Ayaw Pagpakig-ambit sa mga Sala sa Uban
“Wala ako molingkod uban sa mga tawong bakakon; ug uban niadtong nagatago kon unsa sila ako dili mosulod.”—SALMO 26:4.
1. Nganong giusab ni Judas ang iyang katuyoan sa pagsulat ngadto sa kaubang mga Kristohanon?
NAPULOG-SIYAM ka siglo kanhi, nagpiano ang tinun-ang si Santiago sa pagsulat sa kaubang mga magtutuo mahitungod sa ‘kaluwasang gituohan nilang tanan.’ Apan iyang nasutang gikinahanglang awhagon sila sa “pagpakigbugno sa lisod nga bugno sa pagtuo nga sa makausa gitugyan sa mga balaan.” Ngano? Tungod kay ang pila ka “dili-diyosnong mga tawo” nakayuhot sa kongregasyon ug “naghimo sa dili-takos nga kalulot sa atong Diyos nga pasangil sa malaw-ay nga kagawian.”—Judas 3, 4.
2. Bisan tuod makapahayahay ang paghisgot sa kaluwasan, unsa usahay ang kinahanglang atong palandongon nga mainampoon?
2 Pagkahayahay ang paghisgot sa kaluwasang gituohan sa tanan! Ang pagpalandong sa maong mensahe mohatag ug dakong katagbawan, ug kita magakalipay dihang atong dahomon ang tanang panalangin sa maong kaluwasan. Bisan pa niana, adunay mga panahon dihang, inay hisgotan ang kaluwasan, atong atubangon ang panginahanglan sa pagtagad sa ubang seryosong butang. Kon dili matul-id, kini makadaot sa atong pagtuo ug magpahinabong kita mapildi sa lumba alang sa kinabuhi. Maingon nga ang pasidaan ni Judas batok sa daotang kagawian maoy kusganon ug gamhanan, ang mga Kristohanon usab karong adlawa may panahong kinahanglang mamalandong nga mainampoon sa Kasulatanhong tambag nga maoy direkta, nga deretso gayod sa punto.
Ang Atong Kaugalingong mga Sala
3. Nganong gikinahanglan nato ang pagpanton o disiplina, ug sa unsang paagi atong pagadawaton kini?
3 Ang salmistang si David miingon: “Sa sala ako natawo uban ang mga kasakit, ug sa sala gipanamkon ako sa akong inahan.” (Salmo 51:5) Kitang tanan natawo nga makasasala. (Roma 5:12) Si apostol Juan misulat: “Kon kita magaingon: ‘Kita walay sala,’ kita nagalimbong sa atong kaugalingon ug wala kanato ang kamatuoran.” (1 Juan 1:8) Ingong makasasala, adunay mga panahong atong kinahanglan ang disiplina aron sa pagtul-id sa atong dalan. Ang maong disiplina nagagikan kang Jehova pinaagi sa iyang Pulong, sa Bibliya, ug sa iyang organisasyon. Ang iyang disiplina nagatul-id kanato ug nagatabang kanato sa paglakaw nga matul-id sa iyang atubangan. Sumala sa gipahayag ni apostol Pablo: “Matuod, sa pagkakaron walay pagpanton ang daw makalipay, kondili makasakit; apan sa kapulihay alang sa mga nabansay niana kini magahatag sa madaitong bunga, nga mao, ang pagkamatarong.” (Hebreohanon 12:11) Tungod sa madaitong bunga sa maong pagpanton, tinong pagadawaton nato kanang mapasalamaton.
