Pagluwas sa Kinabuhi sa Panahon sa Gutom

DIHADIHA tapos ikatudlong administrador sa pagkaon, gisuroy ni Jose ang yuta sa Ehipto. Organisado na niya kaayo ang kahimtang sa nagsugod ang katuigan sa kadagaya. Sa maong panahon ang yuta mihatag sa iyang abot nga dagaya! Si Jose mipadayon sa pagtigom sa pagkaon gikan sa uma sa katibuk-an sa matag siyudad, nga nagtigom niana sa siyudad. Siya nagpadayon sa “pagtigom ug trigo nga hilabihan ka daghan, sama sa balas sa dagat, hangtod nga sa kataposan mihunong siya sa pag-ihap, tungod kay kadto dili na maihap.”​—Genesis 41:46-49.

2. Sa unsang personal nga pagsakripisyo ang katawhan nakabaton ug pagkaon?

² Natapos ang pito ka tuig sa kadagaya, ug ang gutom misugod sumala sa gitagna ni Jehova​—usa ka gutom dili lamang sa Ehipto kondili “sa tibuok nawong sa yuta.” Sa misugod ang gigutom nga katawhan sa Ehipto sa pagtuwaw alang sa pagkaon kang Paraon, si Paraon miingon kanila: “Pangadto kamo kang Jose. Buhata ninyo kon unsay iyang igaingon kaninyo.” Gibaligyaan ni Jose ang mga Ehiptohanon ug trigo hangtod nga nahurot na ang ilang salapi. Dayon gidawat niya ang ilang kahayopan ingong bayad. Sa kataposan, ang mga tawo nangadto kang Jose, nga nag-ingon: “Palita kami ug ang among yuta alang sa pagkaon, ug kami uban sa among yuta mahimong mga ulipon ni Paraon.” Busa gipalit ni Jose ang tibuok yuta sa mga Ehiptohanon alang kang Paraon.​—Genesis 41:53-57; 47:13-20.

Tagana Alang sa Espirituwal nga Pagpakaon

³ Maingon nga ang trigong giapod-apod ni Jose nagkahulogan sa kinabuhi alang sa mga Ehiptohanon, ang matuod espirituwal nga pagkaon usab bililhon sa pagbuhi sa mga Kristohanon nga mahimong mga ulipon ni Jehova pinaagi sa ilang pagpahinungod Kaniya pinaagi sa Labaw nga Jose, si Jesu-Kristo. Panahon sa iyang yutan-ong ministeryo, gitagna ni Jesus nga ang iyang dinihogang mga sumusunod sa iyang lakang magpas-an sa responsabilidad sa pagtagana sa maong mga pagkaon. Siya nangutana: “Kinsa ba gayod ang matinumanon ug maalamon nga ulipon si kinsa gitudlo sa iyang agalon ibabaw sa iyang mga sakop sa panimalay, sa paghatag kanila sa ilang pagkaon sa hustong panahon? Malipayon ang maong ulipon kon hikaplagan siyang nagabuhat sa ingon inig-abot sa iyang agalon.”​—Mateo 24:45, 46.

4. Sa unsang paagi ang tagana nga gihimo sa “ulipon” nga matang karong adlawa motumbas sa butang giorganisar sa adlaw ni Jose?

⁴ Ang matinumanong nahibilin niining “maalamong ulipon” nga matang karong adlawa mohimo kutob sa ilang maarangan nga uyon sa Kasulatan sa pagtino nga ang nagpahinungod nga mga saksi ni Jehova, ingon man mga tawong interesado diha sa kalibotan, magadawat sa makapabuhi nga espirituwal nga pagkaon. Kining gisalig kanila giila ingong balaang katungdanan ug ginabuhat ingong balaang pag-alagad kang Jehova. Dugang pa, ang “ulipon” nag-organisar sa mga kongregasyon ug nagtagana kanilag daghan kaayong basahon sa Bibliya nga sila dunay igong “binhi” sa Gingharian aron isabod sa dayag diha sa mga umahan nga gitudlo kanila. Kini katumbas sa adlaw ni Jose, sa iyang gitigom ang katawhan ngadto sa mga siyudad ug gitagan-an silag trigo dili lamang alang sa pagkaon kondili aron ipugas usab uban ang hunahuna nga makaani sa ulahi.​—Genesis 47:21-25; Marcos 4:14, 20; Mateo 28:19, 20.

