Ang Katahom sa Kristohanong Personalidad
“Isul-ob ninyo ang bag-ong personalidad nga gibuhat sumala sa kabubut-on sa Diyos diha sa matuod nga pagkamatarong ug pagkamaunongon.”—EFESO 4:24.
1. Unsang matanga sa katahom ang atong gibatbat dinhi?
ADUNAY panultihon nga ang ‘katahom anaa sa mga mata sa nagtan-aw,’ nga nagkahulogan nga relatibo o depende ang katahom sa nagtan-aw. Unsa ang katahom sa usa ka Kristohanong lalaki o Kristohanong babaye? Mao kana ang buot natong hisgotan karon.
Kabatbatan sa Katahom sa Kristohanong Lalaki
2. Nganong dili pisikal nga mga hiyas lamang mailhan ang usa ka tawo sa Diyos?
2 Magsugod kita pinaagi sa pagtagad sa mga hiyas nga makahatag sa usa ka Kristohanong lalaki ug ambongang panagway nga makadani sa uban sa pakigkuyog kaniya. Kulang ang pisikal nga mga hiyas aron mahimo ang tawo nga usa ka “tawo sa Diyos.” (1 Timoteo 6:11) Ang panagway sa gawas sa usa ka tawo, bisag unsa ka ambongan, walay kapuslanan kon dili maalamon ang iyang pangatarongan. Kon siya mapahitas-on, walay batasan, bagis, ug ignorante, dili siya makadani—siya ginaayran. Kon ang iyang batasan nakitang dili mapabilhon, tinuod nga mahimo siyang hinungdan sa kapangdolan sa uban. Kon ang iyang kaugalingon lamang ang iyang gitagad ug ang iyang hitsura o magpadayeg sa uban, dili siya ang matang sa tawo nga gustong pakig-ubanan sa mga tawo.
3, 4. (a) Unsa ang pila ka hiyas sa usa ka tawo sa Diyos sama sa gipakita sa tawong si Jesu-Kristo? (b) Sa unsang paagi imong mabatbat ang pila ka hiyas sa usa ka tawo sa Diyos?
3 Hinunoa, ang tawo sa Diyos nakapalambo sa mga hiyas sa pagkamakataronganon, kaluoy, gugma, ug kalulot. Wala mainila si Jesu-Kristo sa iyang hingpit nga lawas kondili sa iyang pagkamaunongon sa prinsipyo ug sa kamatuoran. Ang paagi sa iyang pagpanudlo nagpaila kaniya ingong usa nga nagpamulong nga may awtoridad gikan sa Diyos. (Mateo 7:28, 29; Juan 7:46) Ang tawo sa Diyos dili madala sa pagbuhat ug daotan tungod sa tinguha sa gahom o pagkahimong inila. Dili siya mahiphipan tungod sa mga bentaha sa usa ka posisyon. Usa siya ka tawo nga may malig-ong kabubut-on. Siya matinguhaon sa pagkamapaubsanon ug dili mamakak. Magpakita siyag maayong kahadlok kang Jehova. (Proverbio 22:4) Mao kini ang pila ka hiyas nga makita sa usa ka tawo sa Diyos.
4 Ang usa ka tawo sa Diyos adunay tanlag, maayong kasingkasing, ug tukmang motibo. (1 Timoteo 1:5; Proverbio 4:23) Dili siya mobuhat ug mga butang nga supak sa iyang tanlag, ni isalikway niya ang matarong nga mga prinsipyo. Sanglit adunay maayong kasingkasing ug matarong nga motibo, dili siya mogamit ug malimbongong mga paagi sa iyang pakigsabot sa uban. (Hebreohanon 13:18) Dili niya tugotang madaot ang iyang maayong mga motibo tungod sa daotang gawi ug buhat. (Oseas 4:11) Mapig-oton siya sa pagdisiplina sa iyang kaugalingon aron ang iyang kasingkasing dili mahimong malimbongon. Sa pulong ug sa buhat nangibabaw siya ingong tawo nga may prinsipyo.—Salmo 15:1, 2.
