Buot Ka Bang Moabiabi sa Imong mga Higala?

SAYO pa sa kagabhion, ug nagpadayon ang solosalo. Ang tanang mitambong nalingaw sa dihang gipahibalo nga duha ka batan-ong lalaki mohatag ug kalingawan, nga may musika ug mugbong pasiaw.

Ang duha malamposong nakapasundayag na sa daghang higayon ug busa gidahom nga may malipayon nga pagsanong. Apan sa ilang kaulaw, ang pasundayag gisugat ug bakikaw nga mga pagtinan-away, kahilom, ug sa kataposan, hinay nga palakpak. Napakyas ang ilang pasundayag! Unsay problema?

Kon abilidaran ka ug buot nga ipakita kana sa imong mga higala, magpanuko ka ba tungod sa kahadlok nga mahitabo ang samang kasinatian? Unsa ang sekreto sa paghimo sa mga tawo nga sila tinuod nga malingaw? O tingali wala gayod sa imong hunahuna nga magpasundayag apan nakahangyo sa uban sa paghimo niana diha sa mga salosalo sa imong balay. Kon kini ang kahimtang, sa unsang paagi matino mo nga ang imong mga bisita malingaw sa presentasyon?

Ang mga sugyot nga mosunod naugmad gikan sa panglantaw sa musikal nga kalingawan sa balay. Bisan pa, imong makita nga ang kadaghanan sa mga prinsipyo ikapadapat sa ubang porma sa kalingawan, sama sa paghimog mugbong pasiaw, pagpakitag mga slide, mga sugilanon, ug mga kasinatian.

Pagmugna ug Palibot

Pananglit nagplano ka ug salosalo, nga naglaraw sa paghatag ug musikal nga presentasyon. Ikaw (o kadtong nagapasundayag) dili magkinahanglag daghang teknik sa musika aron mahimong tuboran sa kalingawan. Ngani, ang pipila ka hanas nga mga musikero dili maayong mga maglilingaw. Tungod kini kay ang paglingaw naglakip sa pagkasayod kon sa unsang paagi matabangan ang mga tawo nga sila malingaw. Kini magsugod sa pagmugna ug palibot nga maayo alang sa paglingawlingaw. Pananglitan, pila ka bisita ang imong dapiton?

Lagmit mas molampos ka sa gamayng grupo lamang kay sa dakong panon. Ang mas gamayng grupo mohatag sa matag tawo ug higayon sa pagpakig-estorya ug kalipayan ang pag-ubanay. Sa ingon usab, aron mamugna ang atmospera nga makalingaw, tagda usab ang pagbaton ug mga pabugnaw, kaha pangaon o meryenda lamang. Kon meryenda lang ang imong idalit, pahibaloa ang imong mga bisita bahin niini aron dili sila magdahom ug labaw pa.

Hinungdanong sabton kon kanus-a himoon ang musikal nga presentasyon. Daghan ang malingaw ug dihadiha nga presentasyon ug nga sa walay pagdumala malingaw sa pagpangaon ug sa kokabildohay. Kon kini tinuod sa imong mga bisita, hatagi silag panahon sa dili pa sugdan ang giplanong programa alang kanila. Kini ang nalimtan sa duha ka batan-ong lalaki nga gihisgotan sa sinugdan. Kon sila naghulat pa hangtod hinayhinay nga matapos ang ubang mga kalihokan, makita nila nga malingaw unta ang ilang mamiminaw.

Kon nagaplano ka nga magkanta-kanta, mas maayong magduol ang usag usa, sama sa mag-alirong atubangan sa kalayo o manglingkod sa salog. Ang mga tawo mas maayong moawit kon maayo ang buot ug mga kahimtang. Ang pagmugna ug hustong atmospera dakog mahimo aron mapaneguro nga malingaw ang mga bisita sa imong presentasyon. Kini usab mag-andam sa ilang hunahuna sa pagkalingaw sa imong musikal nga kalingawan.

