Ang “Nasod” nga Magapakaon sa Minilyong Gigutom
1, 2. (a) Unsang matuod nga panginahanglan ang Pagabation sa katawhan sa yuta? (b) Sa unsang katawhan kita makalantaw bahin niini?
ANG binilyong katawhan sa yuta angay nga pagagutomon alang sa “pagkaon” nga magahatag kanilag sustansiya alang sa kinabuhing walay kataposan dinhi sa yuta, dihang ang yuta pagahimoong usa ka tibuok-yutang paraiso. Apan kang kinsa o diin sila mosalig? Ang Republika sa Israel wala maningkamot sa pagtuman sa tagna sa Bibliya diha sa Isaias 27:6 mahitungod sa pagpuno sa yuta sa “abot” alang sa walay-kataposang kaayohan sa katawhan.
2 Ang nasod sa Israel sa unang siglo sa atong Komung Panahon nawad-an sa komisyon niini sa paghatag ug kaayohan sa tanang tawo. Busa ngadto lamang sa gamayng nahibilin sa kinaiyanhong mga Hudiyo nga gitumong sa Mesiyas ang iyang mga pulong: “Ang tanang pagbulot-an gihatag kanako sa langit ug sa yuta. Busa panlakaw kamo ug himoang mga tinun-an ang katawhan sa tanang nasod, nga magabawtismo kanila sa ngalan sa Amahan ug sa Anak ug sa balaang espiritu . . . Ug, tan-awa! ako magauban kaninyo sa tanang adlaw hangtod sa kataposan sa sistema sa mga butang.” (Mateo 28:18-20) Apan komosta ba mga 20 ka siglo sa ulahi? Kinsa sa atong panahon ang nagbaton sa hunahuna sa katumanan sa Isaias 27:6? Ug sa unsang paagi ikaw ug ang imong mga minahal nalangkit?
3. Kinsa sa atong siglo ang nakasinati sa “kapungot” sa Diyos nga gihisgotan sa Isaias 27:4?
3 Bisan pag kita halayo na kaayo sa tino nga mga hitabo, maayong atong susihon sa daklit ang pila ka hitabo sulod sa katuigan sa Gubat sa Kalibotan I. Niadtong panahona si Jehova nga Diyos may balidong katarongang mobatig “kapungot” batok sa kanasoran sa Kakristiyanohan tungod sa ilang pag-apil niadtong nag-ulag-dugo nga away. (Itandi ang Isaias 27:4.) Kadto ilang gihimo inay itugyan ang ilang nasodnong mga pagmando ngadto sa Labing Gamhanang Diyos sa natukod ang iyang Gingharian sa mga langit sa 1914 diha sa mga kamot sa iyang hinimayang Anak, si Jesu-Kristo. Gisugnoran nila ang iyang kapungot pinaagi sa paglutos sa nahibilin sa espirituwal nga Israel, nga tinuyong nagpugong sa maong debotadong Kristohanong mga Estudyante sa Bibliya sa pagmantalang may kagawasan sa iyang natukod nga Gingharian. Apan, sa pagkamatuod, daghan sa nahibilin sa espirituwal nga Israel nagpadaog sa kalibotanong mga pagpit-os, sa ingon wala makatuman sa ilang responsabilidad ingong pinili nga katawhan nga kinuha gikan niining kalibotanong sistema sa mga butang. Niadtong panahona wala nila hisabti ang isyu sa absolutong neyutralidad bahin sa mga away niining kalibotana, mao nga sila sad-an kon bahin sa dugo, ug sa usa ka panahon takos usab sa usa ka sukod sa “kapungot” sa Diyos.
4. Sa unsang paagi naapektahan sa “kapungot” sa Diyos ang iyang Kristohanong mga alagad, ug unsang pagtulon-an ang atong matun-an gikan niini?
