Kalinaw ug Kasegurohan—Pinaagi sa Gingharian sa Diyos

“ANG Katuyoan sa Hiniusang Kanasoran mao: 1. Aron sa pagpatunhay sa internasyonal nga kalinaw ug kasegurohan.”—Charter of the United Nations.

Dalayegon kini nga mithi, kon isulti ang labing gamay. Apan sumala sa atong nahibaloan, ang resulta sa miaging 40 ka tuig nadayag nga wala molampos ang Hiniusang Kanasoran sa ‘pagpatunhay sa internasyonal nga kalinaw ug kasegurohan.’ Ni mohatag kalainan ang pagdeklarar sa 1986 ingong “Internasyonal nga Tuig sa Kalinaw.”a

Adunay usa lamang ka paagi nga mapatungha ang dumalayong kalinaw ug kasegurohan niining yutaa—pinaagi sa Gingharian sa Diyos sa mga kamot ni Jesu-Kristo. Kini ang tinuod nga kagamhanan sa langit nga maoy gitudlo ni Jesus sa iyang mga sumusunod nga iampo. (Mateo 6:9, 10) Apan nganong molampos kini samtang ang Hiniusang Kanasoran napakyas? Sa yanong pagkasulti: Molampos ang Gingharian sa Diyos sa mismong mga katarongan sa kapakyasan sa Hiniusang Kanasoran.

Labaw sa Tawhanong Kaalam ang Gikinahanglan

Sa among miaging gula, among gipahayag nga ang usa ka katarongan kon nganong ang Hiniusang Kanasoran gihukmang mapakyas mao nga wala hatagi sa Diyos ang tawo ug kaalam o katungod sa pagmando sa iyang kaugalingon. (Jeremias 10:23) Busa, walay hinimog tawong organisasyon, bisan maayo pag katuyoan, ang molampos sa pagpatunghag kalinaw ug kasegurohan.

Kon itandi, si Jesu-Kristo, ang tinudlong Hari sa Gingharian sa Diyos, kanunayng nagpakita ug labaw-tawhanong kaalam. (Mateo 13:54) Ang dakong pananglitan mao ang iyang iladong Wali sa Bukid. (Mateo, kapitulo 5 ngadto sa 7) Diha niini iyang gibatbat kon unsaon sa pagkaplag ug tinuod nga kalipay, sa paghusay sa mga panag-away, sa paglikay sa seksuwal nga imoralidad, ug sa pagbaton ug seguradong umaabot. Dili ba makataronganon nga ang magmamando nga aduna niining kaalama ug pagsabot sa tawhanong kinaiyahan makahibalo kon unsaon sa pagpatunghag kalinaw ug kasegurohan?

Labaw pa niana, ang mahait nga pagsabot ni Jesus napadako tungod sa iyang milagrosong katakos sa pagtan-aw sa mga kasingkasing sa tawo ug sa pagkasayod sa ilang tinuod nga motibo ug kinasulorang mga pangatarongan. (Mateo 9:4; Marcos 2:8) Tagda kon unsay kahulogan niana: Ang usa ka dakong babag sa kalinaw ug kasegurohan karon mao ang pagkawalay pagsalig. Sanglit wala mahibalo sa hunahuna ug motibo sa uban, ang mga tawo ug kanasoran kasagaran walay pagsalig. Ang ilang pagkawalay pagsalig nagbarog ingong babag sa kalinaw. Apan dili kana problema alang sa magmamando nga “makabasa sa mga kasingkasing sa tawo.”—Juan 2:25, Knox.

Pagpapha sa Labaw-tawhanong mga Kaaway

Laing dakong katarongan kon nganong ang mga paningkamot sa Hiniusang Kanasoran sa pagpatunghag kalinaw hinukmang mapakyas mao ang impluwensiya sa “magmamando niining kalibotana,” si Satanas nga Yawa. (Juan 12:31) Siya ug ang iyang panon sa mga demonyo nasayod nga “hamubo na lamang ang panahon” nila sa dili pa sila paphaon. Determinado sa pagpatunghag ‘kalautan sa yuta,’ sila maoy nakababag sa kalinaw pinaagi sa pagbahinbahin sa katawhan sa politika ug sa nasod.—Pinadayag 12:9-12.

