Nahiusa Uban sa Maglalalang sa Unibersohanong Organisasyon
“Tan-awa! Pagkamaayo ug pagkamalipayon gayod sa mga magsoon nga managpuyo sa panaghiusa!”—SALMO 133:1.
1, 2. (a) Unsang makapabalakang butang ang mitungha sa mga 6,000 ka tuig kanhi? (b) Unsay pagtawag sa Bibliya niining mabudhion, ug sa unsang paagi naningkamot siya sa paghimo sa iyang kaugalingon nga mahisama sa Labing Hataas?
ANG Maglalalang sa unibersohanong organisasyon nagtinguha sa paghupot niini nga putli, matarong, ug nahiusa. Apan wala magdugay human sa sinugdanan sa paglungtad sa tawo sa mga 6,000 ka tuig kanhi, usa ka makapabalakang butang ang mitungha sa talan-awon sa uniberso. Nahitabo kini sa dihang ang labaw-tawhanong magsusupak mibulag gikan sa organisasyon sa Maglalalang ug misugod sa pagtukod ug iyang kaugalingong independenteng organisasyon.
2 Tungod kay misupak kining mabudhion sa iyang Maglalalang, gitawag siya sa Bibliya nga Satanas, nga nagkahulogang “Magsusupak.” Siya ang dakong-magsusupak ni Jehova, ang matarong nga Soberano sa uniberso. (Job 1:6, 7) Ambisyoso sa paghimo sa iyang kaugalingon nga mahisama sa Labing Hataas sa pagbaton ug iyang kaugalingong organisasyon, ang Magsusupak naningkamot sa paglihok ingong kaatbang nga organisasyon ug diyos. Busa gihimo ni Satanas ang iyang kaugalingon nga madanihon kaayong tan-awon. Ang tinamdan ni Satanas makita sa dinastiya ug masilakong posisyong kalibotanon nga gihuptan sa “hari sa Babilonya,” nga niini ang mga terminong “magilakong usa” ug “Lucifer” tukmang gingalan. (Isaias 14:4, 12-14; King James Version; An American Translation) Hangtod karong adlawa, sumala sa pagtugot ni Jehova, si Satanas mao ang “diyos sa sistema niining mga butanga.”—2 Corinto 4:4.
3. (a) Unsang bahin sa organisasyon ni Jehova nga unang giatake niining magsusupak? (b) Unsa may mga hitabo nga miagak sa Yawa sa pagkahimong magmamando sa mga demonyo?
3 Aron sa pagpahuyang sa organisasyon ni Jehova, unang giatake ni Satanas ang kinaubsang bahin niini, si Adan, ang tinudlong ulo sa tawhanong banay. (Genesis 3:1-24; Salmo 8:3-5; Roma 5:12) Sa ulahi, daghang mga manulonda sa masinupakon mibiya sa ilang “orihinal nga posisyon,” o angay nga puloy-anan sa langit, ug nagmateryalisar sa unod aron makaminyo ug makarelasyon sa sekso uban sa maanyag, bisag dili hingpit, nga mga babaye. (Judas 6) Ang ilang mestisong mga anak, dili normal sa gidak-on ug kusog, gitawag nga Nepilim. Kining terminoha, gituohang nagkahulogang “mga tighulog,” tukma sanglit dayag sila ang nakapahulog sa mga tawhanon pinaagi sa kapintasan. Sa panahon sa Lunop, mihaw-as ang masinupakong mga manulonda sa ilang unodnong lawas ug mibalik sa espirituhanong gingharian. (Genesis 6:1–7:23) Pinaagi sa pagbulag sa ilang kaugalingon gikan sa organisasyon ni Jehova, gihimo nila ang ilang kaugalingon nga mga demonyo, ug si Satanas nga Yawa nahimong ilang magmamando.—Deuteronomio 32:17; Salmo 106:37; Mateo 12:24; Lucas 11:15-19.