4 Kon buhi ka pa niadto, sa imong hunahuna unsay imong reaksiyon niadtong mga pamit-os panahon sa gubat? Angay nimong palandongon kanang mga butanga, kay pinaagi sa pagbuhat niana imong mapalig-on ang imong hukom bahin sa kon unsay imong buhaton atubangan sa umaabot nga mga pamit-os. Niadto tingali mopatim-aw nga kadto panahon sa pagpugong sa pagsangyaw sa Gingharian ug maghilom. Daghan ang may kiling niana, kay ilang gibating angay silang maghulat alang sa ilang sayo nga pagkahinimaya aron mahauban sa naentronong si Jesu-Kristo. (Lucas 22:28-30) Bisan pa niana, ang pagkadawat sa bahin sa “kapungot” ni Jehova maoy usa ka kasinatian sa pagdisiplina nga nasabtan sa matuod nga mga Kristohanon niadtong panahona, ug busa kadto dili kay walay kapuslanan. Kadto naglig-on kanila alang sa umaabot nga buluhaton sa pagpahayag sa adlaw sa panimalos sa atong Diyos batok sa usa nga ginatawag sa propetang Isaias nga “Leviathan” diha sa Isaias 27:1, diin atong mabasa:
5. Sa modernong mga panahon, sa unsang paagi si Jehova miliso sa iyang pagtagad ngadto sa “Leviathan” nga gihisgotan sa Isaias 27:1?
5 “Niadtong adlawa si Jehova, pinaagi sa iyang magahi ug dako ug malig-on nga espada, moliso sa iyang pagtagad ngadto sa Leviathan, ang halas nga nagadailos, bisan sa Leviathan, ang halas nga baliko, ug iya gayong pagapatyon ang makalilisang nga mananap nga anaa sa dagat.”
Sa karaang mga panahon, giliso ni Jehova ang iyang pagtagad ngadto sa mga nagbihag sa iyang katawhan. Sumala sa napahayag sa nangagi, kana nag-apil sa imperyo sa Babilonya, ingon man sa Ehipto ug Asirya. (Isaias 27:12, 13) Hisabtan mo ba ang modernong kapadapatan sa simbolikong mga pulong sa Isaias 27:1? Sa yugtong duol sa Gubat sa Kalibotan I, ang katawhan ni Jehova wala mabihag sa usa ka nasod o imperyo. Apan kinahanglan gayong hatagan ug pagtagad ni Jehova ang simbolikong Leviathan, nga mao, si Satanas nga Yawa. Siya nagadailos sa malalangon nga paagi latas sa dagat sa katawhan ug nagagamit sa mga butang sa yuta aron ipameligro o babagan ang mga alagad sa Diyos.—Itandi ang Pinadayag 17:15.
6, 7. (a) Sa modernong mga panahon unsa ang nahisamag “mga sampinit ug mga bunglayon”? (b) Unsay atong madahom bahin kanila sa umaabot?
6 Sa dihang gipadayong madasigon sa nahibilin sa espirituwal nga Israel ang ilang pagsangyaw sa Gingharian sa tuig 1919, kadto mao ang panahon nga si Jehova magaingon:
“Wala na kanako ang kapungot. Kinsay mohatag kanako sa mga sampinit ug mga bunglayon sa panggubatan? Kana akong pagayatakan. Sa samang panahon akong pagasunogon kana.”—Isaias 27:4.