Ang higayon sa paghatag ug presentasyon sa imong mga bisita miabot na. Sa unsang paagi molampos ka sa paglingaw sa imong mamiminaw?

Pagdani sa Mamiminaw

Malingaw ang kadaghanang tawo sa pagtan-aw ug maayong pasundayag. Aw, sa usa ka dili pa dugayng tuig lamang, 8,142,000 ka tiket ang nahalin sa mga pasundayag sa Broadway, nga nakakita ug 253.4 ka milyong dolyar [U.S.]! Apan kon ang imong pasundayag maoy pasatiyempo lamang diin wala kay bayad nga madawat, atubangon mo ang hagit sa pagdani sa interes sa mamiminaw nga wala magtinguha sa kalingawan nga imong ihatag. Ang sulbad? Ikombinar ang igong hiyas nga makakuha sa pagtagad sa imong mamiminaw. Ania ang pipila ka sugyot:

Gamita ang nakat-onag maayo nga piyesa. Mipahimangno ang instruktor sa sista si Frederick Noad: “Kinahanglang nasag-ulo nimog maayo ang piyesa sa awit nga gani makapatugtog ka niini samtang naghunahuna ug lain.” Busa maalamong magtago ug bag-ong nakat-onang mga piyesa sa awit alang sa umaabot. Miingon si Gn. Noad: “Mas maayo pang makapatugtog ug simpleng piyesa sa awit nga mapatugtog nimog maayo kay sa magpatugtog ug maanindot nga piyesa nga magkasayopsayop ka.”

Iapil ang imong mamiminaw. Gipasiugda sa usa ka musikero nga may propesyonal nga kasinatian sa daghang katuigan ang bili sa pagpaapil sa mamiminaw, nga nag-ingon nga manghatag siya ug mga papel nga nasulatan sa mga pulong sa awit ngadto sa iyang mamiminaw ug dapiton sila sa pagduyog sa pag-awit. Ang paghimo sa mamiminaw nga malangkit sa imong presentasyon makatabang nga magpabilin ang ilang malipayong pagsanong.

Tinguhaa ang panagkadaiya. Komon nga kiling sa uban nga tugtogon ang tanan nga maulawon ug hinay. Apan, si Frederick Noad mirekomendar: “Paningkamoti kanunay nga magpatugtog ug lainlaing gikusgon ug kahinayon sa matag piyesa; pananglitan, kon ang pasahi balikbalikon sagad epektibo kaayo ang pagpatugtog sa unang linya sa makusog ug ang pagsobli hinay, nga daw halos usa lang ka lanog. . . . Bahin sa katagbawan sa pagpatugtog makita niining matanga sa pagpalainlain sa gikusgon nga magpaila sa musika gikan sa mga nota lamang.”

Magkalipay ka. Dili marelaks ang imong mga bisita kon ikaw nanuskig, ginerbiyos, o maulawon; ni malingaw sila kon tinuyo nga gisundog mo ang usa ka iladong mag-aawit. Lisod nga marelaks ka kon ang tanang mata anaa kanimo, apan kinahanglang makakat-on ka nga marelaks ug ayaw pagpakaaron-ingnon, magmadasigon, ug kalipayi ang imong gibuhat. Niana lamang nga marelaks ang imong mamiminaw ug malingaw sa imong kalingawan.

Mub-a lang! Ang tinuod nga maglilingaw diyutay ray awiton, dili daghan. Diha sa inato nga kahimtang sa sala, ang mga tawo tingali mosugod sa pagbati nga gilaayan human sa 20 ug 30 minutos. Dihang matapos ang imong presentasyon, pasagdi nga kinaugalingong mobalik ang mga bisita sa ilang kalihokan. Ang pasundayag tapos na, apan magpadayon sila sa paghinumdom niana nga may kahinangop tungod kay gusto pa sila ug dugang.

Pag-atubang sa Nerbiyos

Bisan ang mga propesyonal nagapakigbisog sa kakulba diha sa entablado. Apan, sila nakakat-on sa pagkontrolar niana ug labing menos naghatag sa panagway nga kalmado. Sa unsang paagi mabuhat mo ang sama?