4. Unsay gihimo sa mga tawong naluwas sa Lunop, apan unsay gisugdan ni Satanas sa pagbuhat, ug uban sa unsa nga tumong?
4 Nianang paagiha, nagtukod si Satanas ug dili makita, labaw-tawhanong espirituwal nga bahin sa iyang organisasyon. Ang mga nangaluwas sa Lunop, si Noe ug iyang pamilya, nagpabiling nahiusa uban sa dili makita langitnong organisasyon ni Jehova. (Genesis 6:9; 8:18-21) Apan misugod si Satanas sa pagbungkag sa panaghiusa sa matinumanong mga anak ni Noe. Unsa may tumong sa Yawa? Buweno, sa pagpatunghag makitang bahin sa iyang daotang organisasyon!
5. Sa unsang paagi gisugyot sa The Watch Tower sa Mayo 1, 1921 nga si Satanas adunay organisasyon?
5 Milawig unag dugayng panahon sa International Bible Students sa pagsabot nga si Satanas adunay organisasyon. Apan ang The Watch Tower sa Mayo 1, 1921, miingon: “Wala matagbaw sa iya nang nahimo, gidani ni Satanas kining langitnong panon ug gipalihok sila sa pagdaot sa katawhan ug sa pagpuno sa yuta sa kapintasan. Miorganisar siyag sistema nga dili makita sa tawhanong mga mata, maingon man usa ka sistema sa yuta nga makita sa tawhanong mga mata, ug naningkamot siya sa pagtugbang sa tanang bahin sa gipadayag nga mga plano sa Diyos.”
6. Unsay giingon sa The Watch Tower sa Disyembre 1, 1922, bahin sa katuyoan ni Satanas?
6 Ang “Katuyoan ni Satanas” maoy ikaduhang ulohan nga ilalom niini ang The Watch Tower sa Disyembre 1, 1922, matin-awng nag-ingon: “Ania na kita karon sa daotang adlaw. Nagpadayon ang gubat taliwala sa organisasyon ni Satanas ug sa organisasyon sa Diyos. Dili kini mabangbang nga pakiggubat. Naningkamot si Satanas sa pagpukan sa kasibot sa organisasyon sa Ginoo, ug kon, mahimo, sa paglaglag sa mga membro sa panimalay sa mga anak. Tungod niini migamit siyag tanang mga laraw nga mabatonan.”
7, 8. (a) Sa unsang paagi makatabang ang pagsabot sa duha ka magkaawayng mga organisasyon? (b) Diha sa The Watch Tower sa Marso 1, 1925, unsay nagpakitang nagabatok sa masumbingayong “batang lalaki”?
7 Ang pagsabot sa duha ka magkaawayng organisasyon makatabang sa pagtin-aw sa daghang pagtulon-an ug mga tagna sa Bibliya. Pananglitan, ang Pinadayag 12 wala kaayo masabti hangtod nga ang artikulong “Pagkatawo sa Nasod” mitungha sa The Watch Tower sa Marso 1, 1925. Ang temang teksto niana (Pinadayag 12:5, KJ) mabasa: “Ug siya nanganak ug lalaki nga mao ang magahari sa tanang kanasoran pinaagi sa olisi nga puthaw: ug ang iyang anak gisakgaw ngadto sa Diyos, ug ngadto sa iyang trono.”
8 Diha sa mga panid 67 ug 68 kining artikuloha miingon:
“Unsa ang talagsaong bahin sa balaang plano sulod sa katuigan? . . . Ang pagtukod sa gingharian nga gitudlo kanato ni Jesus sa pag-ampo. Kana nagkahulogan sa pagkatawo sa bag-ong nasod, nga magmando ug magapanalangin sa tanang banay sa yuta. . . . Kinsa ang kaatbang nga gahom nga nagpugong sa katawhan sa pagkuhag kahibalo bahin niining mahimayaong bag-ong nasod ug sa mga panalangin nga ihatag niini ngadto kanila? . . . Si Satanas nga Yawa, ug ang iyang organisasyon. . . . Ang tinuod nga pakiggubat maoy sa Diyos batok sa yawa, ang gingharian sa pagkamatarong nga magapukan sa gingharian sa pagkadaotan ug sa kangitngitan, ang pagtukod sa gingharian sa kamatuoran imbes. . . . Human sa 1918 ang organisasyon sa yawa, sa pinansiyal, politikal ug eklesiastikal, ilabina ang ulahi, bukas nga mibulag sa Ginoo ug sa iyang gingharian; ug dihadiha ang kasuko sa Diyos batok sa mga nasod misugod sa pagpadayag. Sukad niadto nagpadayon ang gubat diha sa yuta. Sa wala pa kana mahitabo dihay gubat nga gisangka sa langit.”