Kinsay makapapha niining labaw-tawhanong mga tigmugna sa gubat? Ang Bibliya nagtubag, si Jesu-Kristo, ang usa nga gipunting nga si Miguel, kinsa, uban sa iyang mga manulonda, nagtambog kang Satanas ug sa iyang mga demonyo gikan sa langit. Busa atong mabasa: “Nakita ko ang usa ka manulonda [Jesus] nga nanaog gikan sa langit nga may dalang yawi sa bung-aw ug dakong talikala sa iyang kamot. Ug iyang gisikop ang dragon, ang orihinal nga serpinti, nga mao si Satanas nga Yawa, ug . . . iyang gitambog siya sa bung-aw ug gitabonan ug gitimrihan kini sa ibabaw niya.” (Pinadayag 20:1-3) Busa wagtangon si Satanas. Diha lamang nga mahimong posible ang pagtagamtam sa kinabuhi sa tinuod nga kalinaw ug kasegurohan.

Usa ka “Anak” sa Diyos

Gipadayag sa among miaging gula ang ikatulong katarongan kon nganong ang Hiniusang Kanasoran dili gayod makapatunghag kalinaw ug kasegurohan: Kini maoy anak niining kalibotana ug, sa ingon, kini nakapanunod sa kahuyangan, kadaotan, ug kahugawan nga nagpaila sa kanasoran nga sakop niini.

Sa makahupay nga pagtandi, ang Gingharian nga mopatunghag kalinaw ug kasegurohan gihulagway diha sa Pinadayag 12:5 ingong usa ka “anak” sa Diyos. Ang magmamando niini naglandong sa kinaiya sa Diyos. Matikdi ang pipila ka makapamahal nga mga hiyas nga gipakita sa magmamando niini, si Jesu-Kristo: nagasakripisyo sa kaugalingong gugma (Juan 15:12, 13); mahigugmaon ug mabination (Mateo 9:10-13; Lucas 7:36-48); mapaubsanon (Juan 13:3-5, 12-17); mapuanguron (Marcos 6:30-34); maluluton (Hebreohanon 2:17, 18; 4:15); malig-on sa kamatuoran (Isaias 11:4, 5). Dili ka ba malipay sa pagpasakop sa imong kaugalingon sa ingon nga Magmamando?

Uban sa “Bag-ong Yuta”

Ang kataposang katarongan kon nganong ang Hiniusang Kanasoran dili gayod molampos sa pagpatunghag kalinaw gipakita sa mga pulong sa kanhing Sekretaryo-Heneral si Dag Hammarskjöld kinsa, balik sa 1953, miingon: “Dako ang among paglaom nga tugotan kami sa pagluwas sa daang kalibotan.” Kon ang anaa sa iyang hunahuna mao ang pagtipig niining tibuok-yutang sistema sa mga butang, nan kining mga paningkamota sa pagluwas sa “daang yuta” hinukman nang mapakyas. Ngano?

Una, kining “daang yuta” gilangkoban sa hinimog-tawong mga kagamhanan. Ang tagsatagsa ka kagamhanan nagpasiugdag nasyonalismo, nga nakapabahin sa tawo; gihatagan ug pagtagad sa nasyonalismo ang intereses sa usa ka nasod inay sa pagpangitag katibuk-ang kaayohan sa tanang kanasoran. Kining pagkaikag sa kaugalingon makadaot sa tanang paningkamot sa Hiniusang Kanasoran sa pagpatunghag kalinaw. Ang editoryal sa mantalaan sa Britanya nga The Guardian miingon: “Sanglit walay usa sa membrong nasod ang andam sa pagsakripisyo sa iyang kaugalingong interes alang sa kaayohan sa katibuk-an, ang palaabuton sa kausaban gamay ra kaayo. Ang bugtong obra sa Asembliya [Heneral sa Hiniusang Kanasoran] mao ang pag-alagad ingong usa ka matang sa sukdanan sa hunahuna sa kalibotan. Ang tulomanon niini puno sa mga isyu nga gidebatehan sa dugay nang katuigan nga gamay lamang kon aduna man ing kauswagan padulong sa kasulbaran.”

