Pagpakitag Apresasyon Alang sa Duha ka Kinadak-ang mga Kapahayagan sa Gugma
“Maylabot kanato, kita, nahigugma, tungod kay siya mao man ang unang nahigugma kanato.”—1 JUAN 4:19.
SA UNSANG paagi atong ikapakitag maayo ang atong apresasyon alang sa dakong gugma nga gipakita ni Jehova nga Diyos ug ni Jesu-Kristo kanato? Ang pangunang paagi mao ang pagsundog kang Jesus, kinsa makugihong nagmantala sa ngalan ug sa Gingharian sa iyang Amahan. (1 Pedro 2:21) Iyang gihimo kini diha sa mga kabalayan, sa mga sinagoga, sa mga templo, sa mga kabukiran, ug sa kabaybayonan. Atong tagdon ang siyam ka lahi nga mga paagi nga tingali bukas alang kanato.
Ang Kalihokan sa Pagpamalaybalay
2. Sa unsang paagi makalahutay ka sa buluhatong pagpamalaybalay?
2 Ang una, ug tingali ang labing lahi, nga paagi diin ikapakita nato ang atong gugma ug apresasyon mao ang pagpamalaybalay uban ang maayong balita sa Gingharian sa Diyos. Ang pagbuhat niini nagkinahanglag tinuod nga kagawasan sa pagsulti tungod kay nalangkit kanunay niini ang pag-atubang sa uban, diin ang kadaghanan kanila naglantaw kanato nga samokan. Kini nagkinahanglag tinuod nga gugma alang sa Diyos ug sa silingan aron makapadayon sa pag-adto sa pultahan ug pultahan, bisan pag makaatubang kita ug pagkawalay pagtagad, kapikal, pagbiaybiay, o direktang pagsupak.—Itandi sa Ezekiel 3:7-9.
3. Unsay imong Kasulatanhong basehanan sa kalihokang pagpamalaybalay?
3 Ang rekord sa Ebanghelyo sa instruksiyon ni Jesus ngadto sa iyang 12 ka apostoles, ug sa ulahi sa 70 ka ebanghelisador, tin-awng nagpakita nga sila kinahanglang magpamalaybalay sa pagsangyaw sa maayong balita sa Gingharian sa Diyos. (Mateo 10:5-14; Lucas 10:1-7) Diha sa Buhat 20:20 nag-asoy si Pablo bahin sa iyang pagpamalaybalay. Kadtong mga pulonga giaplikar sa iyang mga pagduaw isip magbalantay, apan ang bersikulo 21 dayag nga nagpakita sa kahulogan sa buluhaton, kay si Pablo midugang: “Bug-os akong nagpamatuod sa mga Hudiyo ug sa mga Grego”—dili sa Kristohanong mga igsoong lalaki ug babaye—“mahitungod sa paghinulsol ngadto sa Diyos ug sa pagtuo diha sa atong Ginoong Jesus.” Dihang maghimog mga pagduaw isip magbalantay, ang ansiano sa kasagaran dili mag-awhag ug ‘paghinulsol ngadto sa Diyos ug sa pagtuo diha kang Jesus.’ Hinunoa, iyang dasigon ang isigka-Kristohanon sa pagpadako sa ilang pagpabili sa mga tigom o diha sa mga ministeryo, o sa pagtabang kanila sa personal nga mga suliran.
4. Unsay makapadasig kanato sa pakigbahin sa pagsangyaw sa balay ug balay?
4 Dili lamang adunay makataronganong basehanan sa Kasulatan sa atong pagpamalaybalay kondili ang mga bunga nianang buluhatona nagpakita sa panalangin ni Jehova diha niana. Oo, “ang kaalam ginamatarong pinaagi sa mga binuhatan niini.” (Mateo 11:19) Sa masubsob, kadtong namalaybalay nakakita sa ebidensiya sa pagtultol sa manulonda nga nagaagak kanila ngadto sa mga gigutom ug giuhaw sa pagkamatarong. Ang tagbalay nag-ingon nga siya nag-ampo ug panabang ug ang pagduaw sa Saksi ang nakatubag nianang pag-ampoa.
