“Ipatawag ang mga Ansiano”

“Aduna ba kaninyoy nagmasakiton? Ipatawag niya ang mga ansiano sa kongregasyon.”​—SANTIAGO 5:14.

1, 2. (a) Unsang peligrosong kahimtang ang nahimutangan karon sa mga alagad ni Jehova, ug unsa kahay ilang gibati? (b) Unsang mga pangutana karon ang kinahanglang tubagon?

“ANG kritikal nga panahon nga malisod sagubangon” ania na. Ang mga tawo nagalihok nga mahakogon, materyalistiko, mapahitas-on, nga nagapukaw ug kagubot niining “kataposang mga adlaw.” (2 Timoteo 3:1-5) Ingong mga Kristohanon nga nagakinabuhi niining presenteng daotang sistema sa mga butang, atong nakita ang atong kaugalingon nga gihulga sa tulo ka dakong kapeligrohan: si Satanas nga Yawa, ang kalibotan sa dili-diyosnon nga katawhan, ug ang atong kaugalingong napanunod nga makasasalang mga kiling.​—Roma 5:12; 1 Pedro 5:8; 1 Juan 5:19.

² Gihulga niining mga kapeligrohana, may mga panahong mobati kita nga madaog. Nan, asa nato makita ang pagpaluyo aron kita matabangan nga makalahutay nga matinumanon? Kang kinsa kita modangop alang sa paggiya kon adunay mga desisyong atubangon bahin sa atong Kristohanong mga kalihokan ug sa atong pagsimba?

Tabang nga Mabatonan

3. Gikan kang kinsa nga kita makabaton ug makalilipay nga pasalig pag-usab, ug sa unsang paagi?

³ Nahibalo nga si Jehova mao ang Tuboran sa atong kusog nagahatag kanatog makalilipay nga pasalig pag-usab. (2 Corinto 1:3, 4; Filipos 4:13) Si salmistang David, nga nakasinati sa tabang sa Diyos, miingon: “Itugyan mo kang Jehova ang imong dalan, ug sumalig ka kaniya, ug siya mismo molihok.” “Itugyan mo kang Jehova ang imong palas-anon, ug siya magasapnay kanimo. Dili gayod niya pasagdan nga mapukan ang usa nga matarong.” (Salmo 37:5; 55:22) Pagkadako sa atong pasalamat sa maong tabang!

4. Sa unsang paagi si Pedro ug Pablo nagtanyag ug paglipay?

⁴ Kita usab makabaton ug kalipay sa kasayoran nga kita wala mag-inusara sa pag-atubang sa mga pagsulay ug sa mga kapeligrohan. Giawhag ni apostol Pedro ang mga isigka-Kristohanon: “Managpanukol kamo batok kang [Satanas nga Yawa], malig-on diha sa pagtuo, nga nahibalo nga ang samang mga pag-antos ginaagoman sa tibuok nga kahugpongan sa inyong mga igsoon sa kalibotan.” (1 Pedro 5:9) Sa pagkatinuod, ang tanang mga Kristohanon nagatinguha sa pagbarog nga malig-on sa pagtuo. Tinuod, may mga panahong bation natong “gipiit sa tanang paagi,” sama kang apostol Pablo. Bisan pa, siya dili “piniotan nga dili makalihok.” Sama kaniya, kita tingali naglibog “apan dili bug-os nga walay lutsanan.” Bisan kon kita pagalutoson, kita “wala biyai nga walay tabang.” Bisan kon “gipukan,” kita “wala malaglag.” Busa, “kita dili mohunong.” Kita maningkamot sa “pagpunting sa atong mga mata, dili sa mga butang makita, kondili sa mga butang nga dili-makita.” (2 Corinto 4:8, 9, 16, 18) Sa unsang paagi atong mahimo kini?

