Gikinahanglan Pag-ayo—Dugang mga Mangangani!
“Ang anihon, sa pagkamatuod, dako, apan diyutay ang mga mangangani. Busa hangyoa ang Agalon sa anihon sa pagpadalag dugang mga mangangani.”—LUCAS 10:2.
1. Unsaon nimo tingali pagpangatarongan bahin sa mga pulong ni Jesus sa Lucas 10:2, apan unsay maayo nimong pagabuhaton?
Samtang basahon nimo kining mga pulong O ni Jesus, mobati ka ba nga nalangkit niana? Sanglit kana gipamulong sa kapin ug 19 ka siglo kanhi, basin makiling ka sa pagpangatarongan nga kana dili na bililhon. Ang maong madalidalion nga panapos sayop gayod. Sa pagsabot sa bug-os nga kahulogan sa mga pulong ni Jesus, atong lingion ang nahitabo sa unang gipamulong kana, ug unya susihon ang atong kaugalingong kahimtang karong adlawa.—Itandi ang 1 Corinto 10:11.
2. Unsang kahimtang nga nagkinahanglag dinaliang lihok ang giatubang ni Jesus sa 32 K.P. ug giunsa niya pag-atubang kadto?
2 Sa 32 K.P., nga miagi na ang Piyesta sa mga Balongbalong, unom na lang ka bulan ang nahibilin una atubangon ni Jesus ang kamatayon sa usa ka kahoy sa pagsakit. Sa pagtabang nga madali ang buluhaton sa pagwali, gipadala ni Jesus ang 70 ka disipulo “nga tinagurha sa pag-una kaniya ngadto sa matag siyudad ug dapit nga iyang pagaadtoan mismo.” Sila nanglakaw uban sa mga pulong ni Jesus nga nanatingting sa ilang mga igdulongog: “Sa pagkamatuod dako gayod ang anihon, apan diyutay ang mga mamumuo. Busa hangyoa ang Agalon sa anihon sa pagpadalag mga mamumuo sa iyang anihon.”—Lucas 10:1, 2.
Misangpot ang Dakong Ani
3. Batbata ang pipila sa mga resulta sa midakong pagwali sa kataposang pila ka bulan sa ministeryo ni Jesus.
3 Unsay misangpot sa maong labawng paningkamot sa pagwali? Atong mabasa: “Unya ang kapitoan namauli nga masadyaon, nga miingon: ‘Ginoo, bisan ang mga demonyo nagpasakop kanamo pinaagi sa paggamit sa imong ngalan.’” Kahibulongan gayod kadto nga pasundayag sa gahom sa Diyos ibabaw sa mga demonyo! Ang maong maayong taho sa pag-alagad tinong nakalipay kang Jesus, kay miingon siya: “Nakita ko na nga siJSatanas nahulog na samag liti gikan sa langit.” (Lucas 10:17, 18) Si Jesus nasayod nga si Satanas ug iyang mga demonyo sa kataposan igatambog gikan sa langit tapos sa pagkatawo sa Mesiyanikong Gingharian sa mga langit. Apan samtang si Jesus dinhi sa yuta, ang maong pagpalagpot sa dili makita nga mga demonyo pinaagi sa yanong mga tawo nagsilbing dugang pasalig alang kaniya sa maong umaabot makalipay nga hitabo. Busa gihisgotan ni Jesus kining umaabot nga pagkahulog ni Satanas gikan sa langit ingong piho.—Pinadayag 12:5, 7-10.
4. Unsa ang katuyoan sa buluhatong pag-ani nga gihimo ni Jesus ug sa iyang mga disipulo una pa sa Nisan 14, 33 K.P.?
4 Ang pag-ani nga gihisgotan ni Jesus dili pag-ani sa trigo o mga bunga sa kahoy kondili pag-ani sa mga tawo, karnerohong katawhan nga daling mosanong sa mensahe sa Gingharian. Nagkadayag na ang mga bunga sa maong pag-ani. Bisan pa niana, ang pag-aning gihimo ni Jesus ug sa iyang mga sumusunod niadtong pila ka nahibiling bulan una sa Nisan 14, 33 K.P., mao lamay pagpahamutang sa patukoranan alang sa labi pang dakong pag-ani tapos sapagkamatay ug pagkabanhaw ni Jesus.—Itandi ang Salmo 126:1, 2, 5, 6.