7 Sa pagkatapos sa Gubat sa Kalibotan I, gitukod ang Liga sa Kanasoran ingong pagsalikway sa Gingharian sa Diyos pinaagi ni Kristo. Kini atong ikatandi sa “mga sampinit ug mga bunglayon” nga gibutang sa dalan ni Jehova nga Diyos, ingong babag o pugong. Ang organisasyong Hiniusang Kanasoran maoy nagpuli karon niadtong Liga. Pinaagi sa Hiniusang Kanasoran ang nagkalainlaing membrong kanasoran nagapadayag sa ilang determinasyon sa pagbarog nga batok sa gisangyawng Gingharian ni Kristo ug sa ilang katuyoan sa pagtipig sa ilang kaugalingong pagkasoberano sa kalibotan. Sa “gubat sa dakong adlaw sa Diyos nga Makagagahom sa Tanan” sa Har-Magedon, sa masambingayon iyang pagayatakan ang tanang “mga sampinit ug mga bunglayon,” nga pagadugmokon sila ug sa kataposan pagasunogon, ingnon ta, nga mahimo na lamang kanang abo. Sa ingon iyang ipasundayag kon kinsa gayod ang Unibersohanong Soberano. Nan, imong hisabtang bisan pag ikaw dili pa buhi taliwala sa dinihogang mga Kristohanon sa duol sa Gubat sa Kalibotan I, ikaw maapektahan—sa ikaayo o ikadaot—sa pangataposang sangpotanan sa mga hitabong motumbas sa Isaias 27:1.—Pinadayag 16:14-16; 17:1-18:4.
‘Paghawid sa Salipdanan ni Jehova’
8. Diha sa unsa ang daghang nasod karon nagasalig?
8 Ang mga membro sa Hiniusang Kanasoran nagasalig sa kaugalingon nilang kusog ug nagasalig sa ilang hinimog-tawong salipdanan. Bisan pa niana, ang ilang pagsalig niana walay igong kalig-on sa pagpugong kanila sa pag-imbento sa labing mangilngig nga mga hinagiban, ang kinalabwang mga hinagiban sa gubat, ang bomba nukleyar. Kalagmitan, ang kahadlok sa balos pinaagi sa paggamit sa bomba nukleyar mao ang nagapugong kanila, dili ang Hiniusang Kanasoran.
9, 10. Nganong maalamong kita mosalig sa laing salipdanan”?
9 Apan, sumala sa amo nang napahayag, ang tinuod nagapameligro sa padayong paglungtad sa kanasoran mao “ang gubat sa dakong adlaw sa Diyos nga Makagagahom sa Tanan.” Unsay madahom sa kanasoran nga mabuhat batok sa Diyos ang Makagagahom sa Tanan, ang Usa nga nagbutang sa dako kaayong gahom sulod sa uyok sa matag atomo sa materya? Maayo pang makombinsir ka nga ang Maglalalang labawng gamhanan nga walay ikatanding kay sa kanasoran uban sa tanan nilang hinagiban. Kadtong nagaila niining kamatuorana—ug ang mga Saksi ni Jehova nagaila niini—usa rag kapaingnan. Kana gipahayag sa dugang mga pulong ni Jehova:
“Sa laing paagi pahawira siya sa akong salipdanan, himoa nga siya makigdait kanako; ang pakigdait mao ang iyang himoon uban kanako.” (Isaias 27:5)
Walay tawhanong ahensiya ang salipdanan nga kadangpan alang sa kasegurohan o santa sa gubat sa yuta, ug tinong dili ang salipdanan nga kakalagiwan sa mga pamilya sa yuta aron malayo sa kadaotan.
10 Lagmit nahibalo ka nga daghang tawo karong adlawa ang mainitong nalangkit sa mga debate ug mga kalihokan maylabot sa mga hinagibang nukleyar ug pagmenos sa armas. Ikasubo, kana nagapahilayo kanila sa kamatuorang ang dili-kalikayang gubat sa Diyos nga Makagagahom sa Tanan sa Armageddon mao ang nagabahad sa kalaglagan sa tanang kanasoran. Kon ilhon mo kanang kamatuorana, nan ang maalamong dalan alang kanimo naglangkit sa pagdangop kang Jehova. Ang iyang “salipdanan” mao ang angay hawiran sa tanang nagapangitag kaluwasan, nga mao, ang iyang gipanag-iyang kusog nga walay pagkahurot. Ang tibuok organisasyon ni Satanas nga Yawa dili makabuntog sa matag Kristohanon nga nakahawid sa maong “salipdanan.”