5. Unsa ang tulo ka pilo nga tabang ang gitagana ni Jehova?

⁵ Si Jehova, ang “Tigpatalinghog sa pag-ampo,” nagatagana ug tulo ka pilo nga tabang. (Salmo 65:2; 1 Juan 5:14) Una, siya nagatanyag ug pagtultol pinaagi sa iyang dinasig nga Pulong, ang Bibliya. (Salmo 119:105; 2 Timoteo 3:16) Ikaduha, ang iyang balaang espiritu nagahatag ug gahom kanato sa pagtuman sa iyang kabubut-on. (Itandi ang Buhat 4:29-31.) Ug ikatulo, ang yutan-ong organisasyon ni Jehova andam sa pagtabang kanato. Unsay atong kinahanglang buhaton aron makadawat sa tabang?

“Mga Gasa nga mga Lalaki”

6. Unsang tabang ang gitagana ni Jehova diha sa Tabera, ug sa unsang paagi?

⁶ Usa ka hitabo sa mga adlaw ni manalagnang Moises motabang kanato sa pag-apresyar sa mahigugmaong pagtagad ni Jehova sa pagtaganag tabang alang sa Iyang mga alagad. Kadto nahitabo sa Tabera, nga nagkahulogang “nagdilaab; dakong sunog; nagsiga.” Niining dapita sa kamingawan sa Sinai, gipasiga sa Diyos ang kalayo batok sa bagolbolang mga Israelinhon. “Ang panon sa nagkasagol nga katawhan” nga mikuyog sa katawhan sa Israel sa paggawas sa Ehipto miduyog kanila sa pagbagolbol batok sa hinatag sa Diyos nga pagkaon. Nakamatikod sa kasuko sa Diyos ug nabug-atan sa responsibilidad sa katawhan ug sa ilang mga panginahanglan, si Moises mituaw: “Dili ako makaarang sa pagdala nga usa ra niining tibuok nga katawhan, tungod kay bug-at kaayo sila alang kanako. Kon mao kini ang imong pagabuhaton kanako, palihog patya na lang ako, kon ako nakakaplag kaluoy sa imong mga mata, ug ayaw ako pakitaa sa akong kaalaot.” (Numeros 11:1-15) Sa unsang paagi misanong si Jehova? Siya nagtudlo ug “kapitoan ka lalaki sa mga ansiano sa Israel” ug gikunsaran sila sa iyang espiritu aron sila takos nga makaambit sa buluhaton ni Moises sa pagdumala. (Numeros 11:16, 17, 24, 25) Uban sa natudlo nga mga lalaking may katakos, ang tabang daling nabatonan sa mga Israelinhon ug sa “dakong panon sa nagkasagol nga katawhan.”​—Exodo 12:38.

7, 8. (a) Sa unsang paagi mitagana si Jehova ug “mga gasa diha sa dagway nga mga lalaki” sa karaang Israel? (b) Unsang unang-siglong pagpadapat sa Salmo 68:18 ang gihimo ni Pablo?

⁷ Human nga nakaabot ang mga Israelinhon sa Yutang Saad sa daghang katuigan, si Jehova sa malarawanon nanaog gikan sa Bukid sa Sion ug gihimo ang Jerusalem nga mao ang kaulohan sa mahulagwayong gingharian nga ang hari niini mao si David. Sa pagdayeg sa Diyos, “ang Usa nga Labing Makagagahom,” gipatugbaw ni David ang iyang tingog sa pag-awit: “Ikaw mikayab sa kahitas-an; gidala mo ang mga bihag; midawat ka ug mga gasa diha sa dagway nga mga lalaki.” (Salmo 68:14, 18) Sa pagkatinuod, ang mga lalaki nga nabihag sa panahon sa pagdaog sa Yutang Saad gitagana sa pagtabang sa mga Levihanon sa ilang mga buluhaton.​—Esdras 8:20.

