Mga Pangutana Gikan sa mga Magbabasa
◼ Ginabut-an bang daan nga mamatay si Adan ug Eva, sanglit nag-ingon ang Hebreohanon 9:27 nga “ang tawo ginabut-ang mamatay sa makausa ra, ug tapos niana ang hukom”?
Dili, kining mga pulonga wala maghisgot kang Adan ug Eva, nga gilalang nga adunay paglaom sa dumalayong kinabuhi dinhi sa yuta. Kon misunod pa sila sa Diyos, mabuhi unta sila sa walay kataposan. Imbes gitakda nang daan ang ilang kamatayon, miresulta kini sa ilang tinuyong sala. (Genesis 2:15-17) Ang konteksto nagpakita nga ang pangunang aplikasyon sa Hebreohanon 9:27 maoy alang sa hataas nga saserdote sa karaang Israel, kinsa sa Adlaw sa Pagtabon sa Sala gilandongan ni Jesu-Kristo.—Hebreohanon 4:14, 15.
Sa 1915 si Charles T. Russell, nga maoy presidente niadto sa Watch Tower Society, gipangutana mahitungod sa Hebreohanon 9:27. Iyang gipunting pagbalik kadtong napatik na, sama sa makita diha sa Studies in the Scriptures ug Tabernacle Shadows of the Better Sacrifices (1899). Ang Hebreohanon 9:27 gibatbat sumala sa konteksto.
Sa Hebreohanon kapitulo 8 ug 9, gipakita ni Pablo nga ang daghang detalye sa Mosaikong Kasugoan maoy “hulad ug landong sa langitnong dapit nga balaan.” (Hebreohanon 8:5) Matuod kini ilabina bahin sa paagi sa paghalad sa tinuig nga Adlaw sa Pagtabon sa Sala. Diha lamang nianang espesyal nga adlaw nga makasulod ang hataas nga saserdote sa pinakasulod nga lawak sa tabernakulo. Kining lawaka, ang labing balaan, gialihan sa usa ka kurtina, ug ang hataas nga saserdote kinahanglang mangandam sa paagi sa paggamit sa espesyal nga insenso. Dayon makasulod siya uban sa haladnong dugo sa turong baka ug sa kanding. Bisan pag mainampingong sundon sa saserdote ang tanang higpit nga mga kinahanglanon, ang moresultang pagtabon sa sala sa mga Israelitas limitado sa panahon; ang mga halad kinahanglang itanyag kada tuig.
Nagpadayon sa iyang argumento, si Pablo miingon nga si “Kristo miabot ingong hataas nga saserdote,” apan human sa iyang kamatayon ug pagkabanhaw, siya “misulod, dili sa balaang dapit nga hinimo sa mga kamot. . . . kondili sa langit mismo, aron sa pag-atubang sa persona sa Diyos alang kanato.” (Hebreohanon 9:11, 12, 24) Kana bang halara kinahanglang sublion? Dili. Si Kristo “mitungha sa makausa ra.” (Hebreohanon 9:25, 26; Roma 6:9) Dayon si Pablo miingon: “Ug maingon nga ang tawo ginabut-ang mamatay sa makausa ra, ug tapos niana mao ang hukom, mao man usab si Kristo tapos makahalad sa makausa ra aron sa pagkuha sa mga sala sa daghang mga tawo.”—Hebreohanon 9:27, 28.
Pinaagi ning repaso sa konteksto atong mapabilhan ang mga komento sa Hebreohanon 9:27 diha sa Tabernacle Shadows: “Sa matag panahon nga mosulod ang saserdote sa Labing Balaan sa Adlaw sa Pagtabon sa Sala iyang gipameligro ang iyang kinabuhi; kay kon ang iyang halad dili hingpit mamatay siya sa moagi siya sa ikaduhang tabil [ang kurtina]. Dili siya dawaton sa Labing Balaan mismo, ni ang iyang dili hingpit nga mga halad ingong pagtabon sa mga sala sa katawhan. Busa magkahulogan ug kamatayon ang bisan unsa nga kapakyasan, ug sa pagkahimong tinunglo sa tanang nakasala nga iyang gisulayan aron makabaton ug kapasig-ulian. Mao kini ang paghukom nga gihisgotan niining tekstoha, nga agian sa matag tuig sa malarawanong mga saserdote.”
Ang Tabernacle Shadows mihimog panagtandi kang Kristo Jesus, kinsa namatay sa haladnong kamatayon: “Kon ang iyang halad sa usa ka sukod dili hingpit siya dili na unta banhawon gikan sa patay, ang ‘paghukom’ sa hustisya magabatok unta kaniya. Apan ang iyang pagkabanhaw, sa ikatulong adlaw, nagpamatuod nga ang iyang buhat hingpit nga pagkahimo, nga kini nakabarog sa pagsulay sa paghukom sa kahitas-an.” Busa, kon lantawon sa kontekso, ang Hebreohanon 9:27 maoy usa ka obserbasyon sa pagkasuperyor sa pag-alagad ni Kristo ingong saserdote.
Apan, posible usab, sa pagpunting sa Hebreohanon 9:27 sa paghimog kinatibuk-ang ekspresyon sa naagian sa katawhan. Bisag adunay posibilidad si Adan ug Eva nga makabaton ug kinabuhing dayon, dili kana tinuod diha sa ilang mga anak. Si Adan ug Eva nakabaton ug anak human nga sila nakasala. Busa, ang ilang tanang dili hingpit nga mga anak nangatawo nga mamatay. (Roma 5:12; 6:23) Busa, ang napanunod nga kamatayon, modangat lamang sa katawhan sa makausa. Matuod usab kana sa umaabot. Kon, human sa pagpadapat sa mga kaayohan sa halad ni Kristo alang sa katawhan, ug kon sa panahon sa adlaw sa paghukom sa Diyos sa usa ka libo ka tuig, ang mabanhawng tawo mapamatud-ang takos sa walay kataposang kalaglagan, ang iyang kamatayon maoy resulta sa iyang kaugalingong pagkadaotan, dili tungod sa napanunod nga sala ni Adan.—Pinadayag 20:13-15.
Sa kasukwahi, kadtong unang nangamatay gumikan sa napanunod nga kasal-anan, apan human sa pagkabanhaw magpamatuod sa ilang kaugalingon nga matinumanon, makadawat ug paborableng paghukom sa kinabuhing dayon.—Pinadayag 21:3-6.
Busa, ang konteksto sa Hebreohanon 9:27 nagpunting sa pag-alagad kang Jesus ingong hataas nga saserdote nga lahi sa hataas nga mga saserdote sa Israel. Gigamit usab kini sa pagbatbat sa kinatibuk-ang kasinatian sa mga tawhanong nakapanunod sa Adanhong kamatayon. Apan wala kini magpaluyo sa dili-kasulatanhon ginabut-ang daang panglantaw nga bisan sa wala pa sila lalanga ginabut-ang daan nga mamatay si Adan ug Eva.