Mga Ansiano, Isipang Maugdang ang Inyong mga Responsabilidad
“Tagda ang panon sa Diyos nga gipaatiman kaninyo.”—1 PEDRO 5:2.
1. Nganong nahiangay kaayo nga ang mga karnero pagagamiton sa pagsimbolo sa mga tawong inuyonan sa Diyos?
ANGAYAN kaayong gamiton ang mga karnero sa pagsimbolo sa mga tawong nauyonan ni Jehova nga Diyos! Ang mga karnero maoy mga linalang nga aghopon nga mosanong sa tingog sa ilang magbalantay ug daling mosunod kaniya. Ang karnerohong katawhan sa Diyos susamang nagapaagak sa Maayong Magbalantay, si Jesu-Kristo. Sila nakaila kaniya, nagasanong sa iyang tingog, ug malipayong nagadawat sa iyang pagpanguna. (Juan 10:11-16) Hinuon, kon walay usa ka maayong magbalantay, ang literal nga mga karnero daling mahimong hadlokan ug walay mahimo. Nan, dili katingalahang si Jesu-Kristo giabot ug kaluoy sa katawhang “gipanitan ug nahisalaag samag mga karnerong walay magbalantay.”—Mateo 9:36.
2. Giunsa ni Jehova pag-isip ang mga karnerohon nga nag-antos ubos sa dili-mahigugmaong “mga magbalantay sa Israel”?
2 Dulot nga interesado si Jehova nga Diyos sa espirituwal nga kaayohan sa buotan-ug-kasingkasing nga mga tawo nga sa Kasulatanhon gitawag “mga karnero.” Pananglitan, pinaagi ni propetang Ezekiel, gipahayag sa Diyos ang kaalaotan sa “mga magbalantay sa Israel,” ang mga lalaking may katungdanan nga nagpakaon sa ilang kaugalingon samtang nagpasagad sa mga karnero. Apan dili itugot ni Jehova nga magaantos ang mga karnerohon nga walay kahupayan, kay siya miingon: “Akong pangitaon ang nawala, ug akong ibalik ang nahisalaag, ug akong bugkosan ang nabalian ug akong lig-onon ang masakiton.”—Ezekiel 34:2-16.
3. Sa unsang paagi gipakita ni Jesu-Kristo ang kabalaka alang sa mga karnero?
3 Ang Maayong Magbalantay, si Jesu-Kristo may susamang kabalaka alang sa mga karnerohon. Busa, una mokayab sa langit gipahayag ni Jesus ang iyang tinguha nga madawat sa mga karnero ang tukmang pag-atiman. Giingnan niya si apostol Pedro, ‘Pakan-a ang akong mga nating karnero, atimana ang akong gagmay nga mga karnero, pakan-a ang akong gagmay nga mga karnero.’ (Juan 21:15-17) Ug sa pagpasalig sa mapinadayonong mahigugmaong pagtagad sa mga karnero, gihatag ni Jesus ang “pipila ingong mga magbalantay” sa paglig-on sa “lawas ni Kristo.”—Efeso 4:11, 12.
4. Giawhag ni apostol Pablo ang tinudlo-sa-espiritung “mga ansiano” sa pagbuhat sa unsa?
4 Sanglit ang Diyos ug si Kristo dunay halalom kaayong gugma ug kabalaka sa mga karnerohon, ang pagkahimong usa ka ubos nga magbalantay sa mga karnero sa Diyos maoy responsable kaayong asaynment. Sa ingon giawhag ni apostol Pablo ang tinudlo-sa-espiritung “mga ansiano” sa Efeso sa “pag-atiman sa kongregasyon sa Diyos,” nga ihatag ang nahiangay nga pagtagad niana. (Buhat 20:17, 28) Busa sa unsang paagi ang tinudlong mga ansiano tukmang magaatiman sa maong responsabilidad?
