Ang Hunahuna sa Bibliya

Angay Bang Mahimong mga Pasipista ang mga Kristohanon?

“Ang mga iglesya angay nga mahimong pasipista pag-usab sama nga sila pasipista sa unang mga siglo sa Kristiyanidad.”—Hubert Butler, taga-Irlandia nga magsusulat.

HUMAN sa pagduaw sa Yugoslavia human sa Gubat sa Kalibotan II, maisogong gisulat ni Hubert Butler ang ibabaw nga mga pulong diha sa usa ka mubong sinulat nga gisulat sa 1947 apan wala patika hangtod lamang sa miaging tuig! Siya nakurat sa paagi sa “pagpakigkunsabo sa mga Kristohanong Iglesya panahon sa gubat sa mangilngig nga mga krimen ug layo na kaayong pagtipas gikan sa pagtulon-an ni Kristo.”

Si Butler wala mahadlok sa pagsulti alang sa di-popular nga mga kawsa o mga pundok. Sa dihang siya misulti, walay nagpaluyo kaniya. Siya misulti nga walay kahadlok sa dihang iyang gitandi ang paggawi sa mga iglesya uban sa maisogong baroganan sa mga Saksi ni Jehova, kinsa gibatbat diha sa The Irish Times ingong “mao lamang ang relihiyosong sekta nga labing maputli ug wala gayod mag-apil-apil sa politika.” Diha sa iyang mubong sinulat, “Report Bahin sa Yugoslavia,” si Butler nagsulat nga ang mga Saksi, kinsa “nagasalikway sa tanang hiwing pangatarongan diin ang gubat gipakamatarong sa mga lider sa politikanhon ug relihiyosong kinabuhi,” gihusay sa mga awtoridad sa Yugoslavia tungod sa ilang pagdumili sa pagpakigbahin sa kalihokan sa gubat.

Apan, nahiuyon ba sa Kasulatan ang pagtawag sa mga Saksi ni Jehova ingong mga pasipista? Aron matin-aw ang butang, depende kini sa kon unsay ipasabot sa pulong “pasipista.” Gigamit ni Butler ang termino sa pagdayeg sa mga Saksi sa ilang kaisog sa pagdumili, sa dakong personal nga pag-antos, sa pagpakig-away sa gubat. Apan, ikasubo daghang tawo nga nadala sa kainit sa gubat naglantaw lamang sa pisipista “ingong talawan o traydor, kinsa maikagon sa pagsibog sa iyang responsabilidad diha sa iyang nasod.” Husto ba kana nga panghunahuna?

Nagasupak sa Gubat o Kapintasan

Ang Webster’s Ninth New Collegiate Dictionary nag-ingon nga ang pasipista maoy usa ka tawo kinsa “kusganon ug aktibong nagasupak sa panag-away ug ilabina sa gubat.” Kini nagbatbat sa “pasipismo” ingong “pagsupak sa gubat o kapintasan ingong paagi sa paghusay sa mga kabingkilan; ilabina: pagdumili sa pagdalag mga hinagiban sa moral o relihiyosong mga katarongan.” Sa unsang paagi kini nga mga kahubitan ikapadapat sa mga magtutuo sa unang Kristohanong kongregasyon?

Sila tinuod nga ‘nagadumili sa pagdalag mga hinagiban sa moral ug sa relihiyosong mga katarongan’ ug naglikay sa tanang ‘panag-away ug gubat.’ Ngano? Tungod kay sila nahibalo nga si Jesus miingon nga ang iyang mga sumusunod “dili bahin sa kalibotan,” ug nga ang “tanang mogamit sa espada mamatay pinaagi sa espada.” (Juan 15:19; Mateo 26:52) Diha sa The Early Church and the World, usa ka magsusulat sa kasaysayan nagpadayag kanato nga “hangtod sa paghari ni Marcus Aurelius sa labing menos [161-180 K.P.], walay Kristohanon ang mahimong sundalo human sa iyang bawtismo.” Diha sa The New World’s Foundations in the Old, lain pa ang miingon: “Ang unang mga Kristohanon nagtuo nga sayop ang pagpakig-away, ug dili moalagad sa pagkasundalo bisan pag nanginahanglan ang Imperyo ug mga sundalo.”