5. (a) Unsang espesyal nga pagtagad ang ginahatag sa “ulipon” ngadto sa mga panginahanglan sa panimalay sa panahon sa krisis? (b) Unsay kahimtang sa “pag-awas” sa espirituwal nga mga pagkaon sa 1986 kon itandi sa mga suplay o pagkaon sa panahon ni Jose?

⁵ Bisan pag gidili ang dayag nga buluhatong pagsangyaw ug ginalutos ang mga Saksi ni Jehova, ang ‘matinumanong ulipon’ nagaisip niining pagtaganag espirituwal nga pagkaon ingong gisalig nga balaang buluhaton. (Buhat 5:29, 41, 42; 14:19-22) Kon moabot ang katalagman, sama sa tungod sa mga bagyo, mga baha, ug mga linog, ang “ulipon” nagatino nga gitagana ang pisikal ug espirituwal nga mga panginahanglan sa panimalay sa Diyos. Bisan kadtong anaa sa mga kampo konsentrasyon giabtan sa regular sa pinatik nga pulong. Ang nasodnong mga utlanan wala tugoting mopugong sa agos sa espirituwal nga pagkaon ngadto niadtong nagkinahanglan niini. Ang pagpadayon sa suplay o tagana nagkinahanglag kaisog, pagtuo kang Jehova ug kadaghanan dakong kamamugnaon. Sa tibuok kalibotan sulod sa 1986 lamang, ang “ulipon” migama sa nag-awas nga 43,958,303 ka Bibliya ug gahig-haping mga libro, ingon man 550,216,455 ka magasin​—tinuod nga “labihan ka daghan, sama sa balas sa dagat.”

Pagbalos, Pagsilot, o Kaluoy?

6, 7. (a) Sa unsang paagi ang gutom misangpot sa paghapa sa napulo ka igsoon ni Jose sa amahan sa iyang atubangan? (b) Sa unsang mga paagi gisulay si Jose mismo sa maong panahon?

⁶ Sa kataposan ang gutom miabot sa yuta sa Canaan. Gisugo ni Jacob ang napulo ka igsoon ni Jose sa amahan ngadto sa Ehipto aron sa pagpalit ug trigo. Apan wala niya ipadala si Benjamin, ang bugtong pursosong igsoon ni Jose, sa kahadlok, sumala pa niya, nga “mahitabo kaniya ang usa ka aksidente nga makapatay.” Sanglit si Jose mao man ang nagbaligya, ang iyang mga igsoon miadto kaniya ug mihapa sa iyang atubangan. Bisan pag sila wala makaila sa ilang igsoon, si Jose nakaila kanila.​—Genesis 42:1-7.

⁷ Sa maong panahon si Jose nakahinumdom sa iyang nangaging mga damgo mahitungod kanila. Apan unsay iyang pagabuhaton? Manimalos ba siya? Sa ilang panahon sa dakong panginahanglan, iya bang pasayloon ang pagtagad nga iyang nadawat sa ilang mga kamot? Unsa na man ang masakit nga kaguol sa iyang amahan? Pagakalimtan na ba lamang diay kadto? Sa maong panahon unsay gibati sa iyang mga igsoon mahitungod sa dakong sala nga ilang nabuhat? Si Jose, usab, gisulayan bahin niana. Ang iyang mga lihok kaha mahiuyon sa tinamdan nga ipakita sa ulahi sa Labaw nga Jose, si Jesu-Kristo, sumala sa gibatbat sa 1 Pedro 2:22, 23: “Siya wala makahimog sala, ni hikaplagan sa iyang baba ang panglimbong. Sa gipasipalahan siya, siya wala mobalos sa pagpasipala. Sa nag-antos siya, siya wala manghulga, kondili nagpadayon sa pagtugyan sa iyang kaugalingon ngadto sa usa nga magahukom sa pagkamatarong.”

8. Pinaagi sa unsa nga si Jose magiyahan, nga nagailustrar sa unsa bahin kang Jesus ug sa Iyang mga tinun-an?

⁸ Sanglit nasabtan ni Jose ang gahom ni Jehova sa pagkatuman sa mga hitabo, siya nagmabinantayon sa pagsunod sa mga balaod ug mga prinsipyo sa Diyos. Sa samang paagi, si Jesus maikagon sa tanang panahon sa ‘pagbuhat sa kabubut-on sa iyang Amahan’ samtang iyang gihatag ang kinabuhing walay kataposan ngadto sa ‘tanan nga motuo kaniya.’ (Juan 6:37-40) Ingong “mga embahador nga kapuli ni Kristo,” ang iyang dinihogang mga tinun-an nagatuman usab sa ilang gisalig nga balaang butang nga mao ang “pagpahayag ngadto sa katawhan sa tanang pulong mahitungod niining kinabuhia.”​—2 Corinto 5:20; Buhat 5:20.