5. Unsang kulbahinam nga mga hitabo ang nahitabo sa Pentekostes, 33 K.P., ug sa unsang paagi naapektahan niadto ang buluhatong pag-ani nga misunod?
5 Panahon na niadto sa adlaw sa Pentekostes, 33 K.P. Mga 120 ka sumusunod ni Jesus nagtigom sa Jerusalem. “Sa kalit may miabot nga dahunog gikan sa langit ingon sa huros sa makusog nga hangin, ug kini mipuno sa tibuok balay diin sila didto nanaglingkod. . . . Ug silang tanan napuno sa balaang espiritu ug misugod sila sa pagsultig nagkalainlaing pinulongan, sumala sa ipasulti kanila sa espiritu.” Kadto ang sinugdanan sa katingalahang pag-ani! “Niadtong adlawa mga tulo ka libong kalag ang nahidugang.” (Buhat 1:15; 2:1-4, 41) “Sa sunodsunod nga adlaw sila nagpadayon sa pag-adto sa templo nga nagkahiusa, . . . nga nanagdayeg sa Diyos ug nakakaplag sa pag-uyon sa tanang tawo. Sa samang panahon si Jehova mipadayon sa pagdugang kanila sa adlaw-adlaw niadtong ginaluwas.” (Buhat 2:46, 47) Sa ulahi atong nasayran: “Ang mga magtutuo nagpadayong nadugangan, kapid-an nga mga lalaki ug mga babaye.” Sa ulahi pa gayod: “Ang pulong sa Diyos nagpadayon sa pagtubo, ug ang gidaghanon sa mga tinun-an nagpadayon sa pagdaghan sa Jerusalem; ug ang dakong panon sa mga saserdote nagsugod sa pagkamasinugtanon ngadto sa pagtuo.”—Buhat 5:14; 6:7.
6. Unsa ang epekto sa pagsupak ngadto sa buluhatong pagwali diha sa mga bunga sa Gingharian?
6 Ang pagsupak sa mensahe sa Gingharian sa maong panahon misamot. Nakapahinay ba kadto sa buluhatong pag-ani? Wala, kay “kadtong nahitibulaag sa yuta nagpadayon sa pagmantala sa maayong balita sa pulong.” Si Filipe miadto sa siyudad sa Samaria; ang mga panon nagpatalinghog kaniyang maikagon; ang mga gidemonyohan, ang mga paralitiko, ug ang mga bakol nangaayo tanan. Dili katingad-ang “may dakong kalipay sa maong siyudad.”—Buhat 8:1-8.
7. Sa unsang gidak-on ang sugo ni Jesus ngadto sa iyang mga disipulo sa Buhat 1:8 sa kataposan gituman?
7 Gisultihan sa nabanhawng Jesus ang iyang mga disipulo: “Kamo mao ang akong mga saksi sa Jerusalem ug sa tibuok Judea ug Samaria ug sa kinalay-ang bahin sa yuta.” (Buhat 1:8) Tungod sa labihang kadako sa uma nga pagaanihon gikinahanglan ang dugang mga mangangani—nga dinalian! Pagkatalagsaon ang ani nga gidahom sa mga disipulo! Ug kadto nagkahitabo na—ang tanan ilalom sa paggiya sa balaang espiritu sa Diyos. Tapos makabig ang mamumuno-ug-hunahunang si Saulo, kini ang giasoy alang kanato: “Unya, sa pagkamatuod, ang kongregasyon sa tibuok Judea ug Galilea ug Samaria misulod sa usa ka yugto sa kalinaw, nga gilig-on; ug samtang kadto milakaw diha sa kahadlok kang Jehova ug sa paglipay sa balaang espiritu kadto nagpadayong midaghan.” (Buhat 9:31) Samtang mikusog ang pag-ani sa mga karnerohon, tinong kadtong unang mga disipulo kanunay nakahinumdom sa mga pulong ni Jesus: “Hangyoa ang Agalon sa anihon sa pagpadalag mga mangangani ngadto sa iyang anihon.” Si Jehova, “ang Agalon sa anihon,” mitubag ba nianang ampoa? Siya mitubag gayod! Kay kon wala pa, sa unsang paagi kini mahitala: “Ang paglaom nianang maayong balita . . . gikawali sa tibuok kalalangan sa silong sa langit”?—Colosas 1:23.