4. Kanus-a ikahatag ang disiplina, ug unsa ang mahimong epekto niana?
4 Ang disiplina o pagpanton gikan ni Jehova mahimong ihatag dihang kita bag-o pang magasugod sa dalan nga mahimong mosangko sa grabe pang buhat nga daotan. (Galacia 6:1) Sa ubang panahon, ang pagpanton tingali moabot tapos kita mas bug-os nang nakasubay sa daotang dalan. Ang maong pagpanton o disiplina tingali mahimong grabe, sama sa dihang kusganong giawhag ni apostol Pablo ang mga taga-Corinto nga molihok batok sa usa ka makihilawason sa kongregasyon. (1 Corinto 5:1-5) Sa bisan haing kahimtang, ang disiplina ihatag aron ang mamumuhat ug daotan maghinulsol unta, magbag-o, ug magsubay sa mapinadayonong dalan nga halayo sa makasasalang mga tinguha nga mosangko sa seryosong buhat nga daotan. (Itandi ang Buhat 3:19.) Ang mga alagad ni Jehova mapasalamaton sa maong pagpanton, maingong ang gibadlong nga tawo sa karaang Corinto nakabatog kaayohan ug lagmit napasig-uli sa mahigugmaong pagpakig-uban sa kongregasyon.—2 Corinto 2:5-8.
5. Ang mga Kristohanong malangkit sa seryosong sala kasagarang mobuhat sa unsa?
5 Ang kinabag-an niadtong nagpahinungod kang Jehova nasayod kaayo sa panginahanglan nga molakaw sa matul-id nga paagi atubangan sa Diyos. Kon sila malangkit ugaling sa seryosong sala, sila sa madali mopahibalo sa daotang dalan, moadto sa tinudlong mga ansiano, ug mohatag ug ebidensiya sa tinuod nga paghinulsol. (Santiago 5:13-16) Ang kamatuorang pipila ra ka Saksi ni Jehova ang mapalagpot kada tuig maoy ebidensiyang ilang ginadumtan ang daotan ug ginatinguha ang pagbuhat sa maayo.—Salmo 34:14;45:7.
Ang mga Sala sa Uban
6, 7. Sa unsang paagi ang pila ka mamumuhat ug daotan nagasulay sa pag-impluwensiya sa uban?
6 Apan ang pipilang dayag nahigugma kon unsay matarong daw nagtugot nga limbongan sila sa ilang mga kasingkasing, kay daw wala nila dumti ang daotan. (Salmo 97:10; Amos 5:15) Ingong resulta, sila malangkit sa pagbuhat sa makasasalang mga buhat ug dili mopadayon sa pagpakigbisog sa pagbuhat sa matarong. Usahay, sila mopasobra pa, nga magtinguhang ilangkit ang uban sa ilang makasasalang dalan. Pagkahinungdanong atong isalikway ang maong mga sugyot!—Itandi ang Proverbio 1:10-15.
7 Usahay kadtong lagmit wala magdumot sa daotan maayo kaayong manulti nga ang pagpangandoy sa pagbuhat sa daotan basin moturok diha sa mga kasingkasing niadtong nagapamati kanila. Ang pagdasig tingali maoy sa pagbuhat sa imoralidad o sa usa ka aksiyong anaa sa ngilit sa kagawiang wala hiuyoni sa Diyos. O ang usa ka tawo tingali aghatong malangkit sa kahimtang nga lagmit peligroso sa espirituwal nga paagi. Kadtong sa ingon nagasulay sa pagdaldal sa uban tingali moangkong si Jehova maoy mahigugmaong Diyos nga maluoy ra kon kita makasala. Ang maong pagkamaluibon sa kasingkasing makapahinabog malungtarong kadaotan. (Jeremias 17:9; Judas 4) Segurado, angay natong ‘ilikay ang atong tiil gikan sa ilang dalan’!—Proverbio 1:15.
Pagpakig-ambit sa mga Sala sa Uban
8. Unsang mga pangutana ang kinahanglang pagatagdon?
8 Apan pananglit atong naamgohang ang usa ka gisugyot nga buhat maoy daotan? Ang ato bang pagsalikway niana nagalibre gayod kanato sa dugang responsabilidad niana? Kon nahibalo kitang kadtong nagasugyot sa buhat nga daotan nagabuhat niana, unsay atong pagabuhaton?