⁸ Sa unang siglo K.P., gihisgotan sa Kristohanong apostol Pablo ang matagnaong katumanan sa mga pulong sa salmista. Si Pablo misulat: “Ang matag usa kanato gihatagan ug dili-takos nga kalulot sumala sa pagsukod ni Kristo sa libre nga gasa. Mao nga siya nag-ingon: ‘Sa dihang siya mikayab sa kahitas-an siya nagdala ug mga binihag; siya naghatag ug mga gasa nga mga lalaki.’ Sa pag-ingon ‘siya mikayab,’ unsa may kahulogan kondili nga nanaog usab siya ngadto sa kinaubsang bahin, sa ato pa, ang yuta? Ang mismong usa nga mikanaog mao usab ang misaka saylo pa sa tanang kalangitan, aron siya magapuno diha sa tanang mga butang.” (Efeso 4:7-10) Kinsa kining “mismong usa”? Walay lain kondili ang hawas ni Jehova, ang Dakong David ug ang Mesiyanikong Hari, si Jesu-Kristo. Siya mao ang usa nga gibanhaw sa Diyos ug gituboy ngadto sa “usa ka labaw nga katungdanan.”​—Filipos 2:5-11.

9. (a) Kinsa ang unang-siglong mga gasa nga mga lalaki? (b) Kinsa ang modernong-adlawng mga gasa nga mga lalaki?

⁹ Nan, kinsa kining “mga gasa nga mga lalaki” (o, “gilangkoban sa mga lalaki”)? Si Pablo nagpatin-aw nga ang Pangulong Hawas sa Diyos “mihatag sa uban sa pagkaapostoles, ang uban mga manalagna, ang uban mga ebanghelista, ang uban mga magbalantay ug mga magtutudlo, aron sa pagpasibo sa mga balaan, alang sa buluhaton sa pagpang-alagad, aron malig-on ang lawas ni Kristo.” (Efeso 4:11, 12) Ang tanang mga sumusunod ni Kristo nga nag-alagad ingong mga apostoles, manalagna, ebanghelista, mga magbalantay, ug mga magtutudlo nagabuhat niini ubos sa teokratikanhong pagtultol. (Lucas 6:12-16; Buhat 8:12; 11:27, 28; 15:22; 1 Pedro 5:1-3) Sa atong adlaw, ang kuwalipikado sa espirituwal nga mga ansiano nga gitudlo sa balaang espiritu nag-alagad ingong mga magtatan-aw sa duolan sa 70,000 ka kongregasyon sa mga Saksi ni Jehova sa tibuok kalibotan. Sila mao ang atong mga gasa nga mga lalaki. (Buhat 20:28) Uban sa tibuok kalibotan nga pagpadako sa buluhaton sa pagsangyaw sa Gingharian nga kusog nga nagapadayon, dugang ug dugang igsoong mga lalaki ang “naninguha” ug nangabaga sa mga responsibilidad nga nalangkit sa “katungdanan sa pagkamagtatan-aw.” (1 Timoteo 3:1) Sa dihang itudlo, sila usab mahimong mga gasa nga mga lalaki.

10. Sa unsang paagi ang paghubit ni Isaias sa “mga prinsipe” mohaom sa papel sa Kristohanong mga ansiano karong adlawa?

¹⁰ Kining Kristohanong mga ansiano, o mga gasa nga mga lalaki, mohaom sa paghubit nga gihatag ni manalagnang Isaias sa dihang nanagna sa papel sa “mga prinsipe,” ang mga administrador ilalom sa pagmando sa Gingharian. Ang matag usa kinahanglan “sama sa tagoanan gikan sa hangin ug dapit nga katagoan gikan sa bagyo, sama sa mga sapa sa tubig sa dapit nga mamala, sama sa landong sa dakong bato sa palanas nga yuta.” (Isaias 32:1, 2) Kini nagapakita kon unsa ka mapaluyohon ang mahigugmaong pagdumala niining tinudlo nga mga lalaki. Sa unsang paagi makabenepisyo ka niana sa bug-os?