5. Unsa ang atong nabatonang maayong tabang alang sa atong ministeryo sa pagpamalaybalay, ug unsang nagkalainlaing mga paagi nga kini makatabang kanato?
5 Pagkadakong tabang alang sa pag-alagad sa kanataran kanato kanang librong Reasoning From the Scriptures! Kini nasudlan ug daghang makaikag nga mga introduksiyon sa panaghisgot sa Bibliya maingon man sa mapuslanong impormasyon mahitungod sa daghang Kasulatanhon ug relihiyosong mga tema. Busa dili lamang magdala niini kondili padayong gamiton kini. Ang mga payunir ilabina nakapahayag ug dakong pagpabili niining bililhong tabang sa pag-alagad sa kanataran. Makapakita ka ba sa imong apresasyon sa gugma sa Diyos pinaagi sa bug-os nga paggamit niining libroha, ug sa mas epektibong paagi?
6. Unsay atong makuhang kaayohan sa pag-adto sa balay ug balay uban sa balita sa Gingharian?
6 Dili nato kalimtan ang kamatuoran nga kita mismo ang makabenepisyog dako sa pagpakigbahin sa pagpamalaybalay. Dihang kita nga mga Kristohanon molihok sa atong pagtuo, mas molig-on kini; dihang mosulti kita uban ang pagtuo, kini mapabaskog. Dili kita makasulti sa uban mahitungod sa atong paglaom kon dili mahimong mas masanag ang atong paglaom. Walay sama nianang pakigbahin sa regular sa pagpamalaybalay nga ministeryo aron mapalambo ang mga bunga sa espiritu nga gihisgotan diha sa Galacia 5:22, 23. Kinahanglang ingon gayod nianang paagiha, kay ang Bibliya nagpasalig kanato: “Ang mahinatagong tawo magmauswagon; siya nga nagapalagsik sa uban mapalagsik usab sa kaugalingon.”—Proverbio 11:25, New International Version.
Paghimog mga Pagbalik Duaw
7, 8. Alang sa unsang makataronganon ug praktikal nga mga rason nga kinahanglang maghimo kitag mga pagbalik duaw?
7 Ang ikaduhang paagi aron makabalos kita sa gugma nga gipakita sa Diyos ug ni Kristo kanato mao ang paghimog mga pagbalik duaw sa mga tawo nga nagpakita sa miagi ug kaikag sa balita sa Gingharian. Matinagdanon si Pablo ug Barnabas niadtong ilang giwalihan. (Buhat 15:36) Sa pagkatinuod, ang pagkamapinadayonon nagkinahanglan nga maghimo usab kitag mga pagbalik duaw. Samtang nagasangyaw sa pultahan ug pultahan, sa dili-pormal nga paagi, o diha sa mga dalan, kita nagapangita niadtong “mahunahunaon sa ilang espirituwal nga mga panginahanglan.” (Mateo 5:3) Sa dayag, ang paghatag kanila, pagaingon pa, ug usa ka basong espirituwal nga tubig o usa ka espirituwal nga tinapay dili pa igo. Aron sila makalakaw sa dalan paingon sa kinabuhi, sila nagkinahanglag dugang tabang.
8 Ang atong unang mga paningkamot mahimong ipakasama sa pagtanom ug mga binhi sa kamatuoran. Apan gipakita ni apostol Pablo diha sa 1 Corinto 3:6, 7, nga dugang pa ang gikinahanglan. Kulang pa ang iyang pagpananom. Ang binhi kinahanglang tubigan, sama sa gihimo ni Apolo. Unya malaoman nga patuboon kini sa Diyos. Kining bahina sa buluhaton gipasagdan sa uban, apan giisip kini sa kadaghanan nga mao ang labing masayong bahin sa Kristohanong ministeryo. Ngano? Tungod kay ang mga tawo nga atong duawon nagpakita na ug interes.
