Sila Determinado nga Dili Mohunong
ANG Oktubre 22, 1998, nga Pagmata! adunay mubong artikulo bahin sa dugay nga pagpakigbisog batok sa kanser sa 17-anyos nga si Matt Tapio. Kini nag-ulohang “Wala Siya Mohunong.” Sa kataposan si Matt namatay niadtong Abril 19, 1998, samtang gisulat pa ang artikulo.
Gikutlo sa artikulo ang gisulti ni Matt diha sa girekord nga interbiyo nga gipatokar sa tigom sa mga Saksi ni Jehova, ug kini napamatud-ang makapatandog ilabina sa batan-ong mga magbabasa. Ania ang pipila sa ilang gibati.
Si Deseree, usa ka 20-anyos nga taga-Canada, misulat bahin sa epekto niini sa dihang siya ug ang iyang kauban sa bug-os-panahong ministeryo nakabasa kon unsa ka dako sa paghigugma ni Matt kang Jehova: “Kami nanghilak. Taudtaod ang among paghilak. . . . Kitang tanan, ilabina ang mga batan-on, makakat-on gikan kang Matt sa ‘pagbuhat kon unsay atong mahimo karon! . . . Bisag unsa pay mahitabo, ayaw gayod paghunong sa pagpamatuod bahin kang Jehova’!”
Si Erin, nga taga-Kentucky, T.B.A., misulat: “Di nako mapugngan ang paghilak samtang akong gibasa ang iyang kasinatian. Ingon nga himsog nga 16-anyos nga dalagita, buot kong mobuhat kutob sa maarangan alang kang Jehova samtang mahimo pa nako, aron nga usa ka adlaw niana, inigbanhaw kaniya, mahimong personal nakong sultihan si Matt nga ang iyang kasinatian nakapadasig pag-ayo kanako.” Sa susama, si Maria, usa ka 15-anyos nga taga-Texas, T.B.A., misaysay: “Ako determinado sa pagbuhat sa tanan nakong mahimo alang kang Jehova samtang ako himsog pa. Mapuslanon kaayo ang tambag ni Matt.”
Si Jessica, usa ka batan-on nga taga-Habagatang Carolina, T.B.A., misulat: “Ako 13-anyos, ug sa personal akong nakitang makapadasig kaayo ang pagkakaplag ug laing batan-on nga natugob pag-ayo sa kasibot ug gugma kang Jehova. Ang pagbasa lamang bahin sa kahimtang ni Matt Tapio nakapaamgo kanako nga ako gipanalanginan gayod nga nakabaton ug kahimsog. Akong gidugang ang ngalan ni Matt sa akong listahan sa mga igsoong lalaki ug babaye nga akong giplanohang himamaton didto sa bag-ong sistema!”
Si Sara, nga taga-San Severino Marche, Italya, misulat: “Ang artikulo nakapahilak kanako. Ako 17 anyos, samag edad ni Matt. Sanglit ako himsog ug panglawas, ang akong tinguha mao nga dili ako mohunong sa pagsulti bahin kang Jehova, sama sa gihimo ni Matt, bisan sa labing lisod nga mga yugto sa iyang kinabuhi. Salamat sa pagpatik ug mga kasinatiang sama niini, nga magpalihok kanamo sa paghatag sa labing maayo sa among mga kinabuhi, sa among panahon, ug sa among kusog ngadto kang Jehova.—Ecclesiastes 12:1.”
Gipalig-on Pinaagi sa Paglaom sa Pagkabanhaw
Batan-on man o tigulang ang usa ka tawo, komon karong adlawa ang pag-atubang sa kamatuoran sa kamatayon. Usa ka 19-anyos nga ginganlag Heidi miingon: “Sa miaging duha ka semana, ako nawad-ag duha ka tawong minahal tungod sa kamatayon, ug ang bugtong butang nga nakapalig-on kanako mao ang paglaom sa pagkakita kanila diha sa pagkabanhaw.
“Ako mapasigarbohon kaayo kang Matt ug sa iyang hugot nga determinasyon sa pagpadayon sa pagpamatuod ngadto sa uban bisan pag masakiton na kaayo. Siya tinuod nga panig-ingnan alang sa tanan, ug ako nagalantaw sa paggakos kaniya sa pagkabanhaw.”
