang mga espada nga mga punta sa daro? Aw, ang Encyclopedia Canadiana nag-ingon: “Ang buluhaton sa mga Saksi ni Jehova maoy pagpasig-uli ug pag-establisar pag-usab sa unang Kristiyanidad nga gibatasan ni Jesus ug sa iyang mga tinun-an sa una ug ikaduhang siglo sa atong panahon. . . . Ang tanan managsoon.”
Busa, sa pagtuman sa sugo ni Kristo sa paghigugma sa usag usa, ang mga Saksi ni Jehova nagadumili sa pagdumot o sa pagpatay sa ilang mga igsoon, bisag sila sakop sa laing rasa o nasyonalidad. (Juan 13:34, 35) Si Martin Niemöller, usa ka lider nga Protestante sa Alemanya, miingon nga “latas sa katuigan, [ang mga iglesia] kanunay nga mikonsenter sa pagbendisyon sa gubat, sa mga sundalo ug sa mga armas ug nga sila nag-ampo nga dili gayod Kristohanong paagi alang sa kalaglagan sa ilang kaaway.” Apan, kon itandi, siya miingon, ang mga Saksi “sa ginatos-gatos ug sa linibo gibanlod sa mga kampong konsentrasyon ug nangamatay tungod kay sila midumili sa pagsilbi sa gubat ug mibalibad sa pagluthang sa mga tawo.”
Oo, dili sama sa mga tawo sa ubang mga relihiyon, ang mga Saksi ni Jehova tinuod gayod nga nagahimo sa ilang mga espada nga mga punta sa daro. Pinaagi sa pagpabiling “dili bahin sa kalibotan,” ingon sa gisugo ni Kristo, sila tinuod gayod nga lahi gikan sa ubang mga relihiyon. (Juan 15:19) Ang Romano Katolikong St. Anthony’s Messenger miingon: “Ang mga Saksi ni Jehova dili bahin sa ‘sekular nga katilingban’ ug dili modawat sa kaakohan sa paghimaya sa bisan unsa nga ipabuhat sa sekular nga kagamhanan.”
Ang saad sa Diyos labot sa pagwagtang sa armas matuman ba lamang ingong resulta sa pipila ka milyong indibiduwal gikan sa tanang mga nasod nga nagahimo sa ilang mga espada nga mga punta sa daro? Dili gayod! Ang saad sa Diyos matuman diha sa labing dakong sukod ug diha sa madulaong paagi.
Sa Unsang Paagi Moabot ang Kataposan sa Gubat
Ang Maglalalang, si Jehova nga Diyos, motapos sa gubat pinaagi sa pagwagtang sa tanang makinarya sa gubat ug kadtong responsable niana. Usa ka salmista sa Bibliya nagdapit sa mga magbabasa sa pagpalandong niining makapalipay nga palaaboton. “Umari, kamong katawhan,” siya misulat, “tan-awa ang mga buhat ni Jehova, kon unsa ang katingalahang mga butang nga iyang gihimo sa yuta. Nagapahunong siya sa mga gubat hangtod sa kinatumyan sa yuta.” (Salmo 46:8, 9) Pagkatalagsaon, makapapukaw nga pahibalo!
Ang palaaboton ba sa usa ka kalibotan nga walay gubat dili-katuohan? Mao kanay hunahuna sa mga maduhaduhaon. Mao kanay hunahuna bisan sa manalaysay sa militar kansang kasaysayan makita diha sa mga panid 9 ngadto sa 13 niining magasina. Apan siya migahin ug panahon sa pagsusig maayo sa ebidensiya. Ingong resulta, iyang napamatud-an mismo nga ang Bibliya tinuod gayod nga kasaligan. Iyang nadiskobrehan nga ang mga tagna sa Bibliya mahitungod sa una pang mga hitabo sa kasaysayan, sa walay pagkapakyas, natuman sa hustong panahon. Kini naghatag kaniya ug katarongan sa pagtuo nga ang maong mga hitabo nga gitagna nga mahitabo pa moabot gayod sumala sa iskedyol.
Pananglitan, tagda kon sa unsang paagi ang makapauyog sa yutang mga hitabo karon nagakahitabo katumbas gayod sa mga hitabo nga gitagna sa Bibliya nga magtimaan sa kataposang mga adlaw niining sistema sa mga butang. (Mateo 24:3-14; 2 Timoteo 3:1-5) Kini nagkahulogan nga kita karon nagakinabuhi na sa panahong moabot ang Gingharian sa Diyos, sa katumanan sa pag-ampo nga gitudlo ni Jesus sa iyang mga tinun-an, nga mao: “Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Matuman ang imong kabubut-on, sa langit, maingon man usab dinhi sa yuta.”—Mateo 6:9, 10.