9. Nganong ang pila tingali dili motaho sa buhat nga daotan sa uban, apan nganong kini seryosong butang?
9 Ang pipilang nahibalo sa buhat nga daotan sa uban tingali makiling sa dili pagbutyag niana ngadto niadtong may pangunang responsabilidad sa paghupot sa kongregasyon nga mahinlo. Ngano? Tingali dili nila buot isipong mga sumbongero. O, tingali tungod sa sayop nga pagsabot sa pagkamaunongon, basin ilang ihilom kana o isulti lamang niadtong mosaad nga dili kana ipanulti. Kini seryoso kaayo. Ngano? Kay kini sa aktuwal mosangpot sa pagpakig-ambit sa mga sala sa uban.
10, 11. (a) Unsay giingon ni apostol Juan mahitungod sa pagpakig-ambit sa mga sala sa uban? (b) Kon kita may nasayrang buhat nga daotan sa usa ka membro sa kongregasyon, unsa ang ikasukna nato sa atong kaugalingon?
10 Gipakita ni apostol Juan nga posible ang pagpakig-ambit sa sala sa laing tawo. Misulat siya: “Si bisan kinsa nga magauna ug dili magapabilin sa pagtulon-an ni Kristo wala makapanag-iya sa Diyos. . . . Kon adunay moanha kaninyo nga wala magdala niini nga pagtulon-an, ayaw ninyo siya pagpasak-a sa inyong mga balay o pangomostaha siya. Kay siya nga mangomosta kaniya nagapakig-ambit sa iyang daotang binuhatan.” (2 Juan 9-11) Ang usa ka apostata gikan sa “pagtulon-an ni Kristo” dili angay nga kauban, ug pinaagi sa dili pagpangomosta kaniya, ang maunongong Kristohanon makalikay sa pag-ambit sa iyang pagkadaotan.
11 Sanglit kana ang kahimtang sa usa ka apostata, tinong dili nato buot mahimong mga umalambit sa pagkadaotan sa uban kansang imoral nga mga buhat atong nasayran. Nan, unsa na man kon nasayran natong ang usa ka membro sa kongregasyon nahimong kawatan o palahubog? Kon dili nato dasigon ang maong tawo sa pagtinguha sa pasaylo ni Jehova ug isugid ang iyang sala ngadto sa mga ansiano, kita ba bug-os dili mabasol? Dili, kay kita may seryosong responsabilidad.
Pagkahinlo ug Panalipod Klnahanglanon
12. Nganong ipakita ang kabalaka sa espirituwal nga kahinlo sa kongregasyon?
12 Sa tagsatagsa kinahanglang atong ipakita ang kabalaka sa espirituwal nga kahinlo sa kongregasyon. Kini gipasiugdag maayo dihang ang Hudiyong mga binihag hapit nang mobiya sa Babilonya sa ikaunom nga siglo W.K.P.! Ang gihatag-sa-Diyos nga sugo mao: “Pahalayo kamo, pahalayo kamo, gumula kamo gikan dinha, ayaw kamo pagkamkam sa mahugaw; gumula kamo sa taliwala sa [Babilonya], panaghinlo kamo sa inyong kaugalingon, kamo nga nagadala sa mga panudlanan ni Jehova.”—Isaias 52:11.
13. Giunsa pagpakita ni Judas nga kinahanglang kita mabalaka bahin sa pagpanalipod sa katawhan ni Jehova gikan sa mga mamumuhat ug daotan?
13 Kinahanglang magmabalak-on usab kita bahin sa pagpanalipod sa katawhan ni Jehova gikan niadtong magtinguha sa pagdaldal kanila ngadto sa buhat nga daotan. Ang “mga tawong dili diyosnon” sa adlaw ni Judas nagtinguha sa ‘paghimo sa dili-takos nga kalulot sa Diyos nga usa ka pasangil sa malaw-ayng kagawian,’ apan ang maong maunongong tinun-an milihok sa pagpasidaan sa kaubang mga magtutuo ug sa ingon nagpanalipod kanila. Iyang gipahinumdoman sila sa mga pasidaang gihatag sa dili-matinumanong mga Israelinhon, masupilong mga manulonda, ug sa uban. Basaha kining dinasig sa Diyos nga sulat, ug imong makitang ang maunongong mga Kristohanon dili lamang magpasagad dihang mameligro ang kahinlo sa kongregasyon o nagakinahanglang panalipod ang katawhan sa Diyos gikan sa imoral nga mga tawong may mahugawng mga motibo.