Ang mga Magbalantay Nagadawat ug Direksiyon
5. Unsang tambag ang gihatag ni Pedro sa kaubang mga magtatan-aw?
5 Si apostol Pedro, kinsa gidahom nga magpakaon sa mga karnero sa Diyos, misulti ngadto sa kaubang mga magtatan-aw: “Tagda ang panon sa Diyos nga gipaatiman kaninyo, dili ingon sa gipamugos kamo, kondili sa kinabubut-on; dili tungod sa gugma sa dili-matarong nga panapi, kondili sa pagkamaikagon; dili ingon sa nagaharihari niadtong panulondon sa Diyos, kondili mahimong mga panig-ingnan sa panon.” (1 Pedro 5:1-3) Atong tan-awon sa unsang paagi ang mga ansiano, nga tinudlo sa balaang espiritu, hustong makasunod niining paagiha.
6. Uban ang unsang tinamdan ang mga ansiano magaalagad sa “panon sa Diyos”?
6 Giawhag ni Pedro ang kaubang mga ansiano: “Tagda ang panon sa Diyos nga gipaatiman kaninyo, dili ingon sa gipamugos kamo, kondili sa kinabubut-on.” Kadtong nakapribelihiyo sa pag-alagad ingong espirituwal nga mga magbalantay angay magbuhat niana nga walay pagbagulbol, nga dili mobating napugos sa pag-atiman sa mga karnero. Angay dili nila bationg pinugos, nga daw kini makapuol o gituklod sila sa uban sa pagtagad sa panon. Hinunoa, ang mga ansiano angay mag-alagad nga may kinabubut-ong espiritu. (Itandi ang Salmo 110:3.) Kon ang usa ka tawo andam mobuhat ug maayo alang sa uban, kasagarang buhaton niya kana sa bug-os nga kasingkasing, nga manlimbasog sa iyang kaugalingon sa pagbuhat ug labaw sa kasagaran sa pag-alagad sa ilang kaayohan. Ang andam nga ansiano dili magtinihik sa iyang panahon ug kusog. Siya nahibalong may panahong mahisalaag ang :mga karnero, ug buot niyang tabangan sila, nga magasundog sa kabalaka sa Diyos alang sa mga karnerohon. Aw, dako gayod ang kabalaka ni Jehova sa mga Israelinhon nga nahisalaag nga ang iyang mga pulong mao: “Ako nagaingon, ‘Ania ako, ania ako!’ ngadto sa usa ka nasod nga wala magsangpit sa akong ngalan”!—Isaias 65:1.
7, 8. (a) Unsay kahulogan sa pagtuman sa buluhaton sa pagkamagbalantay nga dili mahigugma sa dili-matarong nga panapi? (b) Ang pag-alagad nga maikagon nagkahulogan sa pagbuhat sa unsa?
7 Si Pedro miingong ang buluhaton sa pagkamagbalantay pagabuhaton “dili tungod sa dili-matarong nga panapi, kondili sa pagkamaikagon.” Dili buot sa tinudlong mga ansiano nga mahimong palas-anon sa mga karnero. Kana ang tinamdan ni apostol Pablo, kay iyang giingnan ang mga Kristohanon sa Tesalonica: “Inyong ibutang sa inyong mga hunahuna, mga igsoon, ang among paghago ug pagbudlay. Maoy uban sa pagbuhat sa magabii ug sa maadlaw, aron dili makahatag ug dakong kabug-at kang bisan kinsa kaninyo, nga kami nagwali kaninyo sa maayong balita sa Diyos.” Iya usab gipahinumdoman sila: “Kami wala magbagdoy sa inyong taliwala ni kami magkaon sa pagkaon nga iya ni bisan kinsa nga wala namo pagbayri. Hinunoa, pinaagi sa paghago ug pagbudlay sa magabii ug sa maadlaw kami nagkugi aron dili makahatag ug dakong kabug-at kang bisan kinsa kaninyo.”—1 Tesalonica 2:9; 2 Tesalonica 3:7, 8.
8 Sa susama, (ang matinumanong mga magbalantay sa panon sa Diyos karong adlawa dili maibog sa mga butang nabatonan sa mga karnero o mosulay sa pagpanapi nga dili matarong sa ilang kapildihan? (Lucas 12:13-15; Buhat 20:33-35) Gipakita ni Pablo nga kadtong mahimong takos sa pagkamagtatan-aw ‘dili mahakogon sa dili-matarong nga panapi.’ (Tito l:7) Hinunoa, kinahanglang mag-alagad silang maikagon, nga may madasigong kaikag sa ilang buluhaton ug magtinguha sa kaayohan sa mga karnerong gipaatiman kanila. (Filipos 2:4) Niining paagiha, ang maong mga magbalantay magapadayag ug dili-mahakogong kabalaka sa mga karnero nga susama sa gipasundayag ni Jehova nga Diyos ug sa iyang Anak, si Jesu-Kristo.
