Usa ka Adlaw sa Calcutta Pag-abot sa “Mga Tawo sa Tanang Matang” Uban ang Maayong Balita

ANG Calcutta, India, maoy ka siyudad nga puno sa “mga tawo sa tanang matang.” Taliwala sa kapin sa diyes milyones ka pumoluyo niini, okupado ang mga Saksi ni Jehova sa pagmantala sa maayong balita sa Gingharian. Kinahanglan ang kaabtik ug pagkamalahutayon aron maabot kining mga tawhana nga may nagkalainlaing rasanhon, sosyal, kultural, relihiyoso, ug ekonomikanhong gigikanan. Apan sama sa Kristohanong apostol Pablo, diin nadala siya sa iyang misyonerong mga panaw ngadto sa halayong nga suok sa kalibotan niadtong panahona, ang mga Saksi ni Jehova sa Calcutta usab “nahimong tanang mga butang ngadto sa tanang matang sa mga tawo” aron ilang “maluwas sa bisan unsang paagi ang pipila kanila.”​—1 Corinto 9:22; Colosas 1:23.

Sa unsang paagi gihimo sa mga Saksi didto ang ilang buluhatong pagsangyaw, ug unsang matanga sa mga tawo ug kahimtang ang ilang matagbo diha sa ilang ministeryo? Dili pa dugay, ingong usa ka bisita, nakagugol akog usa ka adlaw sa Calcutta uban sa usa ka payunir, kun bug-os panahong magmamantala. Buot ka bang motan-aw nianang tagsaong kasinatian?

Usa ka Dako ug Nagkadaiyang Natad

Sa hapon niadtong okupado ug makawiwiling adlaw sa pagsangyaw sa balay ug balay, ako ug ang akong kauban taliuli na. Samtang naghulat kamig sakyanan, nag-estoryahay kami bahin sa mga hagit nga iyang naatubang ug sa ubang mga payunir niining dako kaayong siyudad.

“Aw,” siya miingon, “pangutan-a lang ang tanang bug-os panahong magmamantala dinhi kon gusto ba siyang mobalhin ug mas masayon nga asaynment. Nagtuo ako nga dili kaayo sila maikag niana.”

Husto siya. Gilantaw sa mga payunir sa Calcutta ang ilang buluhaton ingong usa sa labing makawiwiling karera sa kalibotan. Sila adunay dako ug nagkadaiyang natad niining siyudad nga daghag kalainan.

Bisag nangibabaw ang relihiyong Hindu sa siyudad, daghan kaayo ang mga simbahan ug mga moske sa Muslim, ug makakaplag kag nagkatagkatag nga mga templo sa mga Buddhista. Diha sa ubang seksiyon sa maong dapit, mao ang mga balay sa pipila sa labing adunahang mga tawo sa kalibotan diha sa dagkong mga mansiyon. Dili layo mao ang naghirig nga mga balongbalong sa lalin nga mga trabahante nga may kinitaan nga ingon ka ubos sa 150 ka rupee (mga $12, U.S.) sa usa ka bulan. Ang ilang mga kustombre, pinulongan, ug panagway, nagkadaiya sama sa ilang mga relihiyon ug ilang kahimtang sa pagpuyo.

Taliwala niining tanan adunay usa ka malamboong kongregasyon sa mga Saksi ni Jehova nga may duolan sa usa ka gatos ka aktibong mga magmamantala sa Gingharian. Bisag lisod dag-on ang hagit, nakita sa mga Saksi ang tagsaong kalipay ug katagbawan sa ilang pagpaangay aron makatubag sa panginahanglan sa mga tawo.

Niadtong gutloa, mihunong ang Bus No. 45 sa among atubangan. Puno kaayo kadto nga ang akong reaksiyon mao: “Dili gayod kita makasakay!” May mahigalaong nagduso sa akong likod, ug sa ulahi kaming duha nadala sa pagdutdotay sa mga tawo sa pagsakay sa bus. Labing menos napulo ka tawo ang misunod kanamo sa pagsakay. Nagkumbabit sila sa istribo, nga nagbitay sama sa mga buyog nga naghuot sa pultahan. Sulod sa sakyanan, nga 46 lang ang makalingkod, nakaihap akog kapin sa usa ka gatos ka ulo hangtod nga mihunong ako sa pag-ihap ug mipadayon sa akong pag-estoryahay sa akong higala.