Labi Pang Dinalian Karong Adlawa
8. Nganong sa katuigang 1980 ang panginahanglan labaw kay sukad masukad alang sa dugang mga magbubuhat sa Gingharian?
8 Karong adlawa, sa katuigang 1980, labi pang dako ang panginahanglan sa dugang mga mangangani. Ngano man? Kay labi pang dako ang uma sa kalibotan. Ingong sangpotanan, ang mga bunga nga pagaanihon ug pagatigomon labi pang daghan. Kini nahiuyon sa gitagna ni Jesus. Siya miingong buhaton sa iyang mga sumusunod ang dagko pang mga buhat kay sa iyang nabuhat dinhi sa yuta, kon bahin sa pagwali sa maayong balita.—Juan 14:12.
9. (a) Sa unsang paagi gipasiugda ang pagkadinalian sa buluhatong pagwali karong adlawa diha sa panan-awon ni Juan, nga gibatbat sa Pinadayag 7:1-3? (b) Unsang makahuloganong konklusyon ang mahimo gikan sa ekspresyong “unang mga bunga sa Diyos ug sa Kordero” sa Pinadayag 14:4?
9 Ang pagkadinalian sa buluhaton sa pagwali karong adlawa gipasiugda sa dramatikanhong kahimtang nga gibatbat diha sa panan-awon nga gihatag kang Juan, sumala sa nahitala sa Pinadayag kapitulo 7:1-3. Didto, “ang upat ka manulonda nagtindog sa upat ka suok sa yuta” nakit-ang “nagkupot nga hugot sa upat ka hangin sa yuta.” Unsa ka dugay ang ilang pagkupot sa maong “upat ka hangin”? ‘Hangtod lamang mapatikan ang mga ulipon sa atong Diyos diha sa ilang mga agtang.’ Unsa ka dugay kana? Ang usa ka timailhan gihatag sa kamatuorang sa pagsaulog sa Memoryal sa Abril 15, 1984, 9,081 na lamang ang nag-angkong mga membro sa 144,000. Ang mga dinihogan karong adlawa mao ang kataposang mga membro nianang gibatbat sa Pinadayag 14:4 ingong “gipalit gikan sa taliwala sa katawhan ingong unang mga bunga sa Diyos ug sa Kordero.” Busa mopatim-awng ang kadaghanan sa “unang mga bunga” natigom na. Apan ang pamulong bang “unang mga bunga” nagkahulogang adunay ubang mga bunga nga mosunod? Aw, siyempre! Kini gisimbolohan gayod sa dagayang mga bunga nga giani sa pagkatapos sa Hudiyonhong agrikultural nga tuig sa panahon sa Piyesta sa mga Balongbalong.—Deuteronomio 16:13-15.
10. Unsang duha ka pag-ani ang nagapadayon sa modernong panahon, ug sa unsang paagi kining kamatuorana nagapasiugda sa dinaliang panginahanglan sa dugang mga mangangani?
10 Busa matin-aw nga, samtang naghinapos ang pag-ani sa nahibilin sa mga dinihogan, nagsugod ang laing pag-ani. Dili ba kini gibanaag diha sa sunod nakita ni Juan diha sa panan-awon? “Tapos niining mga butanga nakita ko, ug tan-awa! usa ka dakong panon, nga walay tawo ang makaihap, gikan sa tanang nasod ug kabanayan ug mga katawhan ug mga pinulongan.” Gisultihan si Juan: “Kini sila mao ang nanggula sa dakong kasakitan.” (Pinadayag 7:9, 14) Diyutay na lamang panahon ang nahibilin sa pagtapos sa pagtigom sa “dakong panon.” Dihang buhian na kanang “upat ka hangin,” nga magpasidaan sa pagsugod sa “dakong kasakitan,” ulahi na unya kaayo! Dili ba nimo hisabtan ang dinaliang panginahanglan sa dugang mga mangangani aron tigomon ang kapid-ang kaplagon pa?
