Gikan sa Among mga Magbabasa

Batan-ong Biktima sa Kanser Ako 18 anyos, ug buot kong pasalamatan kamo tungod sa kasinatian ni Matt Tapio, sa artikulong “Wala Siya Mohunong.” (Oktubre 22, 1998) Natandog gayod ako sa iyang pagtuo, sa iyang pagpabili sa espirituwal nga mga butang, ug sa iyang pagbati sa pagkadinalian. Naglaom ako nga pasalamatan si Matt sa personal human sa iyang pagkabanhaw sa Paraiso.

E. G. G., Espanya

Sa ngalan sa akong pamilya, salamat sa artikulo. Sanglit kami adunay tin-edyer nga mga anak nga lalaki, among nakaplagang mapuslanon kaayo nga tagdon uban nila ang panig-ingnan sa pagtuo ni Matt Tapio. Naghatag kini kanamog higayon sa pagtimbangtimbang sa among mga unahonon ingong mga indibiduwal ug ingong usa ka pamilya.

M. F. N. G., Brazil

Ang artikulo nakadasig ug dako kanamong mga batan-on tungod kay kini nagpasiugda sa kasibot sa usa ka batan-ong lalaki kinsa, bisan pa sa iyang balatian, wala gayod mohunong sa pagpakigsulti bahin kang Jehova.

D. M., Italya

Bisan pag si Matt Tapio miatubang sa makamatay nga sakit, siya nanlimbasog nga mabuhi aron nga siya makadayeg ug makaalagad kang Jehova. Maayo kini nga panig-ingnan kanamong himsog ug panglawas.

D. P., Puerto Rico

Ang artikulo bahin ni Matt, nga kinahanglang operahan tungod sa tumor sa utok sa edad 14, nakadani sa akong pagtagad. Lakip sa iyang kataposang mga pulong mao, “Ayaw gayod paghunong sa pagpamatuod bahin kang Jehova.” Nakadasig kini kanako nga dili mohunong ug nakatabang kanako nga makaamgo kon unsa ka hinungdanon ang pagtuon sa Bibliya ug maangkon ang kahibalo nga motultol sa kinabuhi!

D. V., Pilipinas

AIDS Buot kong magpasalamat nga tim-os alang sa seryeng “Ang Bugno Batok sa AIDS—Madaog ba Kini?” (Nobyembre 8, 1998) Kadto matulon-anon kaayo. Ako 19 anyos ug natudloan sa daghang butang bahin sa AIDS ug HIV sa eskuylahan ug sa balay, apan sa gihapon ako nalibog. Kining artikulo mitabang kanako sa pagpabili kon unsa ka hinungdanon nga ako mopilig kapikas sa kaminyoon sa maalamong paagi ug magkinabuhing hinlo sa moral.

S. T., Tinipong Bansa

Ang inyong mga artikulo maoy matulon-anon, tukma, ug matinud-anon. Ako nagkinabuhi nga may AIDS nga kapin na ug napulo ka tuig. Usa ka higala ang nagtudlo kanako sa Bibliya uban sa tabang sa inyong mga publikasyon. Salamat sa dili pagkahadlok sa pagpatik nianang mga artikuloha.

B. W., Tinipong Bansa

Ako dili makahiklin sa Pagmata! hangtod nga akong nahuman pagbasa ang mga artikulo bahin sa AIDS. Wala pa gayod ako makabasa nianang tukmang impormasyon bahin niining ulohana. Ug kana hinungdanon, sanglit ako usa ka nars. Daghang salamat.

D. E., Alemanya

Ang akong apresasyon maoy gumikan sa kamatuoran nga ang akong anak nga lalaki mibiya sa Kristohanong dalan ug mibalik nga may grabeng AIDS. Uban sa tabang ni Jehova, siya sa pagkakaron anaa na sa maayong pagbarog sa espirituwal. Ang iyang panglawas miarang-arang uban sa tabang sa medikal nga pagtambal. Kita nahibalo nga adunay daghan nga natakboyan ug wala pa makaamgo niana. Kini angayng hatagan ug dakong pagtagad ni bisan kinsa nga naghunahuna sa pagminyo.

N. J., Tinipong Bansa

Mga Taytayan Human lamang gayod ang Bagyong Mitch miguba sa hangtod 80 porsiyento sa mga taytayan dinhi sa Honduras, among nadawat ang Nobyembre 8, 1998, nga isyu, uban sa artikulong “Mga Taytayan—Sa Unsang Paagi Kita Makatigayon Kon Wala Kini?” Ang akong bana ug ako kanunayng nagabiyahe dinhi, ug among nakat-onan dihadiha kon unsa ka hinungdanon kanamo ang mga taytayan sa among trabaho. Buot namong pasalamatan kamo alang sa makapainteres ug tukma sa panahong artikulo. Ingon sa gisulti sa paniklop nga parapo, dili na nato ibalewala ang mga taytayan!

C. H., Honduras