Gilimod Mo ba ang Makasasalang Hilig?
“NAKITA ko kini ingon nga usa ka balaod: nga sa dihang buot ko nang buhaton ang maayo, ang daotan maoy ania kanako. Ginakalipay ko ang kasugoan sa Diyos diha sa kinasuloran sa akong pagkatawo, apan dinhi sa mga bahin sa akong lawas nakita ko ang laing balaod nga nagapakig-away batok sa balaod sa akong salabotan ug nagahimo kanakong binihag ngadto sa sala nga ania sa sulod sa akong lawas.”—Roma 7:21-23.
Pagpaubos ang gikinahanglan ni apostol Pablo sa pagdawat sa ibabaw. Bisan pa, sa iyang pagbuhat niini, siya naningkamot sa pagsumpo sa iyang dili-hingpit nga mga hilig sa pagdaog kaniya.
Sama usab kini sa matuod nga mga Kristohanon karong adlawa. Sa dihang nakadangat kita sa tukmang kahibalo sa kamatuoran sa Bibliya, naghimo kitag gikinahanglang mga kausaban sa atong paagi-sa-kinabuhi, sumala sa mga sukdanan ni Jehova. Ang makasasalang mga hilig nagpabilin, hinunoa, “tungod kay ang hilig sa kasingkasing sa tawo daotan man sukad pa sa iyang pagkabata.” (Genesis 8:21) May pagkamatinud-anon ba kita sa pagdawat sa atong kaugalingon sa pipila ka hilig nga naghatag kanatog kalisod? O gilimod ba nato nga kita aduna niana, tingali moingon, ‘Seguro problema kini sa uban, apan dili kanako’?
Ang maong paglimbong sa kaugalingon delikado. Ang usa ka binase sa Bibliya nga ilustrasyon tingalig makatabang kanato sa pag-apresyar sa gikinahanglang pagdawat sa atong makasasalang mga hilig ug sa pagkontrolar niini.
Kon Nganong ang Paglimod Delikado
Sa panahon sa Bibliya ang kadaghanang mga siyudad gipanalipdan ug mga kuta. Ang mga ganghaan—sagad hinimo sa kahoy—maoy daling masugok nga bahin sa kuta sa sulod sa siyudad; busa, kini ang gidepensahan pag-ayo. Ang mga molupyo naghimog daghang ganghaan nga gikinahanglan sa panahon sa kalinaw. Ang kahoyng mga ganghaan salipdan ug metal, aron dili masunog. Gitukoran ug mga torre ang mga kuta aron ang mga magbalantay diha niana makakita sa nagsingabot nga mga kaaway gikan sa halayo.
Karon hunahunaa: Unsa kahay mahitabo kon ilimod sa mga molupyo sa siyudad ang kahuyang sa mga ganghaan sa siyudad ug dili mangandam ug igong panalipod? Ang kaawayng mga sundalo daling makasulod sa siyudad, nga motultol sa kaparotan niini.
Ingon usab kita niana. Si Jehova nahibalo sa atong tagsatagsang punto sa pagkahuyang. “Sa panan-aw sa Diyos walay binuhat nga natago, hinunoa ang tanang butang binuksan ug dayag sa mga mata niya kang kinsa magahatag ra unya kita ug husay.” (Hebreohanon 4:13) Si Satanas usab hayan nakakita sa pipila ka makasasalang hilig diha kanato, mahimong kining hiliga maoy sa pagtuis sa kamatuoran, pagkadaling masuko, kaikag sa seksuwal nga imoralidad, materyalismo, garbo, o laing butang. Kon atong ilimod nga kita dunay makasasalang mga hilig, ilabinang gihimo nato ang atong kaugalingon nga daling maasdang sa mga pag-atake ni Satanas sa atong pagtuo. (1 Pedro 5:8) Basig madaog kita samtang ang daotang mga tinguha manobra pa kay sa yanong mga hilig ug unya manganak ug sala. (Santiago 1:14, 15) Angay natong sundogon si Pablo, matinud-anong dawaton ang bisan unsang ‘mga ganghaan nga kahoy’ nga hayan naglungtad.
Lig-ona ang Imong Kaugalingon!
Walay kapuslanan ang pagdawat sa daotang mga hilig apan walay pagabuhaton mahitungod niana. Sama ra kini sa usa ka tawo nga nagtan-aw sa iyang kaugalingon sa salamin, nakaalinggat ug mga dapit nga kinahanglang tagdon, ug milakaw nga walay gihimong hinungdanong mga pagtul-id. (Santiago 1:23-25) Oo, kinahanglang molihok kita sa pagpanalipod sa atong kaugalingon nga dili madaog sa makasasalang mga hilig. Sa unsang paagi atong himoon kini?