5. Unsang papel ang gidula sa kaluoy diha sa kinabuhi sa usa ka tawo sa Diyos?
5 Ang usa ka tawo sa Diyos maluloy-on sa uban, mapinasayloon ug mapuanguron. Ang usa ka tawong maluloy-on maoy usa ka tawong makibation. Makapakita siya ug empatiya ug pagsabot kon adunay mga problema ang uban nga malisod sulbaron ug mohatag kabalaka. Labaw pa niana, mapinasayloon siya kon may makasala kaniya. Iyang mabuntog ang kinaiyanhong tinguha sa pagbalos ug daotan sa daotan ug sa pagpasipala ug pagpasipala. Tinuod nga natuman niya ang tambag sa 1 Pedro 3:8, 9. Pinaagi sa pagpanalangin imbes pagtunglo, nagapakita siya sa iyang kaugalingon nga mapuanguron ug madaog niya ang dunot nga mga tinguha nga nagtimaan sa tawong salawayon, usa ka tawong walay katakos nga mahimong maluloy-on, mapinasayloon, ug mapuanguron sa uban.—Efeso 4:31, 32.
6. (a) Unsa pa ang ubang tagsaong mga hiyas sa usa ka tawo sa Diyos, ug unsay buot ipasabot niini? (b) Unsay pagtamod sa asawa ug mga anak niining matanga sa tawo?
6 Laing tagsaong hiyas nga nagtimaan sa usa katawo sa Diyos mao ang iyang pagkamanggihatagon. Kon siya minyo, usa siya ka tinuod nga bana ug matinud-anong amahan. Sa iyang pagkahimong minyo, ang tawo sa Diyos adunay dakong higayon nga mahimong impluwensiya ug sumbanan alang sa kaayohan sa iyang asawa ug sa iyang mga anak. (Colosas 3:19, 21) Mahitungod sa pagkamanggihatagon, gisunod niining tawhana ang maayong tambag ni Jesus-Kristo, nga nag-ingon: “Bansaya ang paghatag, ug ang mga tawo magahatag kanimo. Ang takos nga pinaugdo, dinasok ug tinantan, ug magaawas, igabutang ra unya sa inyong sabakan. Kay ang takos nga inyong igahatag mao usab unya ang inyong pagadawaton.” (Lucas 6:38) Sa iyang relasyon sa pamilya, kining matanga sa tawo sa pagkatinuod may pagtagad niadtong sakop sa iyang panimalay. Apan sundon usab niya ang maayong tambag sa Efeso 4:28, sa pagbuhat ug “maayong buhat, aron may ikahatag siya ngadto sa nagakinahanglan.” Ingong tinuod nga bana, ang tawo sa Diyos maunongon sa kahikayan sa kaminyoon. Bug-os nga makasalig ang iyang asawa kaniya ingong usa ka tawong tinuod nga nausa uban kaniya sa bugkos sa kaminyoon. (Proverbio 5:18, 19) Dugang pa, kon may mga anak, magpakita siya nga usa ka matinud-anong amahan, dili limbongan sa iyang pakigsabot sa uban. Busa, iyang mapasilsil ang mga prinsipyo sa pagkamatinud-anon diha sa iyang mga anak. (Proverbio 4:1-5) Pagkamaayong panig-ingnan kining matanga sa tawo ngadto sa maumolong hunahuna sa iyang mga anak! Makalantaw sila kaniya ingong usa ka tawong maunongon, usa ka maghuhupot sa integridad.—Proverbio 11:3, 4.
7. Unsang timbang nga panglantaw sa pagkautangan ang hunahunaon sa tawo sa Diyos?
7 Bahin gihapon niini, ang tawo sa Diyos magbantay nga siya ug ang iyang pamilya dili maputos sa dagkong mga utang, sanglit nahibalo siya nga kini moresultag seryosong mga problema. Siempre, kini nagkahulogan nga dili niya itugot ang iyang kaugalingon ug ang iyang pamilya sa pagkinabuhi nga labaw sa ilang maarangan. Usa siya ka tawo nga maayong moplano sa dili pa magsugod ug usa ka butang. (Lucas 14:28-30) Makahimo siya sa paghikaw sa iyang kaugalingon sa bisan unsang butang alang sa umaabot ug ang makita iyang ihikaw alang sa dili makita, pagaingnon pa. (Itandi sa Hebreohanon 11:8-10.) Ang pagkinabuhi niining paagiha makatabang sa usa ka tawo sa Diyos sa paglakaw sa dalang Kristohanon diha sa iyang adlaw-adlawng pagkinabuhi.