9. Nganong ang Kristonanong magbalantay kinahanglang ‘dili magharihari niadtong panulondon sa Diyos’?
9 Si Pedro miingon usab nga ang mga ansiano angay mag-atiman sa katawhan ni Jehova “dili ingon sa nagaharihari ibabaw niadtong panulondon sa Diyos, kondili mahimong mga panig-ingnan sa panon.” Ang usa ka mahigugmaong magbalantay magbantay nga dili mag-abusar sa iyang awtoridad pinaagi sa pagbatog panagway sa pagkalabaw ug magaharihari ibabaw sa mga karnero. Ang hambogirong espiritu dili Kristohanon ug pagalikayan sa tanang matinguhaon sa pagpahimuot kang Jehova. Ang Proverbio 21:4 nagaingon: “Ang mapahitas-ong mga mata ug ang garboso nga kasingkasing, ang lamparahan sa mga daotan, maoy kasal-anan.” Ug giingnan ni Jesus ang iyang mga sumusunod: “Kamo nasayod nga ang mga punoan sa kanasoran nagaharihari ibabaw kanila ug ang kadagkoan nagabaton ug pagbulot-an ibabaw kanila. Dili kana ang kahimtang sa inyong taliwala; kondili si bisan kinsa nga mahimong dako sa inyong taliwala kinahanglang mahimong inyong alagad, ug si bisan kinsa nga buot mahimong una sa inyong taliwala kinahanglang mahimong inyong ulipon.” (Mateo 20:25-27) Sa pagkamatuod, kinahanglang hinumdoman sa mga ansiano nga kadtong nagalangkob sa panon maoy mga karnero sa Diyos ug dili pagaisog-isogan.
10. (a) Unsa ang gibuhat sa pila ka magbalantay sa katawhan sa adlaw ni Ezekiel? (b) Sa unsang paagi ang maunongong mga magtatan-aw maayong mga panig-ingnan sa panon?
10 Ngadto sa nag-alagad-sa-kaugalingong mga magbalantay sa adlaw ni Ezekiel si Jehova miingon: “Ang mga nagsakit wala ninyo palig-ona, ug ang mga masakiton wala ninyo tambali, ug ang nabalian wala ninyo bugkosi, ug ang nahisalaag wala ninyo pabalika, ug ang nawala wala ninyo pangitaa, apan sa kamaharuson inyo silang giharian, bisan sa kabangis.” Ang Diyos dugang miingon nga ang isog nga mga magbalantay ‘nagpadayon sa pagdus-og sa tanang masakiton hangtod kini sila nangahisalaag.’ (Ezekiel 34:4, 20, 21) Apan dili kana ingon sa mahigugmaong mga magbalantay sa “panon sa Diyos” karong adlawa. Dili nila ipanghambog ang ilang awtoridad ug sila nagabantay nga dili makapandol sa bisan usa sa mga karnero. (Itandi ang Marcos 9:42.) Hinunoa, ang maong mga ansiano nagataganag mahigugmaong tabang ug pagdasig. Dugang pa, sila mainampoong nagasalig kang Jehova ug nagapanlimbasog nga mahimong maayong mga panig-ingnan “sa sinultihan, sa kagawian, sa gugma, sa pagtuo, sa kaputli.” (1 Timoteo 4:12) Busa, ang mga karnero kontento ug mobatig kasegurohan, kay nasayod nga sila ginaatiman sa mahigugmaon, mahadlokon-sa-Diyos nga mga magbalantay.
Mga Kapeligrohang Ginaatubang sa mga Karnero
11. Nganong ang modernong-adlawng mga magbalantay kinahanglang mag-atiman pag-ayo sa panon sa Diyos aron ang mga karnero mobatig kasegurohan?