Apan dunay dakong katarongan kon nganong ang mga paningkamot sa Hiniusang Kanasoran sa pagluwas sa “daang yuta” walay kapuslanan: Supak kini sa mga katuyoan sa Diyos. Sa unsang paagi? Sa mga mata sa Diyos ang “daang yuta” dili na mabag-o pa. Haduol na ang panahon nga matuman na unya ang katuyoan nga gipamulong sa Diyos. Sumala sa pagkabatbat niana ni apostol Juan: “Ug unya nakita ko ang usa ka bag-ong langit ug usa ka bag-ong yuta; kay ang unang langit ug ang unang yuta nangahanaw na.” (Pinadayag 21:1) Inigpapha sa hinimog-tawo nga mga kagamhanan, wagtangon sa Gingharian sa Diyos ang makapabahin nga nasyonalismo. Pulihan kini ug “usa ka bag-ong yuta,” nga usa ka matarong ug kinaiyahang katilingban, nga maoy maglungtad ilalom sa bugtong langitnong kagamhanan, ang Gingharian sa Diyos. Ug, dinhi lamang, makahimo ang katawhan sa pagpahimulos sa tinuod nga kalinaw ug kasegurohan sa tibuok kalibotan.

‘Himoon ang mga Espada nga mga Punta sa Daro’

Nga kini maoy realistikanhong paglaom gipasalig sa mga pulong sa tagna sa Bibliya nga nasulat sa pader nga nag-atubang sa Hiniusang Kanasoran. Didto kini nag-ingon: “Ilang himoon ang ilang mga espada nga mga punta sa daro. Ug ang ilang mga bangkaw himoon nga mga galab: ang nasod dili mobakyaw sa espada batok sa laing nasod ug dili na gayod makakat-on pa sila mahitungod sa gubat.”—Gikutlo gikan sa Isaias 2:4.

Wala, ang Hiniusang Kanasoran wala molampos sa pagsumpo sa kanasoran sa ‘paghimo sa ilang mga espada nga mga punta sa daro’ batok sa usag usa. Bisan pa, may mga tawo nga naghatag buhing ebidensiya nga sila ‘nakahimo sa ilang mga espada nga mga punta sa daro.’ Nakapakita sila ug panaghiusa nga labaw pa sa rasanhon ug nasodnong mga kaulangan. Walay pagpiit ang makapugos niining neyutral nga mga Kristohanon sa “pagbakyaw sa espada” batok sa ilang isigkatawo. Kinsa sila? Ang mga Saksi ni Jehova.

Ang hulagway sa ilang tubag kon piiton sa pakigbahin sa mga gubat sa mga nasod nahitabo sa usa ka Saksi sa usa ka nasod sa Aprika nga napuno sa politikal nga terorismo.

Aron makakuhag bag-ong mga sakop alang sa ilang sundalo sa gerilya, ang usa ka teroristang grupo niining nasod mangidnap ug mga lalaki ug dayon papilion sila: Mag-alagad sa kasundalohan sa gerilya o posilon. Usa ka adlaw ilang gikidnap ang usa ka Saksi ni Jehova. Ang mga lider, nga nag-inom nagpapili kaniya. Gibutang sa iyang atubangan ang duha ka botelya sa serbisa, ilang gitudlo ang usa niini ug miingon nga naglarawan kini sa kagamhanan, ang usa mao ang ilang grupo nga terorista. ‘Hain niini ang imong pilion?’ ilang gipangutana siya. Nagpalandong makadiyut ang Saksi, ug sa nakakitag laing duha ka botelyang serbisa, mipunit siyag usa ug gibutang kini tapad sa duha, ug miingon: ‘Dinhi ako.’ Siya mipadayon: ‘Neyutral ako, kay ako maoy alang sa Gingharian sa Diyos.’ Human niini, gikulata siya sa makadaghan. Dayon gipugos siya sa pagtrabahog bug-at sa kampo sa gerilya, kay sila wala makadesisyon kon posilon ba nila siya o dili. Sa milabay ang walo ka bulan, nakaeskapo siya sa giatake sa kasundalohan sa kagamhanan ang kampo.