9. Sa 1925, kinsa ang gibatbat nga “babaye” sa Pinadayag kapitulo 12?
9 Sayop nga gituohan kaniadto nga nagtagna ang Isaias 66:7 ug Pinadayag 12:5 sa mao ra gihapong “batang lalaki.” (KJ) Busa ang gikutlo sa ibabaw nga Watch Tower miingon usab:
“Ang ‘babaye’ sa dayag naglarawan nianang bahin sa Sion, ang organisasyon sa Diyos, nga nanganak ug bag-ong kagamhanan o nasod nga magmando sa kanasoran ug katawhan sa yuta uban sa olisi nga puthaw ug sa pagkamatarong. . . . (Galacia 4:26) Sa laing pagkasulti ang Sion o Jerusalem, ang organisasyon sa Diyos, mao ang inahan nga nanganak sa usa ka bag-ong nasod, o mga bahin sa pagmando. Ang mga dinihogan sa yuta maoy bahin sa ‘babaye’, ug sa pagkamatuod naglarawan kaniya. Ang babaye nga ‘nagbestig adlaw’ nagkahulogan sa Sion sa langit ug sa mga inuyonan sa yuta sa organisasyon sa Diyos sa panahon sa pag-abot sa Ginoo sa iyang templo. . . . Karon diha sa iyang templo nga gilangkoban sa templong matang o sa pagpasul-ob kanila sa iyang sapot sa pagkamatarong, ang iyang organisasyon mipatunghag bag-ong nasod, nga mao ang Sion, nga nagasidlak sama sa adlaw.”
10. Unsay nahitabo sa espirituhanong bahin sa organisasyon ni Satanas, ug unsang gubat karon ang gisangka?
10 Ang “dragon,” nga karon nasabtang si Satanas nga Yawa mismo, napakyas sa pagtukob sa “batang lalaki,” ang Mesiyanikong Gingharian nga natawo sa langit sa kataposan sa Panahon sa mga Hentil sa 1914. (Lucas 21:24, KJ) Sa gubat nga nahitabo sa langit, ang espirituhanong bahin sa organisasyon ni Satanas gitambog dinhi sa yuta, nga dili na gayod makasulod pag-usab sa langit, ug sa paggamit sa makapabahin nga impluwensiya didto. Kanang napaubos nga organisasyon migukod sa makitang bahin sa unibersohanong organisasyon ni Jehova, nga padayong nagpakiggubat batok sa “mga nanghibilin sa iyang binhi, nga nanagbantay sa mga sugo sa Diyos ug nagahupot sa panghimatuod mahitungod kang Jesus.”—Pinadayag 12:17.
Nahiusang Pag-alagad
11. (a) Ngadto kang kinsa aplikado ang mga pulong ni Pablo bahin sa “Jerusalem sa itaas” karon? (b) Unsay gipamulong ni David bahin sa yutan-ong Jerusalem, nga niini nahimutang ang balay sa pagsimba ni Jehova?
11 Ang mahulagwayong “babaye” gipakasama sa piniling siyudad sa Jerusalem, nga sa magaraynon gitawag nga Sion. Busa, ang mga pulong ni Pablo bahin sa may kagawasang “Jerusalem sa itaas” aplikado karon sa “mga nanghibilin sa iyang binhi” diin batok kanila ang “dragon,” si Satanas nga Yawa, nagpadayon sa “pagpakiggubat.” (Galacia 4:26) Lig-ong natukod ug suod kaayo ang yutan-ong Jerusalem sa mga adlaw ni David, kinsa miingon: “Nalipay ako sa pag-ingon nila kanako: ‘Mangadto kita sa balay ni Jehova.’ Ang among mga tiil nanagtindog sa sulod sa imong mga ganghaan, O Jerusalem. Ang Jerusalem nga gitukod sama sa usa ka siyudad nga gihiusa, diin didto mingtungas ang mga banay, ang mga banay ni Jah, ingong pahinumdom sa Israel sa paghatag pasalamat sa ngalan ni Jehova.”—Salmo 122:1-4.