11 Ang karnerohong mga tawo karong adlawa kinahanglang mobatig kasegurohan, kay masaligon sa maayong pagtagad nga ihatag sa mga ansiano sa pagpanalipod sa panon. (Isaias 32:1, 2) Kini matuod ilabina sanglit ang mga Kristohanon nagaatubang ug daghang kapeligrohan niining “lisod nga mga panahon” nga nagatimaan sa “kataposang mga adlaw.” (2 Timoteo 3:1-5) Giatubang usab sa salmistang si David ang mga kapeligrohan, apan siya nakaingon: “Si Jehova mao ang akong Magbalantay. . . . Bisan pag magalakaw ako sa walog sa halalom nga landong, ako dili mahadlok sa daotan, kay ikaw nagauban kanako.” (Salmo 23:1-4) Ang modernong-adlawng mga magbalantay sa panon sa Diyos kinahanglang mag-atimag maayo sa mga karnero nga, sama kang David, kining mga karnerohon mobating suod kaayo kang Jehova. Kinahanglan usab nga bation nila ang kasegurohan ingong bahin sa organisasyon sa Diyos.
12. Gikan sa unsang kiling karong adlawa nga kinahanglang mapanalipdan ang mga karnero, ug sa unsang paagi ang mga ansiano makatabang niining bahina
12 Ang usa ka kapeligrohang gikan niana gikinahanglan sa panon sa Diyos ang panalipod mao ang kiling karon padulong sa kagawiang walay prinsipyo, imoral. Ilabina tungod sa mga matang karon sa kalingawan, kon kaha pinaagig telebisyon o sa laing paagi, naugmad sa daghang tawo ang paagi sa kinabuhi nga laktud nahasupak sa mga sukdanang gipahayag sa Pulong sa Diyos. Karong adlawa, ang husto-ra-ang-tanan nga tinamdan niining kalibotana, uban sa labihang seksuwal nga kahilayan, kinahanglang masumpo sa maayong tambag sa Kasulatan nga gitagana sulod sa kongregasyon. Busa ang mga magbalantay sa panon kinahanglang masayod pag-ayo kon unsa ang ginatudlo sa Bibliya mahitungod sa moralidad. Dugang pa, kinahanglang ibutang nila atubangan sa mga karnero ang ilang responsabilidad nga magpabiling mahinlo alang sa pag-alagad kang Jehova.—Tito 2:13, 14.
13. (a) Batok sa unsang kapeligrohan ang sulat ni Judas nagahatag ug maayong tambag? (b) Unsang baroganan ang kinahanglang batonan sa mga ansiano bahin sa mga apostata?
13 May mga kapeligrohan usab gikan sa mga apostata. Hinumdoming 19 ka siglo kanhi, ang pila ka “tawong dili diyosnon” nga maoy mini nga mga magtutudlo miyuhot sa kongregasyon. Sila maoy peligrosong “mga batong natago sa ilalom sa tubig,” mini nga mga magbalantay nga nagpakaon sa ilang kaugalingon, mananapong mga tawo nga nagpahinabog mga pagkabahinbahin ug walay espirituwalidad. Ang sulat ni Judas nagahatag ug maayong tambag nga makapaarang sa mga ansiano, ug sa tanang magtutuo, sa “pagpakigbugno sa maayong bugno sa pagtuo.” (Judas 3, 4, 12, 19) Walay duhaduha, kinahanglang huptan sa mga ansiano ang malig-ong baroganan kon bahin kang bisan kinsang nagatinguha sa pagpahinabog mga pagkabahinbahin, kay si Pablo misulat: “Magbantay kamo niadtong nagapahinabog pagkabahinbahin ug kahigayonan sa pagkapandol nga supak sa pagtulon-ang inyong nakat-onan, ug likayi ninyo sila.” (Roma 16:17) Busa ang mga magbalantay adunay responsabilidad sa pagpanalipod sa panon gikan niini kanila o sa ubang ‘mga lobo nga nagasul-ob sa sapot sa mga karnero.’—Mateo 7:15.
Pagtabang sa mga Karnero sa Ubang Paagi
14, 15. Sa unsang paagi ang mga ansiano makatabang sa kaubang mga magtutuo nga nagatratar sa usag usa nga dill maluluton?