Kasagaran, sa panahon sa Bibliya, ang gagmayng mga lungsod, o “sakop nga mga lungsod,” walay mga kuta. (Numeros 21:25, 32; Maghuhukom 1:27; 1 Cronicas 18:1; Jeremias 49:2) Ang mga molupyo niining mga lungsora modangop ngadto sa usa ka kinutaang siyudad kon may mosulong nga kaaway. Busa ang siyudad nga may salipod nagsilbing usa ka dalangpanan alang sa mga tawo sa nagapalibot nga lugar.
Gihubit sa Bibliya si Jehova ingong usa ka torre, usa ka dalangpanan, usa ka kuta nga kita makadalagan alang sa panalipod. (Proverbio 18:10; Zacarias 2:4, 5) Busa si Jehova mao ang dakong depensa sa iyang mga alagad. Ang kanunay nga pag-ampo kaniya gikinahanglan kaayo. (1 Tesalonica 5:17) Laing tabang mao ang Bibliya. Ginamit ang Pulong sa Diyos, maayong atong tun-an pag-ayo ang mga dapit nga kita mahuyang. Mahimong gahinan usab nato ug panahon ang masubsob nga pagsusi sa binase sa Bibliya nga mga artikulo nga naghisgot mahitungod sa atong tagsatagsang ‘kahoy nga mga ganghaan.’
Lain pa, sama sa magbalantay sa usa ka torre, atong makita ang kaaway gikan sa halayo, pagaingnon pa, ug molihok sumala niana. Sa unsang paagi? Pinaagi sa paglikay sa mga kahimtang nga makaatubang kita ug pagsulay ug kalisod. Pananglitan, ang usa ka tawo nga naningkamot nga mahimong makasaranganon sa pag-inom ug maisog nga mga ilimnon maalamong maglikay sa mga dapit nga daling mabatonan kining mga ilimnona o kaha gidasig pa kini.
Kining tanan nagkinahanglag paningkamot. Hinunoa, kon si apostol Pablo ‘nagpanton sa iyang lawas’ aron makasukol sa dili-hingpit nga mga hilig, dili ba usab angay nga kita maningkamot? Ang maong mahunahunaong pagtagad sa atong makasasalang mga hilig mopabanaag nga atong gisunod ang tambag ni apostol Pedro: “Paningkamoti ninyo nga hingkaplagan kamo nga walay buling o hugaw ug maanaa kamo sa kalinaw.”—1 Corinto 9:27; 2 Pedro 3:14.
Dawata ug Lihok
Ayaw kaluya kon, bisan pa sa imong mga paningkamot, ang tanan nimong dili-hingpit nga mga hilig wala mawala. Samtang kita dili pa hingpit, ang daotang mga hilig sa usa ka sukod anaa kanunay, sama sa kaso ni Pablo. Apan kinahanglan magpadayon kita sa pagbuntog niini, paghimo niini nga dili makapanganak ug sala.
Magmahunahunaon, hinunoa, sa kalainan sa pagdawat sa kamatuoran sa pagkadili-hingpit ug sa pagpalabay niana. Kana mahimong ikailustrar sa usa ka tawo nga may mahuyang ug kasingkasing. Kinahanglang atubangon niya kining kamatuorana pinaagi sa pagpaningkamot sa paghimo sa iyang kasingkasing nga anaa sa maayong kahimtang kutob sa iyang maarangan. Dili siya mangatarongan nga sanglit maluya man ang iyang literal nga kasingkasing, mas maayo pang dili na lang tagdon ang tanang pagpugong ug magkinabuhi sumala sa iyang gusto.
Apan, hibaloi nga ang atong kusog wala mahasandig diha sa binuta nga paglimod sa makasasalang mga hilig apan dawaton kini ug mohimog aksiyon batok niini. Busa ayaw kahadlok sa pagdawat niini sa imong kaugalingon ug sa kang Jehova sa dapit nga ikaw daling masulayan ug malisdan. Dili buot ingnon nga wala kay pagtagad sa imong kaugalingon sa pagbuhat niini, ni ang gugma ni Jehova alang kanimo mawala. Sa pagkamatuod, kon ikaw labi pang nagapaduol sa Diyos sa kinasingkasing nga kabalaka sa iyang pag-uyon, siya labi pang magapaduol kanimo.—Santiago 4:8.
[Hulagway sa panid 31]
Kining modelo sa Megiddo nagapakita sa linig-onang mga ganghaan ug kinutaang karaang mga siyudad
[Credit Line]
Pictorial Archive (Near Eastern History) Est.