“Ingon ba gayod kanunay niini ang mga bus?”

“Usahay dili kaayo sila puno,” siya miasoy, “apan dili sila mahal, nga nagpasabot nga makaabot ka sa pagsakay bisan sa 6 ngadto sa 9 ka milya (10 ngadto sa 15 km) kada adlaw sa mas layong bahin sa siyudad sa pagsangyaw.”

“Dili ba mas maayong ang duol nga mga komunidad na lang ang sangyawan?”

“Oo, apan kami nga bug-os panahong magmamantala nakahukom sa pag-abot sa mga tawo sa ubang lugar. Ang among rekord nagpakita nga daghang lugar sa Calcutta wala pa masangyawi sa maayong balita sa kataposang 50 ka tuig!”

Apan usa ka hagit ang pag-abot sa tanan diha sa usa ka lugar tungod sa kadaghan sa tawo. Ang usa ka surbi kas-a nagbanabana sa kadasokon sa populasyon sa Calcutta nga lima ka pilo ang gidaghanon kay sa New York City niadtong panahona, ug ang gidaghanon misaka pa karong mga katuigan.

Labing menos un-tersiya sa mga tawo sa Calcutta nagpuyo diha sa nagdasok nga mga barongbarong nga nailhan dinhi nga mga bustees. Nagsikitsikit lang ang gagmayng mga bustees, sagad usa lamang ka dupa ang gilay-on sa usag usa. Yuta ug salog ang mga barongbarong ug ang bungbong hinimo gikan sa gipaugang lapok ug hugaw sa baka nga gitapal sa kahoy nga mga balayan, ang tanan ubos sa pinaugang lapok nga atop. Ang kada barongbarong, may gamay o walay bentana, mao ang katulganan sa mga pito o walo ka tawo. Kasagaran adunay usa ka tubo sa tubig alang sa 150 ka tawo, ug diha sa dugay nang natukod nga mga barongbarong, ang kagamhanan may gitaganang kasilyas mga alang sa komunidad.

Dihang magsugod ang usa sa pagduaw sa barongbarong, kasagarang ubanan kag mga usa ka gatos ka tawo nga mausisaon, ang kadaghanan kanila mga bata. Ang usa ka Saksi, nga daw napikal sa usa ka batan-on nga nagsigeg kuyog nga nagbandilyo sa iyang pagduaw sa matag balay, nangutana sa batan-on kon gusto ba niya nga siya na lay mosulti. Naglantaw nga imbitasyon kini, gidawat sa batan-on ang tract gikan sa Saksi ug maoy mipahayag sa presentasyon pulong por pulong, bisan sa pagtanyag sa mga magasing Watchtower ug Awake!.

Pagbuntog sa Nagkalainlaing Relihiyosong Gigikanan

Mga katunga sa mga bustees sa siyudad gipuy-an sa mga sumusunod sa Islam. Apan, ang matugotong tinamdan nga kaylap sa siyudad nakapaposible sa pagsangyaw gikan sa balay ug balay sa maong lugar, usa ka pribilehiyo nga dili matagamtam sa ubang mga nasod nga may dakong komunidad sa Muslim. Nangutana ako kon ang mga payunir ba sa Calcutta adunay espesyal nga paagi sa pag-atubang niining matanga sa mga tawo.

“Gamiton sa uban ang lokal nga mga problema aron sa pagpasiugda sa pagkawalay katakos sa tawo sa pagsulbad sa iyang mga kalisdanan,” mitubag ang akong higala, “samtang dag-on sa uban ang relihiyosong pagpihig pinaagi sa paghisgot sa mga punto nga gikausahan, sama sa pagtuo sa usa ka Diyos (dili trinidad) o sa atong komung pagtuo nga ang orihinal nga Bibliya gidasig sa Diyos.”

“Ug unsay mga resulta?” nahibulong ako.

“Diyutay ra kaayoy interesado sa pagtuon ug Bibliya. Ang pagpangitag kapangabuhian ug ang pagpauswag sa ilang kahimtang sa kinabuhi daw mao lamang ang anaa sa ilang hunahuna. Kini, uban sa diyutayng edukasyon, kon aduna man, nakapalisod kanila sa pagdawat sa maayong balita.”

