Pagtubag sa ‘Panawag sa Macedonia’ sa Japan
SA KASAGARAN ang ting-init maoy panahon sa pagbakasyon sa lagyong mga lugar ug sa pagpasiyo sa gawas alang sa kadaghanang tawo. Apan, ang kadaghanan sa mga Saksi ni Jehova, nakatagamtam ug dili hitupngang kalipay sa paggugol sa mga bulan sa ting-init sa tagsaong kalihokan—sa pagduaw sa mga tawong nagpuyo sa halayo ug nahilaing mga dapit sa paghatod kanila sa maayong balita sa Gingharian sa Diyos.
Sulod sa daghang katuigan karon, ang sangang opisina sa Watch Tower Society sa Japan mihimog dakong pagkugi sa pag-abot sa upat ka milyong katawhang nagpuyo ning mga lugaraha nianang nasora. Sayo sa miaging tuig, dihay panawag nga gipadala ngadto sa tanang kongregasyon sa mga Saksi ni Jehova: “Umari sa Macedonia ug tabangi kami!” (Buhat 16:9) Mouban kita niadtong pipila nga midawat sa imbitasyon ug tagamtama ang ilang mga hagit ug mga kalipay.
Nganong Misanong Sila
Sa dayag, ang gugma sa Diyos ug sa silingan mao ang ilang pangunang motibo. Apan makaikag nga panig-ingnan ang nagkalainlaing mga katarongang gihatag sa ilang desisyon.
Usa ka magtiayong miaplay sa pag-alagad sa usa ka bulan sa gamayng balangay sa kabukiran miingon niini: “Ania kami nga mga edad-edaran. Kami walay dagkong mga problema, walay problema sa panglawas. Dagko na ang among duha ka anak ug malig-on sa pagtuo, nga ang duha nag-alagad ingong bug-os panahong mga magbubuhat—sa payoner nga natad ug diha sa sangang buhatan sa Sosyedad. Buot namong ipakita ang among apresasyon kang Jehova sa daghang mga panalangin nga among nabatonan. Ug, usab, gusto kaming mogawas, kami lamang duha, ug sa pagtagamtam sa tabang ug panalangin ni Jehova nga halayo gikan sa tanan namong kaharuhay.”
Ang amahan sa pamilya sa upat gikan sa Saitama Prefecture miasoy: “Akong nakita ang kabataan nga nagdako sa pagkatin-edyer ug nag-atubang ug daghang suliran sa tunghaan. Gigugol nila ang daghang panahon nga halayo kanamo, ug ako, sanglit okupado kaayo sa akong negosyo, adunay limitado kaayong panahon nga akong ikagugol uban kanila. Buot kong mogugol ug panahon kanila ug sa paghimog butang sa pagdasig kanila sa kamatuoran ug sa pagpatungha diha kanila ug espiritu sa pagpayoner.” Iyang gipabalhin ang iyang trabaho sa Agosto ngadto sa Septiyembre aron siya ug ang iyang pamilya makagugol ug usa ka bulan sa teritoryo nga wala pa maabot.
Usa ka dalaga miasoy bahin sa iyang mga paningkamot: “Gibati ko nga mao kini ang paagi nga masuod ko si Jehova ug sa pagpakitag bug-os nga pagsalig kaniya sa pagtagana sa akong mga kinahanglanon.” Gibati usab kini sa pipila ka batan-ong mga Saksi. Duha ka dalaga nga bag-o pang nakatapos sa tuig sa pag-eskuyla miaplay sa pag-alagad sa hilit nga lugar sulod sa tulo ka bulan. Ilang gibati nga pinaagi sa pagsuportar sa ilang kaugalingon, uban sa tabang ni Jehova, makaandam sila sa ilang kaugalingon alang sa bug-os panahong pag-alagad bisan asa.
Ang mga pamilya ug mga dili minyo lang ba ang misanong? Dili. Daghang kongregasyon miaplay usab. Usa ka magtatan-aw ning grupoha miingon: “Among gibating maayong paagi sa pagpalig-on sa higot sa gugma ug panag-uban sa kongregasyon, maingon man sa paghatag sa mga batan-on ug mga bag-ohan sa higayon sa pagtan-aw sa kahinungdanon sa buluhatong pagsangyaw.” Sa 114 ka magmamantala, kapin sa 80 ang nakabahin sa usa ka higayon sulod sa unom ka semana nga gialagaran sa kongregasyon diha sa teritoryong wala pa maabot.