9, 10. (a) Unsay gibuhat sa maong panahon ni Jose, ug ngano? (b) Giunsa ni Jose pagpakitag kaluoy nga sama sa gipakita ni Jesus?

⁹ Wala dayon ipadayag ni Jose ang iyang kaugalingon ngadto sa iyang mga igsoon. Hinunoa, siya nakigsulti kanila nga mapintason pinaagi sa usa ka maghuhubad, nga miingon: “Mga espiya kamo!” Sanglit ilang gihisgotan ang usa ka manghod nga lalaki, gipangayo ni Jose nga ilang pamatud-an ang ilang pagkamatinud-anon pinaagi sa pagdala kaniya ngadto sa Ehipto. Nadunggan ni Jose nga sila nagsultiay sa usag usa nga mahinulsolon nga ang maong mga panghitabo mao gayoy balos sa ilang pagbaligya kaniya, kang Jose, sa kaulipnan. Nga nagpahilayo, si Jose mihilak. Bisan pa niana, iyang gipagapos si Simeon ingong binihag hangtod sila mobalik uban kang Benjamin.​—Genesis 42:9-24.

¹⁰ Si Jose wala manimalos tungod sa sala nga gibuhat kaniya. Buot niyang tinoon kon ang ilang paghinulsol maoy tiunay, gikan sa kahiladman sa ilang mga kasingkasing, aron sila pakitaag kaluoy. (Malakias 3:7; Santiago 4:8) Tungod sa maluluy-ong tinamdan, nga sama sa gipasundayag ni Jesus, si Jose wala lamang magpuno sa ilang mga sako sa trigo kondili nag-uli usab sa ilang salapi kanila diha sa baba sa sako sa matag usa. Dugang pa, gihatagan niya silag mga pagkaon alang sa ilang panaw.​—Genesis 42:25-35; itandi ang Mateo 11:28-30.

11. (a) Sa nahaigong panahon, si Jacob napugos sa pagbuhat sa unsa, ug nganong siya sa kataposan misugot? (b) Sa unsang paagi ang Roma 8:32 ug 1 Juan 4:10 susamang nagapasalig kanato sa gugma sa Diyos?

¹¹ Sa nahaigong panahon, nahurot nila ang pagkaon nga ilang napalit sa Ehipto. Gihangyo ni Jacob nga mobalik ang siyam ka anak ug mopalit ug dugang. Sa nangagi, siya nangamuyo bahin kang Benjamin, nga miingon: “Dili molugsong ang akong anak nga lalaki uban kaninyo, kay ang iyang igsoon patay na ug siya na lamang ang nahibilin. Kon mahitabo kaniya ang makapatay nga aksidente sa dalan nga inyong pagalaktan, nan inyo gayong igatunod ang akong ubanon nga buhok uban ang kagul-anan ngadto sa Sheol.” Ugaling, tapos ang labihang paghaylo ug sa tanyag ni Juda nga siya ang manubag kang Benjamin, nagpanukong misugot si Jacob nga ilang ikuyog ang batang lalaki.​—Genesis 42:36–43:14.

12, 13. (a) Giunsa ni Jose pagpahamtang ang usa ka pagsulay sa pagpadayag sa tinamdan sa kasingkasing sa iyang mga igsoon? (b) Sa unsang paagi ang resulta mihatag kang Jose ug pasikaranan sa pagpakitag kaluoy?

¹² Sa dihang nakita ni Jose nga miabot si Benjamin uban sa mga managsoon, iyang gidapit sila ngadto sa iyang balay, diin siya naghimo sa kombira. Alang kang Benjamin iyang gihatag ang bahin nga lima ka pilo kay sa bahin sa matag usa sa uban. Unya gihimo ni Jose ang kataposang pagsulay sa iyang mga igsoon. Sa makausa pa, iyang giuli ang tanan nilang salapi diha sa ilang tagsatagsa ka sako, apan ang iyang linaing kopa nga salapi gibutang sa baba sa sako ni Benjamin. Sa ilang pagbiya, gipaagpas ni Jose ang tagdumala sa iyang panimalay sa pagsumbong kanila sa pagpangawat ug pagsusi sa ilang mga sako alang sa iyang kopa. Sa dihang kadto nakaplagan sulod sa sako ni Benjamin, gigisi sa mga igsoon ang ilang mga kupo. Sila gidala pagbalik aron moatubang kang Jose. Si Juda nangaliyupo alang sa kaluoy, nga mitanyag nga mahimong ulipon ilis kang Benjamin aron ang batang lalaki mahiuli ngadto sa iyang amahan.​—Genesis 43:15–44:34.

