Unsa ka Masangkaron ang Imong Gugma?

GAGMAY ang sisi, may kabhang nga linalang nga nagpuyo sa tubig. Pipila lamang ka tawo ang nagtagad niini. Apan, ang sisi adunay usa ka tagsaong katakos: Kini mahibalo sa pagtapot sa mga butang. Ang sekreto niini? Kini mohimog papilit nga lig-on kaayo nga ang pelikula nga aduna lamay 3/10,000 sa usa ka pulgada (0.00762 mm) nga kanipison may “tagsaong kalig-on” nga 7,000 ka libra matag kuwadrado pulgada (493 kg/sq cm)! Ang usa nga nakasulay sa pagtangtang sa sisi sa lugar nga gitapotan niini makapamatuod sa gahom sa elemento niini sa pagtapot.

Pamilyar ang mga Kristohanon sa kaamgid nga butang. Gilangkoban ang organisasyon ni Jehova sa yuta sa mga tawo nga gikan sa tanang nasod, pinulongan, rasa, ug katilingbanong mga grupo. Apan kini bug-os nga nahiusa. Ang sekreto niini? Kini, usab, adunay gamhanong elemento sa pagtapot, usa nga mas malig-on kay sa papilit sa ubos nga sisi. Gisultihan kita ni apostol Pablo kon unsa kining elementoha nga makapatapot sa dihang misulat siya: “Sul-obi ninyo ang inyong kaugalingon sa gugma, kay kini mao ang hingpit nga bugkos sa panaghiusa.”—Colosas 3:14.

Sa pagkamatuod, dili tanang butang nga gitawag gugma makapahiusa. Daghang gubat ang gisangka sa ngalan sa “gugma sa nasod.” Ang mahakugong gugma mopatunghag pangabubho. “Ang paghigugma sa salapi mao ang gamot sa tanang makadaot nga butang.” (1 Timoteo 6:10) May bahin sa hinungdan sa malisod nga panahon karon, mao kanang kamatuoran nga daghang tawo “mga mahigugmaon sa kaugalingon.”—2 Timoteo 3:1, 2.

Nan, unsang matanga sa gugma, ang makapahiusa sa mga Kristohanon? Ang dili mahakugon, masangkarong gugma.

Diin Gikan Kining Matanga sa Gugma?

Kining pangutanaha gitubag sa tulo ka mubong mga pulong nga gisulat ni apostol Juan: “Ang Diyos gugma.” (1 Juan 4:8) Gipakita ang gugma ni Jehova pinaagi sa iyang pagkamaluluton kanato. Ang tanang maayong butang nga atong nabatonan nagagikan kaniya. “Ang tanang maayong gasa ug ang tanang hingpit nga regalo nagagikan sa kahitas-an.” (Santiago 1:17) Matuod kini sa pisikal nga kalibotan nga atong gikalipayan, ug ilabina sa espirituwal nga mga panalangin nga gihatag sa madagayaon diha sa mapabilhong mga Kristohanon.

Gikuha ni Jesu-Kristo ang atong pagtagad sa usa ka tagsaong kapahayagan sa gugma ni Jehova, nga nagaingon: “Siya [Jehova] nagapasubang sa iyang adlaw sa ibabaw sa mga daotan ug sa mga maayo ug nagpadalag ulan ngadto sa mga matarong ug sa mga dili matarong.” (Mateo 5:45) Ug ang gugma ni Jehova alang sa katawhan sa kinatibuk-an saylo pa sa pagtaganag materyal nga mga panalangin, kay si Jesus mibatbat: “Gihigugma pag-ayo sa Diyos ang kalibotan nga iyang gihatag ang iyang bugtong Anak, aron ang tanan nga mopakitag pagtuo kaniya dili malaglag kondili makabaton ug kinabuhing dayon.” (Juan 3:16) Duna pa bay labawng gugma nga sama niini nga makita?