12. (a) Sa unsang panaghiusa ang mga pulong sa Salmo 122:1-4 aplikado karon? (b) Ang Jerusalem ug ang balaang tabernakulo didto may kalabotan sa unsang panaghiusa sa mga banay sa Israel?
12 Pagkatahom nga talan-awon sa panaghiusa sa unibersohanong organisasyon ni Jehova! Ilabinang makita ang panaghiusa diha sa nasodnong kapiyestahan, sa dihang ang 12 ka banay sa Israel makigduyog sa hiniusang pagsimba ni Jehova diha sa balaang tabernakulo sa Jerusalem. Ug sa panahon sa pagmando sa ilang magbalantay-hari nga si David, ang mga banay nagpabiling nahiusa dili lamang tungod sa unodnong relasyon kondili sa nahiusang pagsimba sa ilang Diyos. Oo, ang Jerusalem mao ang inuyonan sa kahitas-an nga sentro sa nahiusa, organisadong pagsimba ilalom sa usa ka pagkasaserdote nga gikuha gikan sa banay ni Levi ug sa pamilya sa unang hataas nga saserdote sa Israel, si Aaron, ang magulang ni propetang Moises. Dugang pa, ang tanang 12 ka banay nahiusa sa Kasugoan sa pakigtugon nga nagpalahi kanila batok sa nagasimbag-demonyong mga nasod.
13. Unsay gipamulong ni David bahin sa panaghiusa nga gitagamtam sa karaang mga Israelitas?
13 Unsa ka makapahiusa kining mga butanga! Kini ang nakapahiusa sa katawhan sa Diyos ingong usa ka nasodnong organisasyon alang sa ilang kaluwasan ug panalangin. Gipahayag ni David kini ning paagiha: “Tan-awa! Pagkamaayo ug pagkamalipayon gayod sa mga magsoon nga managpuyo sa panaghiusa! Kini sama sa bililhong lana nga anaa sa ibabaw sa ulo, nga nagadaligdig ibabaw sa bungot, bisan sa bungot ni Aaron, nga midaligdig ibabaw sa liab sa iyang mga besti. Sama kini sa tun-og sa Hermon nga nangatagak ibabaw sa kabukiran sa Sion. Kay didto gisugo ni Jehova ang panalangin, bisan sa kinabuhing walay kataposan.”—Salmo 133:1-3.
14. (a) Kinsa ang nagsundog sa nasodnong panaghiusa sa Israel karon? (b) Diin gilarawanan nga nagbarog ang espirituwal nga mga Israelitas, ug unsang “awit” ang dungan nilang giawit?
14 Ang nasodnong panaghiusa nga nagdasig ning kinasingkasing nga mga pahayag gisunod karon. Pinaagi kang kinsa? Pinaagi sa “Israel sa Diyos,” ang espirituwal nga Israel kansang pagkainahan nahinumdoman ni Pablo sa pag-ingon: “Apan ang Jerusalem sa itaas may kagawasan, ug siya mao ang atong inahan.” (Galacia 6:16; 4:26) Wala niya ibutang ang iyang inanak sa espiritu nga mga anak ubos sa pagkaulipon sa Kasugoan sa pakigtugon. Bisag ang “Israel sa Diyos” gilarawanan nga gilangkoban sa 12 ka banay, ang tanang 144,000 ka sakop gitimrihan sa samang “timri sa buhi nga Diyos,” ug ang tanan gihulagway nga nagbarog atubangan sa bugtong langitnong “Bukid sa Sion.” (Pinadayag 7:1-8; 14:1-4) Pagkadako nilang grupo sa koro samtang nagkahiusang nag-awit sa “awit ni Moises ang ulipon sa Diyos ug awit sa Kordero,” si Jesu-Kristo! (Pinadayag 15:3, 4; Juan 1:29, 36) Kanang maong “awit” nakahatag kalipay sa Diyos ug nagpadayag ug kadaogan!
15. (a) Ang 144,000 giorganisar alang sa unsa gawas sa pag-awit? (b) Sa unsang paagi nagkahulogang panaghiusa ang pulong “organisasyon”?