¹³ Kay kombinsido na sa kausaban sa kasingkasing sa iyang mga igsoon, si Jose wala na makapugong sa iyang emosyon. Tapos imando nga manggawas ang tanan nga uban gikan kaniya, si Jose mipahayag: “Ako si Jose nga inyong igsoon, nga inyong gibaligya sa Ehipto. Apan karon ayaw kamo kasubo ug ayaw kamo pagkasuko sa inyong kaugalingon tungod kay kamo nagbaligya kanako dinhi; tungod kay ang Diyos nagpadala kanako sa pag-una kaninyo aron sa pagluwas sa kinabuhi . . . aron ibutang ang usa ka salin kaninyo sa yuta ug sa paghupot kaninyo nga buhi pinaagi sa dako nga pagluwas.” Unya siya miingon ngadto sa iyang mga igsoon: “Adto kamo sa madali ngadto sa akong amahan, ug magaingon kamo kaniya, ‘ . . . Umari ka kanako. Ayaw pagdugay. Ug magapuyo ka sa yuta sa Goshen, ug . . . ako magatagana kaninyo sa pagkaon didto, kay may lima pa ka tuig nga gutom; kay basin ikaw ug ang imong panimalay ug ang tanan nga imoha modangat sa kakabos.’”​—Genesis 45:4-15.

14. Unsang malipayong balita ang gipahibalo kang Jacob?

¹⁴ Sa nadungog ni Paraon ang balita mahitungod sa mga igsoon ni Jose, iyang giingnan si Jose nga kuhaon ang mga karro gikan sa yuta sa Ehipto aron dad-on ang iyang amahan ug ang tibuok niyang pamilya sa Ehipto kay ang labing maayo sa yuta maila. Sa pagkabati sa tanan nga nahitabo, nabuhi pag-usab ang espiritu ni Jacob ug siya mipatugbaw: “Igo na! Si Jose nga akong anak buhi pa! Ah, ako moadto ug motan-aw kaniya sa dili pa ako mamatay!”​—Genesis 45:16-28.

Dagaya ang Espirituwal nga Pagkaon

15. Kang kinsa kita karon mosalig alang sa espirituwal nga pagkaon, ug sa unsang paagi kita mapasaligan sa kadagaya?

¹⁵ Unsay ipasabot niining tanan alang kanato karong adlawa? Kay mahunahunaon kanunay sa atong espirituwal nga panginahanglan, kita nagasalig sa Usa nga labaw kaayo kay sa malulutong Paraon sa panahon ni Jose. Kini mao ang Soberanong Ginoo si Jehova nga nagataganag sustento ug giya latas niining mangitngit nga mga adlaw sa kalibotan nga gigutom sa kamatuoran sa Bibliya. Kita naghago sa kaayohan sa iyang Gingharian, nga nagdala sa atong mga ikapulo, ingnon ta, ngadto sa iyang tipiganan. Manggihatagon kaayong iyang gibuksan alang kanato “ang mga tamboanan sa mga langit,” nga nagbubo sa panalangin “hangtod nga wala nay panginahanglan”!​—Malakias 3:10.

16. (a) Hain lamang hikaplagan karong adlawa ang “pagkaon” nga moluwas sa kinabuhi? (b) Sa unsang paagi gipauswagan ang pagpugas sa “trigo” alang sa gigutom nga katawhan?