8. Sa unsang paagi atubangon niining matanga sa tawo ang dili maayong mga kahimtang sa iyang kinabuhi?
8 Sa kinabuhi sa tanang katawhan, tungod sa kasal-anan ug pagkadilihingpit, kinahanglang atubangon usahay ang dili maayong mga kahimtang. Apan ang tawo sa Diyos malig-on ug masubayon sa mga prinsipyo sa ingon niini nga mga kahimtang, sama sa sumbanan nga gipakita ni Jesus. (Juan 16:33) Pinaagi sa kalig-on sa iyang Diyos, si Jehova, iyang atubangon ang malisod nga mga problema uban ang kaisog, masaligon sa tabang ug pagtultol ni Jehova.—Proverbio 18:10.
9. Sa unsang paagi imong mabatbat ang moral nga kinabuhi sa usa ka tawo nga nagtinguha sa pagpahimuot kang Jehova?
9 Ang tinuod nga tawo sa Diyos mao ang agalon sa iyang lawas. Nga ang buot ipasabot, iyang ginakontrolar ang iyang mga tinguha ug kailibgon, sanglit nahibalo siya nga ang iyang lawas maoy usa ka maayong ulipon apan daotan kaayong agalon. Hinumdoman niya kanunay ang dinasig nga mga pulong ni apostol Pablo: “Gibun-og ko ang akong lawas ug gihimo ko kining ulipon.” (1 Corinto 9:27) Busa, maningkamot siya kanunay sa pagpalambo nianang bunga “sa espiritu . . . pagpugong sa kaugalingon,” nga naglikay sa mga butang nga makadaot kaniya. (Galacia 5:22, 23) Maalamon siya sa pagkasayod nga ang pagpadala sa imoral nga hunahuna moresultag imoral nga buhat. Sa makausa pa, siya masaligon sa iyang Diyos, si Jehova, ug sa kusog nga Iyang ihatag.—Filipos 4:13.
10, 11. (a) Unsang maayong hiyas ang ipakita sa usa ka tawo sa Diyos kon makahimo siyag kasaypanan sa iyang paghukom? (b) Unsang panig-ingnan ang sundon sa mga ulo sa pamilya bahin sa pagtuon sa pamilya?
10 Ug sa kataposan, ang tawo sa Diyos modawat sa iyang mga sayop, siya makasulti nga gikasubo niya ang nahitabo, ug makapangayog pasaylo sa iyang kapikas ug sa uban nga nasakitan sa iyang nahimo o nasulti tungod sa pagkadilihingpit. Makaduol siya kang Jehova uban sa mahinlong kasingkasing ug sa pagpangayog pasaylo sa iyang nahimong kasal-anan tungod kay nakapangayo na siya sa iyang asawa, sa iyang isigkatawo, sa iyang mga anak, ug pasaylo. Ang katakos sa pag-ingong, “Pasayloa ako, kay nasayop ako” maoy timaan sa tinuod nga tawo, ilabina sa tawo sa Diyos.—Mateo 18:21, 22; Marcos 11:25.
11 Dili ba imong ikaingon nga ang usa ka tawo, usa ka bana, usa ka amahan, nga ingon nianang kalibreha tabangan ni Jehova? (Salmo 54:4) Sa pagkatinuod, masangkapan siya sa pag-atubang sa mga problema nga ihatag niining modernong kalibotan kanatong tanan tungod sa mga laraw ug katuyoan ni Satanas sa paglaglag sa tanang butang nga maayo, lakip sa kaminyoon ug sa malipayong pamilya. Iyang atimanon ang espirituwalidad sa mga membro sa pamilya, manguna kanila sa regular nga pagtuon sa Pulong sa Diyos ug sa pag-ampo, sumala sa panig-ingnan sa matinumanong mga alagad sa Diyos sa panahon Bibliya.—Deuteronomio 11:18-21; Proverbio 7:1-3.