Pinaagi sa pagpakitag dakong gugma alang sa katawhan, nagpakita si Jehova ug gugma nga lig-ong gipasukad sa prinsipyo. Sa Gregong pinulongan, kanang maong gugma gitawag nga a·gaʹpe. Gipakita ni Jehova kining gugmaha diha sa mga Kristohanon usab. Apan, ang iyang gugma alang kanila adunay laing diwa. Kon mosanong ang tawo sa gugma sa Diyos, ipadayag ni Jehova ang phi·liʹa, usa ka Gregong pulong nga nagkahulogang “panaghigala” o “pagmahal.” Si Jesus nagpasalig kanato: “Ang Amahan adunay pagmahal kaninyo, kay kamo nagmahal man kanako.”—Juan 16:27.

Sundoga ang Gugma sa Diyos

Ang gugma nga nahimong bugkos sa panaghiusa alang sa mga Kristohanon mosundog sa tagsaong panig-ingnan ni Jehova. Sumala sa gipamulong ni apostol Juan: “Kita nahigugma, tungod kay siya ang unang nahigugma kanato.” (1 Juan 4:19) Kining gugmaha maoy timaan sa tinuod nga Kristohanon ug, sa pagkatinuod, ang bunga sa balaang espiritu sa Diyos.—Juan 13:34, 35; Galacia 5:22.

Ang gugma sa Kristohanon kinahanglang unang ipakita ug sa labing dako diha sa iyang langitnong Amahan. Dayon, kinahanglang magpakita siyag gugma sa iyang isigkatawo. (Mateo 22:37-39) Sanglit malukpanon man kaayo ang gugma sa Diyos, ang atong gugma alang sa masigkamagtutuo, kinahanglang masangkaron usab, ‘malaparon.’ Maingon man, gisultihan ni apostol Pablo ang mga Kristohanong taga Corinto: “Ang among baba nagabungat diha kaninyo, mga taga Corinto, ang among mga kasingkasing gipalapad. . . . Kamo, usab, magpalapad.”—2 Corinto 6:11-13.

Sa unsang paagi makasundog kita sa masangkarong gugma ni Jehova? Atong tagdon ang pipila ka mga pananglitan.

‘Palapara’ ang Gugma sa Pamilya

Mipasidaan si Pablo nga sa “kataposang mga adlaw” aduna unyay kakulang sa “kinaiyanhong pagbati.” (2 Timoteo 3:1-3) Apan, diha sa Kristohanong pamilya, kinahanglang abunda ang gugma, gugma nga pinasukad sa prinsipyo (a·gaʹpe) ug sa mahigalaon, mabinationg matang sa gugma (phi·liʹa).—Mateo 10:37; Efeso 5:28; Tito 2:4.

Dili masayon ang pagpakitag gugma. Moresulta usahay ug masakit nga pagbati diha sa pamilya ang suliran sa salapi. Tingali masuko ang kapikas sa kaminyoon sa mga pagpangayog panahon sa usa nga kapikas. Tingali mobati ang asawa nga siya gipasagdan ug gibale-wala. Bation sa daghang tin-edyer nga ang ilang mga ginikanan wala makasabot kanila. Sa unsang paagi kini ug ang ubang kaamgid nga suliran masulbad?

Una, ang sulbad alang sa tanang nalangkit mao ang pagsundog sa panig-ingan sa Diyos ug “magpalapad” sa iyang gugma. “Kamong mga asawa magpasakop kamo sa inyong mga bana, kini maoy matarong diha sa Ginoo,” miawhag si Pablo. “Kamong mga bana padayon sa paghigugma sa inyong mga asawa, ug ayaw ninyo sila pagpahimungti. Kamong mga anak, magpasakop kamo sa inyong mga ginikanan sa tanang butang, kay kini makapahimuot sa Ginoo. Kamong mga amahan, ayaw pagsuk-a ang inyong mga anak, aron dili sila mawad-an sa kadasig.”—Colosas 3:18-21.