14 Ang pag-atiman sa “panon sa Diyos” tingali magkinahanglan sa pagtabang sa mga karnero sa nagkadaiyang mga sulirang basin motungha sulod sa kongregasyon. Usahay, ang mga karnero basin mosugod sa pagpakig-away sa mga karnero. Tungod sa ginagmayng mga hitabo, ang pipila tingali mosugod sa pagtratar nga dili maluluton sa usag usa. Ang maong mga tawo tingali magdaot sa dungog sa usag usa ug sa kataposan mohunong sa pagpakig-uban sa kanhi nilang mga kauban sa pag-alagad kang Jehova, sa ila mismong dakong kapildihan sa espirituwal.—Proverbio 18:1.
15 Ang espirituwal nga mga magbalantay kinahanglang magmaigmat sa pagtabang sa maong kaubang mga magtutuo. Pananglitan, tingali kinahanglang ipunting sa mga ansiano unsa ka daotan ang pagdaot sa dungog sa usag usa ug sa unsang paagi ang tanang Kristohanon manlimbasog sa pagtipig sa panaghiusa sa kongregasyon. (Levitico 19:16-18; Salmo 133:1-3; 1 Corinto 1:10) Ang mga ansiano tingali makaarang sa pagtabang pinaagi sa pagpunting sa pasidaan ni Pablo: “Kon . . . kamo magpinahitay ug magtinukbanay sa usag usa, magbantay nga kamo dili mangalaglag pinaagi sa usag usa.”—Galacia 5:13-15; Santiago 3:13-18.
16. Unsay kinahanglang buhaton sa mga ansiano kon ilang mamatikdan ang dili-maayong mga kiling sa kongregasyon?
16 Mga ansiano, hinumdoming ang Yawa nagalibotlibot “sama sa usa ka nagangulob nga leyon, nga nangitag matukob.” (1 Pedro 5:8) Ang tanang matuod nga Kristohanon dunay pagpakig-away, dili batok sa unod ug dugo, kondili batok sa daotang espirituhanong mga gahom. (Efeso 6:10-13) Ang matinumanong mga magbalantay tinong dili buot nga ang mga karnero hisakpan ni Satanas. Busa kon ang pila ka karnerohon mosugod sa pagpaltag Kristohanong mga tigom, ang matinagdanong mga ansiano angay mosulay sa pagtino sa hinungdan ug mohatag ug igong espirituwal nga tabang. Kinahanglang mailhan sa mga magbalantay ang panagway sa panon ug magmaigmat sa bisan unsang dili maayong mga kiling sa kongregasyon. (Proverbio 27:23) Kon mamatikdan nila ang kiling sa pagpasagad sa pagsangyaw sa kanataran, dili pagpakabana sa personal nga pagtuon, o pagkalangkit nga hinobra sa kalingawan o materyalistikanhong mga pangagpas, ang maong responsableng mga lalaki kinahanglang magtul-id sa kahimtang. Ingong pagsundog kang Jehova ug sa Maayong Magbalantay, si Jesu-Kristo, ang mga ansianong nagaatiman sa “panon sa Diyos” nahiangayng mohatag ug personal nga tabang o, usahay mohatag sa gikinahanglang tambag panahon sa mga tigom. (Galacia 6:1) Niini nila ug sa ubang paagi, ang mahigugmaong mga ansiano nagahatag ug ebidensiyang ilang ginaisip nga maugdang ang ilang mga responsabilidad sa pagkamagbalantay.—Buhat 20:28.
Ang Pagkamagbalantay Maoy Ugdang nga Butang
17. Unsay gikinahanglan aron mahimong takos nga usa ka ansiano?
17 Ang pag-atiman sa “panon sa Diyos” ingong ansiano maoy usa ka buluhatong lisod. Ang hataas nga mga sukdanang pagakab-oton aron mahimong takos sa maong pribilehiyo tin-awng gipahayag sa 1 Timoteo 3:1-7, Tito 1:5-9, 1 Pedro 5:1-4. Si bisan kinsa lamang nga igsoong lalaki dili makaalagad sa maong katungdanan, kay ang espirituwal lamang nga mga lalaki ang makapas-an sa tukma niining maong responsabilidad. (1 Corinto 2:6-16) Daghang lalaki nga karon wala mag-alagad nga mga ansiano mahimong takos nianang pribilehiyoa, apan kinahanglang ila unang ‘tinguhaon ang katungdanan sa magtatan-aw.’ Kinahanglang sila kugihang mga estudyante sa Pulong sa Diyos aron mabatonan nila ang halalom nga pagsabot niana. Sa pagkamatuod, kinahanglang ilang ipakita nga sila angay irekomendar tungod kay nakakab-ot sa Kasulatanhong mga kinahanglanon aron matudlong mga ansiano, angayang mga magbalantay sa “panon sa Diyos.”