11. Sa unsang paagi atong ikapadapat ang mga pulong ni Jesus sa Lucas 14:31-33 samtang kita mohawid sa “salipdanan” sa Diyos?
11 Si Jehova ug ang iyang kasundalohan ilalom sa Kapitan, si Jesu-Kristo, ingnon ta, karon nagamartsa. Samtang sila halayo pa, ang dalan nga ginadiktar sa sentido komun, kon dili man sa tinuod nga kaalam, mao nga ang usa ka tawo magpadalang abante, sa masambingayong pagkasulti, sa usa ka misyon sa pakigdait ug mohangyo alang sa pakigdait atubangan sa dili mabangbang nga mga kakulian. Ang dili-mapildi nga Kapitan sa kasundalohan ni Jehova mitambag niana nga dalan sa dinhi siya sa yuta. (Lucas 14:31-33) Ug kon susihon nimog maayo ang gipamulong dinha ni Jesus, imong masabot nga iyang gilangkit ang atong tinamdan ngadto sa atong “mga kabtangan.” Kon kaha nagapuyo kita sa abante ug mauswagong nasod o kon kita nagapuyo sa usa ka nasod sa Ikatulong Kalibotan diin kinahanglan ang dakong paningkamot aron mabatonan ang kasegurohan sa panalapi, angay natong susihon ang atong panglantaw. Suknaa ang imong kaugalingon: Tinuod bang ginabutang ko ang akong pagsalig sa kusog ni Jehova ingong akong salipdanan o gitugotan kong ang “mga kabtangan” magkuha sa labing iladong dapit? May kalabotan niini, palihog basaha ang Lucas 12:15-21.
12. Unsa ang ebidensiya nga daghan karong adlawa ang nagahawid sa kusog ni Jehova?
12 Sa tibuok yuta, kaliboang Saksi ni Jehova ang mingdangop na nga walay pag-ukon-ukon kang Jehova, nga nakigdait kaniya. Daghan ang nagahikay sa ilang kahimtang aron ihalad ang tinagkawhaang takna matag bulan ngadto sa buluhaton sa paghimog tinun-an. Ang matag usa nga nanlimbasog gayod sa iyang kaugalingon sa pag-alagad kang Jehova makaarang sa pagkaagom sa gisaad nga “kalinaw sa Diyos” nga molabaw sa tanang tawhanong hunahuna ug pagsabot. (Filipos 4:7) Samtang may panahon pa, sila nagapadayon sa pagtabang sa uban sa pagsulod niining makigdaitong kahikayan ni Jehova sa kasundalohan. Unsang dapit ang naangkon nianang moluwas-kinabuhing buluhaton diha sa imong kinabuhi?
Pagpuno sa “Mabungahong Yuta” sa “Abot”
13. Unsay gipaila sa Isaias 27:6 nga madahom sa atong panahon?
13 Unsa ba ang bahin sa espirituwal nga Israel maylabot sa kalibotan tapos kini mapasig-uli sa balaang pag-uyon tapos sa Gubat sa Kalibotan I? Kini gipaila alang kanato niining makadasig nga mga pulong sa Isaias 27:6:
“Sa umaabot nga mga adlaw si Jacob mogamot, si Israel mamulak ug mamutot; ug pagapun-on nila ang nawong sa mabungahong yuta sa abot.”
Susiha ang kamatuoran nianang mga pulonga karong adlawa. Ang pagbuhat niana mohatag kanimog dugang katarongan nga mahimong usa sa katawhan sa Diyos o, kon usa ka na, nga malig-ong maghukom nga magpabiling apil sa matuod nga mga magsisimba bisan pag unsang mga pagsulay o mga suliran ang motungha.