Ang mga panglantaw sa Hindu mao ang kasagarang maatubang nianang siyudara. Ang mga tawong Bengali ilabina anad sa pagkutlog panultihon ni Ramakrishna, nga nagpuyo ug nagwali sa tungatunga sa ika-19ng siglo. “Jotto moth, totto poth,” nagkahulogan, kon hubaron, ang tanang mga relihiyon maoy nagkalainlang mga dalan nga motultol sa mao rang tumong.

“Kini bang panglantawa lisod nga buntogon?” nangutana ako.

“Dili kon bukas ang tawo sa katarongan. Kita mataktikahong makapatin-aw sa pipila ka dayag nga mga kalainan, sama sa atong binase sa Bibliya nga paglaom sa pagkinabuhi sa walay kataposan diha sa tawhanong kahingpitan dinhi sa yuta. O makapunting kita nga dili posible sa magkaatbang nga mga panglantaw nga mahimong tinuod sa samang higayon. Pananglitan, mahimong aduna o walay dili mamatay nga kalag.”

“Daw maayong pangatarongan kana.”

“Oo, apan kasagarang dili motuo ang mga tawo nga seryoso ang among gipahayag. Sila masaligon nga nasayod sila sa atong gituohan ug nga nagtuo sila sa sama ra nga butang. Kining tinamdana daw nakasanta sa maayong panaghisgot. Busa maningkamot kami nga makabilin ug basahon ug mopadayon sa sunod tawo.”

“Duna bay tawo nga gikan sa komunidad sa Hindu nga nangitag mas lalom nga kahibalo sa Diyos ug sa iyang mga katuyoan?”

“Oo, nakahibalag ang mga payunir ug usa ka batan-ong lalaki nga nawad-ag pagsalig sa iyang pag-ubanay sa mga sumusunod ni Ramakrishna,” miasoy ang akong higala. “Midawat siya sa mga magasin ug nakabasa niana dihang gibalikan siyag duaw sa milabay ang duha ka adlaw. Tapos sa daghang diskusyon, siya misugod sa pagtuon sa pulyetong The Path of Divine Truth Leading to Liberation. Iyang gisulat ang iyang tubag ug mga komento sa mga pangutana sa pagtuon diha sa kuwaderno. Sulod sa lima ka bulan, kining tawhana gibawtismohan ug nag-alagad ingong auxiliary payunir aron siya makabahin sa iyang kahibalo sa uban pa.”

“Maayo kaayong eksperyensiya kana! Apan unsay reaksiyon sa iyang pamilya?”

“Nagpuyo siya uban sa iyang biyudang inahan ug apohan, nga debotadong mga Hindu. Sila, usab, misugod sa pagpakitag interes ug misugod sa pagtuon sa Bibliya. Sa ulahi namatikdan sa mga silingan ang kausaban niining mga babayehana, ug ingong resulta tulo ang nagpakitag interes. Bawtismado na karon ang inahan, ug ang apohang babaye, nga mas mahinay tungod sa iyang panuigon nga 70 anyos, naglaom nga magpabawtismo sa dili madugay.”

Tungod sa kalipay sa akong higala sa pag-asoy sa iyang sugilanon, akong nakita nga kining mga eksperyensiyaha nakahatag ug tinuod nga pagpadasig sa mga payunir. Usahay daw hinay kaayo ang pag-uswag, apan dayon may mopakitag tagsaong kaikag. Busa ang mga payunir nadasig sa pagpadayon sa ilang pagpangitag lain nga tingali interesado.

Pagdaog sa Babag sa Pinulongan

Ang mga tawo sa bus nagkagamay, nakamatikod akog Ingles nga pulong. “Ticket, apnar ticket,” misinggit ang mubo, walay unipormeng tawo, nga may daghang kolor nga papel de bangko sa iyang tuong kamot ug may puyo alang sa sensilyo sa iyang kilid sa pagpakita nga siya mao ang konduktor. Mitanyag ako nga akoy mobayad, apan tungod sa Indian nga pagkamaabiabihon sa akong higala wala siya mosugot. Iyang gitunol sa akong kamot ang iyang bag ug mikuot ug sensilyo sa bulsa sa iyang senina.

“Unsa bay sulod niini?” nangutana ako. “Maora man ug usa ka tonilada ang kabug-at niini!”