Pagdumala sa mga Pagtuon sa Bibliya sa Balay
9. Nganong kinahanglang imong himoong tumong ang pagdumalag pagtuon sa Bibliya sa balay?
9 Kon maghimog mga pagbalik duaw sa mga tawo nga nagpakitag kaikag sa balita sa Gingharian, ang resulta sa kasagaran maoy pagtuon sa Bibliya—ang ikatulong paagi nga atong ikapasundayag ang atong apresasyon. Tinuod nga mahimo kining labing makalipay ug labing magantihong bahin sa atong ministeryo. Ngano? Buweno, pagkadakong kalipay ang pagtan-aw sa mga tawo nga motubo diha sa kahibalo ug pagpabili sa mga kamatuoran sa Bibliya, sa pagtan-aw kanila nga nagahimog mga kausaban sa ilang mga kinabuhi, ug sa pagtabang kanila hangtod nga magpahinungod sila sa pagbuhat sa kabubut-on sa Diyos ug mabawtismohan! Kini sila tinuod nga malantaw nga atong espirituwal nga mga anak ug kita ingong ilang espirituwal nga mga ginikanan.—Itandi sa 1 Corinto 4:14, 15; 1 Pedro 5:13.
10. Unsang malarawanong pananglitan ang nagpakita sa bili sa pagdumalag mga pagtuon sa Bibliya sa balay?
10 Tagda ang mahulagwayong pananglitan. Usa ka misyonero nga nagpamalaybalay diha sa isla sa Caribbeano nakahibalag ug magtiayong hippie nga may mahugaw ug nagkalamukat nga balay. Apan nagpakita silag interes. Napahiluna ang basahon alang sa pagtuon sa Bibliya, ug nasugdan ang pagtuon sa Bibliya sa balay uban sa magtiayon, nga dili kasado apan daghan silag mga anak. Dihang miuswag ang pagtuon sa Bibliya, ang balay misugod nga nahimong mas presentable ug mao man ang magtiayon ug ang ilang mga anak. Wala magdugay mihangyo ang magtiayon sa misyonero sa pagkasal kanila, nga nakabukas sa dalan sa ilang pagpabawtismo. Dayon usa ka adlaw malipayong gipakita sa bag-ong igsoon ang iyang lisensiya sa pagmaneho, ang una nga iyang nabatonan. Oo, sa wala pa siya nahimong usa sa mga Saksi ni Jehova, wala niya makita ang panginahanglan sa pagkuhag lisensiya sa pagpakasal o lisensiya sa pagmaneho, apan karon gisunod na niya ang mga balaod sa Diyos ug ni cesar.
Pagsangyaw sa Kadalanan
11, 12. (a) Unsay atong Kasulatanhong pagpadasig sa pakigbahin sa pagsangyaw sa kadalanan? (b) Unsay atong mga katarongan sa atong pagbuhat niini?
11 Ang ikaupat nga paagi nga atong ikapakita ang atong apresasyon sa nahimo sa Diyos ug ni Kristo kanato mao ang pagsangyaw sa kadalanan. Dihang makigbahin kita, kita nakatabang nga matuman ang Proverbio 1:20, 21 sa literal nga paagi: “Ang tinuod nga kaalam nagasinggit sa makusog sa kadalanan. Diha sa mga dapit nga hugopanan sa katilingban siya nagapagula sa iyang mga tingog. Siya sa pikas tumoy sa masaba nga mga dalan siya nagasiyaggit.”
12 Adunay daghan kaayong maayong mga katarongan nga makigbahin kita sa regular niining bahina sa pagsangyaw sa Gingharian. Diha sa daghang mga dapit, nagakalisod ang pagkaplag ug mga tawo diha sa balay. Tingali naglingawlingaw sila, namalit, o nagtrabaho. Dugang pa, nagpuyo ang kadaghanang mga tawo sa ekslusibong mga apartment o mga condominium, bisag dili na hisgotan pa kadtong nagpuyo sa mga otel. Apan sa kasagaran adunay mga tawong makita diha sa mga dalan.