12. Unsang hinungdanong papel ang atong sunod tagdon?
12 Apan duna pay daghang butang tagdon. Anaa ang papel nga dulaon sa asawa sa pagbuntog sa mga problema sa pamilya. Atong tagdon karon kadtong mga hiyasa nga buot niyang palamboon sa iyang kinabuhi.—Proverbio 19:14.
Kabatbatan sa Katahom sa Kristohanong Babaye
13, 14. Unsang mga lakang ang himoon sa usa ka babaye aron madani ang pag-uyon ni Jehova ug, kon siya minyo, sa iyang pamilya, ug unsay tambag ni apostol Pedro diha sa 1 Pedro 3:1-5 alang sa kababayen-an?
13 Ang basahon sa Proverbio nagtug-an kanato ug usa ka butang bahin sa usa ka babaye sa Diyos: “Ang katahom malimbongon, ug ang kaanyag kakawangan; apan ang usa ka babaye nga mahadlok kang Jehova mohatag ug kadayegan sa iyang kaugalingon.” (Proverbio 31:30) Nan, sa unsang paagi, mabatonan sa usa ka babaye kining mga hiyasa nga makapamahal sa iyang bana ug kabataan o sa uban kon siya dalaga, ug tungod niana mawili ang uban sa pakig-uban kaniya? Una, ang usa ka babaye sa Diyos dunay bukas nga kasingkasing, nagkahulogan nga siya manggihatagon, matinguhaon sa pagtabang sa uban sa tanang paagi nga iyang maarangan, sa materyal man o sa espirituwal. Kon adunay tawong nanginahanglan, una siya nga motabang, magpakitag tinuod nga interes sa mga panginahanglan sa uban. Apan, siempre, iyang itimbang ang maong interes sa pag-atiman ug pagtagad nga iyang ihatag, kon siya minyo, ngadto sa iyang kaugalingong pamilya.—Tito 2:3-5.
14 Dugang pa, ang usa ka babaye sa Diyos mapaubsanon, dili mapahitas-on; buotan, dili sapoton; mahinlo, dili hugawan; maluloy-on, dili gahig-ulo. Ug, kon minyo, maningkamot siya sa pagsunod sa tambag nga gihatag sa apostol sa 1 Pedro 3:1-5.
15. (a) Unsang tumong ang huptan sa usa ka babaye sa Diyos, ug sa unsang paagi iyang makab-ot kini? (b) Sa unsang paagi mapaluyohon siya sa iyang bana? (c) Nganong padayon siyang panggaon sa iyang pamilya?
15 Lain pa, ang usa ka babaye sa Diyos dili maalamon sa kalibotan, kondili mapaningkamoton sa pagpalambo sa espirituwalidad. Mainiton siyang magbabasa sa Bibliya ug maikagon sa pagpadapat sa mga prinsipyo niini diha sa iyang kinabuhi. (Salmo 119:66) Dili niya kini himoon alang sa iyang kaugalingong kaayohan lamang, nga nagtinguha sa kahibalo alang sa iyang kaugalingon, kondili, iyang gihunahuna ang pakigbahin sa maayong mga butang nga iyang nakat-onan, diha sa Kristohanong ministeryo ug sa adlaw-adlawng pakig-atubang sa iyang mga silingan, mga paryente, ug mga higala. Malipay ang Kristohanong bana sa usa ka asawa nga iyang ikaestorya bahin sa espirituwal nga mga butang, ingong iyang kaparang, usa ka tawo nga nagapabili usab sa espirituwal nga mga butang ug nagtinguha sa pakigbahin uban kaniya sa dugang nga pagkahibalo kang Jehova. (Proverbio 9:9, 10) Busa ang usa ka babaye sa Diyos may pag-ila ug pagsabot. Kon minyo, nasayod siya sa iyang papel ingong kaparang sa iyang bana. Mapaluyohon siya sa iyang bana sa paghatag espirituwal nga mga pahamangno sa mga bata, ilabina kon wala ang bana sa panimalay. (Itandi sa 2 Timoteo 1:2, 5; 2 Juan 1, 2.) Padayon siyang mapinanggaon ug gipangga sa pamilya bisag dugay nang nahupas ang katahom sa iyang pagkabatan-on. Makasalig ang iyang bana kaniya sa maayo ug tukmang mga obserbasyon, timbang nga mga opinyon, ug tim-os nga pagpadasig, tungod kay siya mapahimut-anon ug makataronganon. (Proverbio 25:11) Sa dihang milihok si Abigail nga maalamon ug sa walay paglangan si David nakaingon: “Bulahan ang imong pagkamakataronganon.”—1 Samuel 25:32, 33.