Kaliboan Karon Nagasanong
11. (a) Sa unsang gidak-on ang “ubang mga karnero” ni Jesus nagapakig-ambit sa pag-ani? (b) Unsay gipaila sa tumatambong sa 1984 nga Memoryal?
11 Gitagna ni Jesus kining pagpauswag sa iyang buluhatong pag-ani sa mga karnerohon sa miingon siya: “Ug ako adunay ubang karnero, nga wala niining torila; sila akong pagadad-on usab, ug sila magpatalinghog sa akong tingog, ug sila mahimong usa ka panon, usa ka magbalantay.” (Juan 10:14, 16) Aduna nay kapin sa 2,800,000 niining “ubang mga karnero” nga aktibong nagpaila nga sila sakop nianang “usa ka panon.” Sa maong gidaghanon, may 179,421 nga nabawtismohan sa tuig sa pag-alagad sa 1984! Bisan pa niana, ang tumatambong sa pagsaulog sa Memoryal maoy 7,416,974. Unsay ginapaila niini kanato? Nga may daghan pang nagpatalinghog sa tingog sa Magbalantay, apan tungod sa usa o laing hinungdan, sila wala pa mosanong ngadto sa mainitong pagdapit ni Jesus: “Sumunod ka kanako.”—Lucas 5:27.
12. Unsang hinungdanong mga pangutana ang angay natong ipangutana sa atong kaugalingon karon?
12 Diin ka ba nagabarog maylabot niining hinungdanong buluhatong pag-ani sa ‘kataposan niining sistema sa mga butang’? (Mateo 13:39) Naihap ka ba nga apil sa malipayong mga panon niadtong nagapakig-ambit karon sa mga kalipay sa pag-ani? O ikaw usa gihapon ka tumatan-aw, nga sa hunahuna makiling sa pagsibog sa dayag nga pagdawat sa pagdapit sa Maayong Magbalantay: “Sumunod ka kanako”? Tinong walay mausa karong adlawa ang buot mohimog mga pasangil sama niadtong tulo ka lalaki sa Lucas kapitulo 9, nga gihisgotan sa atong nag-unang artikulo. Hunahunaa kon unsay nasayloan niadtong tulo ka lalaki—ang kalipay sa pag-alagad sa Gingharian, apil lagmit ang pagpakig-ambit sa pagpahigawas sa pipila niadtong gidemonyohan!—Lucas 9:57-62; 10:17.
13. Sa unsang paagi ang pagtuo may hinungdanong bahin sa imong pagkahimong andam nga mangangani?
13 Si apostol Pablo miingon: “Kon walay pagtuo dili mahimo ang pagpahimuot sa [Diyos] nga maayo.” (Hebreohanon 11:6) Ay, oo, kinahanglan ang pagtuo sa bahin sa tanan aron ipadaplin ang kaugalingong interes ug kinabubut-ong ipahinungod ang kinabuhi sa usa ngadto sa Diyos ingong usa ka mangangani. Pananglitan, ikaw tingali may grabeng suliran sa panglawas; tingali ang pila ka membro sa inyong pamilya supak kaayo sa mga Saksi ni Jehova; tingali mobati kang tigulang na kaayo aron himoon ang gikinahanglang kausaban sa imong kinabuhi; sa laing bahin, basin giisip nimo nga ikaw dili makaagwanta sa pagpit-os sa isigkaingon nga imong masinati sa eskuylahan. Bisan unsa ang imong kahimtang, ayaw gayod hikalimting si Jehova nakasabot pag-ayo sa imong mga suliran kay ni bisan kinsa pa. Usab, andam siyang mosuod kanimo ug molig-on sa imong hukom sa pag-alagad kaniya kon imo lamang himoon ang gikinahanglang mga lakang sa imong kaugalingon.—Salmo 103:13, 14; Santiago 4:8.