Sa unsang paagi atong malaoman nga moabot ang Gingharian sa Diyos? Usa ka tagna sa Bibliya nagaingon bahin niini: “Sa mga adlaw niadtong mga haria [nagpasabot, sa mga kagamhanang nagamando karon] ang Diyos sa langit magatukod ug usa ka gingharian nga dili gayod malumpag. Ug ang gingharian mismo dili igabilin sa lain nga katawhan. Kini magadugmok ug magaut-ot sa tanan niining mga gingharian [o, mga kagamhanan], ug kini [ang Ginghariang kagamhanan sa Diyos] molungtad sa walay kataposan.”—Daniel 2:44.
Oo, ang Gingharian sa Diyos moabot sa usa ka madulaong paagi sa pagwagtang sa tanang presenteng mga kagamhanan, sama sa pag-abot sa gitagnang tibuok yutang Lunop sa mga adlaw ni Noe. (Mateo 24:36-39; 1 Juan 2:17) Tungod sa umaabot nga kalaglagan sa tanang presenteng mga kagamhanan, ingon man sa mga relihiyon nga nagapaluyo kanila, hinungdanon nga kita sa tinagsatagsa magasusi sa atong kaugalingong situwasyon. Maningkamot ba kita nga makakat-on mahitungod kang Jehova nga Diyos ug sa iyang Anak, si Jesu-Kristo, ug unya buhaton ang ilang gisugo kanato? (Juan 17:3) Higugmaon ba nato ang usag usa, magadumili sa pagdaot sa atong isigkatawo, ug sa ingon nagapakita nga ginahimo nato ang atong mga espada nga mga punta sa daro?
Kon mouyon ka nga ang gubat dili-makataronganon ug nga buot mo nga mabuhi sa yuta dihang ang pakigdait maoy tibuok yuta, pakigkita sa mga Saksi ni Jehova. Sila malipay sa pagtabang kanimo nga makakat-on ug dugang pa bahin sa kon sa unsang paagi ang gubat mawala na sa dili madugay, ubos sa pagmando sa Gingharian sa Diyos.
[Kahon sa panid 7]
Ang mga Plano ni Himmler sa mga Saksi ni Jehova
SI HEINRICH HIMMLER mao ang pangulo sa Nazi SS, o Kinamaayohang Sundalo, ug sa panahon sa Gubat sa Kalibotan II mao ang ikaduhang labing gamhanang tawo sa Alemanya, sunod kang Adolf Hitler. Bisag gidumtan ni Himmler ang mga Saksi ni Jehova tungod sa ilang pagdumili sa pagpakigbahin sa mga plano sa Nazi alang sa pagpangdaog sa kalibotan, iyang gitahod sila. Diha sa usa sa iyang mga sulat ngadto kang Ernst Kaltenbrunner nga hepe sa Gestapo, si Himmler misulat:
“Ang pipila ka impormasyon ug mga obserbasyon sa dili pa dugay miagak kanako sa paghimog mga plano nga buot kong dalhon sa imong pagtagad. Kini maylabot sa mga Saksi ni Jehova. . . . Unsaon nato sa pagmando ug sa pagpalinaw sa Rusya kon . . . atong daogon ang dagkong mga luna sa teritoryo niini? . . . Ang tanang porma sa relihiyon ug ang pasipistang mga sekta kinahanglang paluyohan . . . , ilabina ang mga pagtulon-an sa mga Saksi ni Jehova. Kaylap nga nahibaloan nga ang ulahi dunay mga kinaiya nga makahatag kanato ug kaayohan: Gawas sa kamatuoran nga sila nagadumili sa pagsilbi sa militar ug sa bisan unsang butang maylabot sa gubat . . . , sila kasaligan kaayo, dili moinom, dili motabako; sila kugihang mga trabahante ug talagsaon ang pagkamatinud-anon. Ang ilang pulong kasaligan. Tilinguhaon kini nga mga kinaiya . . . , kasinahang mga hiyas.”
Dili, dili gayod unta danihon ni Himmler ang mga Saksi sa pagtrabaho alang sa mga Nazi. Wala niya tinguhaa ang mahigugmaog-kalinaw nga mga hiyas sa mga Saksi alang sa iyang kaugalingon o sa iyang katawhan, apan gusto niya nga kining mithianong mga hiyas maugmad sa mga Ruso. Kini mopahimo kanilang mga tawong makigdaiton, mopahinabo kanila sa paghimo sa ilang mga espada nga mga punta sa daro.
[Hulagway sa panid 8]
Ang Gingharian sa Diyos magwagtang sa tanang mga makinarya sa gubat ug magluwas sa mga tawo ngadto sa usa ka malinawong bag-ong kalibotan