14. Sa unsang paagi natuman ang Isaias 27:6 diha sa katawhan sa Diyos?
14 Ang kahimtang sama sa gitagna diha sa Isaias 27:6 mausbawong hikaplagan taliwala sa mga magsisimba ni Jehova sukad sa tuig 1919, dihang gihimo ang unang heneral nga kombensiyon sa mga Saksi ni Jehova sa Cedar Point, Ohio. Pananglitan, wala magdugay tapos niadto gisugdan sa Watch Tower Society ang pag-imprenta sa bag-ong magasin niini, ang The Golden Age, nga karon gitawag Awake! Kadto nahisamag ang espirituwal nga Juda niadto nakagamot na.
15. Unsang makalipayng palaabotan ang gihatag sa matuod nga mga magsisimba sugod sa 1918?
15 Busa sa unang katuigan sa pagkagawas ug pagkapasig-uli sa pag-uyon ni Jehova, ang matuod nga mga Kristohanon misugod sa pagbulak ingong “tinanom ni Jehova.” (Isaias 61:3) Sa 1918, ang kataposang tuig sa Gubat sa Kalibotan I, ang talagsaong pakigpulong nga “Minilyong Buhi Karon Mahimong Dili na Gayod Mamatay” gipahayag sa publiko ni J. F. Rutherford. Tungod kay ang gamay rang nahibilin sa inanak-sa-espiritung mga tinun-an sa nagmandong Hari, si Jesu-Kristo, ang nabilin sa yuta aron sa pagtuman sa gitudlo-sa-Diyos nga buluhaton nga niadto nahimutang kanila, dili ba kadto pagpasobra sa mga butang?
16. (a) Unsa ang reaksiyon sa nahibilin ngadto sa mga palaaboton sa ilang unahan? (b) Unsang “abot” ang ilang gikalipayan, ug unsay sangpotanan?
16 Sa unsang paagi magamit ni Jehova ang maong mga Kristohanon sa pagpuno sa nawong sa “mabungahong yuta sa abot”? Ang nahibilin sa espirituwal nga Israel ang nanguna, apan komosta ang “abot” nga magapuno sa mabungahong yuta? Nadiskobrehan sa nahibilin nga lamian kaayo ug masustansiya ang “abot,” nga nag-apil sa maayong balita sa natukod nga Gingharian ni Jehova diha sa mga kamot ni Kristo nga buot nilang ipaambit kini sa ilang isigkatawo. Gitagna ni Jehova nga ang diyutay mahimong usa ka libo ug ang gamay usa ka gamhanang nasod, ug sa bahin sa Diyos napamatud-ang kadto dili sayop nga kalkulasyon. (Isaias 60:22) Sa wala madugay ang nahibilin sa espirituwal nga Israel gikuyogan sa “dakong panon” sa “ubang mga karnero” sa Maayong Magbalantay, si Jesu-Kristo.—Pinadayag 7:9-17; Juan 10:16.
17, 18. Unsay imong kapamatud-an bahin sa ‘pagpuno sa nawong sa mabungahong yuta sa abot’?
17 Tingali nasayod ka sa kahimtang sa matuod nga Kristiyanidad karong adlawa. Ang Watch Tower Society karon dunay 94 ka sanga sa tibuok kalibotan. Ang organisadong aktibong mga kongregasyon sa mga Saksi ni Jehova karon may gidaghanong mga 48,000, ug kini sila makaplagan sa 203 ka kayutaan. Moadto sa matuod nga Diyos ang dungog alang niini, ug kining talagsaong mga kaugmaran maoy kabayawan sa iyang dili-masayop nga Pulong, samtang “ang kataposan,” nga gitagna sa Mateo 24:14 wala pa moabot.
18 Oo, adunay duolag tulo ka milyong Kristohanon nga nagabuhat duyog sa Watch Tower Society sa tibuok yuta. Kining minilyon maoy sakop ilabina sa “ubang mga karnero” nga maoy nagapas-an sa kinadak-an sa tibuok-kalibotang buluhaton sa pagsangyaw, ug ‘ang kalipay ni Jehova mao ang ilang kusog, o salipdanan.’ (Nehemias 8:10) Busa, ang matag usa kanato karong adlawa may higayong mabusog pag-ayo sa espirituwal ug makaapil sa ‘pagpuno sa nawong sa mabungahong yuta sa abot.’