14. Kon mapakyas ang mamumuhat ug daotan sa pagsugid ngadto sa mga ansiano, sa unsang paagi ang Salmo 26:4 makatabang kanato sa paghukom kon unsay pagabuhaton?
14 Bisan pa niana, pananglitan atong gidasig ang usa ka mamumuhat ug daotan sa pagtinguha sa pasaylo sa Diyos ug pagsugid ngadto sa mga ansiano, apan padayon niya kanang ilangan o wala niya pagsabtang kinahanglang himoon kini nga mga tikang. Hikalimtan na ba lamang nato kana? Ang uban tingali mangatarongang dili nila buot malangkit. Tingali dili nila buot ipameligrong mabugto ang pakighigala sa usang nakasala. Ug basin dili nila buot hunahunaong mga tawong traidor pinaagi sa pagsulti sa mga ansiano. Apan kini sayop nga pangatarongan. Ang salmistang si David miingon: “Wala ako molingkod uban sa mga tawong bakakon; ug uban niadtong nagatago kon unsa sila ako dili mosulod.” (Salmo 26:4) Nan, tinong dili nato buot mahimong mga konsabo “niadtong nagatago kon unsa sila.”
15. Giunsa sa pagpakita sa Levitico 5:1 ang atong responsabilidad tapos sa paghatag sa nakasalang indibiduwal ug igong panahon sa pagduol sa mga ansiano mahitungod sa iyang daotan nga buhat?
15 Busa, tapos matagaan natog igong panahon ang nakasala nga indibiduwal sa pagduol sa mga ansiano mahitungod sa iyang buhat nga daotan, atong responsabilidad sa atubangan ni Jehova nga dili mahimong umalambit sa iyang sala. Kinahanglang atong pahibaloon ang responsableng mga magtatan-aw nga ang tawo nagbutyag sa seryosong buhat nga daotan nga angay nilang imbestigahon. Kini mahiuyon sa Levitico 5:1, nga nagaingon: “Karon kong ang usa ka kalag makasala sa pagkaaging siya nakadungog sa dayag nga panghimaraot ug siya usa ka saksi o nakakita niana o nahibalo niana, kon dili niya kana itaho, nan kinahanglang manubag siya sa iyang sala.” Siyempre, kinahanglang likayan nato ang paglihok nga madalidalion pinasukad sa pagbanabana lamang bahin sa buhat nga daotan.
16. Unsa ang labawng bililhon kay sa pag-unong ngadto sa usa ka higala kinsa dili mopadayag sa iyang seryosong buhat nga daotan ngadto sa tinudlong mga ansiano?
16 Sa kalibotan karong adlawa, ang pagtabon sa buhat nga daotan sa uban maoy batasan sa kadaghanan. Daghan ang maamang sama sa batong pader kon bahin sa pagbutyag sa buhat nga daotan sa uban niadtong angay masayod sa maong mga buhat. Kinahanglag kalig-on sa Kristohanong pagkatawo ang pagpahibalo sa tinudlong mga ansiano sa seryosong sala sa usa ka kaubang magtutuo. Apan aron mabatonan nato ang pag-uyon ni Jehova, kinahanglang dili nato itugot nga ang personal nga panaghigala maghimo kanatong buta sa buhat nga daotan sa laing indibiduwal. Ang atong relasyon sa Diyos labi pang hinungdanon kay sa pag-unong ngadto sa usa ka higala nga sad-an sa seryosong buhat nga daotan ug dili mobutyag niana ngad-to sa tinudlong mga ansiano.
Usa ka Sulirang Pagatagdon sa Tanan
17. Unsay nagailustrar nga ang pipila ka batan-on sa atong taliwala kinahanglang magbantay batok sa pagpakig-ambit sa mga sala sa uban?