16. Unsang matang sa mga pulong ug mga buhat ang magpaila sa usa ka babaye sa Diyos?
16 Ang makasaranganong impluwensiya alang sa kaayohan nga mahimo sa asawa sa pagpaluyo sa iyang bana dili kanang mahait, mahalang, o mapanawayong mga pulong. Ang pabor madani pinaagi sa buotang panagway, maayong pagkasulting mga pulong, mahigugmaong mga buhat, pagkakugihan, kalulot ug sangkad nga pagsabot. (Itandi sa Proverbio 25:11; 31:10-28; I Tesalonica 2:7.) Ang kaaghop, pagtuo, pagkamakasaranganon, mao kini ang mga butang nga makadani sa malungtarong pagmahal sa babaye sa Diyos.—Salmo 37:11; Hebreohanon 11:11, 31, 35; Proverbio 11:2.
17. Unsa ka bililhon ang hiyas sa gugma alang sa usa ka babaye sa Diyos?
17 Laing tagsaong hiyas sa usa ka babaye sa Diyos mao ang iyang katakos sa pagpakitag kaluoy ug pagbati. (Roma 12:10) Ang iyang labing maayong dayandayan mao ang gugma, nga makapugong kaniya nga mahimong masinupakon sa gagmayng mga butang. Pagkatahom nga pagkabatbat nianang gugmaha sa 1 Corinto 13:4-7. Sumala sa The New English Bible, kini mabasa: “Ang gugma mapailobon; ang gugma maluluton ug dili masinahon. Ang gugma dili mapahitas-on, ni andakan, ni walay batasan; dili gayod hakog, dili daling masuko. Ang gugma dili maghambin ug kasuko; dili malipay sa kasalanan sa uban, apan malipay sa kamatuoran. Walay butang nga dili maatubang sa gugma; walay kinutoban sa pagtuo, sa paglaom, ug pag-antos niini.”
Unsa ba Kita?
18. Unsang personal nga mga pangutana ang ginaatubang sa matag usa kanato karon, ug unsay mahimo sa pagsusi sa kaugalingon?
18 Ang dakong pangutana karon mao: Ang tagsatagsa ba kanato maila ingong Kristohanong tawo, minyo o dili-minyo? Duna bay mga dapit sa atong kinabuhi nga atong nakita nga nagkinahanglag dugang pagpasibo samtang nagapaningkamot kita sa pagpahimuot kang Jehova ug sa atong isigkatawo? Malagmit, nga ang bisan unsang pagsusi sa kaugalingon nga atong himoon kita makakaplag ug bahin nga kinahanglan natong pauswagon. Apan pagkadakong kalipay sa pagtan-aw niining maong mga kauswagan sa atong kaugalingon ug, labaw pa niana, nga makamatikod ang uban ug mokomento sa kausaban nga atong nahimo tungod sa atong tim-os nga pagsunod sa Pulong sa Diyos ug sa mga pagtulon-an niini!—2 Corinto 13:5; 1 Timoteo 4:15, 16.
19. Sa unsang paagi atong masulbad ang mga problema nga atong maatubang sa pagpangagpas ug malinawon, diyosnong kinabuhi?