Pag-atubang sa mga Hagit
Gikan sa sinugdan, ang ‘pag-adto sa Macedonia’ sa pagwali adunay iyang mga hagit. Sa pagkatinuod, ang una mao: “Asa man kami mopuyo?” Ang paagi sa pagsulbad ning problema bug-os nagpakita sa kamatuoran sa tambag ni Jesus: “Nan, padayon, sa pagpangita pag-una sa gingharian ug sa iyang pagkamatarong, ug kining tanang mga butanga akong igadugang kaninyo.”—Mataeo 6:33.
Duha ka babayeng gikan sa Tokyo adunay asaynment sa pagtrabaho sa halayong balangay sa kabukiran. Una pa niana, miadto sila sa pagpangitag kapuy-an apan walay nakit-an. Mihukom nga isalig kining butanga sa mga kamot ni Jehova, miadto sila sa ilang asaynment. Human sa kataposan sa ilang unang adlaw sa buluhatong pagsangyaw, wala gihapon sila makakitag permanenteng kapuy-an. Unsay ilang buhaton?
“Sa ikaduhang adlaw sa pag-alagad,” ang usa kanila miasoy, “nakakita akog bakanteng drive-in nga restawran. Tigulang ang tag-iya nga nagpakitag maayong tinamdan. Sa among gipangutana kon makahimo ba kami sa pag-abang sa balay, iyang gitanyag sa pagpaabang niini kanamo sa 10,000 yen [$45, U.S.] sa tulo ka bulan nga among gihikay sa pag-alagad. Gihatagan kami ning tawhana ug dapit nga kapuy-an ug kahimoan sa mga tigom. Ang anak nga babaye sa tawo ug ang iyang bana midawat sa koleksiyon sa mga libro. Sa ulahi nianang adlawa, among nahibalag ang anak nga lalaki sa tawo ug ang iyang asawa. Sila usab, midawat sa literatura ug miuyon sa pagtuon sa Bibliya uban kanamo. Apan, sa ilang nahibaloan nga nagpuyo kami sa restawran sa ilang amahan, natingala sila. Hangtod niadtong panahona, nagpakitag masuk-anong tinamdan ang ilang amahan sa tanang relihiyon. Tinuod gayod namong gibati ang tabang ni Jehova ning butanga.”
Ang pagpinig, katahap, ug ang dulot kaayong pagkagamot nga tradisyon usahay maoy mga hagit, apan si Jehova ang magabukas sa dalan. Mao kana ang kasinatian sa edad-edarang magtiayong gihisgotan ganiha. Sa una nilang pag-abot, maduhaduhaong gilantaw sila sa tigbantay sa balay nga ilang giabangan, kinsa misusisusi sa ilang tanang lihok. Mihatag kini kanilag ideya sa reaksiyon nga ilang malaoman sa teritoryo ug unsay ilang mahimo aron maputol ang babag ug maabot ang mga tawo.
“Midesider kami sa pagugol sa among unang adlaw sa paghinlo ug sa pagpahiluna sa mga butang,” miasoy ang bana. “Among gibuksan ang tanang mapadigyas nga pultahan sa kiliran sa balay aron bug-os nga makita sa mga silingan kon unsay among gihimo. Ilang makita ang among mga Bibliya ug mga literatura sa Bibliya diha sa lamesa. Ilang makita kon giunsa nako paghapnig ang tanan. Ilang makita ang paagi sa among pagkinabuhi. Ingong epekto, among gisultihan sila, “Dayon kon buot ninyo. Duawa kami. Walay butang kami nga gitago. May pagsalig kami kaninyo.’
“Sa nanglakaw kami sa pagsangyaw, among gipailaila ang among kaugalingon nga gikan sa dakong siyudad ug nangutana kon aduna ba silay ikatudlo kanamo bahin sa nasod ug sa ilang mga kinaiya. Among giseguro nga matimbaya ang tanan bisan sa mga mag-uumang nagtrabaho sa kaumahan. Mamalit kami sa kooperatiba sa lokal nga mga mag-uuma. Kining tanan nakatabang sa mga tawo sa pagkakita nga kami tinuod gayod nga interesado kanila ug dili lamang sa ‘pagpamaligyag libro.’ Ilang nakita nga ordinaryo lamang kaming mga tawo sama kanila ug sila nahimong mahigalaon. Wala magdugay, dili na gani kinahanglang ipailaila pa namo ang among kaugalingon. Dili tagsaon nga timbayaon sa gawas uban niining mga pulonga: “Mainit sa gawas. Dayon ug pag-inom ug pabugnaw?’ o, ‘Bag-o pang kaming nakahuman ug luto para sa paniudto. Dinhi na lang kamo pangaon.’ Milampos ang among paningkamot sa pagbukas sa ilang hunahuna ug kasingkasing sa balita.”