¹⁶ Sa tuong kamot ni Jehova anaa ang iyang Administrador sa Pagkaon, karon ang gientronong Hari, ang hinimayang Jesus. (Buhat 2:34-36) Maingon nga ang katawhan kinahanglang magbaligya sa ilang kaugalingon ingong mga ulipon aron magpabiling buhi, ang tanan usab karong adlawa nga buot magpadayong buhi kinahanglang moduol kang Jesus, nga mahimong iyang mga sumusunod nga napahinungod sa Diyos. (Lucas 9:23, 24) Maingon nga gisugo ni Jacob ang iyang mga anak nga moadto kang Jose alang sa pagkaon, si Jehova nagagiya usab sa mahinulsolong mga tawo ngadto sa iyang minahal nga Anak, si Jesu-Kristo. (Juan 6:44, 48-51) Si Jesus nagatigom sa iyang mga sumusunod nganha sa samag-siyudad nga kongregasyon​—kapin sa 52,000 ka lig-ong kongregasyon sa tibuok kalibotan karong adlawa​—diin sila gipakaon gikan sa dagayang espirituwal nga pagkaon ug gitagan-an sa nag-awas nga “trigo,” ingong “binhi” aron ipugas sa kaumahan. (Genesis 47:23, 24; Mateo 13:4-9, 18-23) Kinabubut-on gayod nga mga magbubuhat kining mga saksi ni Jehova! Dugang ug dugang pa kanila ang nagaboluntaryo alang sa bug-os-panahong payunir nga pag-alagad, uban ang abot sa 595,896 kanila nga nakig-ambit, ingong kinatas-ang ihap, sa maong bulahang buluhaton sa usa ka bulan sa miaging tuig. Kana may aberids nga kapin sa 11 ka payunir sa matag kongregasyon!

17. Unsang laing matagnaong asoy ang susama sa paghiusa sa napulo ka igsoon ni Jose sa amahan uban kaniya?

¹⁷ Mamatikdang ang tanang napulo ka igsoon ni Jose sa amahan, nga sa maong panahon mahinulsolon sa kanhing mga tinamdan ug mga buhat, nahiusa uban kaniya didto sa Ehipto, nga, duyog sa Sodoma, nagahulagway sa kalibotan nga niana si Jesus gilansang. (Pinadayag 11:8) Kini nagapahinumdom kanato sa Zacarias 8:20-23, nga natapos sa usa ka kabatbatan sa “napulo ka lalaki” kinsa nagaingon, “Mouban kami kaninyo,” nga mao, uban sa dinihogang katawhan ni Jehova, nga ang nahibilin kanila nagaalagad pa dinhi sa yuta.

18. Ang linaing pabor nga gipakita kang Benjamin susama sa unsa sa modernong mga panahon?

¹⁸ Bisan pa niana, komosta ang usa nga pursosong igsoon ni Jose, si Benjamin, kansang lisod nga pagkahimugso nakahunos sa kinabuhi sa hinigugmang asawa ni Jacob, si Rachel? Si Benjamin pinangga ilabina ni Jose, kinsa pihong mibating mas suod sa maong anak sa iyang kaugalingong inahan. Kini lagmit kaayo mao ang hinungdan sa pagdawat ni Benjamin sa lima ka pilo nga bahin dihang ang tanang 12 ka magsoon unang nagkahiusa pag-usab sa kombira sa balay ni Jose. Dili ba si Benjamin nagahulagway gayod sa nahibilin sa dinihogang mga Saksi karong adlawa, nga kadaghanan niadtong buhi natigom na sa kiliran sa Ginoo sukad sa 1919? Kining “Benjamin” nga matang nakadawat gayod ug espesyal nga bahin gikan kang Jehova, kay ang iyang ‘espiritu nagapamatuod uban sa ilang espiritu.’ (Roma 8:16) Kini sila, usab, gisulayan bahin sa ilang integridad samtang ang “mga karnero” sa Ginoo nagaalagad kanila.​—Mateo 25:34-40.

19. Unsang kasamahan ang makita tali sa pagbalhin sa mga panimalay sa Israel ngadto sa Goshen ug ang pagkatigom sa katawhan sa Diyos karong adlawa?

¹⁹ Makaiikag nga, sa gihikay ni Paraon ang pagdala kang Jacob ug sa iyang mga panimalay ngadto sa Ehipto, ang tanang lalaking “mga kalag” nga mipuyo didto maoy 70, nga usa ka pinilong numero sa 7 ug 10. (Genesis 46:26, 27) Kining duha ka numero gigamit nga makahuloganon sa tibuok Kasulatan, nga ang “7” kadaghanan nagapaila sa pagkalangitnon ug “10” sa yutan-ong pagkakompleto. (Pinadayag 1:4, 12, 16; 2:10; 17:12) Kini motumbas sa kahimtang karong adlawa, dihang kita makalaom nga tigomon ni Jehova nganha sa iyang “yuta,” ang espirituwal nga paraiso nga sulod niana kita karon nagakalipay, ang matag kataposang bahin sa iyang pamilya sa mga Saksi. (Itandi ang Efeso 1:10.) “Si Jehova nakaila niadtong iya,” ug bisan karon siya nagapapuyo kanila diha sa “labing maayo sa yuta,” nga mao niadto ang Goshen sa dominyo ni Paraon.​—Genesis 47:5, 6; 2 Timoteo 2:19.