17 Ang suliran sa pagpakig-ambit sa mga sala sa uban nagalungtad usahay sa pila ka batan-on sa atong taliwala. Sila tingali maghilom ug dili motug-an niadtong angay pahibaloon dihang ang uban magabuhat sa mga butang nga makadaot sa kongregasyon ug mahimong mosangpot sa kasuko ni Jehova. Ang pagtabon sa buhat nga daotan sa uban maoy kasagaran sa mga sistema sa tunghaan sa kalibotan. Apan kon kining punto de vista mokuyanap sa kongregasyon, mahimong mosangpot ang daghang suliran. May mga taho bahin sa mga batan-ong nagkausa sa pagbuhat sa daotang buhat samtang nagapanumpa sa usag usa nga dili motug-an aron ang mga ansiano ug mga ginikanan dili mahibalo sa maong kalihokan. Ang pagpadaog sa pamit-os sa mga katalirongan ug tinguhang dawaton sa pundok nakapahinabog dakong kaguol sa maong mga batan-on, sa ilang mga ginikanan, ug sa uban sa kongregasyon dihang nadiskobrehan ang buhat nga daotan. Atong hinumdomang walay butang tinago nga dili ibutyag, ug usa sa atong pangunang mga responsabilidad atubangan ni Jehova mao ang pagtabang sa paghupot nga hinlo sa iyang organisasyon.—Lucas 8:17.
18. Unsay pagabuhaton sa Kristohanong mga ginikanan kon makasala ang ilang mga anak?
18 Ang tanang alagad ni Jehova angay mag-amping kaayong dili makaambit sa mga sala sa uban. Ang pila ka ginikanan tingali mosulay sa pagpakamatarong sa daotang kagawian sa ilang mga anak, nga maningkamot sa pagsalipod kanila. Apan ang Kristohanong mga ginikanan angay dili magsagop sa tinamdang ang tanan nagakontra sa ilang mga anak dihang mohimog daotan kining mga batan-ona. Hinunoa, ang diyosnong mga ginikanan angay magtabang sa ilang nakasalang anak sa pagdawat, pag-angkon, ug pagbatog kaayohan gikan sa gikinahanglang disiplina nga gilaraw diha sa Pulong sa Diyos.
19. (a) Mahitungod sa seryosong mga sala, ang Kristohanong mga magtiayon kinahanglang magbantay sa unsa? (b) Unsay pagabuhaton sa mga ansiano kon ang usa kanila o usa ka ministeryal nga alagad makahimog seryosong sala?
19 Ang Kristohanong mga magtiayon kinahanglan usab nga mag-amping nga dili nila malapas ang mga kasugoan sa Diyos pinaagi sa pagtabon sa seryosong mga sala sa matag usa. Pagahinumdoman nila ang kaso ni Ananias ug Sapira, kinsa nagsabutsabot apan wala molampos sa pagtabon sa seryosong sala. (Buhat 5:1-11) Ang mga ansiano kinahanglan usab mag-maigmat nga dili magpanalipod sa usag usa o sa ministeryal nga mga alagad kon usa kanila nakahimog seryosong sala nga mahimong mosangpot sa pagpalagpot. Angay nilang sundon ang prinsipyong gilaraw ni Pablo, kinsa misulat: “Ayaw pagdali sa pagpandong sa imong mga kamot kang bisan kinsa; ni makig-ambit sa mga sala sauban; magmaputli ka.”—1 Timoteo 5:22.
Ang Kaalam sa Pagpabiling Dili Salawayon
20. Inay tabonan o makig-ambit sa dagkong mga sala sa uban, unsay atong pagabuhaton?
20 Ang mga alagad ni Jehova angay dili makig-ambit o mosundog sa daotang mga paagi niining kalibotana. Sa pagsulat kang Gayo, si apostol Juan miingon: “Hinigugma, ayaw pagsundoga ang daotan, kondili ang maayo. Ang nagabuhat ug maayo nagagikan sa Diyos. Ang nagabuhat ug daotan wala makakita sa Diyos.” (3 Juan 11) Pagkamaayo nga magiyahan sa tinong Pulong sa Diyos ug sa ingon buhaton ang maayo! Busa, inay tabonan o makig-ambit sa dagkong mga sala sa uban, atong ihukom nga mosidlak ingong mga kahayag, nga dili salawayon ug walay sala. (Filipos 2:14, 15) Ang matag alagad sa Diyos maoy responsable sa paghupot nga hinlo sa kongregasyon, samtang magpabiling walay mantsa sa kaugalingon. (2 Pedro 3:14) Apan unsa man kon nasamok ka kon bahin sa pagkanahiangay sa gibuhat sa lain? Ayaw pagpanuko sa pagpakigsulti sa mga ansiano ug baton! ang pagtultol kon bahin sa hustong dalang pagasubayon.