“Aw, ang mga edisyon sa Bibliya sa pinulongan sa India mas dako. Aron bug-os nga masangkapan sa Calcutta, kinahanglang magdala kamig tulo ka Bibliya sa tulo ka pinulongan​—Bengali, Hindi, ug Ingles​—siyempre, dugang pa sa basahon sa Bibliya.”

“Magdala ka na lang ug Ingles nga Bibliya ug hubaron na lang ang mga bersikulo.”

“Makahimo kami. Apan, adunay daghang mga tawo nga makabasa lamang ug Bengali o Hindi nga wala pa gayod sukad makakita ug kompletong Bibliya sa ilang kaugalingong pinulongan. Gibati namo nga mas maayo kon among ikapakita kanila ang kopya ug basahan sila gikan niana. Takos kini sa dugang kahago ug kabug-at.”

Okupado ang mga payunir dinhi sa pagpahiangay sa mga panginahanglan sa nagkalainlaing pundok sa mga pinulongan. Ang kadaghanan kanila nagtudlo sa ilang kaugalingon nga makapamatuod sa epektibong paagi diha sa tulo ka pangunang mga pinulongan. Ang uban nga may tagsaong katakos nakakat-on sa pagsulti ug lima kun unom ka pinulongan. Gipabilhan sa lokal nga mga tawo ang mga paningkamot sa mga bisita sa pagsulti sa pinulongan sa komunidad, ug igo nang ganti ang atentibong pagsanong sa hataas nga mga oras sa pagtuon sa pinulongan.

Gikalipayan ang Mahagitong Teritoryo

Dayon mihunong ug kalit ang among bus nga nakakudkod sa gubaon nang preno, ug natulod ako sa gawas.

“Nganong mihunong man kita dinhi?” nangutana ako. “Wala ka man magpuyo dinhi.”

“Wala, sa Punjabi na kini. Abu gud nimo, maayong mohimog tsa ang mga tawo dinhi. Nagtuo ako nga gusto kang moinom.”

Lami tinuod ang tsa.

“Nganong natultolan man nimo kining dapita?” matud ko.

“Sa pagtrabaho sa matag dapit, kaming mga payunir nahibalo kon unsa ang kinaham sa lokal nga dapit ug diin ang labing maayo ug labing baratong mga tindahan. Kon dili daling madaot ang imong tiyan, mangadto ta ug tilawan nato ang lamiang mga pagkaon karong gabii.”

Nakahinumdom sa tambag sa pipila sa mas mapanagan-ong mga higala, mibalibad ako. Apan tinuod nga gilamian ako sa tsa. Akong nakita nga timbang ang mga payunir ug nakakat-on sa pagpahimulos sa ilang mga kahimtang. Bisan ang mga butang nga daw sa sinugdan kababagan nabuntog ra ug gikawilihan.

“May butang ba nga wala nimo maangayi sa imong buluhaton?” nangutana ako sa kataposan.

Gipalandong makadiyut sa akong higala ang pangutana. “Sa akong hunahuna ang ting-init ug ting-ulan maoy butang nga wala gayod namo maanari. Apan problema kana bisan pag magpayunir ka ug dili. Ang kainit ug kaumog grabe kaayo nga magtulo ang imong singot gikan sa tumoy sa imong ilong ngadto sa imong Bibliya samtang magbasa ka gikan niana. Apan, nakakat-on kami sa pag-agwanta niini. Gani, sa Mayo, nga tingali mao na ang labing init nga bulan sa tuig, among nakita ang labing taas nga gidaghanon sa mga auxiliary payunir nga miduyog kanamo sa buluhatong pagsangyaw.”

Nagpalandong sa tibuok adlaw ug sa akong pagsultihay uban sa akong payunir nga higala, nakadayeg ako sa abilidad sa mga payunir sa Calcutta sa pagpaangay sa daghang nagkalainlaing mga situwasyon ug mga tawo aron ilang maabot sila sa maayong balita. Siyempre, nasayod ako nga gihimo usab kini sa ubang mga payunir sa tibuok kalibotan. Sila tinuod nga malipayon nga ‘nahimong tanang butang ngadto sa tanang matang sa mga tawo.’​—Tinampo.

[Mapa/Letrato sa panid 26]

(Alang sa bug-os nga pagkahan-ay sa teksto, tan-awa ang publikasyon)

INDIA

Calcutta