13. Unsay lagmit moresulta sa atong pagsangyaw sa kadalanan? Iilustrar.
13 Usa ka ansiano sa Tinipong Bansa nagdumala ug upat ka pagtuon sa Bibliya uban sa upat ka indibiduwal nga iyang unang nahimamat diha sa buluhaton sa pagsangyaw sa dalan. Sa pagkatinuod, wala lamang siya magtindog nga walay tingog-tingog (apan sa ubang mga yuta mao ra kanay itugot sa balaod). Hinunoa, uban sa mahigalaong pahiyom ug masadyaong tuno sa tingog, iyang duolon ang mga tawo nga nagbarog, naghulat ug sakyanan, o nagpopasiyo lamang. Ang iyang ‘sinultihan madanihon, tinimplahan ug asin,’ ug migamit siyag kaalam kon unsaon niya pagduol ang matag usa. (Colosas 4:5, 6; 1 Pedro 3:15) Dili lamang nakakita siyag upat ka pagtuon sa Bibliya pinaagi sa maong pagsangyaw sa dalan kondili siya malamposon usab kaayo sa pagpahimutang ug daghang basahon. Oo, pinaagi sa mahinlong pamostura ug sa pagpakitag mahigalaong pahiyom uban ang kagawasan sa pagsulti, mahimo kang epektibo kaayo diha sa pagsangyaw sa dalan. Sa pagkatinuod, lima ka Saksi dili pa dugay nakapahimutang ug kapin sa 30 ka kopya sa librong Life—How Did It Get Here? By Evolution or by Creation? diha sa mga tindahan. Ug daghang mga libro ang napahamutang diha sa mga tawong nanaglingkod sa ilang mga awto.
Dili-pormal nga Pagsangyaw
14. Sa unsang paagi makita ang bili sa dili-pormal nga pagsangyaw?
14 Ang ikalimang paagi aron atong ikapasundayag ang apresasyon sa dakong gugma sa Diyos ug ni Kristo nga gipakita kanato mao ang pagsangyaw sa dili-pormal nga paagi. Kasagarang epektibo kaayo niini, sa pagkaplag ug mga tawo nga gigutom ug giuhaw sa pagkamatarong ug sa pagpahilunag basahon! Dayag nga usa kini ka paagi nga atong gipatalinghogan ang tambag nga makita diha sa Efeso 5:15, 16, ‘sa pagpalit sa higayon alang sa atong kaugalingon.’ Usa ka misyonero nakasugod ug pagsultihay sa usa ka kaubang pasahero diha sa taksi. Nagpakitag interes ang tawo. Gihimo ang mga pagbalik duaw ug gisugdan ang pagtuon sa Bibliya. Karon kadtong tawhana usa na ka Kristohanong ansiano. Sa laing dapit nakasugod ug pagsultihay ang usa ka ansiano sa babaye kinsa, nagbag-o sa iyang relihiyon aron makaminyo ug Hudiyo. Gusto siyang masayod kon kinsay mitungha ug una, si Moises, Noe, David, ug uban pa. Iyang gisultihan ang babaye nga ang iyang gikinahanglan mao ang librong Estorya sa Bibliya, nga nagpadayag sa mga hitabo sa Bibliya sumala sa kronolohikal nga pagkahan-ay. Bisag estranghero siya alang sa babaye, gihatag dayon sa babaye ang iyang ngalan ug direksiyon ngadto kaniya ug sa kontribusyon aron iyang ikapadala pinaagi sa koreyo ang libro ngadto sa babaye.
15. Unsay makatabang kanato sa pagkahimong alisto sa mga higayon alang sa dili-pormal nga pagsangyaw?
15 Usahay, sa kahadlok nga dili kita tagdon, tingali magpanuko kita sa pagpakigsulti sa tawo nga nagabiyahi tapad kanato. Apan, daghan nang higayon nga kita tugob nga gigantihan kon mangisog kita sa paghimo niini! Ang apresasyon sa pagkamaayo sa Diyos ug ang panginahanglan sa tawo makatabang kanato sa pagbaton sa gikinahangang kaisog. Oo, hinumdomi nga ang “Diyos wala maghatag kanato ug espiritu sa katalaw, kondili espiritu sa gahom, ug gugma ug pagpugong sa kaugalingon.”—2 Timoteo 1:7, NIV.