Nanguna sa Paghimog Lakang

11. Kon maluya sa espiritu, sa unsang paagi kita makadawat ug tabang?

¹¹ Ang tawong talilumos kinaiyanhong manawag ug tabang. Wala nay pagpanuko. Kon kinabuhi na ang mameligro, walay usa ang kinahanglang aghaton pa sa pagpangayog tabang. Dili ba masubsob nga nangayog tabang si Haring David kang Jehova? (Salmo 3:4; 4:1; 5:1-3; 17:1, 6; 34:6, 17-19; 39:12) Kon maluya sa espiritu, tingali nawad-ag paglaom, modangop usab kita kang Jehova diha sa pag-ampo ug mangaliyupo kaniya nga tultolan kita pinaagi sa iyang balaang espiritu. (Salmo 55:22; Filipos 4:6, 7) Kita mangitag paglipay gikan sa Kasulatan. (Roma 15:4) Konsultahon nato ang Kristohanong mga publikasyon sa Watch Tower Society alang sa praktikal nga tambag. Kini makapaarang kanato sa pagsulbad sa atong kaugalingong mga problema. Apan, kon morag nabug-atan na kaayo kita sa mga kalisod, kita makapangayo usab ug tambag sa tinudlong mga ansiano sa kongregasyon. Sa pagkatinuod, may mga panahong gikinahanglan gayod natong “ipatawag ang mga ansiano.” Nganong ipatawag ang Kristohanong mga ansiano? Sa unsang paagi sila makatabang niadtong nanginahanglan ug espirituwal nga tabang?

12-14. (a) Unsa ang maalamong dalan nga pagasundon kon ang usa masakiton? (b) Sumala sa Santiago 5:14, unsay gitambag nga buhaton sa “masakiton” nga mga Kristohanon? (c) Unsang matang sa sakit ang gipasabot sa Santiago 5:14, ug nganong mao kanay imong tubag?

¹² Kon kita magkasakit, kita mopahulay aron hatagan ug higayon sa paglihok ang mga gahom sa lawas sa pagpaayo. Apan kon ang atong sakit dili maayo, kita maalamong mangitag kuwalipikadong medikal nga tabang. Dili ba mao usab kanay atong buhaton kon kita magmaluya sa espirituwal?

¹³ Matikdi kon unsay gitambag ni disipulong Santiago kanato niining bahina. Siya miingon: “Aduna ba kaninyoy nagmasakiton? Ipatawag niya ang mga ansiano sa kongregasyon, ug paampoa sila alang kaniya, nga magahaplas kaniyag lana sa ngalan ni Jehova.” (Santiago 5:14) Unsang matanga sa sakit ang gipasabot ni Santiago dinhi? Ang ubang mga komentarista sa Bibliya naghinapos nga pisikal nga sakit kini, nangatarongan nga ang paghaplas ug lana maoy komon nga batasan sa medisina niadtong adlawa. (Lucas 10:34) Sila usab nagtuo nga anaa sa hunahuna ni Santiago ang milagrosong tambal pinaagi sa gasa sa pagpang-ayo. Apan, unsa may gipadayag sa konteksto?

¹⁴ “Ang nagamalipayon” gitandi sa “nagaantos sa kadaotan.” Kini nagpasabot nga si Santiago naghisgot sa espirituwal nga sakit. (Santiago 5:13) “Ang mga ansiano [mga gulang, King James Version] sa kongregasyon,” dili mga doktor o bisan kadtong may milagrosong gasa sa pagpang-ayo, ang gipatawag. Ug unsay ilang pagabuhaton? Si Santiago miingon: “Paampoa sila alang kaniya. . . . Ug ang pag-ampo sa pagtuo magaayo sa nagmasakiton.” (Santiago 5:14, 15; itandi ang Salmo 119:9-16.) Bug-os nagpamatuod nga naghisgot si Santiago bahin sa espirituwal nga sakit mao ang kamatuoran nga iyang gidasig ang pagsugid sa mga sala labot sa gilaomang pagkaayo. Siya misulat: “Bukas nga isugid ninyo ang inyong mga sala sa usag usa ug pag-ampo sa usag usa, aron kamo mangaayo.” Kon mabug-at nga sala ang hinungdan sa espirituwal nga sakit, ang tawong masakiton malaomang maulian lamang kon maayo ang iyang pagsanong sa tambag nga gipasukad sa Pulong sa Diyos, maghinulsol, ug magpalayo gikan sa iyang makasasalang dalan.​—Santiago 5:16; Buhat 3:19.