Ang pag-ampo sa pagpangayog tabang sa pagpakitag gugma sa pagkatinuod epektibo kon adunay mga problema. Maingon man ang maayong komunikasyon sa pamilya ug ang regular nga panaghisgot sa Bibliya. (Deuteronomio 6:4-9) Ingong pasukaranan sa mahigugmaong komunikasyon, nakita sa daghang pamilya nga nakatabang ang paggamit sa artikulong “Buhi ang Pulong sa Diyos” diha sa Ang Bantayanang Torre ug sa usang nag-ulohang “Mga Batan-on Nangutana” diha sa magasing Pagmata!

Masangkarong Gugma Diha sa Kongregasyon

Makasubo kon ang mga ginikanan ug mga anak mapakyas sa paghigugma sa usag usa. Makasubo usab kon ang masigka-Kristohanon mapakyas sa pagpakitag gugma sa usag usa. Si apostol Juan nag-ingon: “Siya nga wala maghigugma sa iyang igsoon, nga iyang nakita, dili gayod makahimo sa paghigugma sa Diyos, nga wala niya makita.”—1 Juan 4:20.

Ang gugma makatabang kanato sa paglaom sa labing maayo alang sa atong espirituwal nga mga igsoon. (1 Corinto 13:4, 7) Tingali atong makita ang atong igsoon nga adunay mga problema—tingali ‘nagaani sa iyang gipugas’ sa miaging dili maalamong mga buhat. (Galacia 6:7) Apan, ang gugma makatabang kanato sa paghupot ug positibong tinamdan diha kaniya. Likayan nato ang mga panghunahuna sama sa, ‘nagtahap ako kaniya.’ Bisag mahuyang ang atong igsoon sa pagtuo, makapabanaag kita sa pailob ni Jehova diha sa mga mahuyang ug maningkamot sa pagsundog sa Iyang mahigugmaong kalulot.—2 Pedro 3:9.

Ang gugma nga naglungtad taliwala sa mga alagad ni Jehova nakatabang sa pagpalig-on sa batan-ong mga Kristohanon latas sa malisod nga katuigan sa pagkatin-edyer. Sa dihang gipangutana ang batan-ong taga Aprika nga dalaga kon unsay nakatabang kaniya sa pagpabilin diha sa tinuod nga pagsimba, siya mitubag: “Tingali dili lamang sa akong nakat-onan gikan sa Bibliya kondili sa gugma nga akong nakita sa motambong ako sa Kristohanong mga tigom ug sa ilang pagdawat kanako nga maoy nakapadayeg kaayo kanako.”

Oo, ang masangkarong gugma makabugkos sa kongregasyon. Apan hinumdomi, ang gugma ni Jehova nagaabot ngadto sa tanang katawhan. Sa unsang paagi makasundog kita kaniya ning bahina?

Paghigugma Niadtong Dili Nato Kaila

Gipasiugda ni Jesus ang usa ka tagsaong paagi sa pagpakitag gugma bisan sa mga tawo nga dili nato kaila. Siya miingon: “Kining maayong balita sa gingharian kinahanglang igawali sa tanang pinuy-anang yuta sa pagpamatuod sa tanang kanasoran; ug unya moabot ang kataposan.” (Mateo 24:14) Oo, ang mga Saksi ni Jehova nagpakita sa ilang gugma sa uban kon sila magsangyaw sa maayong balita ngadto sa mga tawong dili kaila.