Pag-abiabig mga Estranghero
16. Nganong kinahanglang alisto kita sa pagtagad sa mga estranghero nga moduaw sa atong Kingdom Hall?
16 Ang ikaunom nga paagi nga kita makapakita sa atong utang-kabubut-on sa Diyos ug kang Kristo mao ang pag-abiabi sa mga estrangherong motungha sa atong Kingdom Hall. Ang gugma alang sa silingan maoy mopaalisto kanato sa pagmatikod sa tanang mga estranghero nga moduaw sa atong dapit sa pagsimba. Maningkamot kita sa pagpabati kanilang haruhay, sa pagpabati nga siya anaa taliwala sa mga higala nga kinasingkasing maikagon sa iyang espirituwal nga kaayohan. Lagmit, labaw sa pagkamausisaon ang nakadala kanila didto. Basin ug tinuod siya nga gigutom ug giuhaw sa pagkamatarong. Ang atong tinuod nga pagpakitag kabalaka kaniya hayan moresulta sa atong pagsugod ug pagtuon sa Bibliya, tabangan siya sa dalan paingon sa kinabuhi. (Mateo 5:3, 6; 7:3, 14) Sa pagkatinuod, nahitabo kini sa makadaghan na. Usa ka misyonero sa unang klase sa Watchtower Bible School of Gilead nakamatikod nga ang iyang duha ka labing maayong mga estudyante sa Bibliya mao kadtong una niyang nahibalag diha sa Kingdom Hall.
Pagsangyaw Pinaagi sa Pagsulat
17. Unsay lagmit moresulta sa pagsangyaw pinaagi sa sulat?
17 Ang ikapitong paagi aron kita makapamatuod, sa pagbalos sa gugma sa Diyos ug kang Kristo nga gipakita kanato, mao ang pagsulat, kadtong migamit niining pormaha sa pagsangyaw sagad nakadawat ug mapabilhong mga tubag sa sulat. Kini maoy paagi nga gigamit sa ubang bug-os-panahong mga ministro nga dili makahimo sa temporaryo sa pagpamalaybalay tungod sa pisikal nga balatian. Pananglitan: Dihay pamilya nga adunay 12 ka anak. Usa ka adlaw miabot ang amahan sa balay nga nakakita nga lima sa iyang mga anak giposil sa usa sa nangulitawo sa iyang anak nga dalaga. Sa walay kapuslanan nangita siyag paglipay gikan sa mga klero sa Kakristiyanohan. Dayon usa ka adlaw nakadawat siyag sulat gikan sa usa ka estranghero, usa ka Saksi nga nakabasa sa balita mahitungod sa nahitabo kaniya ug nagtinguha sa paglipay kaniya, nga gisukip ang librong Kamatuoran. Mao kini ang gipangita sa tawo. Siya karon, maoy usa na ka madasigong Saksi.a
Pagtawag sa Telepono
18, 19. Unsang ubang mga natad sa pagsangyaw sa maayong balita nga nakitang epektibo sa uban, ug ngano?
18 Sa paghisgot sa ikawalong paagi sa pagpamatuod, adunay higayong magamit ang telepono sa pagsangyaw sa maayong balita sa Gingharian. Kini dugang nga napamatud-an nga maayo ug epektibong porma sa pagsangyaw. Dugang ug dugang mga Saksi nahimong hanas na niining bahina sa ministeryo, nga daghan ang ikasugyot bahin niana. Pinaagi niini atong maabot ang ubang mga tawo nga dili mahibalag diha sa pagpamalaybalay. Kon maalamong gamiton ang pagsangyaw pinaagi sa telepono, uban sa kalulot, ug taktika, ug kahanas, nakita sa uban nga maayo ang pagsanong kay sa pagduaw niining mga tawhana sa ilang mga balay.
19 Usa ka kongregasyong Hapones diha sa nasod nga Iningles ang sinultihan migamit ug libro sa telepono ingong bahin sa teritoryo niini. Tawgon sa mga magmamantala ang mga ngalang Hapones ug maghikay sa paghimog personal nga pagduaw kon may makitang interes. Sila nakasugod sa aktuwal ug dinosenang mga pagtuon niining paagiha.
Pagsangyaw Pinaagi sa Maayong Paggawi
20, 21. Unsa ang posibleng maayong mga epekto sa atong paggawi? Iilustrar.