15. Unsang matang sa aksiyon ang girekomendar sa Santiago 5:13, 14?

¹⁵ Adunay laing butang nga matikdan sa tambag nga gihatag ni Santiago. Dihang magaantos sa kadaotan, ang Kristohanon kinahanglang “magpadayon sa pag-ampo.” Kon nagamalipayon, “paawita siya ug mga salmo.” Ang matag situwasyon​—kon ang tawo nagaantos man sa kadaotan o nagamalipayon—​nagkinahanglag aksiyon. Ang pag-ampo gikinahanglan sa usa ka bahin, malipayong mga ekspresyon sa lain. Nan, unsay atong malaoman sa dihang nangutana si Santiago: “Aduna ba kaninyoy nagmasakiton?” Siya mirekomendar na usab ug positibong aksiyon, oo, manguna sa paghimog lakang. “Ipatawag niya ang mga ansiano sa kongregasyon.”​—Salmo 50:15; Efeso 5:19; Colosas 3:16.

Kon sa Unsang Paagi “ang mga Ansiano” Makatabang

16, 17. Sa unsang paagi ang mga ansiano makatabang kanato sa pagpadapat sa mga prinsipyo sa Bibliya?

¹⁶ Malisdan usahay kita kon unsaon sa pagpadapat sa mga prinsipyo sa Bibliya sa atong kaugalingong mga kahimtang. Dinhi ang Kristohanong mga ansiano makapamatuod nga usa ka dakong tuboran sa tabang. Pananglitan, sila makaampo alang sa nagmasakiton sa espirituwal nga tawo ug ‘magahaplas kaniyag lana sa ngalan ni Jehova’ pinaagi sa mahanason nga pagpadapat sa makahupay nga instruksiyon gikan sa Pulong sa Diyos. Ang mga ansiano sa ingon makaamot ug dako sa atong espirituwal nga pagkaayo. (Salmo 141:5) Kasagaran, ang atong gikinahanglan lamang mao ang kalig-onan nga kita nangatarongan sa hustong paagi. Ang pagpakigsulti sa mga butang uban sa usa ka eksperyensiyadong Kristohanong ansiano molig-on sa atong determinasyon sa pagbuhat sa matarong.​—Proverbio 27:17.

¹⁷ Kon ipatawag sa pagduaw, ang Kristohanong mga ansiano kinahanglang “mosultig mga pulong sa paglipay sa mga kalag nga masulob-on.” Ila usab “tabangan ang mahuyang, [ug] magmapailobon sa tanan.” (1 Tesalonica 5:14) Kining suod, masinabtanong relasyon tali sa “mga ansiano” ug “sa mahuyang” makatabang sa bug-os nga pagkaayo gikan sa espirituwal nga sakit.

Personal nga Responsibilidad ug Pag-ampo

18, 19. Unsang papel ang gidula sa Kristohanong mga ansiano labot sa Galacia 6:2, 5?

¹⁸ Kinahanglang abagahon sa Kristohanong mga ansiano ang ilang responsibilidad diha sa panon sa Diyos. Sila kinahanglang matinabangon. Pananglitan, si Pablo miingon: “Mga igsoon, kon ang usa ka tawo mahiligas ngadto sa kalapasan una pa siya nakaamgo niana, kamo nga adunay espirituwal nga kuwalipikasyon maningkamot sa pagpasibo niining tawhana diha sa espiritu sa kalumo, samtang nagabantay kamo sa inyong kaugalingon, kay basin matental usab kamo. Padayon sa pagpas-an sa mga palas-anon sa usag usa, ug sa ingon nagatuman sa kasugoan ni Kristo.” Ang apostol usab misulat: “Ang matag usa magapas-an sa iyang kaugalingong lulan.”​—Galacia 6:1, 2, 5.