Alang sa usa ka butang, pangandam! Si Dale Carnegie, nga nagtimbang-timbang sa libolibong mga pakigpulong tuig-tuig, miingon: “Ang nangandam nga mamumulong lamang ang takos nga may kompiyansa.” Matuod usab kana bahin sa mga maglilingaw. Ang abanse nga pagpraktis, dugang sa mga pag-ensayo sa dili pa ang panahon sa pasundayag, mohatag ug kalainan. Samtang nagapasundayag, bug-osa ang imong hunahuna sa materyal. Hunahunaa ug batia ang tanan mong gitugtog. Si Frank Battisti sa New England Conservatory of Music misugyot: “Ang usa ka butang nga kinahanglang buhaton sa tawo mao ang pagsentro sa iyang hunahuna sa iyang gihimo, ug sa dili pagkabalaka kon unsay hunahunaon sa uban bahin niana. Kon aduna ka nianang matanga sa konsentrasyon dili ka gayod kulbaan.”

Kon masayop ka, ayaw ipahibalo sa imong mamiminaw pinaagi sa pagpakitang ikaw nasayop. Diyutay lamang tingali ang nakamatikod sa sayop, ug hayan ang nahibilin dili manumbaling. Ilang tan-awon ang imong mga timaan​—kon magpadayon ka sa pagtugtog nga morag ang sayop gamay ra, tagdon usab nila kana sa ingon.

Abilidad nga Nagapasidungog sa Maglalalang

Kon hangyoon ka sa mga higala sa pagtugtog alang kanila, ayaw dayon ug balibad, tingali mobating ikaw kulang sa abilidad. Kon buot nila nga walay sayop, dili ba pilion na lang nila ang narekord na nga musika? Usa ka babaye, nga ilado sa iyang mga higala tungod sa iyang makalingaw gamayng mga salosalo sa balay, miingon: “Pagkamaayo kon abilidaran ang bisita sa musika ug motambong nga andam pa sa paglingaw ug nagaapil sa tanan diha sa pasundayag!”

Oo, daghan ang moapresyar sa kasadya ug kalipay nga talagsaon diha sa buhi nga kalingawan sa balay. Hinumdomi, usab, nga ang imong mga higala tingalig nangitag maayong kalingawan, nga nagakalisod pangitaon diha sa propesyonal nga kalibotan. Busa kon ikaw ginasahan sa abilidad sa paglingaw sa uban, hinaot gamiton mo kana alang sa kahimayaan sa atong Dakong Maglalalang, ang Maghahatag sa “tanang maayong gasa ug sa tanang hingpit nga regalo.”​—Santiago 1:17.

[Kahon sa panid 16]

Dugang mga Sugyot

MAGMAPAILIN-ILINON. Kon makatugtog ka ug nagkalainlaing mga estilo, bisan kon pipila lang ka tugtog sa matag kategoriya, may bentaha ka sa pagtagbaw sa mga kagustohan ug mga hangyo sa mamiminaw.

Hikaya ang materyal nga maayong pagkasunodsunod. Sagad labing maayong sugdan ug taposon pinaagi sa mga piyesa nga mubo ug popular. Ang taas o lisod nga mga piyesa, kon itugtog man, labing maayong ibutang diha sa tungatunga.

Tagda ang imong mamiminaw. Samtang ang pagtutok mopabati kanila ug kagil-as, ikaw makatan-aw ug makasulti sa imong mamiminaw tali sa matag piyesa.

Hupting nagapadayon ang pasundayag. Samtang ang panaglagsang mga pulong sa introduksiyon makatabang sa tanan (apil sa imong kaugalingon) nga marelaks, ayaw kini pasobrahi. Usab, likayi ang taas nga mga kahilom nga ipahinabo sa sobrang pagpaangay sa tuno. Ang imong mamiminaw lagmit dili makamatikod ug diyutayng problema sa tuno sanglit laayan sila sa kanunay nga mga paglangan.