Pagtuo Magabalhin sa ‘mga Bukid’
14. Ipatin-aw kon unsay gipasabot ni Jesus sa iyang mga pulong nga nahitala sa Mateo 17:20.
14 Si Jesus miingon: “Kon ikaw adunay pagtuo nga sama ka dako sa liso sa mustasa, ikaw magaingon niining bukira, ‘Balhin dinhi ngadto didto,’ ug kini mobalhin, ug walay butang dili mahimo alang kanimo.” Kini ang personal nga kasinatian sa daghan niadtong ginatos ka libong misanong sa panawag sa dugang mga mangangani sa katuigang 1980. Ang personal nga mga suliran ug mga kalisod nga mipatim-awng samag bukid alang kanila sa usa ka panahon nabuntog sa tabang ni Jehova. (Mateo 17:20;19:26) Palandonga ang mosunod nga mga kasinatian:
15, 16. Isaysay sa unsang paagi ang usa ka batan-ong lalaki sa Tinipong Bansa ug sa usa ka Katolikong bana sa Brazil nagbuntog sa dagkong mga sulirang nagbabag sa ilang bawtismo.
15 Usa ka batan-ong lalaki sa California, T.B.A., nabiktima sa polio, nga grabeng nabaldado ug gipasagdan intawon sa iyang pamilya. Unya nakaplagan siya sa usa sa mga Saksi ni Jehova. Nasugdan ang usa ka pagtuon sa Bibliya. Apan siya maulawon kaayo nga sa pag-abot sa Saksi aron dumalahon kana, iyang paligiron ang iyang silya ngadto sa usa ka suok sa kuwarto ug moatubang sa bungbong aron dili hikit-an ang iyang nawong. Gidangtag pila ka bulan nga nabuntog sa maong batan-ong lalaki ang pipila sa iyang mga suliran. Apan, kana iyang nabuntog ug karon siya usa ka malipayon, bawtismadong Saksi.
16 Ang usa ka magtiayong Katoliko sa Brazil nadiskontento sa ilang relihiyon ug sa kataposan misugod sa pagtuon sa Bibliya uban sa mga Saksi ni Jehova. Gibati nilang ang ilang espirituwal nga mga panginahanglan sa maong panahon gitagbaw, apan may usa ka dako, daw-bukid nga suliran: Ang bana, si Antonio hinabako kaayo. Siya nagtabako sulod sa 48 anyos, sukad siya siyete anyos! Latas sa katuigan misulay siya sa paghunong sa bisyo apan wala molampos. Ugaling, sa maong panahon kadto lahi, sumala sa giasoy ni Antonio: “Karon ako nahibalo nga aron pahimut-an ang Diyos ug ipahinungod ko ang akong kaugalingon sa pagbuhat sa iyang kabubut-on, kinahanglang mohunong ako. Tapos sa daghang pag-ampo, siya sa kataposan nakahunong.” Pagkadako sa iyang kalipay nga siya nakapasimbolo sa iyang pahinungod kang Jehova pinaagi sa bawtismo sa tubig!—Salmo 66:19; Marcos 11:24.
17. (a) Unsang daotang impluwensiya ang nahibalag ni Jesus ug sa iyang mga disipulo nga labi pang kusganon kay sukad masukad karong adlawa? (b) Unsay gihimo ni Jesus ug sa iyang mga disipulo sa mga gidemonyohan sa unang siglo, ug unsaon kini pag-atubang karon?