15 Ang 144,000 ug ang ilang Maestro-koro, “ang Kordero,” giorganisar dili lamang sa pagpalanog sa kalangitan uban sa ilang mga pag-awit. Ang ila maoy harianong organisasyon nga magmando sulod sa usa ka libo ka tuig alang sa kabayawan sa unibersohanong pagmando ni Jehova ug sa pagpanalangin sa tanang masanongong katawhan. (Pinadayag 20:4-6) Ang pulong “organisasyon,” nga tugbang pulong sa “dis-organisasyon,” may kalabotan sa usa ka kahikayan sa mga butang nga ang matag bahin gipahiluna sa iyang tukmang dapit ug gihatagag iyang buluhaton aron silang tanan magkahiusa sa pagpatunghag resulta sa kinatibuk-an. Busa, ang organisasyon mopatunghag panaghiusa, kooperasyon, kahusay, ug kaharmoniya—dili panag-away.
16. Sumala sa Efeso 4:8, 11-16, unsang tumong ang gisugdan kapin sa 19 ka siglo kanhi, ug unsay nakab-ot taliwala sa mga Saksi ni Jehova?
16 Ang tumong sa Kristohanong panaghiusa gisugdan kapin sa 19 ka siglo kanhi, sa dihang ang “mga gasa sa mga tawo” gihatag sa porma sa mga apostoles, mga propeta, mga ebanghelisador, mga magbalantay, ug mga magtutudlo. Sa dihang misugod pagpatik ang magasing Watch Tower sa 1879, mihatag usab ang Diyos ug espirituwal nga “mga magbalantay ug mga magtutudlo.” Kining taganaha nakaagak sa mga Saksi ni Jehova sa ilang presenteng “pagkausa diha sa pagtuo ug sa tukmang kahibalo sa Anak sa Diyos.” (Efeso 4:8, 11-16) Pagkadako sa atong pasalamat nga gihimo kini ni Jehova bisan pa sa daghang kasiglohan sa tibuok-yutang kalibogan ug dis-organisasyon sa relihiyon!
17. Sa unsang paagi nahibalo kita nga labaw pa sa panaghiusa sa dinihogang mga Kristohanon ang anaa sa hunahuna sa Diyos, ug niining bahina unsay gitagna ni Jesus?
17 Sa matin-aw, labaw pa kay sa panaghiusa sa dinihogang Kristohanon ang anaa sa hunahuna sa Diyos, kay “naglaraw siya ug usa ka kagamhanan nga inig-abot sa kataposan sa tinudlong panahon, nga mao, ang pagtigom pag-usab sa tanang butang diha kang Kristo, sa mga butang sa langit ug sa mga butang sa yuta.” (Efeso 1:9, 10) Niining bahina, si Jesus mitagna: “Ako adunay ubang mga karnero, nga dili sakop niining torila; ug kadto usab akong pagadalhon, ug sila mamati sa akong tingog, ug sila mahimong usa ka panon, usa ka magbalantay.”—Juan 10:16.
18. (a) Kinsa ang lakip sa “mga butang sa yuta” nga kinahanglang dungang tigomon? (b) Sa 1935, sa unsang paagi gihatagag espesyal nga pagtagad ang “ubang mga karnero”?
18 Lakip kining “ubang mga karnero” sa “mga butang sa yuta” nga kinahanglang dungang tigomon. Busa, ilalom sa impluwensiya sa espiritu sa Diyos, duolan sa 21 ka tuig human nga misugod si Jesus sa pagmando sa 1914, misugod nga gihatagan ug espesyal nga pagtagad ang “ubang mga karnero.” Sa panahon sa kombensiyon sa mga Saksi ni Jehova sa Washington, D.C., sa 1935, ang presidente sa Watch Tower Society mibatbat nga ang “dakong katilingban” mao ang “ubang mga karnero” nga sa ulahi pagatigomon sa Maayong Magbalantay, si Jesu-Kristo. (Pinadayag 7:9-17, KJ) May gitigom ba si Jesus sa “ubang mga karnero” nianang makasaysayanhong kombensiyon? Oo, kay 840 ka kombensiyonista niadto miila sa ilang kaugalingon ingong tinigom sa Maayong Magbalantay ug nagpabawtismo sa pagsimbolo sa ilang pahinungod kang Jehova nga Diyos.
19. (a) Sa pagkakaron, nahimong unsa ka dako ang “dakong katilingban”? (b) Pinaagi sa pakighiusa sa makitang organisasyon ni Jehova, ang “dakong katilingban” midangat ug panaghiusa uban kang kinsa, ug unsa ang ilang determinasyon?
