Gikan sa Among mga Magbabasa

Down’s Syndrome

Magbabasa ako sa Pagmata! kapin na sa 25 ka tuig, apan unang higayon pa kini nga nakabasa akog artikulo nga naghisgot ug kahimtang nga kaamgid sa akoa. Usa ako ka inahan sa 22-anyos nga lalaki kinsa nag-antos sa Down’s Syndrome. Akong gibasa ang artikulo bahin kang Valerie sa inyong Pranses nga edisyon sa makadaghan. (Cebuano, Hunyo 8, 1984) Nakatabang kini kanako sa pagbuntog sa pagbati sa pagkasad-an, kaulaw ug kapakyasan nga nagsamok kanako sulod sa 22 ka tuig. Prangkang gipahayag sa ginikanan ni Valerie ang ilang mga pagbati ug ang ilang pagkaprangka nakapukaw kanako sa pagpalandong pag-usab sa mga butang aron masusi kon unsay akong mahimo sa positibong paagi alang sa akong anak nga anaa sa usa ka institusyon. Salamat kaninyo sa wala dahomang tabang. Ania na ako sa hustong dalan karonl

Ngalan gihawiran, Pransiya

Homoseksuwalidad

Bata pa ako nga gusto ko nang mahimong babaye ug ingong resulta nahimo akong homoseksuwal. Ang mga simbahan nga akong ginatambongan nagdasig kanako sa pagsagop sa papel nga akong gitinguha. Busa akong gitusokan ang akong dalunggan, mitomar ug mga hormones aron modako ang akong suso ug misugod sa pagsul-ob ug mga besti sa babaye. Ang akong igsoong babaye, nga usa sa mga Saksi ni Jehova, mipakita kanako sa mga teksto sa Bibliya nga nagtunglo sa mga buhat sa homoseksuwal, apan yanong mitubag ako nga dili ako motuo ug Bibliya. Gihatagan niya ako ug mga mabasa, lakip sa Pagmata! nga adunay sugilanon bahin sa usa ka tawo nga sama kanakog situwasyon. (Nobyembre 22, 1980) Ug milampos siya sa pagdaog sa homoseksuwal nga mga buhat. Gipanlimbasogan ko kini, misugod sa pagsusi sa Bibliya ug nakakat-on sa gahom sa pag-ampo. Sa ulahi, gidawat nako ang pagtuon sa Bibliya ug nahunong nako ang akong homoseksuwal nga mga buhat, ug karon usa na ako ka dedikadong alagad ni Jehova. Salamat sa Pagmata! ug sa ubang tabang nga akong nadawat.

J. R., Brazil

Pagpahawa sa Balay

Daghan kaayong salamat kaninyo sa artikulong “Mga Batan-on Nangutana . . . Sa Unsang Paagi Ako Mahamtong Kon Dili Ako Mopahawa?” (Septiyembre 8, 1984) Naghinaot ako nga basahon sa tanang batan-on ang artikulo ug ipadapat kini. Mipahawa ako sa balay aron mohamtong, sa dihang mahinumduman ko kini magmahay gayod ako. Dili ako makapugong sa paghunuhuna kon unsa unta ka sayon ang pagkahimong hamtong uban sa tabang sa mga tawo nga tinuod gayod nga nagmahal kanako ug nagtagad sa akong kaugmaon. Ang akong tambag alang sa mga batan-on mao ang pagpabilin sa balay ug pagkakat-on sa labing maarangan. Dayon inig-abot na sa panahon ug modangat sila sa tinuod nga pagkaedad-edaran, mabatonan nila ang mas masayon ug mas malipayong panahon sa pagpuyo sa ilang kaugalingon.

A. H., Nevada