17 Ang gidemonyohang mga Hudiyo maoy usa ka sulirang kanunayng nahibalag ni Jesus ug sa iyang mga disipulo. Ang samang daotang mga impluwensiya nagalihok karong adlawa, ilabina karong si Satanas ug ang iyang mga demonyo gikatambog na gikan sa langit nganhi niining yutaa. (Pinadayag 12:7-9, 12, 17) Lahi sa Kristiyanidad sa bag-o pa kini, si Jehova wala maghatag sa iyang katawhan karong adlawa sa milagrosong mga gahom sa pagpapahawa sa mga demonyo. Bisan pa niana, ang espirituwal nga armadura nga iyang gitagana alang sa mga Kristohanon makasilbing panalipod batok sa impluwensiya sa demonyo, ug kini magamit usab nga galamiton sa pagpahigawas sa uban gikan sa gahom sa demonyo. (Efeso 6:10-18) Gikan sa Ghana kining tahoa miabot: “Pinaagi sa determinadong paningkamot sa mga igsoon, daghan ang ginapagawas gikan sa gahom sa mga demonyo.” Usa ka Saksi nakahibalag sa usa ka babaye sa pagsangyaw, ug sa misugod ang panaghisgot sa Bibliya, “ang babaye misugod sa paghilak.” Unsa ang suliran? Ang Saksi miasoy: ‘Gidemonyohan siya, ug kon kini moatake kaniya, siya makahilak, ug ang bisan pilang kuwarta nga naa kaniya mawala.’ Ang regular nga pagtuon sa Bibliya nakatabang kaniya sa pagkagawas sa maong pagsamok sa demonyo, nga niana siya nakapahinungod sa iyang kaugalingon kang Jehova.—Juan 8:32.
18. Unsang kasinatian ang nagailustrar nga ang mga manulonda aktibo sa pagtultol sa buluhatong pagwali?
18 Ang mga sulirang sama sa gibatbat sa ibabaw basin mahimong dako kaayo diha sa hunahuna sa usa ka tawo nga makapalandong siya sa paghikog. Tagda ang kaso sa usa ka batan-ong babaye sa New Zealand. Ang Saksing unang miduaw kaniya nakamatikod nga siya “emosyonal kaayo ug dayag may gikabalak-an.” Sa ulahi ang maong babaye miangkong “siya hapit nang maghikog ug mihukom sa pag-ampo una sa Diyos aron mangayo sa iyang tabang.” Sa maong gutlo ang Saksi mituktok sa iyang pultahan, mao nga siya “nagpasalamat gayod sa Diyos tungod sa pagtubag sa iyang pag-ampo.” Kadto ba nagkaatol lamang? Nan nganong mahitabo nga subsob ang susamang mga butang? Unsay giingon ni Jesus? “Inig-abot sa Anak sa tawo sa iyang himaya, ug ang tanang manulonda uban kaniya, . . . iyang pagabulagbulagon ang katawhan gikan sa usag usa maingon sa pagbulagbulag sa usa ka magbalantay sa mga karnero gikan sa mga kanding.” (Mateo 25:31, 32; tan-awa usab ang Pinadayag 14:6.) Ang mga manulonda nagatabang kang Jesus sa buluhaton sa pagka-magbalantay, ug sila nagatultol sa “kaubang mga magbubuhat” sa Agalon ngadto niadtong nagatuwaw ngadto Kaniya alang sa tabang.—1 Corinto 3:6, 9; tan-awa usab ang Buhat 8:26-39; 16:9, 10.
19. Unsang tibuok-kalibotang kahimtang ang nagalungtad karong adlawa, nga nagkinahanglan sa unsang lihok sa atong bahin?
19 Karong adlawa, bisan diin kita magapuyo, adunay kaliboang katawhan nga nabug-atan ug nagsubo tungod sa samang mga suliran nga nabuntog sa daghan sa katawhan ni Jehova. Ang pipila kanila tingali nagapuyo sa sunod nga ganghaan! Sila nagkinahanglan gayod sa tabang. Sa pagkamatuod, sumala sa giingon ni Jesus: “Ang anihon, sa pagkamatuod, dako.” Kita nagahangyo sa Agalon sa anihon karon nga magpadalag dugang mga mangangani ngadto sa iyang anihon sulod sa tuig 1986. Hinaot ang imong kasingkasing magdasig kanimo sa pagtubag sa panawag: Gikinahanglan Pag-ayo—Dugang mga Mangangani!
[Mga Pangutana sa Pagsubli]
□ Kinsa ang Agalon sa anihon?
□ Unsang duha ka pag-ani ang nagapadayon?
□ Unsa ang dagko pang mga buluhaton nga giingon ni Jesus nga buhaton sa iyang mga sumusunod?
□ Nganong ang pagtuo gikinahanglan sa tanang mangangani?