19 Dinhi nagsugod ang pagtigom sa “dakong katilingban” sa “ubang mga karnero,” nga karon may gidaghanong kapin sa 2,800,000. Pinaagi sa pakighiusa uban sa makitang bahin sa organisasyon ni Jehova—nga mao, ang nanghibilin sa “gamayng panon” “niining torila” sa Maayong Magbalantay—midangat sila sa panaghiusa uban sa Dakong Maglalalang sa unibersohanong organisasyon. Ug sila determinado sa paghupot nianang panaghiusa sa tibuok nilang kinabuhi diha sa Paraiso sa yuta nga itagana alang kanila sa Supremong Magbalantay, si Jehova.—Lucas 12:32; 23:43.
20. Samtang ang dinihogang nanghibilin ug ang “dakong katilingban” nagpalandong sa nahimo sa Supremong Magbalantay sukad sa 1914, unsang mga pahayag nga mapalihok sila sa pagpamulong?
20 Samtang ang dinihogang nanghibilin ug ang nagkadaghang “dakong panon” nagpalandong sa tanang nahimo sa Supremong Magbalantay sa tibuok yuta sukad nga natapos ang panahon sa mga Hentil sa 1914, ang kinasingkasing nga pasalamat nagpalihok kanila sa dungang pag-awit sa dakong Hallelujah nga awit: “Dayega ninyo si Jah, kamong katawhan! Dayega ang Diyos diha sa iyang balaang dapit. Dayega siya sa pagkasangkad sa iyang gahom. Dayega siya tungod sa iyang mga buhat nga gamhanan. Dayega siya sumala sa iyang labaw nga pagkahalangdon. Dayega siya nga adunay honi sa trompeta. Dayega siya nga adunay salterio ug alpa. Dayega siya nga adunay gagmayng tambor ug pagsayaw. Dayega siya uban ang mga tulonggon nga kinuldasan ug organo. Dayega siya uban sa mga piyangpiyang nga mahonihon. Dayega siya sa piyangpiyang nga malanog ug tunog. Ang tanang may gininhawa—ipapagdayeg si Jah. Dayega si Jah, kamong katawhan!—Salmo 150:1-6.
21. (a) Kanus-a nga ang “tanang may gininhawa” magadayeg kang Jehova? (b) Alang kang kinsa ug sa unsang katuyoan nga magabuhat ang tanang mga sakop sa unibersohanong organisasyon?
21 Sa dili madugay ang presenteng “mga langit” ug “yuta” matunaw sa “gubat sa dakong adlaw sa Diyos nga Makagagahom,” ug ang dugay nang gihulat nga “bag-ong mga langit ug usa ka bag-ong yuta” lig-ong matukod. (2 Pedro 3:7-13; Pinadayag 16:14, 16) Ug, tinuod, “ang tanang may gininhawa” nga makalabang buhi niining hininloang yuta modayeg kang Jah, ang Dakong Maglalalang sa unibersohanong organisasyon sa pagkamatarong. Ang tanang mga sakop nianang organisasyona sa langit ug sa yuta sa mahimayaon magadayeg kang Jehova ug maunongon ug mahigugmaong magbuhat uban kaniya alang sa walay kataposang kabayawan sa iyang unibersohanong pagmando ug sa pagbalaan sa iyang labing bililhong ngalan. O pagkahalangdong panaghiusa ang gipadayag niining tanan!
Unsaon Nimo sa Pagtubag?
◻ Unsay mga hitabo ang mitultol sa pagkahimong magmamando ni Satanas sa mga demonyo?
◻ Sa unsang paagi makatabang ang pagsabot sa duha ka dagkong organisasyon?
◻ Ang Salmo 122:1-4 aplikado sa unsang panaghiusa karon?
◻ Nganong ikaingong labaw pa kay sa panaghiusa sa dinihogang mga sumusunod ni Jesus ang anaa sa hunahuna ni Jehova?
◻ Kanus-a managdayeg ang “tanang may gininhawa” kang Jehova nga Diyos?
[Mga Letrato sa panid 16, 17]
Kanunayng nahiusa ang katawhan ni Jehova sa usag usa ug sa Maglalalang sa unibersohanong organisasyon