19 Aron mapadayon ang kinabuhing dili-minyo, ang tawo makapalambo niining mga hiyasa. (1 Corinto 7:32) Ug kon moabot man ugaling ang adlaw nga modesisyon na ang usa nga magminyo, kining mga hiyasa sa tinuod makaayo kanila nga nakapalambo niini. Taliwala sa mga minyo, ang padayong pagpalambo sa Kristohanong mga hiyas moresulta ug dakong kalipay. (Filipos 4:8, 9) Ang pagsulbad sa mga problema nagkinahanglan ug paningkamot sa duha nga kapares diha sa kahikayan sa kaminyoon. Ang pagkamainandamon sa pagdawat ug sa pag-usab sa dili maayong mga batasan makaamot ug dako sa pagsul-ob ug maayo Kristohanong personalidad. (Colosas 3:8-10) Hinumdomi, usab, nga ang timaan sa usa ka Kristohanong lalaki o Kristohanong babaye mao kanang katakos sa pag-ingon, “Nasubo ako, palihog pasayloa ako.” Makasala kitang tanan. Kon dawaton nato kini, kita nagpakitag pamatuod nga nakapalambo sa tugob nga mga hiyas sa pagkamakasaranganon ug pagkamapaubsanon.—Miqueas 6:8; Santiago 3:2.
20. Unsang tukmang mga pulong ni apostol Pablo sa Colosas 3:12-17 ang makatabang ug angay sa tanan?
20 Pagkatukma niining mga pulonga ni Pablo ngadto sa kongregasyon sa Colosas: “Nan isul-ob ninyo ang mga besting angay sa piniling katawhan sa Diyos, iyang kaugalingon, iyang pinalangga: ang pagkamabination, pagkamapuanguron, pagkamapaubsanon, kaaghop, pailob. Mag-inantusay ang usag usa kaninyo, ug mapinasayloon, kon aduna may pagmahay ang usa batok sa usa, magpinasayloay ang usa sa usa; maingon nga ang Ginoo nakapasaylo kaninyo. Apan labaw niining tanan, kinahanglang adunay gugma, aron mabugkos ug mabug-os ang tanan. Ug paharia ang kalinaw ni Kristo diha sa inyong mga kasingkasing; nga ngadto sa maong kalinaw kamo sa pagkatinuod gipanagtawag diha ingong sakop sa mao rang usa ka lawas. Magpasalamaton kamo. Ang balita ni Kristo papuy-a nga madagayaon gayod diha kaninyo. Magtinudloay ug matinambagay kamo ang usa sa usa sa tanang kaalam. Magaawit kamo sa inyong mga kasingkasing ngadto sa Diyos, uban ang mga salmo ug mga alawiton ug mga espirituwal nga mga awit. Ug bisan unsay inyong pagabuhaton, sa pulong o sa buhat, buhata ang tanan sa ngalan ni Ginoong Jesus, nga magahatag ug pasalamat sa Diyos nga Amahan pinaagi kaniya.”—Colosas 3:12-17, NEB.
21. Sa unsang paagi ang atong batasan ug buluhaton makadasig sa uban?
21 Ang maayong mga pananglitan sa Bibliya, ug ang Kristohanong kongregasyon usab niining ika-20ng siglo, makapadasig sa tanan sa pagpadayon sa pagpaningkamot sa pagsul-ob ug bag-ong personalidad. (Efeso 4:22-24) Sa pagbuhat niini, kita mahimong panalangin sa tanan nga atong makauban. Dugang pa, daghan pang atong dalhan sa balita sa Gingharian makadayeg ug madasig, dili lamang sa atong mga pulong kondili sa kadasig ug maayong batasan nga ilang makita diha sa tibuok yutang pamilya sa mga Saksi ni Jehova.—Juan 13:34, 35.
Agig sumariya sa ibabaw, unsay imong ikasulti?
□ Unsang mga hiyas ang palamboon sa usa ka tawo sa Diyos?
□ Sa unsang paagi atimanon sa Kristohanong lalaki ang iyang asawa ug kabataan?
□ Mailhan ang Kristohanong babaye pinaagi sa unsang mga hiyas?
□ Sa unsang paagi maalamong makatukod ang mga dili-minyo alang sa umaabot?