Antuson sa mga Saksi ni Jehova ang pagkabilanggo, bisan kamatayon, inay makigbahin sa mga gubat sa kanasoran. Busa, sa Nazi Alemanya libolibo kanila gibutang sa mga kampong konsentrasyon tungod kay dili sila mosuportar sa paghari sa Nazi sa kalisang. Gatosgatos sa mga Saksi gipamatay o nangamatay sa mga kampo. Sa karon, bisag dugay nang nawala ang mapintasong kagamhanan sa Nazi, daghan kaayo ang mga Saksi ni Jehova sa Alemanya ug sa tibuok globo.

Apan nganong milampos sila sa ‘paghimo sa ilang mga espada nga mga punta sa daro’? Makita ang tubag sa pasiuna sa Karta sa UNESCO, nga nag-ingon: “Sanglit magsugod ang gubat diha sa hunahuna sa mga tawo, kinahanglang diha sa mga hunahuna sa mga tawo tukoron ang pagpanalipod sa kalinaw.”

Kaharmoniya niana, bahin niadtong ‘naghimo sa ilang mga espada nga mga punta sa daro,’ ang tagna ni Isaias nag-ingon, ‘ug dili na gayod sila makakat-on pa mahitungod sa gubat.” Hinunoa, pinaagi sa pagtuon ug sa pagpadapat sa Kasulatan, sila ‘nakakat-on sa dalan sa Diyos ug nanglakat sa iyang mga alagianan.’ (Isaias 2:3, 4) Pinaagi sa tabang sa iyang balaang espiritu, ilang ‘gibag-o ang ilang salabotan,’ sa pagkahimong makigdaiton.—Roma 12:2, 18.

Ang klarong ebidensiya nga milampos ang mga Saksi ni Jehova sa ‘paghimo sa ilang mga espada nga mga punta sa daro’ nagpamatuod nga posible ang pagkinabuhi sa kalinaw ug kasegurohan. Ang ilang presenteng paagi sa kinabuhi nagpadayag sa gamayng sukod kon unsay mahimo sa Gingharian sa Diyos pinaagi ni Kristo sa tibuok yuta sa haduol nga umaabot.

Madanihon ba kanimo kanang palaabutona? Malipay ang mga Saksi ni Jehova sa pakigbahin uban kanimo sa ebidensiya sa ipakanaog sa Gingharian sa Diyos sa dili madugay ang dumalayong kalinaw ug kasegurohan. Nganong dili makigkita kanila sa inyong lugar o sa pagsulat sa mga magpapatik niining magasina? Tun-i ug dugang pa kon sa unsang paagi ‘makahimo ka sa mga espada nga mga punta sa daro’ karon, uban sa palaabuton sa dili madugay sa pagpahimulos sa kinabuhi sa tibuok yuta nga walay gubat.

[Mga footnote]

[Kahon sa panid 5]

Kon Nganong Napakyas ang Hiniusang Kanasoran:

◻ Limitado kaayo ang tawhanong kaalam (Jeremias 10:23)

◻ Mapakyas ang mga paningkamot niini tungod sa impluwensiya ni Satanas (Pinadayag 12:12)

◻ Kini maoy anak niining kalibotana ug nakapanunod sa mga kahuyangan niini (1 Juan 5:19)

◻ Kini naningkamot sa pagluwas sa “daang yuta,” nga batok sa katuyoan sa Diyos (1 Juan 2:17)

Kon Nganong Molampos ang Gingharian sa Diyos:

◻ Ang magmamando niini may labaw-tawhanong kaalam, ug makabasa sa kasingkasing sa mga tawo (Juan 2:25)

◻ Paphaon niini ang yawan-ong mga tigmugna sa gubat (Pinadayag 20:1-3)

◻ Kini maoy usa ka “anak” sa Diyos, ug ang mga magmamando niini naglarawan sa mga hiyas sa Diyos (Pinadayag 12:5)

◻ Tukoron niini ang matarong “bag-ong yuta” ilalom sa usa ka langitnong kagamhanan (Pinadayag 21:1)

[Letrato sa panid 7]

Magtukod ang Gingharian sa Diyos ug “usa ka bag-ong yuta,” usa ka matarong nga tawhanong katilingban, nga molampos ubos sa usa ka langitnong kagamhanan