¹⁹ Sa unsang paagi atong mapas-an ang mga palas-anon sa usag usa ug bisan pa niana magpas-an sa atong kaugalingong lulan? Ang kalainan sa kahulogan sa Gregong mga pulong nga gihubad “mga palas-anon” ug “lulan” nagahatag sa tubag. Kon ang usa ka Kristohanon may suliran sa espirituwal nga mabug-at kaayo kaniya, abagan siya sa mga ansiano ug sa ubang mga isigkamagtutuo, busa nagatabang kaniya sa pagpas-an sa iyang “mga palas-anon.” Ugaling, ang indibiduwal mismo gilaomang maoy mopas-an sa iyang kaugalingong “lulan” sa responsibilidad ngadto sa Diyos.a Ang mga ansiano malipayong mopas-an sa “mga lulan” sa ilang mga igsoon pinaagi sa pagdasig, Kasulatanhong tambag, ug pag-ampo. Bisan pa, dili kuhaon sa mga ansiano ang atong kaugalingong “palas-anon” sa espirituwal nga responsibilidad.​—Roma 15:1.

20. Nganong dili angay kalimtan ang pag-ampo?

²⁰ Ang pag-ampo hinungdanon ug dili gayod kalimtan. Apan daghang Kristohanon nga masakiton sa espirituwal maglisod sa pag-ampo. Sa dihang ang mga ansiano motanyag ug mga pag-ampo sa pagtuo alang sa usa nga nagmasakiton sa espirituwal, unsa may katuyoan niini? “Si Jehova magabangon kaniya,” gikan sa kasubo, ug molig-on kaniya sa pagtinguha sa dalan sa kamatuoran ug pagkamatarong. Ang Kristohanon nga masakiton sa espirituwal tingali adunay sayop nga tinamdan apan tingali wala gayod makahimog dakong sala, kay si Santiago nag-ingon: “Dugang pa, kon siya nakasala, siya pagapasayloon.” Ang Kasulatanhong tambag sa mga ansiano nga inubanan sa kinasingkasing nga pag-ampo usahay moagda sa tawo nga maluyahon sa espirituwal sa pagsugid sa seryosong mga sala nga tingali iyang nahimo ug sa pagpakitag mahinulsolong espiritu. Kini, sa baylo, mopukaw sa kapasayloan sa bahin sa Diyos.​—Santiago 5:15, 16.

21. (a) Nganong ang ubang mga Kristohanon nagpanuko sa pagtawag sa mga ansiano? (b) Unsay pagahisgotan sa sunod nga artikulo?

²¹ Ginaatubang ang hagit sa pag-atiman sa panon sa mga bag-ohan diha sa Kristohanong kongregasyon, ang mahunahunaong mga ansiano adunay daghang buluhaton sa pagtaganag igong pagdumala. Sa pagkatinuod, kining mga gasa nga mga lalaki maoy maayong tagana nga gikan ni Jehova sa pagtabang kanato nga maantos kining kritikal nga mga panahon. Bisan pa, ang ubang mga Kristohanon nagpanuko sa pagpangayo sa ilang tabang, naghunahuna nga okupado kaayo kining mga igsoona o nabug-atan na kaayo sa mga problema. Tabangan kita sa sunod nga artikulo sa pagsabot nga kining mga lalakiha malipayng motabang, kay sila andam sa pag-alagad ingong luyoluyong mga magbalantay diha sa Kristohanong kongregasyon.

[Mga footnote]

Unsaon Nimo Pagtubag?

◻ Kon kita nagkinahanglag tabang, unsa ang tulo ka pilo nga tabang ang gitagana ni Jehova?

◻ Kinsa ang modernong-adlawng mga gasa nga mga lalaki?

◻ Kanus-a ipatawag nato ang mga ansiano?

◻ Unsang tabang ang atong malaoman gikan sa Kristohanong mga ansiano?

[Hulagway sa panid 15]

Imo bang gitagamtam ang espirituwal nga mga kaayohan sa pag-ampo, pagtuon sa Bibliya, ug tabang gikan sa Kristohanong mga ansiano?