21. (a) Sa unsang paagi ang gugma ni Kristo alang sa iyang kongregasyon usa ka panig-ingnan alang kanato? (b) Mahitungod sa buhat nga daotan sa uban, unsang responsabilidad ang atong pagaspasanon?
21 Ang atong gugma sa organisasyon ni Jehova angay magsundog sa gugma ni Jesu-Kristo alang sa iyang espirituwal nga pangasaw-onon, ang kongregasyon. Siya “nahigugma sa kongregasyon ug mitugyan sa iyang kaugalingon alang niana, aron siya makabalaan niana, pinaagi sa paghugas niana sa tubig pinaagi sa pulong, aron iyang ikatanyag ang kongregasyon alang sa iyang kaugalingon diha sa katahoman niini, nga walay mantsa o kunot o susama niana, kondili kini mabalaan gayod ug walay buling.” (Efeso 5:25-27) Sa susamang paagi, ang atong gugma sa organisasyon ni Jehova angay magtukmod kanato sa pagbuhat sa atong maarangan sa paghupot nianang hinlo. Hinaot kita dili gayod magbuhat sa bisan unsa nga magpakaulaw sa Diyos o sa iyang organisasyon o mokonsentir sa buhat nga daotan sa uban sa kongregasyon. Hinunoa, atong dasigon ang mga mamumuhat sa daotan sa pagtul-id sa ilang kagawian ug tinguhaon ang tabang sa mga ansiano. Kon mapakyas sila sa pagbuhat niini sulod sa makataronganong yugto sa panahon, atong abagahon ang atong responsabilidad sa pagpahibalo sa tinudlong mga magtatan-aw. Niining paagiha, makalikay kita sa pagpakig-ambit sa mga sala sa uban ug magbatog tulubagon tungod sa daotan nilang buhat.
22. (a) Sa pagkab-ot sa kaluwasan, unsay atong pagabuhaton? (b) Unsang pangutana ang pagahisgotan pa?
22 Ang kaluwasang atong nabatonan tanan maoy usa ka bahanding walay sama. Sa pagkab-ot niini kinahanglang mopadayon kita sa paglakaw atubangan ni Jehova sa matul-id nga paagi. Busa, magtinabangay kita sa usag usa sa pagbuhat niana, nga dili gayod makig-ambit sa mga sala sa uban. Mahigugmaong gitagana ni Jehova ang organisasyonal nga kahikayan sa pagtabang kanato sa maong mga paningkamot, ug niining bahina ang tinudlong mga ansiano may hinungdanong bahin. Apan sa unsang paagi sila magasundog kang Jehova ug sa iyang Anak, ang Maayong Magbalantay? Unsang tabang ang ikahatag kanato sa mga ansiano sa pagsubay sa dalan sa kinabuhi? Ang mosunod nga artikulo motubag niining mga pangutanaha.
Makahinumdom Ka Ba?
□ Sa unsang paagi pagaisipon nimo ang pagpanton o disiplina?
□ Kon tug-anan ka sa kaubang magtutuo nga siya nakahimog seryosong sala, pagaawhagon nimo siya sa pagbuhat sa unsa?
□ Unsay imong pagabuhaton kon nasayran nimong ang usa ka mamumuhat ug daotan wala mosugid sa iyang sala ngadto sa tinudlong mga ansiano?
□ Kon kita mga ansiano, mga kapikas sa kaminyoon, o mga anak, sa unsang paagi kita makalikay sa pagpakig-ambit sa mga sala sa uban?