18. Unsay gibati ni Pablo mahitungod sa mga kongregasyon, ug ang uban ba may samang pagbati?
18 Nagaalagad ubos kang Jehova nga Diyos mao ang ulo sa Kristohanong kongregasyon, ang Maayong Magbalantay, si Jesu-Kristo. (Juan 10:11; 1 Corinto 11:3; Efeso 5:22, 23) Ug nahimuot kaayo si Jesus sa pagkabaton sa ubos nga mga magbalantay sa panon nga tukmang nagapanguna ug nagapanalipod sa mga karnero! Ang maong espirituwal nga mga lalaki nakakab-ot sa hataas Kasulatanhong mga kuwalipikasyon nga gibutang alang sa Kristohanong mga ansiano. Dugang pa, nabatonan nila ang samang halalom nga kabalaka alang sa mga karnero sama sa gipasundayag ni apostol Pablo, kinsa misulat: “Gawas pa nianang mga butanga [mga kalisod ug mga pag-antos] sa gawas nga matang, sa matag adlaw nagaabot kanako, ang kabalaka alang sa tanang kongregasyon. Kinsa ba ang mahuyang, ug ako dili mahuyang? Kinsa ang napandol, ug ako wala masuko?” (2 Corinto 11:23-29) Dako ang panaw nga nahimo ni Pablo, ug sa matag adlaw iyang naagoman ang “kabalaka alang sa tanang kongregasyon,” sama sa nasinati sa nagapanawng mga magtatan-aw karong mga adlawa. Sa susama, ang tinudlong mga alagad sa matag usa ka kongregasyon nakasinatig kabalaka alang sa mga karnero sulod sa panon nga gipaatiman kanila ingong espirituwal nga mga magbalantay.
19. Unsay mosangpot kon ipadapat ang Hebreohanon 13:17 ug ang mga ansiano magpadayon sa pag-isip nga maugdang sa ilang mga responsabilidad sa pagkamagbalantay?
19 Ang pag-atiman sa “panon sa Diyos” ingong magbalantay maoy lisod nga buluhaton, apan labing magantihon. Busa, mga magbalantay sa panon, ampingi pag-ayo ang bililhon ninyong pribilehiyo. Atimana pag-ayo ang mga karnero sa Diyos. Ug hinaot ang tanang karnerohon bug-os mokooperar sa ubos nga mga magbalantay nga gitudlo sa balaang espiritu. “Magmasinugtanon kamo sa mga nagapanguna sa inyong taliwala ug magmapinasakopon kamo,” miawhag si Pablo, “kay sila nagabantay sa inyong mga kalag ingon niadtong magahatag ug husay.” (Hebreohanon 13:17) Samtang ang tanang debotado kang Jehova sa bug-os kasingkasing maghiusa sa pagbuhat, mosangpot ang dagkong espirituwal nga mga panalangin ug mga kaayohan gikan sa matinumanong pag-alagad sa Kristohanong mga ansiano nga nagaisip nga maugdang sa ilang responsabilidad sa pagkamagbalantay.
Makapatin-aw Ka Ba?
□ Nganong ang espirituwal nga mga magbalantay nagaalagad nga kinabubut-on?
□ Nganong ang mga ansiano kinahanglang mahigawas sa gugma sa dili-matarong nga panapi?
□ Nganong sayop nga ang mga ansiano magaharihari ibabaw sa panon sa Diyos?
□ Nganong ang mga magtatan-aw kinahanglang mahimong mga panig-ingnan sa panon?
□ Unsa ang pila ka kapeligrohan nga gikan niana ang mga magbalantay kinahanglang manalipod sa “panon sa Diyos“?