Kon ang tibuok kongregasyon makigbahin, mas modaghan ang mga hagit. Kaharmoniya sa gipasabot sa tambag ni Jesus sa ‘pagkuwenta sa galastohan,’ kinahanglang abanseng pagplano ang himoon may kalabotan sa kapuy-an, paghinlo, sakyanan, pag-alagad sa kanataran, ug uban pa. (Lucas 14:28) Ang usa ka kongregasyon mitaho: “Bisag nagplano kami sa pag-alagad gikan sa kataposan sa Hulyo ngadto sa unang semana sa Septiyembre, nangita na kami ug kapuy-an sa Mayo. Miadto kami sa opisina sa siyudad ug gisultihan namo sila sa among panginahanglan. Among gibatbat nga grupo kami sa mga pamilya ug mga batan-ong interesado sa pagtudlo sa Bibliya sa maong dapit. Matinabangon kaayo sila ug misugyot ug daghang kapilian.
“Sa kataposan sa nakakita kami ug maayong dapit, mipadala kamig mga grupo nga manghinlo nga abanse ug usa ka semana aron maandam kini. Giandam ang mapa sa teritoryo, mga karatula sa pag-anunsiyo sa atong mga tigom gihimo, ug giprinta ang mga handbill. Sanglit nakadawat kami ug permiso sa paggamit sa bag-ong sentro sa kalingawan alang sa among tigom, kami adunay maayong publisidad ug mibiya nga adunay maayong impresyon.
“Nasayod kami nga kon pulos lamang trabaho ug walay dula dili kini maayo ilabina kay adunay daghang batan-on nga uban kanamo. Busa sa matag adlaw human nga makasangyaw, o sa adlaw sa pagpahulay sa semana kon ang tanan nakahuman na sa ilang buluhaton, manglakaw kami, mamangka, ug mangisda ug mapalagsik sa matahom nga talan-awon ug sa preskong hangin sa bukid.”
May Kaayohan ba Kadto?
Ang pamilya sa upat nga gikan sa Saitama Prefecture mihatag ning tubaga: “Sa panahon sa among usa ka bulan diha sa teritoryo, nakapahimutang kamig 920 ka magasin, 240 ka libro, 13 ka interesadong mga tawo ang mitambong sa mga pakigpulong sa publiko nga among gihikay ug nakasugod ug 4 ka pagtuon sa Bibliya nga nagpadayon hangtod nga migikan kami. Kining mga resultaha nakabayad sa kahago, ug sobra pa. Nakat-onan sa among mga anak ang kalipay sa ministeryo ug nakaugmad ug tinuod nga espiritu sa pagpayoner. Ingong pamilya, miuswag ang among panaghiusa samtang nakigbahin kami sa buluhaton ug mga kasinatian sa kanataran. Naghimo kami ug tinong mga plano sa pagbalik sa sunod tuig.”
Ang edad-edarang magtiayong naningkamot sa pakighigala sa mga tawo mihatag niini nga taho: “Human nga nakobrehan ang teritoryo makausa, among gigugol ang among mga hapon sa paghimog pagbalik-duaw. Nakakita kamig mga higala sa lokal nga mga katawhan ug nanghilak pa gani ang uban sa migikan kami sa maong dapit. Ilang gidawat kami ug ang maayong balita ug nagbilin kanamo ug malipayong mga handumanan. Gawas kon imong maeksperyensiyahan kini mismo, dili ka gayod masayod kon unsa ka katingalahan kini. Among naamgohang makahimo kami sa bisan unsang butang pinaagi sa tabang ni Jehova.”
Ang usa ka Saksi nga aktibo kapin na sa 20 ka tuig miingon sa iyang taho: “Ang akong 82-anyos nga kauban ug ako wala gayod sukad mibati ug mas suod kang Jehova kay sa among nahimo karon human nakaalagad ug duha ka semana sa usa ka hilit nga teritoryo. Ang among mga kasingkasing nagsugwak.”
Usa ka Tagsaong Pribilehiyo
Kadto silang misanong sa ‘panawag sa Macedonia’ sa Japan bug-os miapresyar sa pulong ni Jesus: “Dako ang alanihon apan diyutay lamang ang mangangani. Busa, hangyoa ang agalon sa alanihon sa pagpadalag mga mangangani sa iyang alanihon.”—Mateo 9:37, 38.
Ang makalipayng mga kasinatian niadtong misanong sa panawag nakita nga “ang Agalon,” si Jehova nga Diyos, mitubag nianang pag-ampoa. Giisip kini sa mga batan-on ug tigulang nga usa ka tagsaong pribilehiyo ang pakigbahin sa pagpanigom. (Exodo 23:16) Gihimo mo ba ang imong bug-os maarangan niining dakong buluhaton?
[Hulagway sa panid 30]
Ang mga magmamantala sa gingharian malipayong nakigbahin sa maayong balita sa uban diha sa Japan