20. Bisan pa sa espirituwal nga gutom karong adlawa, nganong kita kinahanglang maglipay?

²⁰ Sa adlaw ni Jose, ang katuigan sa gutom misunod sa katuigan sa kadagaya. Karong adlawa, sila nagadungan. Kasukwahi sa espirituwal nga gutom diha sa yuta sa gawas sa pag-uyon ni Jehova, adunay dagayang espirituwal nga pagkaon diha sa dapit sa pagsimba ni Jehova. (Isaias 25:6-9; Pinadayag 7:16, 17) Oo, samtang adunay gutom alang sa pagpatalinghog sa mga pulong ni Jehova diha sa Kakristiyanohan, sumala sa gitagna ni Amos, ang pulong ni Jehova nagagula sa langitnong Jerusalem. Kana nagalipay gayod kanato!​—Amos 8:11; Isaias 2:2, 3; 65:17, 18.

21. (a) Unsang dakong pribilehiyo ang atong gipahimuslan karong adlawa? (b) Tungod sa unsa nga kita magmapasalamaton, ug sa unsang paagi atong ikapahayag ang atong mga pasalamat?

²¹ Karong adlawa, ilalom sa pagdumala sa Labaw nga Jose, si Jesu-Kristo, kita nakabaton sa dakong pribilehiyo nga matigom ngadto sa samag-siyudad nga mga kongregasyon. Dinha kita makakaon sa dagayang tugob espirituwal nga pagkaon ug makapugas usab sa mga binhi sa kamatuoran ug makasabwag sa maayong balita sa pagkadunay espirituwal nga pagkaon. Kini atong ginabuhat sa kaayohan sa tanang magadawat sa mga kondisyon ug mga tagana nga mahigugmaong gihikay sa Soberanong Magmamando, si Jehova. Kita mapasalamaton gayod kaayo sa atong Diyos tungod sa gasa sa iyang Anak, ang Labaw nga Jose, kinsa nagaalagad nga maalamong Administrador sa espirituwal nga pagkaon! Siya mao ang gitugyanan ni Jehova nga magsilbing Manluluwas sa kinabuhi niining panahon sa espirituwal nga gutom. Hinaot ang matag usa kanato magpakitag kakugi sa paghatag sa balaang pag-alagad nga magasunod sa iyang panig-ingnan ug ilalom sa iyang pagpangulo!

Nakita ba Nimo ang Kasamahan?

◻ Sa unsang paagi si Jose susama kang Jesus ingong Administrador sa Pagkaon?

◻ Ang pagkahimong mga ulipon sa Diyos pinaagi sa pagpahinungod ikatandi sa unsa diha sa drama ni Jose?

◻ Unsang hiyas ang gipakita ni Jose ug ni Jesus ingong panig-ingnan alang kanato karong adlawa?

◻ Sama sa panahon ni Jose, unsang bug-os nga kahikayan sa pag-apod-apod sa pagkaon ang nagalungtad karong adlawa?

◻ Ang atong pagtagad niining maong drama nagatukmod kanato sa pagbuhat sa unsa?

1. Unsang maalamong aksiyon ang gihimo ni Jose panahon sa katuigan sa kadagaya, ug unsay sangpotanan?

3. Unsang ahensiya ang gitagna ni Jesus aron motaganag pagkaon sa hustong panahon?

[Mga Letrato sa panid 16, 17]

Sa kalibotang nalukop sa espirituwal nga gutom, ang Labaw nga Jose nagataganang madagayaon alang sa tanang moduol kaniya diha sa pagtuo

Maingong ang napulo ka igsoon sa amahan nagpakitag pagpasakop kang Jose, ang usa ka dakong panon karon nagaila kang Kristo

Sama sa 70 ka kalag sa panimalay ni Jacob, ang bug-os nga gidaghanon sa “mga karnero” ni Jehova miabot sa usa ka maayong “yuta”—ang espirituwal nga paraisong atong gipahimuslan karon

[Hulagway sa panid 18]

Ang modernong-adlawng Benjamin nga matang sa linain gipaboran ni Kristo, nga nagadawat sa dagayang “pagkaon sa hustong panahon”