19. Unsa ang mahimong imong kapahimuslan bahin sa “mabungahong yuta,” ug unsay imong pagbati niana?
19 Kita makatinong dili gayod itugot ni Jehova nga malaglag ang presenteng “abot” sa “mabungahong yuta,” ang nataran sa buluhaton sa iyang mga Saksi. Ang buluhaton sa iyang nagasangyawng mga Saksi dili gayod makawang! Ang espirituwal nga bunga, o “abot,” ingon nga gihagoan sa pag-alima sa matuod nga mga Kristohanon maoy alang sa pagpakaon sa tanang buot magpahimulos niana. Kini magaapil, sa igong panahon, sa binilyong tawhanong patay nga pagabanhawon ilalom sa Milenyong Paghari ni Jesu-Kristo. Hunahunaa ra kon unsay ipasabot niana alang kanimo sa umaabot! Sa nahaigong panahon, daghang kinaiyanhong Israelinhon sa nangagi ang pagabanhawon. Ang pipila kanila tingali nalangkit sa unang katumanan sa tagna sa Isaias kapitulo 27. Dili ba makaiikag nga mabuhi unýa, nga mopaarang kanimo sa pagsaysay sa unsang paagi nakaapil ka sa labaw, presenteng-adlawng ‘pagpuno sa mabungahong yuta sa abot’?—Itandi ang Pinadayag 22:2, 3.
Ang Dalan sa “Leviathan” Gitapos
20. Unsay palaaboton sa “Leviathan,” ug uban ang unsang resulta bahin sa pagkasoberano sa Diyos?
20 Unya wala na ang masambingayong Ehipto, ang presenteng daotang sistema nga gigamhan ni Satanas nga Yawa ingong diyos niini. Iliso na unya ni Jehova ang iyang pagtagad ngadto sa simbolikong Leviathan, ang nagadailos, baliko nga halas nga anaa sa taliwala sa dagat sa katawhan. Mahanaw na unya siya ug ang kanasoran, ug bisan ang mga unyon sa kanasoran. Siya wala na ingong may-kagawasan, aktibong magdadaot sa katawhan nga alang kanila si Jesu-Kristo nagpakamatay. (Isaias 27:1) Oo, si Satanas nga Yawa itambog sa bung-aw sulod sa Usa ka Libong Tuig nga Paghari ni Jesu-Kristo, ang Anak ni David ug ang may-katungod nga Manununod sa Gingharian. Ang 144,000 espirituwal nga Israelinhon mahimong kaubang mga manununod sa langit uban kaniya, ang masambingayong Leyon sa tribo ni Juda. (Roma 8:16, 17; Pinadayag 5:5, 9, 10; 7:1-4) Si Jehova nga Diyos ang Labing Hataas mabayaw na sa walay kataposan ingong Soberanong Ginoo sa uniberso. Ang unibersohanong organisasyon ni Jehova sa langit ug sa yuta malipayong makatagamtam sa malungtarong pakigdait ug panaghiusa. Sa panahong walay kataposan, bisan hangtod sa hangtod, si Jehova magkalipay tungod sa iyang nagkahiusang unibersohanong organisasyon.
Makahinumdom Ka Ba?
□ Nganong nasinati sa matuod nga mga Kristohanon ang “kapungot” ni Jehova sa sinugdan niining sigloha, ug unsay atong makat-onan gikan niining kasinatiana?
□ Katugbang sa kanasoran, sa unsang paagi kita ’makahawid kang Jehova ingong atong salipdanan’? (Isaias 27:5)
□ Sa unsang paagi “ang mabungahong yuta” napuno sa “abot” sa atong panahon? (Isaias 27:6)
□ Unsang umaabot nga katumanan sa Isaias 27:1 ang atong masaligong mapaabot?