Usa ka inahan nga ginganlag Nancy misulat: “Akong gibasa ang artikulo nga nagaagay ang akong mga luha. Ang among anak babayeng si Rachelle namatay tungod sa tumor sa utok niadtong Enero 11, 1996, duha ka adlaw pa lamang sa wala pa makab-ot ni Matt ang iyang tumong sa pagpabawtismo. Sayis anyos pa lamang si Rachelle sa dihang ang tumor mihunos sa iyang kinabuhi, apan sama kang Matt, siya wala mohunong, ug siya naningkamot kanunay kutob sa iyang mahimo sa pagpahimuot kang Jehova.
“Usa gayod unya ka mahimayaong adlaw sa dihang si Jehova magpanalangin kanamo nga makita ang among anak babaye nga himsog ug makahimo sa pagpahimulos sa bug-os sa iyang pagkabata. Sama kang Jairo ug sa iyang asawa, kami gayod mahinam pag-ayo ‘sa hilabihan nga kalipay.’”—Marcos 5:42.
Si Shannon, nga taga-Georgia, T.B.A., misulat: “Gipakita kanako niining estoryaha nga ikaw mahimong lig-on dapig kang Jehova bisan kon ikaw masakiton. Bisan tuod wala akoy grabeng sakit karon ug kanunay nga may maayong panglawas, akong tipigan kini aron mabasa sa ulahi.
“Ako naglaom nga ang mga ginikanan ni Matt makabatog kahupayan diha sa paglaom sa pagkabanhaw. Ako usab nawad-ag minahal diha sa kamatayon—ang akong apohang babaye, sa 1995. Ako mapasalamaton kaayo nga ako nakaila kang Jehova ug nga ako adunay paglaom sa pagkakita sa akong mga minahal pag-usab.”
Usa ka tin-edyer nga Katsila misulat: “Ang akong mga ginikanan nagtisok diha sa akong upat ka igsoong babaye ug kanako sa bili sa pagtambong sa Kristohanong mga tigom. Apan human mabasa kining kasinatiana, ako nakaamgo nga moabot ang puntong among isipon kini ingon nga rutina. Buot kong pahalipayan ang mga ginikanan ni Matt sa paghatag kaniya sa maong maayong espirituwal nga edukasyon. Sila maoy panig-ingnan alang kanamong tanan. Buot kong mahibalo sila nga bisan tuod lisod ang pagsagubang niining matanga sa kahaw-ang, si Jehova anaa kanunay sa atong kiliran.
“Ako naglaom sa paghimamat kang Matt sa bag-ong kalibotan. Gusto kong moingon kaniya nga siya maoy usa ka maayong panig-ingnan ug nga kaming tanan naghandom kaniya diha sa among mga kasingkasing. Si Jehova maoy usa ka Diyos sa mga buhi, ug si Matt anaa karon sa samang dapit nga nahimutangan sa akong igsoong babaye nga namatay upat na ka tuig kanhi—diha sa panumdoman ni Jehova. (Lucas 20:38) Si Matt, ang akong igsoong babaye nga si Eva, ug ang daghang uban pang matinumanong mga alagad sa Diyos atua didto. Kahibulongan si Jehova, ug dili niya kami biyaan.”
Sa pagkatinuod, ang paglaom sa pagkabanhaw talagsaon. Hinaot nga atong pabilhan kini, ug hinaot atong ipakita ang atong pagpabili niining maanindot kaayong saad pinaagi sa paghinumdom sa atong Maglalalang sa adlaw-adlaw, sama sa gihimo sa iyang pinalanggang Anak, si Jesu-Kristo.
[Hulagway sa panid 24]
Si Deseree
[Hulagway sa panid 24]
Si Erin
[Hulagway sa panid 24]
Si Maria
[Hulagway sa panid 24]
Si Jessica
[Hulagway sa panid 25]
Si Sara
[Hulagway sa panid 25]
Si Heidi
[Hulagway sa panid 25]
Si Nancy, uban sa iyang bana ug anak babayeng si Rachelle
[Hulagway sa panid 25]
Si Shannon