Ang gugma alang sa katawhan sa kinatibuk-an nagpalihok sa mga Kristohanon sa pagtabang sa mga dumuluong sa ubang mga paagi usab. Sama sa sambingay ni Jesus sa Samaritano, misulay sila sa pagpakitag maayo sa ilang mga silingan, ‘nagapangabudlay alang sa tanan,’ nga sa kasagaran mihatag ug dili madahom nga mga maayong resulta. (Galacia 6:10; Lucas 10:29-37) Pananglitan, usa ka batan-ong babaye sa Alaska nga nakigbahin sa buluhatong pagsangyaw sa kalay-ong hapit 160 milya (260 km) gikan sa iyang balay nakahibalag ug pobre kaayong pamilya kansang sakyanan naguba. Sa pagkadungog sa ilang situwasyon, ang amahan sa babaye mimanehog 320 milya (520 km) sa pagtabang. Kini nakahatag higayon sa pagpahayag niining pamilyaha bahin sa mga katuyoan ni Jehova ug sa Gingharian. Human sa pagtuon sa Bibliya, ang bana ug ang asawa nagpasimbolo sa ilang dedikasyon kang Jehova. Karon, sila usab, nakatagamtam ug kalipay sa pakigbahin sa maayong balita ngadto sa uban.—Buhat 20:35.

Higugmaon ba Nimo Kadtong Nagadumot Kanimo?

Apan, saylo pa ang Kristohanong gugma kay sa paghigugma sa mga dumuluong. Giawhag ni Jesus ang iyang mga tinun-an: “Padayon sa paghigugma sa inyong mga kaaway ug sa pagpanalangin niadtong nagalutos kaninyo; aron mapamatud-an ninyo ang inyong kaugalingon nga mga anak sa inyong Amahan nga anaa sa langit, kay siya nagapasubang sa iyang adlaw sa ibabaw sa mga daotan ug sa mga maayo ug nagapadalag ulan ngadto sa mga matarong ug sa dili mga matarong.”—Mateo 5:44, 45.

Tinuod bang mahimo ang paghigugma niadtong nagalutos kanato? Sa panahon sa Gubat sa Kalibotan II ang mga Saksi ni Jehova sa Nazi Alemanya mapintas nga gidagmalan ug gipugos sa pagtrabahog mabug-at nga diyutay ra kaayog makaon. Tataw, dili nila mabati ang pagmahal ug pagkamahigalaon (phi·liʹa) sa ilang mga maglulutos. Apan, ilang gipakitaan sila ug samang may prinsipyong gugma (a·gaʹpe) nga gipakita ni Jehova sa tanang katawhan. Busa, kon maarangan, ipakigbahin sa mga Saksi sa mga maglulutos ang makahatag-kinabuhing balita sa kamatuoran. Ug ang uban ning maong mga kaaway sa ulahi nahimong mga Kristohanon.

Ang kadaghanan niadtong naglutos sa mga alagad sa Diyos naghimo niini tungod sa pagkawalay kahibalo, sama sa gihimo ni Saulo, kinsa sa ulahi nahimong si apostol Pablo. (Galacia 1:13, 14) Kon atong maamgohan nga kining mga maglulutosa, sa usa ka paagi, maoy mga biktima sa propaganda ni Satanas, matabangan kita sa pagbaton ug mas mahigugmaong tinamdan diha kanila.—2 Corinto 4:4.

Si Jehova, ang Diyos sa mainit nga pagbati, malipay sa pagganti niadtong magpakitag masangkarong gugma diha sa pamilya, sa kongregasyon, sa mga dumuluong, ug bisan sa mga kaaway. Kining gugmaha lig-ong makabugkos sa sakop sa pamilya ug sa kongregasyon, sama sa papilit sa sisi nga makahimo niini sa pagtapot nga malig-on diha sa bato. Dugang pa, ang gugma magadasig sa mga tagagawas sa pagduol ug sa pakigbahin sa Kristohanong panaghiusa. Nan, dili ba may katarongan kita sa maapresyahong pagsanong sa gugma sa Diyos pinaagi sa dugang pagpasangkad sa atong gugma? Tinuod nga kita adunay katarongan! Busa magpadayon kita “sa pagbuhat niini sa mas bug-os pa.”—1 Tesalonica 4:9, 10.