Gipakamenos ang mga Lagda sa Trabaho

“Ang telebisyon mao ang labing dakong tigprograma sa masa sa modernong katilingban,” miingon si Edward Cornish, presidente sa World Future Society, ug kini “mas importante kay sa mga tunghaan, sa mga ginikanan o sa mga tigsimba.” Siya mipatuo nga ang mga tigtan-awg telebisyon “ginaprograma sa mosunod nga mga pagtuo: Ang tanan may katungod sa hataas nga sukdanan sa pagkinabuhi bisan unsa pa ka gamay sa trabaho nga ilang ginahimo. Ang trabaho, sa pagkatinuod, sa dakong bahin dili kinahanglanon tungod kay masulbad ang dagkong mga suliran pinaagi sa usa ka produkto nga nagpaluyo sa programa. Dili kinahanglan ang paghago sa pagtrabaho tungod kay makabalda kana sa tawo sa paglipaylipay, ug . . . ang pagdula . . . paglingawlingaw—mao ang katuyoan sa kinabuhi.”

Nagpakigpulong diha sa espesyal nga komperensiya sa Washington, D.C., si Gn. Cornish miingon nga samtang ginapakita sa mga personalidad sa telebisyon ang mga kahimtang sa trabaho, sa tinuod nagdula lamang sila, nagahimo sa “popakaaron-ingnong trabaho—nagligoyligoy sa ilang mga trabaho.” Ang resulta, siya miingon, nga ang “mga programa sa TV nakamugnag kaliwatan sa katawhan kinsa naglaon ug usa ka sukdanan sa kinabuhi, nga walay paghago sa pagkab-ot niana,” nga ginaprograma “sa pagtuo nga ang tinuod nga pagkugi ug pagdisiplina sa kaugalingon dili hinungdanon.”

Kini, sa tinuod, dili mao ang katuyoan sa Diyos alang sa tawo. Iyang gilalang ang tawo sa pagtrabaho. (Genesis 2:15) Apan, bisag magkugi ang tawo, usa kini ka kalingawan, inay makatakang buhat. Ang “gasa” sa Diyos, miingon ang Ecclesiastes 3:13, mao nga ang “tagsatagsa ka tawo mokaon ug moinom ug malipay pag-ayo sa tanan niyang pagkugi.” Dugang pa, ang tawo nga mahadlokon sa Diyos gitambagan sa “pagkugi, nga magabuhat sa maayong mga butang pinaagi sa iyang kamot, aron may ikahatag siya ngadto sa mga nagakinahanglan.”—Efeso 4:28.