20 Ang ikasiyam nga paagi nga makahatag kitag pagdayeg sa Diyos mao ang atong maayong paggawi. Ang usa ka Russong magsusulat mipahayag kas-a nga ang atong maayong paggawi mao ang atong labing maayong sermon. Sa pagkatinuod, masubsob nga ang prensa mikomento mahitungod sa hataas nga moralidad sa mga Saksi ni Jehova. Ang usa mitaho: “Ang mga Saksi ni Jehova nailhan nga mao ang labing matinud-anong mga tawo diha sa Pederal nga Republika sa Alemanya.” Sa sinugdanan sa semestre sa pagtungha , usa ka batan-ong babayeng Saksi nagdalag pulyetong School sa iyang magtutudlo. Wala niya kini dawata, ug miingon nga dili siya gustong mangilabot sa mga Saksi. Apan, sa ulahi nakadayeg pag-ayo ang magtutudlo sa iyang paggawi nga bug-os nakabag-o sa iyang tinamdan sa mga Saksi. Ang susama niini mao ang sulat nga nadawat sa mga ginikanang Saksi gikan sa magtutudlo sa ilang mga anak: “Ang dili-ikalimod nga kalamposan sa inyong pagtuo mao ang inyong mga anak.”
21 Ang mga tawo sa kalibotan walay masulting maayo mahitungod sa mga Saksi ni Jehova nga walay paghatag pasidungog sa Diyos ug kang Kristo. Tinuod kini. Wala ba mag-ingon si Jesus nga kinahanglang atong ipasidlak ang atong kahayag aron ang mga tawo makakita sa atong maayong mga buhat ug makahimaya sa atong langitnong Amahan? (Mateo 5:16) Sa pagkatinuod, pinaagi sa atong maayong paggawi, kita makapasidungog sa kamatuoran. (Tito 2:10) Siyempre, ang kamatuoran nga makahatag ang atong maayong paggawi ug kadayegan sa Diyos ug kang Kristo ug makatabang sa uban paingon sa dalan sa kinabuhi maoy gamhanong katarongan sa atong dulot nga pagkabalaka nga ang atong paggawi sa tanang panahon dili masaway.
22. Unsang mga paagiha sa pagpakitag apresasyon ang imong paningkamotan, ug ngano?
22 Sumala na sa atong nakita, adunay daghang mga paagi diin makapasundayag kita sa atong apresasyon sa tanang nahimo ni Jehova ug ni Jesu-Kristo alang kanato, ilabina sa ilang kinadak-ang mga kapahayagan sa gugma. Sa ingon, kita makapamatuod sa atong gugma sa silingan.—Marcos 12:30, 31.
23. Unsang kataposang paagi nga imong ikapakita ang apresasyon ngadto sa Diyos ug kang Jesus?
23 Sa kataposan, atong matikdan nga kita makapakita sa atong apresasyon alang sa duha ka labing kinadak-ang mga kapahayagan sa gugma pinaagi sa pagsaulog sa Panihapon sa Ginoo. Diha sa iyang kataposang gabii sa yuta ingong tawo, gisugdan ni Jesus ang tuig-tuig nga halandomong panihapon sa tinapay ug bino, nga naghawas sa iyang unod ug sa iyang dugo. Iyang gisugo nga himoon kini nga kasaulogan sa paghandom kaniya. (1 Corinto 11:23-26) Karong tuiga ang Panihapon sa Ginoo mahulog sa Dominggo, Abril 12, tapos sa pagsalop sa adlaw. Sa tibuok yuta, ang mga Saksi ni Jehova magtigom sa pagsunod sa sugo ni Jesus. Ayaw pagsipyata kana!
[Mga footnote]
a Alang sa mga detalye, tan-awa ang Awake! October 22, 1986, panid 12-16.
Mga Pangutana Agig Repaso
◻ Sa unsang paagi ug diin nagpamatuod si Jesus?
◻ Sa unsang mga paagi atong masundog si Jesus sa pagpakitag apresasyon sa dakong gugma sa Diyos?
1. Unsang panig-ingnan ang gihatag ni Jesus alang kanato?