Ang sugo sa mga Kristohanon mao ang pagsangyaw sa maayong balita. (Mateo 24:14; 28:19, 20) Sila nakasabot nga sila walay nadawat nga sugo gikan sa Diyos sa pagpakiggubat batok sa iyang mga kaaway, sa paglihok ingong mga berdugo sa Diyos, pagaingnon pa. (Mateo 5:9; Roma 12:17-21) Diha lamang nga ang ginaingong mga Kristohanon kono ‘layo na kaayong pagkatipas gikan sa pagtulon-an ni Kristo,’ sumala pa sa giingon ni Butler, nga sila nagapakigbahin sa mga gubat sa kanasoran. Dayon panalanginan sa klero ang mga sundalo ug moampo alang sa kadaogan, kasagaran sa duha ka kiliran sa panag-away. (Itandi ang Juan 17:16; 18:36.) Sa Edad Media, pananglitan, ang mga Protestante ug mga Katoliko nakasangka ug daghang madugoong mga gubat, nga misangpot sa “mga kalisang nga [mihugpa] sa Kasadpang Uropa, ang duha ka kiliran nagmantala sa ilang kaugalingon nga mao ang mga instrumento sa kaligutgot sa Diyos,” nagsulat si Kenneth Clark sa iyang librong Civilisation. Ang mga argumento nga gihimo sa pagpakamatarong niining matanga sa panaggubat, ang Cyclopedia of Biblical, Theological, and Ecclesiastical Literature ni McClintock ug Strong nag-ingon, “hayan mitungha gikan sa tinguha sa paghupay sa sibil nga gahom, ug ang maong mga pangatarongan sukwahi gayod kaayo sa karaang Kristohanong doktrina ug sa tibuok nga espiritu sa Ebanghelyo.”​—Santiago 4:4.

Bug-os ba Gayod nga Supak sa Gubat?

Apan, ‘ang karaan bang Kristohanong doktrina ug ang tibuok nga espiritu sa Ebanghelyo tinuod gayod nga pasipista? Ang unang mga Kristohanon tinuod bang ikahubit ingong mga pasipista, sama sa gihubit sa sinugdanan? Dili! Nganong dili? Usa ka katarongan mao, ilang giila ang katungod sa Diyos sa pagpakiggubat. (Exodo 14:13, 14; 15:1-4; Josue 10:14; Isaias 30:30-32) Gawas pa niana, sila wala gayod magduhaduha sa katungod sa Diyos sa pag-awtorisar sa karaang Israel sa pagpakig-away alang kaniya sa dihang kadtong nasora nagsilbing iyang bugtong instrumento sa yuta.​—Salmo 144:1; Buhat 7:45; Hebreohanon 11:32-34.

Ang Diyos dili lamang may katungod kondili usab may obligasyon pinasukad sa hustisya sa pagkuha sa mga tawong daotan gikan sa yuta. Daghang mamumuhat ug daotan dili gayod mosanong sa mapailobong mga hangyo sa Diyos kanila sa pagbag-o sa ilang mga dalan. (Isaias 45:22; Mateo 7:13, 14) Ang pagtugot sa Diyos sa daotan adunay limite. (Isaias 61:2; Buhat 17:30) Busa, ang mga Kristohanon nagadawat nga sa ulahi puwersadong wagtangon sa Diyos ang mga tawong daotan gikan sa yuta. (2 Pedro 3:9, 10) Sumala sa gitagna sa Bibliya, kini mahitabo “inigpadayag sa Ginoong Jesus gikan sa langit uban sa iyang gamhanang mga anghel sa nagadilaab nga kalayo, sa dihang siya magapanimalos kanilang wala makaila sa Diyos ug kanilang wala mosunod sa maayong balita bahin sa atong Ginoong Jesus.”​—2 Tesalonica 1:6-9.

Ang kataposang basahon sa Bibliya nagbatbat niining maong panag-away ingon nga “ang gubat sa dakong adlaw sa Diyos nga Labing-Gamhanan,” o Armagedon. (Pinadayag 16:14, 16) Kini nag-ingon nga si Jesu-Kristo mao ang mangulo niini, nga siya “nagapakiggubat diha sa pagkamatarong.” (Pinadayag 19:11, 14, 15) Si Jesu-Kristo tukmang gitawag nga “Prinsipe sa Pakigdait.” (Isaias 9:6) Apan dili siya pasipista. Siya nakasangka na ug gubat sa langit aron sa pagkuha sa tanang rebelyosong mga kaaway sa Diyos. (Pinadayag 12:7-9) Sa dili madugay siya makigsangka ug laing gubat aron sa “pagdala ngadto sa kagun-oban niadtong mga nagagun-ob sa yuta.” Apan, ang iyang mga sumusunod sa yuta dili magapakigbahin nianang paghukom sa Diyos.​—Pinadayag 11:17, 18.

Ang matuod nga mga Kristohanon nahigugma sa pakigdait. Sila bug-os nagpabiling neyutral sa militar, politikal, ug etnikong mga panag-away. Apan, sa estriktong pagkasulti, sila dili mga pasipista. Ngano? Tungod kay sila nagadawat sa gubat sa Diyos nga sa kataposan magpatuman sa iyang kabubut-on sa yuta​—usa ka gubat nga mohusay sa dakong isyu sa pagkasoberano sa uniberso ug paphaan ang yuta sa tanang kaaway sa pakigdait sa walay kataposan.​—Jeremias 25:31-33; Daniel 2:44; Mateo 6:9, 10.

[Picture Credit Line sa panid 22]

Christ Mocked/The Doré Bible Illustrations/Dover Publications, Inc.